Ruka 18

Sanza: dekurugbo na gbegberẽ basapungbanga

1Yesu ki pe pa sanza fu yo tipa gi pai re nga aboro ka kpara dedede, ka i mbu nga be he ya. 2Ko ki ya, “Basapungbanga adu rogo bakporo, ko agunde nga ti Mbori te ka ko aberã nga pa aboro a ya. 3Dekurugbo adu rogo gu bakporo re a; ri ki ye koyo du ko ni dungu rago, niya, ‘Mo káraga pa vurare.’ 4Ko aida nga ha fu ri ni ipo te. Ko ki ya tigako giza, ‘Ka mi avura gunde nga ti Mbori, ki niberẽ pa aboro ya; 5were bambiko gi de re nadogosa re, mi nikakaraga pa vurari, si ngia ri nikaye kindi mi ki mbu be ri.’” 6Gbia ki ya, “Oni gí gu pai gbegberẽ basapungbanga agumba. 7Mbori akáraga nga pa gako siasia aboro nga agu yo nakpara fu ko na uru na yuru, te? nga agu yo ko nahi pai fu yo, te? 8Ya mi fu roni, ko akáraga payo ni ngarã. Ono ho Wiri boro ka ye ni, ko abi idapase kpoto sende no?”

Sanza: Farusi na barogo marã ngbeti

9Yesu ki gumba gi sanza re a fu agu aboro naberã ha tigayo ya ruru aboro nangia yo, ki basa pa kura aboro: 10“Akumba ue abiti ku yekaru yo ka kpara; gu ni nangia Farusi, gu ni nangia barogo marã ngbeti. 11Farusi ki ru ki nikpari tigako wa gere, ‘Mbori, mi natambua ro, bambiko mi adu nga wa kura aboro, nga abatuka, na airabiriki, na airabari, na wa kina gi barogo marã ngbeti re a te. 12Mi nagina riahe bara ue rogo poso sa, mi nakpara gimi ahe dunduko ki ru gu fu Mbori.’ 13Ono barogo marã ngbeti ki ru tuturu, ko angera nga ku ngbangbaturũ yo a te, ono ko ata ngbaduko ki ya, ‘Mbori, mo íni pai fere nga boro ingapai!’ 14Ya mi fu roni, gi kumba re azorõ ku kpuko yo ni ruru ko ti gu kura kumba; bambiko gu ni nakiisa tini i aúmbasi pa ni aumbasi; gu ni naumbasi tini i akíisa pa ni akíisa.”

Yesu afu maku fu rukutu agude

(Mt. 19:13-15; Mk. 10:13-16)

15Aboro ki ye koyo du Yesu ni na gayo fogo agude a, ko zazadi yo. Ono ho abawiriki abi he ni, i ki za yo. 16Ono Yesu ayambu yo koyo du ko ni, niya, “Oni he rukutu agude i ye fuo re, ka oni káraga nga yo ya; bambiko avuru ga Mbori ngbi wa kina yo. 17Ya mi fu roni ni rengo, ka boro adia nga ga Mbori ngbi wa toni gude ya, ni rimi nga koyo wa sa te.”

Kumukokumuko banyaki

(Mt. 19:16-30; Mk. 10:17-31)

18Banyaki ki sana ko niya, “Wene Bayugupai, mi amánga wãi ka dia nyenye unga?” 19Yesu ki ya fu ko, “Tipagine ya mo ti re ti ni, wene? a nga boro sa du ni wene ni te, kina Mbori sa. 20Mo ini rugute, ‘Ka mo mángi nga bari ya, Ka mo imi nga boro ya, Ka mo dí nga he ya, Ka mo gúmba nga zire kuti boro ya, Mo irisi bamo na namo.’ ” 21Ko ki ya, “Mi atona manga agi apai re dunduko ho mi adu ni ni gude.” 22Ho Yesu agi he ni, ko ki ya fu ko, “Pai ho sa mo ata manga nga ha ya. Mo bági agu ahe dunduko du be ro, ki gagamu he fu rungorungo aboro, mo akumuko ngbangbaturũ yo; mo ki ye, ki nipeke re.” 23Ho ko agi gi pai ni re, ko ki rungo arungo bambiko ahe adu be ko gbe. 24Yesu ki ta bi ko niya, “Kpakara rima ku rogo ga Mbori ngbi akpakara fu agu yo kumuko akumuko gbe! 25Bambiko ka kameri kuru rogo yaro mbereke yo, si ka ipo ti rima kumukokumuko boro ku rogo ga Mbori ngbi yo.” 26Agu yo nagi he i ki ya, “Da ka bati tie?” 27Ko ki ya, “Agu apai ka aboro amanga nga ha ya, ka Mbori mangi he amanga dunduko.” 28Petero ki ya, “Mo ngére, ani ambu gaani ahe, ki nipeke ro.” 29Ko ki ya fu yo, “Mi nagumba ha fu roni ni rengo, ka boro he gani bambu, na diani, na awirinani, na avunguni, na awirini tipa ga Mbori ngbi, 30ni azía ahe bakere ti gure ni gi rago re, na nyenye unga rogo gu ngbi nikadu yo.”

Yesu ayugu he ni biata ha ya ko nikakpi ki zingi be kpio

(Mt. 20:17-19; Mk. 10:32-34)

31Yesu ki yambu agu yo nanidu bawe na ue koyo du ko ni, ki ya fu yo, “Oni ngere, ani nandu ku Yerusarema yo, agu apai dunduko anebi ake he tipa Wiri boro si adú ni mangimangi he yo. 32Bambiko i afú ko fu aGendiria, i ki sawia ko nimangi ko gbegberẽ, ki nisukudi ko. 33I ki nitaki ko, ki imi ko; biata uru ko ki zingi berewe.” 34Ka i aruga nga tiyo na agi apai re wa sa ya; gi pai re ki du ni okooko ho ti yo, ka i aina nga gu pai ko agumba ha fu yo wa sa ya.

Yesu ahusi Batimayo nga iravurari Yereo yo

(Mt. 20:29-34; Mk. 10:46-52)

35Si ki ta du wa gere wa Yesu ambedi ku Yereo yo, iravurari ki sungu pangba gene ni kangadu. 36Ko ki ta gia woro rimbasa aboro wa i asusa, ko ki sana he ya gini pai dũ. 37I ki ya fu ko, “Yesu nga boro Nazareta nasusa.” 38Ko ki poi ku ari, niya, “Yesu, mo wiri Dawidi, mo íni pai fere.” 39Agu aboro nandu mbata yo i ki za ko, ko ongo. Ko ki poi ku ari si ki susi gu nadu mbata, “Mo wiri Dawidi, mo íni pai fere.” 40Yesu ki ru ki rugu yo i ye na ko. Ho iravurari ambedi ni koyo du Yesu ni, Yesu ki sana ko ki ya, 41“Gini he mo nakpi nyemu mi mangi he foro?” Ko ki ya, “Gbia mi ngére.” 42Yesu ki ya fu ko, “Mo ngére; ga idapase batasi ro.” 43Ko ki ngere angera ni ba sa, ki nipe ko, nitaasi rimo Mbori. Aboro dunduko, ho i abi he ni, i ki tambua Mbori.

Currently Selected:

Ruka 18: ZB1978

Highlight

Copy