Luka 1
1
Utangulizi
1-3Muheshimiwa Teofilo:
Watu wengi wamejaribu kuandika juu ya mambo yale yaliyotendeka katikati yetu. Wameyaandika sawa vile tulivyoelezwa na wale walioona mambo yale tangu mwanzo, na waliotangaza ujumbe ule. Inafaa nami vilevile kisha kuchunguza kwa uangalifu mambo yote tangu mwanzo, nikuandikie kwa utaratibu, 4kusudi upate kujua ukweli juu ya mambo uliyofundishwa.
Malaika anatangaza habari ya kuzaliwa kwa Yoane Mubatizaji
5Katika siku Herode alipokuwa mufalme wa Yudea, kulikuwa kuhani mumoja, aliyeitwa Zakaria, wa kundi la makuhani wa ukoo wa Abiya. Muke wake Elizabeti alikuwa vilevile wa uzao wa Kuhani Mukubwa Haruni. 6Wote wawili walikuwa wenye haki mbele ya Mungu, walishika kwa ukamilifu amri na maagizo yote ya Bwana. 7Lakini hawakukuwa na mutoto, kwa maana Elizabeti alikuwa tasa, tena wote wawili walikuwa wazee sana.
8Siku moja, Zakaria alikuwa akimutumikia Mungu, akifanya kazi yake ya ukuhani kwa maana ilikuwa zamu ya kundi lake. 9Na kama ilivyokuwa desturi ya makuhani, yeye alichaguliwa kwa njia ya kupiga kura kwa kuingia ndani ya hekalu la Bwana, kusudi achome ubani. 10Kundi kubwa la watu walikuwa inje wakiomba saa ile Zakaria alipokuwa akichoma ubani. 11Halafu malaika wa Bwana akamutokea Zakaria, akisimama upande wa kuume wa mazabahu ya kuchomea ubani. 12Wakati Zakaria alipomwona, akahangaika na kushikwa na woga. 13Lakini yule malaika akamwambia: “Zakaria, usiogope, kwa maana Mungu amesikia maombi yako. Muke wako Elizabeti atakuzalia mutoto mwanaume, nawe utamwita jina lake Yoane. 14Utakuwa na furaha na shangwe kwa ajili yake, na watu wengi watafurahia kuzaliwa kwake, 15kwa maana atahesabiwa kuwa mutu mukubwa mbele ya Bwana. Hatakunywa divai wala kinywaji kikali, na atajazwa na Roho Mutakatifu tangu kuzaliwa kwake. 16Atawageuza Waisraeli wengi kwa kumurudilia Bwana Mungu wao. 17Atatangulia mbele ya kufika kwa Bwana, akiwa na roho na uwezo kama nabii Elia, kwa kuwapatanisha tena baba na watoto wao, na kuwageuza waasi wapate kuwa na hekima kama vile wenye haki. Hivi atamutayarishia Bwana watu wanaokuwa tayari kwa kumupokea.”
18Zakaria akamwuliza yule malaika: “Kitu gani kitakachonijulisha kwamba maneno hayo ni ya kweli? Mimi ni muzee, na muke wangu amekwisha kuzeeka sana.”
19Malaika akamujibu: “Mimi ni Gabrieli, anayebaki karibu na Mungu! Nimetumwa kusema nawe, kwa kukuletea habari hii njema. 20Maneno yale yatatimia kwa wakati wake uliopangwa, lakini kwa sababu haukuyasadiki, utakuwa bubu. Hautaweza kusema mpaka siku ile mambo hayo yatakapotimia.”
21Kwa muda wote watu wale walipokuwa inje, wakimungojea Zakaria, wakashangaa kwa kuona anakawia ndani ya hekalu. 22Alipotoka inje, hakuweza kusema nao, na watu wakatambua kwamba amepata maono ndani ya hekalu. Lakini alikuwa akifanya alama kwa mikono, kwa sababu alibaki bubu.
23Wakati Zakaria alipotimiza siku zake za kazi, akarudia kwenye nyumba yake. 24Halafu nyuma ya siku zile, muke wake Elizabeti akapata mimba. Hakutokatoka ndani ya nyumba kwa muda wa miezi mitano, akisema: 25“Sasa Bwana amenifanyia mema kwa kunitendea hivi; ameniondolea haya ya kutokuzaa niliyokuwa nayo mbele ya watu.”
Malaika anatangaza habari ya kuzaliwa kwa Yesu
26Mimba ya Elizabeti ilipotimiza miezi sita, Mungu akamutuma malaika Gabrieli katika muji mumoja wa Galilaya, unaoitwa Nazareti. 27Alimutuma kwa binti mumoja aliyekuwa muchumba wa mutu mumoja wa ukoo wa mufalme Daudi, aliyeitwa Yosefu. Jina la yule binti liliitwa Maria. 28Malaika akamufikia kwenye nyumba yao na kumwambia: “Salamu kwako, wewe uliyejaliwa neema kutoka kwa Mungu! Bwana yuko pamoja nawe.”
29Wakati Maria aliposikia maneno haya, akahangaika sana na kujiuliza: “Maana ya salamu hii ni nini?” 30Halafu malaika akamwambia: “Maria, usiogope, kwa maana Mungu amekujalia neema. 31Utapata mimba, utazaa mutoto mwanaume, na utamwita jina lake Yesu. 32Yeye atakuwa mwenye mamlaka, na ataitwa Mwana wa Mungu Mukubwa. Bwana Mungu atamuweka kuwa mutawala wa ufalme wa babu yake Daudi. 33Yeye atatawala taifa la Israeli hata milele, nao ufalme wake hautakuwa na mwisho.”
34Maria akamwuliza malaika: “Jambo hili litawezekana namna gani kwa maana mimi ningali bikira?”
35Malaika akamujibu: “Roho Mutakatifu atakufikia, na uwezo wa Mungu Mukubwa utakufunika kama vile kivuli. Kwa sababu hii mutoto yule atakayezaliwa ataitwa Mutakatifu na Mwana wa Mungu. 36Hata Elizabeti wa jamaa yako, amepata mimba, naye atazaa mutoto mwanaume, ijapokuwa yeye ni muzee. Yeye aliyekuwa akiitwa tasa, sasa huu ni mwezi wa sita wa mimba yake. 37Kwa maana hakuna kisichowezekana kwa Mungu.”
38Basi Maria akasema: “Mimi ni mujakazi wa Bwana; ifanyike kwangu sawa ulivyosema.” Kisha malaika akajiendea.
Maria anamutembelea Elizabeti
39Katika siku zile, Maria akafunga safari, akaenda kwa haraka katika muji mumoja uliokuwa katika vilima vya Yudea. 40Akafika kwenye nyumba ya Zakaria, akaingia ndani yake na kumusalimia Elizabeti. 41Elizabeti aliposikia salamu ya Maria, mutoto akajitingiza ndani ya tumbo lake. Elizabeti akajazwa na Roho Mutakatifu, 42akasema kwa sauti kubwa: “Wewe umebarikiwa kuliko wanawake wote, na mutoto utakayemuzaa amebarikiwa! 43Namna gani nimepata bahati hii ya kutembelewa na mama ya Bwana wangu? 44Kwa maana mara moja niliposikia salamu yako, mutoto akajitingiza kwa furaha ndani ya tumbo langu. 45Heri kwako wewe uliyesadiki kwamba maneno yale uliyoambiwa kutoka kwa Bwana yatatimizwa!”
Wimbo wa Maria
46Halafu Maria akasema:
“Moyo wangu unamutukuza Bwana,
47roho yangu inamufurahia Mungu, Mwokozi wangu;
48kwa maana ameniangalia kwa huruma, mimi mujakazi wake munyenyekevu.
Tangu sasa watu wote wataniita mwenye heri,
49sababu Mungu Mwenye Uwezo, amenitendea maajabu.
Jina lake ni takatifu.
50Yeye anawasikilia wale wanaomwogopa huruma kwa vizazi vyote.
51Ametenda kwa uwezo wake mukubwa,
amewasambaza wale wanaofanya mipango kwa kiburi.
52Amewashusha wafalme wenye uwezo,
lakini amewainua wanyenyekevu.
53Anawatajirisha wenye njaa,
lakini amewaacha watajiri mikono mitupu.
54Amesaidia Israeli mutumishi wake,
akikumbuka huruma yake,
55sawa alivyoahidi babu zetu,
Abrahamu na wazao wake kwa milele.”
56Maria akakaa na Elizabeti kadiri ya miezi mitatu. Kisha akarudia kwenye nyumba yao.
Kuzaliwa kwa Yoane Mubatizaji
57Wakati wa kuzaa kwa Elizabeti ulipotimia, akazaa mutoto mwanaume. 58Wajirani zake na wandugu zake wa jamaa waliposikia jinsi Bwana amemusikilia huruma sana, wakafurahi wote pamoja naye. 59Ilipotimia siku nane tangu mutoto alipozaliwa, wakaenda kumutahiri, nao wakataka kumupa jina la baba yake Zakaria. 60Lakini mama yake akakataa na kuwaambia kwamba jina lake litaitwa Yoane. 61Wakamwambia: “Mbona hakuna mutu katika jamaa yako anayeitwa kwa jina hili?”
62Halafu wakamwuliza baba ya mutoto kwa njia ya kufanya alama jina gani analotaka wamupe. 63Zakaria akaomba wamuletee kibao, naye akaandika maneno haya juu yake: “Jina lake ni Yoane.” Wote wakashangaa. 64Na pale pale ulimi wa Zakaria ukafunguka, akaanza tena kusema, akasifu Mungu. 65Basi watu wote waliokaa karibu naye wakashikwa na woga, na habari ya mambo haya yote ikaenea fasi zote katika inchi ya vilima vya Yudea. 66Na wote waliosikia habari ile wakafikiri juu yake na kujiuliza: “Mutoto huyu atakuwa mutu gani?” Maana hakika nguvu ya Bwana ilikuwa pamoja naye.
Wimbo wa Zakaria
67Baba yake Zakaria akajazwa na Roho Mutakatifu, na kuanza kutabiri, akisema:
68“Asifiwe Bwana, Mungu wa Waisraeli,
maana amewasaidia watu wake na kuwakomboa.
69Ametuletea Mwokozi mwenye uwezo,
toka ukoo wa mutumishi wake Daudi.
70Ni sawa alivyosema zamani kwa njia ya manabii wake watakatifu.
71Aliahidi kutuokoa toka mikono ya waadui zetu,
ndio wale wanaotuchukia.
72Aliahidi kuwasikilia babu zetu huruma;
na kukumbuka agano lake takatifu,
73sawa alivyomwapia babu yetu Abrahamu.
74Alimwahidi kutuokoa toka mikono ya waadui zetu,
kusudi tumutumikie pasipo woga,
75katika hali ya utakatifu na haki mbele yake
siku zote za maisha yetu.
76Na wewe, mutoto wangu, utaitwa nabii wa Mungu Mukubwa,
maana utatangulia mbele ya kufika kwa Bwana,
kusudi umutengenezee njia.
77Upate kuwajulisha watu wake kwamba atawaokoa
akisamehe zambi zao.
78Kutokana na huruma kubwa ya Mungu wetu,
atatutumia mwangaza kutoka juu.
79Atawaangazia wale wanaoishi katika giza na wanaokaa katika kivuli cha kifo,
kusudi atuongoze tupate kufuata njia ya amani.”
80Mutoto yule akakomaa na kuzidi kuwa na nguvu katika roho. Akakaa katika nafasi za jangwa mpaka siku alipojionyesha waziwazi mbele ya Waisraeli.
Currently Selected:
Luka 1: SWC02
Highlight
Share
Copy
Want to have your highlights saved across all your devices? Sign up or sign in
Bible in Swahili Congo © Bible Society of the Democratic Republic of Congo (DRC), 2002.
