TOBITƐ 6
6
Tobi gbɛa gã kɔyɔ
1Tobi do anzɛ wa lia wala, nɛ tole 'da wa kpia dɛ 'do wa. Wa la bɔa nɛ ni gbaa, nɛ tũ tũ wa, nɛ wa dɛ fala ɔi 'da wa tɛ nu gba lì Tigrɛ. 2Nɛ Tobi nɛa we fɔlɔ nyanga a 'dɔ lì i, nɛ gã kɔyɔ bũlũ dɛ nza, nɛ a nɛ we nyɔngɔ nyanga a. Nɛ Tobi gbanga, nɛ a he mɔ. 3Nɛ anzɛ tɔ̃ hã a na: “Mɔ bá a, nɛ mɔ tɛ dà kɔ̃ mɔ tɛ̃ a gɔ!” Nɛ Tobi ba a, nɛ a gbɔtɔ a dɛ nza. 4Nɛ anzɛ na: “Mɔ gbá zã a, nɛ mɔ dá kala zã a nù, nɛ mɔ e faliã a, do sila a, do 'bunggulu a do tɛ̃ ɛ, we kɛ mɛ a dia ina.”
5Nɛ Tobi gba zã kɔyɛ, nɛ a fua faliã a, do sila a do 'bunggulu a. 'Do nɛ, nɛ a hana mbe 'bili kɔyɛ ni, nɛ a nyɔngɔ, nɛ a a tɔ̃ tɛ tala nɛ na ma kolo, hã ma gbaka wa li wala.
6Nɛ wa bɔa nɛ, wa nɛa ni gbaa, nɛ wa hɔ li ngbala nù Medi. 7Nɛ Tobi aka Azaria na: “Aa nyae, ina kɛ wa wia we dɛ do sila kɔyɛ, do faliã a, do 'bunggulu a ni a ina ge nde?”
8Nɛ anzɛ gese na: “Fala kɛ 'dã hi wi le kɔ wele, nɛ wa dɔ sila kɔyɛ, do 'bunggulu a dɛ dati wi ni, nɛ zɛ̃ we nɛ ma ndaka 'dã hi wi, nɛ a yu do ti. 9Kɔ fala kɛ wi kele ngɔ li wele, nɛ wa ba faliã kɔyɛ, nɛ wa kɔ ngɔ li a, nɛ wa ufu wi ngɔ li a ni, nɛ ma fo tɛ̃ ɛ, nɛ a zɔ mɔ.”
Anzɛ Rafaɛlɛ tɔ̃a we 'da Sara hã Tobi
10Wa hɔa ngɔ nù Medi i, kɔ wa nɛa we kɔlɔ do le Ekbatanɛ, 11nɛ anzɛ Rafaɛlɛ sa mɔ na: “Nyae Tobi.” Nɛ Tobi aka a na: “Ma dɛa nɛ nde?” Nɛ anzɛ gese na: “Tũi gɛ lɛ ɔ sɛ 'da wi na 'da mɔ Raguɛlɛ. A do be zɔnga be 'da a, li a a Sara. 12A do gele be bina, tati a boko be ni zu a kpo iko. Nɛ mɔ a kuti wi na 'da Sara, kɛ mɔ wia we ba a do wuko dati hã ogele wi nanɔ vɛ̃, nɛ mɔ dungu 'bɔ ngɔ mɛnɔ olo baa a ni. A a boko be kɛ a do hã zã wena, nɛ a sɔ̃ wena, a de 'bɔ zɔnga wena, nɛ baa a a wi dĩ. 13Mɔ wia we ba a do wuko. Kɔ aa nyae, mɔ zélé mi sɛ: Tũi gɛ mi wele sɛ we do baa a, nɛ mi aka sɛ a na, a ba a hã mɔ do kɛnɛ mɔ. Kɔ lɛ nɛ Ragɛsi i, hã lɛ kpolo tɛ lɛ i nga, nɛ lɛ dɛ gbalimɔ we ba ngba wi 'da nɛ. Mi ĩ na, Raguɛlɛ wè we bɛ̃ na, mɔ ba ngba mɔ do be 'da a gɔ. Nɛ a wè 'bɔ we hã a hã gele wi wili gɔ. A dɛ na mɛ ni, nɛ nde a wia do fio, ɔ nɛ kɛ mbula 'da Mɔizɛ tɔ̃a ni. Mba gɔ, a ĩ na kuti wi wili kɛ a wia we ba be 'da a ni, wi a mɔ, ɔ nɛ kɛ mbula tɔ̃a ni. Kɔ nyae, mɔ zélé mi sɛ! Sɔɛ gɛ do gɛ̃a wese, nɛ lɛ do Raguɛlɛ, lɛ wele sɛ we 'da Sara, nɛ lɛ 'dafa sɛ we ba ngba wi 'da nɛ do a. Kɔ lɛ nɛ Ragɛsi i, hã lɛ kpolo tɛ lɛ, nɛ lɛ si sɛ do a dɛ 'da mɔ i.”
14Nɛ Tobi gese na: “Nyae Azaria, mi zila na Sara ba wili fala sambo ia, nɛ wi wilinɔ ni vɛ̃ wa fia dɛ kɔ tɔa ɔi 'da a. Do tũi, kɔ wa nɛ we kɔlɔ do a, nɛ wa fe iko. Nɛ ombe wele wa tɔ̃a 'bɔ hã mi na, mɛ gbɛ zi wi wilinɔ ni, mɛ a 'dã hi wi. 15Ma kɛ mi do kili. 'Dã hi wi ni dɛ́ 'dã mɔ kpo do be zɔnga gɔ, nɛ nde a gbɛ wi wilinɔ vɛ̃ kɛ wa kɔ̃ we kɔlɔ do a ni. Mi a kpo be iko, kɔ ma dɛ na mi fe, nɛ 'bako fio mi ma gbɛ sɛ baa mi do naa mi iko. Dɛ ngɔ nɛ, wa do gele bulu be we mi wa bina.”
16Nɛ anzɛ tɔ̃ hã a na: “Ta zu mɔ ila ngɔ mbulanɔ 'da baa mɔ nde? A tɔ̃̀ hã mɔ na, mɔ ba wuko kɔ nu fɛlɛ kula 'da mɔ gɔ nde? Nyae, mɔ zélé mi sɛ! Mɔ tɛ dɛ̀ kili 'dã hi wi ni gɔ, mɔ bá Sara do wuke 'da mɔ kpa. Mi ĩ na, gɛ̃a wese gɛ, nɛ baa a a kɔ̃ sɛ na, mɔ ba a do wuke 'da mɔ. 17Nɛ nde fala kɛ mɔ le dɛ kɔ tɔa ɔi 'da nɛ i, nɛ mɔ ba 'bunggulu kɔyɛ do sila a, nɛ mɔ e ma dɛ ngɔ kalĩ we wa dɔ do yɔmbɛ ni. Kɔ fala kɛ unu nɛ ma yɛ'bɛ sɛ, hã ma gbo nu zɔ̃ 'dã hi wi ni, nɛ a yu sɛ pii, nɛ a kɔ́lɔ́ sɛ 'bɔ do wuke gɔ. 18Nɛ dati kɛ na, nɛ mba ngɔ te ɔi do a ni, nɛ nɛ kulu ngɔ bɔa nɛ, nɛ nɛ sambala NWA kɛ a li nza i ni, nɛ nɛ aka a na, a ĩ 'bako hã nɛ, nɛ a fɔmɔ nɛ. Mɔ tɛ dɛ̃ kili gɔ, we kɛ wa saka zi Sara do wuke 'da mɔ zi belee ia, nɛ mɔ a mɔ kpasa sɛ a. A si sɛ do mɔ, nɛ mi ĩ na, mɔ ko sɛ dɛlɛ be do a, nɛ mɔ kɔ̃ sɛ gɛnɛ benɔ ni wena. Mɔ tɛ bà kafi nɛ gɔ!”
19Kɔ Tobi nɛa we zele wenɔ Rafaɛlɛ tɔ̃a na, Sara a wi na 'da a ni, nɛ a kɔ̃a gɛnɛ a, nɛ a e sila vɛ̃ ngɔ a.
Currently Selected:
TOBITƐ 6: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.