TOBITƐ 7
7
Raguɛlɛ kɔ̃a na Tobi ba Sara do wuke 'da a
1Wa nɛa we hɔ kɔ le Ekbatanɛ, nɛ Tobi tɔ̃ hã anzɛ na: “Nyae Azaria, lɛ tɛ dà'bà gɔ, mɔ kã mi 'da nya lɛ Raguɛlɛ i.” Nɛ anzɛ kã a dɛ nu tɔa 'da Raguɛlɛ i. Kɔ wa hɔa, nɛ wa kpa a, nɛ nde a dungu nù dɛ kɛ zã nu ngboe kɛ wa le do ma dɛ 'da a i ni, nɛ wa sa balɛ hã a.
Nɛ Raguɛlɛ gese hã wa na: “Mbanɔ, mi kɔ̃a balɛ 'da nɛ, nɛ mi fana 'bɔ nɛ!” Nɛ a tɔ̃ hã wa na, wa le dɛ kɔ tɔa i. 2Nɛ a sa mɔ hã kɛnɛ a Edna, nɛ a tɔ̃ hã a na: “Mɔ zɔ́, be zagbãlã gɛ hɔ nya mi Tobitɛ wena!” 3Nɛ Edna aka we li nwa le 'da ogɛnɛnɔ, nɛ wa gese na: “Lɛ yula kɔ le Ninivɛ. Lɛ a Oisraɛlɛ kɛ wa kala zi wa do 'duli ni. Lɛ a nu fɛlɛ Nɛftali” 4Nɛ wuke aka 'bɔ na: “Nɛ ĩ ti wi na 'da lɛ Tobitɛ nde?” Nɛ wa gese na: “Ĩi, lɛ ĩ ti a.” 5Nɛ wuke na: “A vɛ̃ a dia nde?” Nɛ Tobi gese na: “A 'bana nza, nɛ a dungu vɛ̃ a dia.” Nɛ a tɔ̃ 'bɔ na: “A a baa mi!”
6Kɔ Raguɛlɛ nɛa we zele ni, nɛ a gbo, nɛ a ba a dɛ tɛ̃ a, nɛ a ma ngɔ he ma. 'Do nɛ, nɛ a tɔ̃ hã a na: “Be 'daa! E kɔ Gale wele nu a tɛ mɔ! Mɔ kpa gbãlã we baa wi! Mɛ a 'bako wena we zɔ na, wi bɔlɔ zu, do wi dɛ gbɛla ɔ nɛ a ni, nɛ a hɔ wi tandu ni!” A ma ngɔ tɔ̃ ni, nɛ a sanga Tobi dɛ tɛ̃ a, nɛ a ndo 'bɔ he nɛ. 7Nɛ kɛnɛ a Edna, do be 'da a Sara, wa nɛa we lengge Tobitɛ, nɛ wa ma tɛ mɛ 'bɔ ngɔ he ma. 8Wa wila we do ngba wa do'do, nɛ Raguɛlɛ gbɛ wili bata hã gɛnɛnɔ 'da a, nɛ wa dɛa mɔ dɔ.
9Nɛ wa fɔlɔ tɛ wa we hɔ sa wi li Gale, ɔ nɛ kɛ mbula tɔ́a ni do'do, nɛ wa dungu nù nu mɛsa we nyɔngɔ mɛ. Nɛ Tobi tɔ̃ hã Rafaɛlɛ na: “Nyae Azaria, mɔ aka Raguɛlɛ na a kɔ̃, nɛ mi ba Sara do kɛnɛ mi.” 10Raguɛlɛ zila we Tobi tɔ́a ni, nɛ a tɔ̃ hã a na: “Nyae, mɔ nyɔ́ngɔ́ mɔ, mɔ nɔ́ dɔ̃, nɛ mɔ dɛ̃ yangga gɛ̃a wese gɛ! Mɔ ĩ na, mbé gele wele olo mɔ kɛ a wia we ba be 'da mi Sara ni bina. Mi wè we ba a hã gele wi gɔ, we duzu kɛ mɔ a wi na 'da mi ngboo. Nɛ nde, ma wia 'bɔ na, mi tɔ̃ wenɔ vɛ̃ dɛ nza: 11Mi ba zi a hã ombe nya lɛ, Oisraɛlɛ, fala sambo ia, nɛ wa vɛ̃ wa fia do kɔ tũ ba ngba wi, 'da fala kɛ wa nɛa we mba ngɔ te do a ni. Gɛnɛ kɔ na mɛ ni, we bina be 'daa, mɔ nyɔ́ngɔ́ mɛ, nɛ mɔ nɔ́ dɔɛ, NWA a zɔ sɛ mɔ tɛ nɛ bɔa nɛ.”
12Nɛ Tobi gisa na: “Gɔ! Mɔ kpò mbulu ba koe hã mi gɔ, nɛ nde mi nyɔ́ngɔ́ sɛ mɛ gɔ, nɛ mi nɔ́ sɛ dɔɛ gɔ.” Nɛ Raguɛlɛ gese na: “Ma a dia! Mi nɛ dɛ ma hã ni. We zɔ mbula 'da Mɔizɛ, nɛ nde wele Sara a mɔ́ mɔ, nɛ Gale hã a ba a hã mɔ do kɔ̃a zã 'da a. Mɔ bá a do wuke 'da mɔ. Yolo do sɔɛ gɛ, mɔ a wili a, nɛ a a kɛnɛ mɔ. Yolo do sɔɛ gɛ, wele a mɔ́ mɔ kɔ sabɛlɛ do sabɛlɛ. NWA kɛ a li nza i ni a dɛ sɛ na, mɔ kpo tɛ dɛ̀ nɛ tũi gɛ gɔ. E kɔ a ĩ 'bako hã nɛ, nɛ a hã gɛ̃a dungu hã nɛ!”
13Dɛ 'do nɛ, nɛ Raguɛlɛ sa mɔ hã be 'da a Sara, nɛ a tɛa. Nɛ Raguɛlɛ 'be nu kɔ̃ a, nɛ a ba a hã Tobi, nɛ a na: “Mɔ bá a do wuke 'da mɔ, ɔ nɛ kɛ mbula 'da Mɔizɛ tɔ́a ni! Mɔ bá a si do a do dia nɛ dɛ 'da baa mɔ i. E kɔ Gale kɛ a li nza i ni, a kã nɛ, nɛ a dɛ na nɛ dungu do yangga!”
14'Do ki ni, nɛ a sa mɔ hã kɛnɛ a, nɛ a tɔ̃ hã a na, a ba mɔ dɛ do mbɛti hã ɛ. A tɛa do ma, nɛ Raguɛlɛ kɔmɔ mbɛti ba koe na, ɛ ba be 'dɛ ɛ Sara hã Tobi do wuke 'da a, ɔ nɛ kɛ mbula 'da Mɔizɛ tɔ́a ni. 'Do nɛ, nɛ wa ma ngɔ nyɔngɔ mɛ, do nɔ dɔɛ.
Tũ ba ngba wi
15Nɛ Raguɛlɛ tɔ̃ hã Edna na: “Kɛnɛ mi, mɔ 'dáfá mbee 'bili tɔ̃a ɔi, nɛ mɔ kṹ be 'da lɛ Sara dɛ kɔ nɛ.”
16Nɛ Edna la we 'dafa mɔ ɔi ɔ nɛ kɛ wili a tɔ́a ni. A 'dafa do'do, nɛ a kã boko be 'da wa dɛ kɔ nɛ. A lingga be 'da a, nɛ a ma ngɔ he ma. Nɛ a kpãlã sila a, nɛ a dili mili kɔ̃a li a, 17nɛ a tɔ̃ na: “Be 'daa, mɔ kúnú sila mɔ. E kɔ NWA tɛ li nza i kifi 'bakoe 'da mɔ do yangga! Mɔ nɔ sila mɔ!” A tɔ̃a ni do'do, nɛ a hɔ nza.
Currently Selected:
TOBITƐ 7: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.