MATIE 7

Nɛ tɛ 'bìlì we mɔ́ ngba nɛ gɔ

(Luk. 6.37-38,41-42)

1“Nɛ tɛ 'bìlì we mɔ́ ngba nɛ gɔ, dɔ Gale 'bílí tɛ mɛ 'bɔ we 'da nɛ gɔ. 2We kɛ Gale a 'bili sɛ we 'da nɛ kpasaa ɔ nɛ kɛ nɛ 'bili do wenɔ 'da ngba nɛ ni. Mɛ nɛ we do mɔ hã ngba nɛ ni, Gale a we sɛ tɛ mɛ 'bɔ do mɔ hã nɛ. 3Kɔdɛ kɛ mɔ zɔ be 'bulu wɔkɔsɛ kɛ ma tia li nya mɔ ni, nɛ nde mɔ ĩ́ fala te kɛ ma tia li mɔ gɛ gɔ ni nɛ nde? 4Kɔdɛ kɛ mɔ wia tɛ tɔ̃ hã nya mɔ na, mɔ é li mɔ, kɔ mi fo 'bulu wɔkɔsɛ ngɔ nɛ gɛ, nɛ nde ĩ na, mɔ tɛ mɛ 'bɔ do te li mɔ ni nɛ nde? 5Mɔ, wi ɔlɔ wi gɛ, ma wia na, mɔ fo te li mɔ dati do'do, sɛ nɛ mɔ zɔ sɛ mɔ do dia nɛ, we fo 'bulu wɔkɔsɛ li nya mɔ ni de.

6“Nɛ tɛ ha mɔ kɛ ma a sa li Gale ni hã otolo gɔ, dɔ wa síkí tɛ wa, kɔ wa nyɔngɔ nɛ gɔ. Nɛ nɛ tɛ dà oiyakanɔ 'da nɛ hã ongulu gɔ, dɔ wa má ma do nyanga wa iko gɔ. #7.6 'Da Oyudanɔ, tolo do ngulu mɛ a osa'de ndi li Gale.

Nɛ gɔ́ mɔ kɔ̃ Gale, nɛ a hã sɛ hã nɛ

(Luk. 11.9-13)

7“Nɛ gɔ́ mɔ kɔ̃ Gale, nɛ a hã sɛ hã nɛ. Nɛ fá mɔ, nɛ nɛ kpa sɛ. Nɛ ngbóló 'do nu tɔa, nɛ Gale a hũi sɛ hã nɛ. 8Mba gɔ, wi kɛ a gɔ mɔ, nɛ wa hã sɛ hã a, nɛ wi kɛ a fa mɔ, nɛ a kpa sɛ, nɛ wi kɛ a ngbolo 'do nu tɔa, nɛ wa hũi sɛ hã a. 9Sanga nɛ gɛ, baa be kɛ be 'da a aka a na, a hã mapa hã ɛ, nɛ a hã ta hã a ni a wio nde? 10Tabi be aka we kɔyɔ, nɛ baa a a hã sɛ gɔ̃ hã a nde? 11Nɛ a owi dɛ 'dã mɔ, kɔ nɛ hã odia mɔ hã obenɔ 'da nɛ ni, ní a tɔlɔ wá do Baa nɛ Gale li nza i ni nde? Nɛ gɔ mɔ kɔ̃ a, nɛ a hã sɛ odia mɔ hã nɛ wena.

12“Nɛ dɛ́ do ongba nɛ ɔ nɛ kɛ nɛ kɔ̃a tɛ mɛ 'bɔ na, wa dɛ do nɛ ni. Ki ni a kɛ mbula 'da Mɔizɛ, do 'buki 'da Owi gba olo nu Gale tɔ̃a gɛ a ni.

Nɛ lé do be nu ngboe

(Luk. 13.24)

13“Nɛ dɛ́ nganda na, nɛ le do be nu ngboe. We kɛ nu ngboe kɛ ma gã wena, nɛ li wala nɛ lɔ wena ni, ma kã wele dɛ li fio. Nɛ gba gili Owele wa la do ma. 14Nɛ nu ngboe kɛ ma a bi sĩ, nɛ li wala nɛ gã̀ gɔ, nɛ fala la li nɛ nganda wena ni, ma kã wele we kpa kpasi. Nɛ Owele wa lá li nɛ wena gɔ.

Wa ĩ ti te we wala nɛ

(Luk. 6.43-44)

15“Lì nɛ sɔ̃́ tɛ owinɔ wa gba olo nu Gale do bɛlɛ ni. We kɛ wa tɛ 'da nɛ ɔ nɛ obata ni, nɛ nde kɔ sila wa ɔ nɛ kɔ sila gɔ̃̀ ni. 16Nɛ ĩ sɛ ti wa we dɛa to tɛ wa. We kɛ wele wè tɛ 'bi wala ndimɔ ngɔ te sàlá gɔ, nɛ wele wè 'bɔ tɛ 'bi wala mafuku ngɔ te gbakɔnda gɔ. 17Dia te ko dia wala te, nɛ 'dã te ko tɛ mɛ 'bɔ 'dã wala te. 18Dia te wè tɛ ko 'dã wala te gɔ, nɛ 'dã te wè tɛ ko dia wala te gɔ. 19Tenɔ vɛ̃ kɛ ma kó dia wala nɛ gɔ ni, nɛ wa 'bili ma do'do, nɛ wa da ma li we. 20Na mɛ ni, nɛ ĩ sɛ ti owinɔ wa gba olo nu Gale do bɛlɛ ni we dɛa to tɛ wa.

Owinɔ wa le sɛ kɔ le nwa 'da Gale a wio nde?

(Luk. 13.25-27)

21“Winɔ vɛ̃ kɛ wa sa li mi na: ‘Nwa, Nwa’ ni, wa lé sɛ kɔ le nwa 'da Gale gɔ, nɛ nde wi tati a wanɔ wa dɛ mɛnɔ kɛ zã Baa mi kɛ li nza i kɔ̃a ni, wa le sɛ. 22Do ngba soe 'bili we, nɛ ogba gili wele wa tɔ̃ sɛ hã mi na: ‘Nwa, Nwa, lɛ bia zi we nu Gale hã Owele do zu li mɔ, nɛ lɛ fua o'dã hi wi, nɛ lɛ dɛa ogba gili ɔngbamɔ do zu li mɔ!’ 23Nɛ mi gese sɛ hã wa na: ‘Mi ĩ̀ ti nɛ gɔ, nɛ a owi dɛ 'dã mɔ! Nɛ fó tɛ nɛ ngɔ li mi do'do!’ ”

Gba we ngɔ dɛ to tɔa mɔ́ owele bɔa

(Luk. 6.47-49)

24Nɛ Yezu tɔ̃ 'bɔ na: “Winɔ vɛ̃ kɛ wa zele we mi tɔ̃ gɛ, kɔ wa e ma fala dɛa to, nɛ nde wa wia kɔ̃ do wi hã zã, kɛ a dɛa tɔa 'da a, nɛ a a nyanga nɛ dɛ ngɔ ta ni. 25Nɛ kolo tɛa, nɛ lì hɛ̃a, nɛ gba bũ zɛa tɔa nganda wena, nɛ nde ma tè gɔ, we kɛ a a zi nyanga tɔa ni dɛ ngɔ ta. 26Nɛ winɔ vɛ̃ kɛ wa zele we nu mi, kɔ wa è ma fala dɛa to gɔ ni, wa wia kɔ̃ do yɔndɔ wi kɛ a dɛa tɔa 'da a dɛ ngɔ kɛnzɛ ni. 27Nɛ kolo tɛa, nɛ lì hɛ̃a, nɛ gba bũi zɛa tɔa nganda wena, nɛ ma te wuku.”

Yezu be we do dĩ wena

28Yezu bia wenɔ ni do'do, nɛ ogba gili winɔ vɛ̃ wa ɔngba bia wenɔ 'da a wena, 29we kɛ a be zi ma do dĩ wena, nɛ nde a bé ɔ nɛ kɛ owi be mbulanɔ 'da wa wa be zi ni gɔ.

Currently Selected:

MATIE 7: NGB

Highlight

Copy