LUKA 4
4
Satana yamba sila Yezu
(Mat. 4.1-11; Mar. 1.12-13)
1Yezu nɛa we hɔ nza 'dɔ lì Yɔrdanɛ, nɛ ngawi 'da Hi Wi Santo dunu kɔ a, nɛ a kã a dɛ li gba zɔ̃ i. 2Nɛ a ɔa i mɔ 'bu tũ nalɛ, nɛ Satana zi tɛ yamba sila a. Nɛ tũnɔ ni vɛ̃ Yezu nyɔ̀ngɔ̀ mɔ gɔ, nɛ wɔ ba a. 3Nɛ Satana tɔ̃ hã a na: “Fala kɛ mɔ a Be 'da Gale kpaa nde, nɛ mɔ tɔ̃́ hã ta gɛ, kɔ ma kifi nyɔngɔmɔ, hã mɔ nyɔngɔ.”
4Nɛ Yezu gese hã a na: “Wa kɔma kɔ 'Buki 'da Gale na: ‘Wele kpásá tati a we nyɔngɔmɔ iko gɔ.’ ”#4.4 Mɔ tɔ́lɔ́ Mbulanɔ 8.3.
5Nɛ Satana ba Yezu dɛ li ngɔ i, nɛ a bia lenɔ ngɔ nù gɛ hã a vɛ̃ 'da kala gɔ, 6-7nɛ a tɔ̃ hã a na: “Fala kɛ mɔ dɔnggɔ mi, nɛ mi hã sɛ lenɔ gɛ, do dɔ̃lɔ̃ li 'da ma vɛ̃ hã mɔ, nɛ mɔ dungu nwa ngɔ nɛ. We kɛ wa 'dɔlɔ ma vɛ̃ hã mi, nɛ mi wia we hã ma hã wi kɛ zã mi kɔ̃a a ni.”
8Nɛ Yezu gese hã a na: “Wa kɔma kɔ 'Buki na: ‘Mɔ dɔnggɔ sɛ Nwa Gale 'da mɔ, nɛ mɔ sambala tati a a zu a kpo.’ ”#4.8 Mɔ tɔ́lɔ́ Mbulanɔ 6.13.
9Nɛ Satana ba 'bɔ a, nɛ a la do a dɛ kɔ le Yeruzalɛmɛ, nɛ a e a gbogbo zu tɔa Tɛmpɛlo i, nɛ a tɔ̃ hã a na: “Fala kɛ mɔ a ngbongbo Be 'da Gale, nɛ mɔ bṹlṹ, kɔ mɔ zĩ nù. 10We kɛ wa kɔma kɔ 'Buki na:
‘Gale a a sɛ oanzɛnɔ 'da a na,
wa zɔ mɔ tɛ mɔ.
11Wa kpɔ sɛ kɔ̃ wa ti mɔ dɛ li ngɔ gɛ na,
dɔ mɔ tó nyanga mɔ do ta gɔ.’ ”#4.10-11 Mɔ tɔ́lɔ́ Zumanɔ 91.11-12.
12Nɛ Yezu gese hã a na: “Wa kɔma 'bɔ kɔ 'Buki na: ‘Mɔ tɛ yàmbà Nwa Gale 'da mɔ gɔ.’ ”#4.12 Mɔ tɔ́lɔ́ Mbulanɔ 6.16.
13Satana yamba Yezu do walanɔ ni vɛ̃ ia do'do, nɛ a la a we 'bɔ 'da mbé 'da fala.
Yezu ndua toe 'da a tɛ ngɔ nù Galile
(Mat. 4.12-17; Mar. 1.14-15)
14Nɛ ngawi 'da Hi Wi Santo dunu kɔ Yezu, nɛ a kpolo tɛ̃ a dɛ ngɔ nù Galile i. Nɛ sako li a yɛ'ba ngɔ nùi ni vɛ̃. 15Nɛ a be zi we kɔ tɔa mbulanɔ, nɛ winɔ vɛ̃ wa dɔnggɔ zi a wena.
Owi Nazarɛtɛ wa kɔ̃̀ gɛnɛ Yezu gɔ
(Mat. 13.53-58; Mar. 6.1-6)
16Nɛ Yezu hɔa tɛ Nazarɛtɛ, le kɛ a gã zi dɛ kɔ nɛ ni. Nɛ do tũ ɔmɔ tɛ wi, nɛ a nɛa kɔ tɔa mbula ɔ nɛ kɛ a dɛ ma fai ni. Nɛ a kulu ngɔ we tɔlɔ 'Buki 'da Gale, 17nɛ wa hã 'buki kɛ Ezai kɔma ni hã a. Nɛ a yala kasa 'buki ni, nɛ a kpa fala lɛnggɛ wa kɔma na:
18“Hi Wi 'da Nwa Gale ngɔ mi boe,
a saka mi na, mi be Dia Sakoe hã owi sãnɔ.
A tumba mi na, mi tɔ̃ hã owi bɔlɔkɔ na,
wa hɔa nza kɔ bɔlɔkɛ ia,
nɛ mi hũi li owi lɔa linɔ na, wa zɔ mɔ,
nɛ mi fo owinɔ kɛ ogele wele wa zɛlɛ tɛ wa ni
ti kɔ̃ Owi zɛlɛ tɛ wa do'do.
19Nɛ mi be 'bɔ hã owinɔ na,
ngba soe kɛ Gale nɛ be do dia zã 'da a ni, ma wia ia.”#4.19Mɔ tɔ́lɔ́ Ezai 61.1-2.
20Yezu nɛa we tɔlɔ ma do'do, nɛ a kasa 'buki, nɛ a gese hã wi dɛa toe, nɛ a dungu nù. Nɛ owinɔ kɔ tɔa mbula ni vɛ̃, wa kala li wa dɛ tɛ̃ a. 21Nɛ a tɔ̃ hã wa na: “We kɛ nɛ zila kɔ 'Buki gɛ, ma dɛa tɛ̃ ɛ sɔɛ gɛ.”
22Nɛ winɔ vɛ̃ wa ɔngbɔ do Yezu wena, nɛ wa kɔ̃a gɛnɛ dia wenɔ kɛ a bia ma ni. Nɛ wa tɔ̃ na: “Wi gɛ a be 'da Yozɛfu gɔ nde?”
23Nɛ Yezu tɔ̃ hã wa na: “Mi ĩ na, nɛ tɔ̃ sɛ hã mi do gba we na: ‘Monganga, mɔ kpásá kili tɛ mɔ wele nɛ!’ Nɛ nɛ tɔ̃ sɛ 'bɔ na: ‘Lɛ zila we mɛnɔ kɛ mɔ dɛa ma Kafarnaumɛ i ni vɛ̃. Kɔ mɔ dɛ́ mbe ma dɛ kɔ le 'da mɔ gɛ!’ ”
24Nɛ a tɔ̃ 'bɔ na: “Mi tɔ̃ hã nɛ do gbãlã we na, wa kɔ̃́ gɛnɛ wi gba olo nu Gale kɔ le 'da a gɔ. 25Gbãlã we, owi fio wili wa dɛlɛ zɛ́ ngɔ nù Israɛlɛ do 'da fala 'da Elia wena. Nɛ do ngba soenɔ ni, kolo tɛ́ zɛ́ gɔ gbaa 'do sabɛlɛ talɛ do zɛkɛ gazɛlɛ. Nɛ gba wɔ ma tia ngɔ nùi vɛ̃. 26Nɛ Gale tòmbò zɛ́ Elia 'da mbe wele kpo sanga owuko Israɛlɛnɔ ni gɔ. A tumba a 'da mbe gele wuko wi fio wili tɛ kɔ le Sarɛpta, tɛ ngɔ nù Sidoni.#4.26Sidoni mɛ a gele nù, ma te Israɛlɛ gɔ. 27Nɛ 'da fala 'da Elize, wi gba olo nu Gale, Owi zɛlɛ ngbɛlɛ wa dɛlɛ zɛ́ ngɔ nù Israɛlɛ wena. Nɛ mbe kpo sanga wa ni kpàsà gɔ. Wi kpasa zɛ́ kpo a Namanɛ, gele wi kɛ a yula ngɔ nù Siri ni.”
# 4.27 Mɔ tɔ́lɔ́ Onwanɔ 5.1-14. 28Owinɔ kɔ tɔa mbula ni wa nɛa we zele ni, nɛ zã wa vɛ̃ nɔ̃lɔ̃ wena. 29Nɛ wa kulu ngɔ dɛ tɛ̃ a, nɛ wa nɛ do a zununu dɛ 'do ngba i, tɛ gbogbo zu kala wa dɛa le 'da wa ngɔ nɛ ni, takɔ wa ili a dɛ kɔ gbangɔlɔ̃ i. 30Nɛ a hɔ nza do sanga wa ni, nɛ a la.
Yezu ndaka 'dã hi wi kɔ wele
(Mar. 1.21-28)
31Nɛ Yezu la dɛ kɔ le Kafarnaumɛ, tɛ ngɔ nù Galile. Nɛ ma hɔa tũ ɔmɔ tɛ wi, nɛ Yezu lia kɔ tɔa mbula, nɛ a ma ngɔ be we hã owinɔ. 32Nɛ winɔ kɛ wa zila a ni, wa ɔngba do tɛlɛ tɛ bia wenɔ 'da a wena, we duzu kɛ a be zi ma do dĩ wena. 33Nɛ mbe wele kpo zi kɔ tɔa mbula ni, a do 'dã hi wi kɔ a. Nɛ a ma ngɔ he mɔ nganda wena na: 34“Aa Yezu, wi Nazarɛtɛ, mɔ nɛ dɛ do lɛ nɛ nde? Mɔ tɛa we kumu lɛ kumu nde? Mi ĩ ti mɔ de wena. Mɔ a santo kɛ Gale a tumba mɔ!”
35Nɛ Yezu dãlã dɛ tɛ 'dã hi wi ni na: “Mɔ kpé nu mɔ, kɔ mɔ hɔ́ nza kɔ wi gɛ do'do!” Nɛ 'dã hi wi lua wi ni nù kpingbi dɛ dati winɔ vɛ̃, nɛ a za'da nza. Nɛ nde a dɛ̀ 'dã mɔ do wi ni gɔ.
36Nɛ winɔ vɛ̃ wa ɔngbɔ nɛ ge nde ni, nɛ wa ma ngɔ tɔ̃ dɛ sanga ngba wa na: “Ki a wila we ge nde? A ba nu a do ngawi ɔ nɛ nwa ni hã o'dã hi winɔ, nɛ wa hɔ nza kɔ wele!” 37Nɛ sako li Yezu yɛ'ba ngɔ nùi ni vɛ̃.
Yezu kpasa ogba dɔa wi zɛlɛ
(Mat. 8.14-17; Mar. 1.29-34)
38Nɛ Yezu hɔa nza kɔ tɔa mbula ni, nɛ a la dɛ kɔ tɔa 'da Simɔ. Kɔ a nɛa we hɔ i mɔ, nɛ nde kɛfɛ Simɔ wuko nɛ zi a ngɔ te ɔi, we duzu kɛ tɛ̃ a ba we kpangbangba. Nɛ wa tɔ́a hã Yezu na, a kpasa a. 39Nɛ Yezu bili zu ɛ dɛ ngɔ a, nɛ a tɔ̃ do nga gɛlɛ na: “Bawe tɛ wi, mɔ gɛ̃́!” Nɛ bawe tɛ̃ a gɛ̃a do ti, nɛ a kulu ngɔ, nɛ a ma ngɔ gi nyɔngɔmɔ hã wa.
40Kɔ wese nɛa we le nù, nɛ winɔ wa kala Owi zɛlɛ kpi do kpi, nɛ wa tɛ do wa hã Yezu. Nɛ a ia kɔ̃ a ngɔ wa kpo kpo, nɛ wa kpasa. 41Nɛ Yezu ndaka o'dã hi wi kɔ owinɔ wena, nɛ o'dã hi winɔ ni wa ma ngɔ he mɔ na: “Mɔ a Be 'da Gale!” Nɛ Yezu ua dã zu wa nganda wena na, wa kpe nu wa. Mba gɔ, wa ĩ zi na, Yezu a Mɛsiya.
Yezu bia we tɛ ngɔ nù Yude
(Mar. 1.35-39)
42Fala nɛa we sa nɛ, nɛ Yezu hɔa nza kɔ le ni, nɛ a la dɛ 'do ngba i. Nɛ gba gili Owele wa ma ngɔ fa a. Kɔ wa nɛa we kpa a, nɛ wa disi a, nɛ wa kɔ̃̀ na a la lo gɔ. 43Nɛ Yezu tɔ̃a hã wa na: “Ma wia na, mi be tɛ mɛ 'bɔ Dia Sako dɛa to nwa 'da Gale tɛ kɔ gele lenɔ. We duzu kɛ Gale tumba mi we be ma.”
44Nɛ Yezu ma zi ngɔ be wenɔ kɔ tɔa mbulanɔ tɛ ngɔ nù Yude.
Currently Selected:
LUKA 4: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
