LUKA 22
22
Onwa Yudanɔ wa fa we ba Yezu
(Mat. 26.1-5; Mar. 14.1-2; Yoa. 11.45-53)
1Gã ɛngga kɛ wa nyɔngɔ do mapa wa à ina hana mapa tɛ nɛ gɔ, nɛ wa sa li nɛ na ɛngga Hɔ Nza kɔ Ngbá ni kɔla zi. 2Nɛ onwa nganganɔ do Owi be mbulanɔ, wa ma ngɔ fa tɛlɛ tɛ kɛ wa wia tɛ gbɛ do Yezu ni, we kɛ wa dɛ zi kili owinɔ.
Yudasi fa wala 'dɔlɔ Yezu
(Mat. 26.14-16; Mar. 14.10-11)
3Nɛ Satana lia kɔ Yudasi Iskariɔtɛ, mbe sanga Owi yambala mɛnɔ 'da Yezu 'bu ngɔ wa bɔa ni. 4Nɛ Yudasi nɛa 'da onwa nganganɔ, do onwa ngɔ Owi zɔ mɔ nu tɔa Tɛmpɛloe, nɛ a wele we do wa ngɔ tɛlɛ tɛ kɛ a kɔ̃a we 'dɔlɔ do Yezu hã wa ni. 5Wa zila ní, nɛ wa dɛ yangga wena, nɛ wa kpua mbulu hã mbili hã a. 6Nɛ Yudasi kɔ̃a, nɛ a ma ngɔ fa dia fala kɛ a wia tɛ 'dɔlɔ do Yezu hã wa do usu nɛ na, dɔ winɔ wa ĩ́ fala nɛ gɔ ni.
Yezu do owi yambala mɛnɔ 'da a wa nyɔnga ɛngga Hɔ Nza kɔ Ngbá
(Mat. 26.17-25; Mar. 14.12-21; Yoa. 13.21-30)
7Ma hɔa ngba soe ɛngga kɛ wa nyɔngɔ do mapa wa à ina hana mapa tɛ nɛ gɔ, nɛ wa gbɛ do obe bata we dungu do ɛngga ni. 8Nɛ Yezu sa mɔ hã Petro do Yoanɛ, nɛ a tɔ̃ hã wa na: “Nɛ nɛ́, kɔ nɛ 'dáfá nyɔngɔmɔ ɛngga Hɔ Nza kɔ Ngbá, takɔ lɛ nyɔngɔ.”
9Nɛ wa aka a na: “Mɔ kɔ̃a na, lɛ nɛ, kɔ lɛ 'dafa ma do nde?”
10Nɛ a gese hã wa na: “Nɛ zɔ́! 'Da fala nɛ hɔ sɛ dɛ kɔ le i ni, nɛ nɛ kpa sɛ wi wili kpo, a tula kpana lì, nɛ nɛ kpe dɛ 'do a gbaa dɛ kɔ tɔa a nɛ le do ma ni. 11Nɛ nɛ tɔ̃ hã wele tɔa ni na: ‘Wi be mɔ aka mɔ na, fala ɛ nɛ nyɔngɔ do ɛngga do Owi yambala mɛnɔ 'dɛ ɛ ni, ma a do nde?’ 12Nɛ a be sɛ gã 'bili kɔ tɔa do ngɔ hã nɛ, nɛ nde mɛnɔ vɛ̃ di ni boe, nɛ nɛ 'dafa sɛ nyɔngɔmɛnɔ hã lɛ dɛ di ni.” 13Nɛ wa nɛa, nɛ wa kpa mɛnɔ vɛ̃ ɔ nɛ kɛ Yezu tɔ̃a sɔ hã wa ni, nɛ wa 'dafa nyɔngɔmɔ ɛngga Hɔ Nza kɔ Ngbá dɛ di ni.
Nyɔngɔmɔ Santo 'da Nwa
(Mat. 26.26-30; Mar. 14.22-26; 1 Kor. 11.23-25)
14Kɔ 'da fala nyɔngɔmɛ wia, nɛ Yezu dungu nù we nyɔngɔ mɛ fala nɛ kpo do owi yambala mɛnɔ 'da a. 15Nɛ a tɔ̃ hã wa na: “Mi kɔ̃a zi wena na, lɛ nyɔngɔ ɛngga gɛ do nɛ, sɛ nɛ mi ĩ ti kpa zɛlɛ tɛ de. 16Kɔ mi tɔ̃ hã nɛ do gbãlã we na, ndo do sɔɛ gɛ, mi nyɔ́ngɔ́ sɛ 'bɔ mbé mɔ do nɛ gɔ gbaa na, gulu nyɔngɔmɛ gɛ be tɛ̃ ɛ kɔ le nwa 'da Gale sɛ nɛ de.”
17Nɛ a ba bila dɔ̃ɛ, nɛ a hã iɔ̃nae hã Gale, nɛ a tɔ̃ na: “Nɛ bá, kɔ nɛ kɛ dɛ kɔ̃ ngba nɛ. 18We kɛ mi tɔ̃ hã nɛ do gbãlã we na, ndo do sɔɛ gɛ, mi nɔ́ sɛ 'bɔ mbé dɔ̃ gɔ, gbaa we hɔ tɛ ngba soe kɛ Gale nɛ ndo do dɛa to nwa 'da a ni.”
19'Do nɛ, nɛ a ba mapa, nɛ a hã iɔ̃nae hã Gale, nɛ a gbini sanga nɛ, nɛ a kɛ̃ ma hã Owi yambala mɛnɔ. Nɛ a tɔ̃ hã wa na: “Kɛ gɛ a kili tɛ mi, [kɛ mi hã ma we duzu nɛ. Nɛ dɛ́ sɛ na mɛ ni fai, we lengge do mi.”
20Nɛ 'do nyɔngɔmɛ ni, nɛ a hã 'bɔ bila dɔ̃ɛ ni hã wa. Nɛ a tɔ̃ hã wa na: “Bila gɛ mɛ a bila tɔkɔ tɛ mi, kɛ ma a sɛ nù we duzu nɛ. Mɛ a mbé gba tɔkɔ kɛ Gale gba sanga tɛ ngba ɛ do owinɔ.] 21Kɔ nɛ zɔ́, wi kɛ a 'dɔlɔ sɛ mi ni, a nu nyɔngɔmɛ gɛ do mi boe! 22Mi Be 'da Wele, mi nɛ fe ɔ nɛ kɛ Gale 'bili zɛ́ do kɔ sila ɛ ia ni, nɛ nde 'bako do wi kɛ a nɛ 'dɔlɔ mi ni.”
23Nɛ wa ma ngɔ aka dɛ sanga ngba wa na: “Wi sanga lɛ gɛ nɛ dɛ ki ni a wio nde?”
Wi nɛa ngɔ ngbɛ ɛ a wio nde?
(Mat. 20.24-28; Mar. 10.41-45)
24Nɛ owi yambala mɛnɔ wa ma ngɔ ba kafi sanga tɛ ngba wa we ĩ na, wi nɛa ngɔ ongba a sanga lo a wio nde. 25Nɛ Yezu tɔ̃ hã wa na: “Onwa ngɔ owinɔ nù gɛ wa do ngawi ngɔ owinɔ 'da wa. Nɛ gã winɔ wa kɔ̃a na, winɔ 'da lo wa sa li lo na, lo a dia wele. 26Nɛ nde kɛ 'da nɛ, ma wè tɛ ɔ ni gɔ. Wi kɛ a kɔ̃ we nɛ ngɔ ongba a sanga nɛ ni, nɛ a ɔ nɛ be hɔ dɛ 'do nɛ vɛ̃ ni. Nɛ wele kɛ a kɔ̃ we hɔ gã wi, nɛ ma wia na, a ɔ wi dɛa to 'da ongba a. 27Nɛ lénggé na, wi nɛa ngɔ ngbɛ ɛ a wio nde? Wi a wi kɛ a dungu nù nu nyɔngɔmɔ ni, tabi wi a wele kɛ a yolo dɛ ngɔ, we hã nyɔngɔmɔ hã wele kɛ a dungu nù ni nde? Wi a wele kɛ a nyɔngɔ mɛ ni gɔ nde? Kɔ we mi, mi ɔ sanga nɛ gɛ nɛ wi kɛ a dɛ to hã ngba a ni! 28'Da fala mi kpa zi ngamɛnɔ ni, nɛ zi do mi fai boe. 29Na mɛ ni, ɔ nɛ kɛ Baa mi a hã ngawi hã mi, takɔ mi dɛ to nwa ni, mi hã tɛ mɛ 'bɔ kpo ngawi ni hã nɛ. 30Nɛ nyɔngɔ sɛ mɔ, nɛ nɛ nɔ dɔ̃ fala nɛ kpo do mi tɛ kɔ le kɛ mi nɛ dungu do nwa ni. Nɛ nɛ dungu sɛ ngɔ kpongbo nwa fala nɛ kpo do mi, takɔ nɛ 'bili we 'da onu kpala obe Israɛlɛ 'bu ngɔ wa bɔa ni.”
Yezu tɔ̃a hã Petro na a kafa sɛ ɛ
(Mat. 26.31-35; Mar. 14.27-31; Yoa. 13.36-38)
31Nɛ 'do nɛ, nɛ Yezu tɔ̃ hã Petro na: “Simɔ, Simɔ, mɔ ĩ́ na, Satana kpa ngawi, takɔ a pɛpɛ nɛ, ɔ nɛ kɛ wa pɛpɛ do gbãlã mɔ, we gɔnɔ sanga kɔa kɛ do gbãlã kɛ ni. 32Kɔ mi aka Gale we duzu mɔ na, da dɛ kɔ kɔ̃a we 'da mɔ mbɔ́kɔ́ gɔ. Kɔ 'da fala kɛ mɔ kpolo tɛ mɔ dɛ 'da mi, nɛ mɔ ngándá sila onya mɔ.”
33Nɛ Petro gese hã a na: “Nwa, ma ɔ do bɔlɔkɔ, tabi fio, nɛ nde mi kɔ̃a na, lɛ le, nɛ lɛ fe do mɔ fala nɛ kpo.”
34Nɛ Yezu tɔ̃ hã a na: “Petro, mi tɔ̃ hã mɔ na, sɔɛ gɛ dati kɛ na kɔla he mɔ ni, nɛ mɔ kafa sɛ mi fala talɛ na, mɔ ĩ̀ ti mi gɔ.”
Ngba soe bi bolo kɔlɔ ia
35Ne Yezu tɔ̃ hã wa na: “'Da fala mi tumba zi nɛ we be Dia Sakoe ni, nɛ zi do mbili, do koe, do mɔ nyanga wi bina. Nɛ nɛ zɔla zi mɔ nde?”
Nɛ wa gese na: “Ɔ̃ ɔ̃, lɛ zɔ̀lɔ̀ zi mɔ gɔ.”
36Nɛ a tɔ̃ 'bɔ hã wa na: “Kɔ ngangga ni, fala kɛ wele do mbili boe, nɛ a ba ma. Fala kɛ wele do koe, nɛ a ba ma. Kɔ fala kɛ wele do du kɔya bina, nɛ a tɛ́ká gba tulu 'da a, kɔ a oso do nɛ. 37We duzu kɛ mi tɔ̃ hã nɛ na, ma wia na, we wa kɔma zɛ́ kɔ 'Buki 'da Gale na: ‘Wa tɔla zi a fala nɛ kpo do o'dã winɔ’ ni, ma dɛ tɛ̃ ɛ do mi.”
38Nɛ owi yambala mɛnɔ wa ma ngɔ tɔ̃ na: “Nwa, mɔ zɔ́, lɛ do du kɔya dɛ bɔa.”
Nɛ a gese hã wa na: “Ma wia!”
Yezu sambala Gale te ngɔ kala Olivɛ
(Mat. 26.36-46; Mar. 14.32-42)
39Yezu hɔa nza kɔ tɔa ni, nɛ a la dɛ ngɔ kala Olivɛ, ɔ nɛ kɛ a dɛ ma fai ni. Nɛ owi yambala mɛnɔ 'da a, wa nɛa 'dɔkɔlɔ a. 40Kɔ a hɔa tɛ fala kɛ a nɛ sambala do Baa a ni, nɛ a tɔ̃ hã wa na: “Nɛ sámbálá Gale na, da dɛ kɔ sila nɛ ɔ́lɔ́ nɛ, kɔ nɛ dɛ 'dã mɔ gɔ.”
41'Do nɛ, nɛ a la nyɛlɛ do wa sĩ, nɛ a gu gba zugolo, nɛ a sambala Gale na: 42“Baa mi, fala kɛ mɔ kɔ̃, nɛ mɔ fó ngamɛ kɛ ma nɛ kpa mi gɛ do'do. Nɛ nde mɔ tɛ dɛ̀ ɔ nɛ kɛ mi kɔ̃a ni gɔ, mɔ dɛ́ ɔ nɛ kɛ mɔ kɔ̃a ni.” [43Kɔ a nɛa we da nu a, nɛ mbe anzɛ 'da Gale kpo hɔa we nganda sila a. 44Nɛ 'bako ba Yezu wena, nɛ a ma 'bɔ ngɔ sambala nganda wena, nɛ gbɛngɛmɔ tɛ̃ a ma ngɔ hulu dɛ nù ɔ nɛ tɔkɔ ni.]
45A wila we ni ia do'do, nɛ a kulu ngɔ, nɛ a nɛ dɛ 'da Owi yambala mɛnɔ i. Kɔ a nɛa we hɔ ma, nɛ nde wa dungu do 'bako gbaa, kɔ wa ɔa yala vɛ̃. 46Nɛ a tɔ̃ hã wa na: “Gulu kɛ nɛ ɔ yala we ge nde? Nɛ kúlú ngɔ, kɔ nɛ sambala Gale na, da dɛ kɔ sila nɛ ɔ́lɔ́ nɛ, kɔ nɛ dɛ 'dã mɔ gɔ.”
Wa ba Yezu
(Mat. 26.47-56; Mar. 14.43-50; Yoa. 18.3-11)
47Yezu 'bana tɛ tɔ̃ tɔ̃a iko, nɛ gba gili owele wa hɔ, nɛ nde Yudasi, mbe sanga owi yambala mɛnɔ 'bu ngɔ wa bɔa ni kpia dati wa. Nɛ Yudasi nɛa dɛ 'da Yezu, takɔ a 'be a dɛ tɛ̃ a we fana a. 48Nɛ Yezu tɔ̃ hã a na: “Yudasi, mɔ fana mi Be 'da Wele, takɔ mɔ 'dɔlɔ mi nde?”
49Kɔ winɔ kɛ Yezu yɛnggɛ do wa ni, wa nɛa we zɔ ní, nɛ wa aka a na: “Nwa, lɛ bí wa do kɔyanɔ 'da lɛ gɔ nde?”
50Nɛ mbe wele kpo sanga winɔ zi di ni, a mana kɔya 'da a, nɛ a 'bili zala mbe wi toe 'da gã nwa nganga, si ngawili kɔ̃. 51Nɛ Yezu tɔ̃ hã wa na: “Ma wia, nɛ lá ni!” Nɛ a 'be tɛ zala wi ni, nɛ ma de dɛ olo nɛ.
52Nɛ Yezu tɔ̃ hã onwa nganganɔ, do onwa ngɔ owi zɔ mɔ nu tɔa Tɛmpɛloe, do okumunɔ kɛ wa tɛa zi we ba a ni na: “Gulu kɛ nɛ tɛa 'dɔkɔlɔ mi do okɔya, do odɔ te we ba mi, ɔ nɛ kɛ mi a wi zũ ni we ge nde? 53Tũ kpo kpo, mi zi tɛ yɛnggɛ do sanga nɛ gɛ do kɔ Tɛmpɛloe, nɛ nɛ bà zi mi gɔ. Kɔ ngangga ni, mɛ a 'da fala 'da nɛ, we kɛ Satana tɛ be ngawi 'da a kɔ gba tũ.”
Petro kafa Yezu
(Mat. 26.57-58,69-75; Mar. 14.53-54,66-72; Yoa. 18.12-18,25-27)
54Wa ba Yezu, nɛ wa la do a dɛ kɔ tɔa 'da gã nwa nganga. Nɛ Petro tɛ nɛ do 'do wa ni, nɛ ngbala wa nyɛlɛ do a nyɛla. 55Nɛ nde Owele wa dã zi we dɛ li fanda kɔ ngboe ni, kɔ wa tɛ ɔ ma. Nɛ Petro nɛ, nɛ a dungu nù dɛ sanga owinɔ ni. 56Nɛ mbe wuko wi toe 'da gã nwa ni zɔ kɛ Petro tɛ ɔ we ni, nɛ a soko Petro gbaa, nɛ a tɔ̃ na: “Wi gɛ zi tɛ mɛ 'bɔ fala nɛ kpo do a gɔ nde?”
57Nɛ Petro kafa na: “Wuko, mi ĩ̀ ti wi mɔ sa li a gɛ gɔ.”
58'Da kala bi sĩ, nɛ mbé gele wele zɔ a, nɛ a tɔ̃ na: “Mɔ tɛ mɛ 'bɔ a mbe kpo sanga winɔ ni.”
Nɛ Petro gese hã wi ni na: “Mbaa, wi a mi gɔ.”
59Olo nɛ nɛa we la 'bɔ ɔ nɛ sa kpo ni, nɛ mbe wele di ni dala nu ɛ na: “Mɛ a ngbongbo we, wi gɛ a mbe kpo sanga owinɔ ni. Mba gɔ, a a be Galile.”
60Nɛ Petro gese na: “Mbaa, mi ĩ̀ ti kɛ mɔ tɔ̃ ni gɔ.” Nɛ ma nɛ 'bana dɛ nu a ni, nɛ kɔla he mɔ. 61Nɛ Nwa Yezu siki tɛ̃ a, nɛ a ka mɔ li Petro, nɛ tɛ zu Petro gba ngɔ we Yezu tɔ̃a zɛ hã a na: “Sɔɛ gɛ, dati kɛ na kɔla he mɔ ni, nɛ mɔ kafa sɛ mi gbaa fala talɛ na, mɔ ĩ̀ ti mi gɔ.” 62Nɛ Petro hɔa nza, nɛ 'bako ba a, nɛ a he wena.
Wa dã Yezu, nɛ wa zɛ 'bɔ a
(Mat. 26.67-68; Mar. 14.65)
63-64Nɛ owinɔ kɛ wa zɔ mɔ tɛ Yezu ni, wa ɛnzɛ li a do tulu, nɛ wa zɛ a, nɛ wa na: “Mɔ sá li wi zɛa mɔ ni!” Nɛ wa ma ngɔ mɔmɔ a. 65Nɛ wa tɛ tɔ̃ ogele 'dã we hã a nɛ ge nde ni.
Owi 'bili wenɔ wa aka Yezu
(Mat. 26.59-66; Mar. 14.55-64; Yoa. 18.19-24)
66Kɔ fala nɛa we sa nɛ, nɛ okumunɔ, do onwa nganganɔ, do Owi be mbulanɔ, wa mba ngba wa. Nɛ wa sa mɔ hã Yezu tɛ kɔ gã mba li ngba wi 'da wa ni. 67Nɛ wa aka a na: “Mɔ tɔ̃́ hã lɛ sɛ! Mɔ a Mɛsiya nde?”
Nɛ Yezu gese hã wa na: “Gɛnɛ kɔ mi tɔ̃ hã nɛ na, mi a Mɛsiya, nɛ nde nɛ kɔ̃́ sɛ gɔ. 68Kɔ mi aka nɛ do we kpo, nɛ nde nɛ gésé sɛ 'bɔ nu nɛ hã mi gɔ. 69Nɛ nde yolo do ngangga ni, mi Be 'da Wele, mi dungu sɛ tɛ ngɔ ngawili kɔ̃ Gale, kɛ a do nganda vɛ̃ ni.”
70Nɛ wa vɛ̃ wa aka a na: “Ní a mɔ a Be 'da Gale nde?”
Nɛ a gese hã wa na: “Ma a nɛ tɔ̃a ni.”
71Nɛ wa tɔ̃ na: “Lɛ nɛ fa 'bɔ mbé we tɔ̃ dɛ ngɔ a fa we ge nde? Mba gɔ, lɛ do tɛ lɛ lɛ zila dɛ nu a wele nɛ ngboo!”
Currently Selected:
LUKA 22: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.
