LUKA 21

Wi fio wili hã mbili hã Gale

(Mar. 12.41-44)

1Nɛ Yezu dungu kɔ Tɛmpɛloe i, nɛ a zɔ tɛlɛ tɛ kɛ owi kpamɛnɔ wa da do mbilinɔ 'da wa dɛ kɔ sanduku da do mbili ni. 2Nɛ a zɔa mbe wi fio wili kpo, a hɔa tɛ mɛ 'bɔ, nɛ a da bi gbãlã mbili bɔa. 3Nɛ Yezu tɔ̃ na: “Mi tɔ̃ hã nɛ do gbãlã we na, wi fio wili gɛ, a da mbili nɛa ngɔ tala winɔ vɛ̃. 4Mba gɔ, owinɔ ni wa hã kɛnɔ 'da wa, mɛ a nu mbili kɛ wa do to dɛ do ma bina ni. Nɛ nde wi fio wili gɛ, gɛnɛ kɔ a a wi sã ni, nɛ a hã tala mbili 'da a kɛ sɔ a nɛ kpasa do ma ni vɛ̃.”

Yezu tɔ̃a na wa gbini sɛ tɔa Tɛmpɛloe

(Mat. 24.1-2; Mar. 13.1-2)

5Nɛ ombe wele wa ma ngɔ tɔ̃ we Tɛmpɛloe na, tanɔ wa dɛa do tɔa ni, do omɛnɔ kɛ wa hã ma we dɔnggɔ do Gale ni, ma de wena. Nɛ Yezu tɔ̃ na: 6“Ngba soenɔ 'do gɛ, nɛ wa gbini sɛ mɛnɔ nɛ zɔ gɛ vɛ̃, nɛ gbãlã ta kpo 'báná sɛ ngɔ ngbɛ ɛ gɔ, ma gbɛsɛ sɛ vɛ̃.”

Ngamɛnɔ kɛ ma hɔ sɛ dati a ndɔti nùi

(Mat. 24.3-14; Mar. 13.3-13)

7Nɛ wa aka Yezu na: “Wi be mɔ, mɛnɔ mɔ tɔ̃a we nɛ gɛ, ma dɛ sɛ tɛ̃ ɛ soe ki nge nde? Nɛ mɛ ma be sɛ na, ngba soe ni kɔla ia ni a ge nde?”

8Nɛ Yezu gisa hã wa na: “Li nɛ sɔ̃́ na, da dɛ kɔ wele ɔ́lɔ́ nɛ gɔ. We duzu kɛ Owele wena wa hɔ sɛ do zu li mi, nɛ wa tɔ̃ sɛ na, lo a Mɛsiya. Nɛ wa tɔ̃ sɛ 'bɔ na, ngba soe tɛa 'da Mɛsiya ma kɔla ia! Nɛ nde nɛ tɛ nɛ̀ 'do wa gɔ. 9Kɔ fala kɛ nɛ ma sɛ ngɔ zele sako bolonɔ, do sako balianɔ winɔ wa fa do Onwanɔ 'da wa ni, nɛ nɛ tɛ dɛ̀ kili gɔ. We kɛ ma wia na, mɛnɔ ni ma hɔ dati. Kɔ gɛnɛ kɔ ma dɛ tɛ̃ ɛ, nɛ nde mɛ sɛ a ndɔti nùi a ni gɔ.”

10'Do nɛ, nɛ Yezu tɔ̃ 'bɔ na: “Do 'da fala ni, nwa kpo a kulu sɛ ngɔ do owinɔ 'da a, nɛ a bi do nwa kɔ gele le. Nɛ owinɔ tɛ ngɔ nù kpo wa bi sɛ kpo ngba wa. 11Nɛ nùi ma tana sɛ nganda wena, nɛ gba wɔ do o'dã zɛlɛ ma sɛ tɛ falanɔ kpi do kpi. Nɛ omɔ hã kili hã wele ma dɛ sɛ tɛ̃ ɛ, nɛ yolo do li nza i, omɔ ma be sɛ tɛ̃ ɛ li winɔ.

12“Nɛ nde do dati mɛnɔ ni, Owele wa kala sɛ nɛ, nɛ wa zɛlɛ tɛ nɛ, nɛ wa nɛ do nɛ we 'bili we 'da nɛ kɔ tɔa mbulanɔ, nɛ wa a sɛ nɛ bɔlɔkɔ. Wa a sɛ nɛ dati Onwanɔ, do ogã winɔ, we kɛ nɛ a winɔ 'da mi. 13Nɛ ma hã sɛ wala hã nɛ na, nɛ tɔ̃ we 'da mi hã wa. 14Nɛ nde da dɛ kɔ nɛ bí tɛ nɛ na, lo nɛ tɔ̃ sɛ na ge nde gɔ. We kɛ nɛ ĩ́ na, 15mi e sɛ wila we dɛ nu nɛ, nɛ mi hã hã zã hã nɛ, nɛ owi sɛnɛ nɛ wa wé sɛ do ba kafi, tabi bɛ̃ we nu nɛ gɔ. 16Obaa nɛ, onaa nɛ, onya nɛ, owi nanɔ 'da nɛ, do oyali ngba nɛ, wa 'dɔlɔ sɛ nɛ, nɛ wa gbɛ sɛ ombe sanga nɛ. 17Nɛ owinɔ vɛ̃ wa sɛnɛ sɛ nɛ we duzu mi. 18Nɛ nde gbãlã mili zu nɛ kpo gɔ́nɔ́ sɛ gɔ. 19Kɔ sila nɛ nɔ tɛ kɔ̃a we 'da nɛ, nɛ Gale a kpasa sɛ nɛ.

Yezu tɔ̃a na Owele wa 'danga sɛ Yeruzalɛmɛ

(Mat. 24.15-21; Mar. 13.14-19)

20“'Da fala kɛ nɛ zɔ sɛ Owi bolonɔ nɛ nde wa zĩ 'do le Yeruzalɛmɛ takpa, nɛ nɛ ĩ na, le Yeruzalɛmɛ kɔlɔ 'danga nɛ ia. 21Nɛ winɔ kɛ wa sɛ tɛ ngɔ nù Yude ni, ma wia na, wa yu dɛ ngɔ kalanɔ i. Nɛ wanɔ kɛ wa dɛ kɔ le Yeruzalɛmɛ ni, ma wia na, wa hɔ nza kɔ nɛ, nɛ wanɔ safɔ i ni, wa tɛ sì 'bɔ le nga gɔ. 22Mɛ sɛ a ngba soe bili nu gbã, takɔ kɛ wa kɔma kɔ 'Buki 'da Gale ni, ma dɛ tɛ̃ ɛ. 23Do ngba soe ni, 'bako sɛ wena we wukonɔ kɛ wa do zã, do wanɔ wa tɛ ɔmɔ obe ni. Mba gɔ, gã ngamɔ sɛ wena, nɛ nɔ̃lɔ̃ zã 'da Gale ma be sɛ tɛ̃ ɛ hã owinɔ ngɔ nùi gɛ. 24Owele wa gbɛ sɛ ombe sanga wa do du kɔya, nɛ ombe wa la sɛ kɔlɔ 'duli tɛ ngɔ gele nùnɔ vɛ̃. Nɛ ogele winɔ wa ma sɛ le Yeruzalɛmɛ ti nyanga wa, gbaa ndɔti nɛ a kɛ ngba soe 'da wa ma we.

Yezu a tɛ sɛ 'bɔ

(Mat. 24.29-31; Mar. 13.24-27)

25“Nɛ omɔ ma dɛ sɛ li wese, do zɛkɛ, do osɔlanɔ. #21.25 Mɔ tɔ́lɔ́ Ezai 13.10, Yɔɛlɛ 3.4. Nɛ ngɔ nù nga, sila owinɔ ma ɔ sɛ ngɔ ngbũu, nɛ wa zele sɛ giti ngele gba lì kɛ ma sulu ni, nɛ wa tana kili. 26Nɛ ombe winɔ wa lengge sɛ mɛnɔ kɛ ma nɛ dɛ tɛ̃ ɛ ni, nɛ wa fe sɛ tɛ kili. We kɛ ngawi 'da mɛnɔ li ngɔ gɛ, ma vĩ sɛ zu ngbɛ ɛ. 27Nɛ 'do nɛ, nɛ wa zɔ sɛ mi Be 'da Wele, nɛ nde mi hɔa do ngawi, do dɔ̃lɔ̃ li vɛ̃ dɛ sanga kutunɔ. 28Kɔ 'da fala kɛ mɛnɔ ni ma ngɔ dɛ tɛ̃ ɛ, nɛ nɛ kúlú ngɔ, nɛ nɛ ká mɔ dɛ ngɔ i, we kɛ ngba soe kɛ Gale nɛ kpasa do nɛ ni ma kɔla ia.”

Yezu bia we ngɔ te figɛ

(Mat. 24.32-35; Mar. 13.28-31)

29'Do nɛ, nɛ Yezu tɔ̃a gba we gɛ hã wa na: “Nɛ zɔ̃ te figɛ, do tala gele tenɔ vɛ̃. 30Ngba soe kɛ nɛ zɔ mbé nwá nɛ tɛ 'bɔ nɛ, nɛ nɛ ĩ na, zɔlɔ lì kolo kɔla ia. 31Na mɛ ni, fala kɛ nɛ zɔ mɛnɔ mi tɔ̃a sɔ we nɛ ni tɛ dɛ tɛ̃ ɛ, nɛ nɛ ĩ sɛ na, dɛa to nwa 'da Gale kɔla ia. 32Mi tɔ̃ hã nɛ do gbãlã we na, mɛnɔ ni ma dɛ sɛ tɛ̃ ɛ, nɛ nde mbe winɔ sɔɛ gɛ wa 'bana nza. 33Li nza do nùi ma 'danga sɛ, nɛ nde we nu mi ma 'bana sɛ fai.

Ma wia na li nɛ sɔ̃

34“Li nɛ sɔ̃́! Nɛ nɛ tɛ sì tɛ nyɔngɔ mɔ dɔ, do te bá dɔ̃ iko gɔ. Nɛ tɛ sì tɛ lengge mɛnɔ ngɔ nùi gɛ iko gɔ, da dɛ kɔ ngba soe hɔa 'da mi ni ma gbángá nɛ hia iko gɔ. 35We kɛ ngba soe ni, ma mbala sɛ owinɔ ngɔ nù gɛ vɛ̃ kpiti, ɔ nɛ kɛ sa'de ba do bili ni. 36Nɛ tɛ ɔ̃ yala gɔ. Nɛ sámbálá Gale 'da falanɔ vɛ̃ na, a hã ngawi hã nɛ, takɔ nɛ we tɛ kpasa kɔ mɛnɔ vɛ̃ kɛ ma hɔ sɛ ni, nɛ nɛ we tɛ yolo dati mi Be 'da Wele.”

37Tũ kpo kpo, do gba wese, nɛ Yezu be we tɛ kɔ tɔa Tɛmpɛloe. Kɔ wese nɛ gɛ̃ nɛ, nɛ a la, nɛ a ɔ ngɔ kala Olivɛ i. 38Nɛ do titole belee, nɛ owinɔ wa tɛ we zele bia we 'da a kɔ tɔa Tɛmpɛlo nga.

Currently Selected:

LUKA 21: NGB

Highlight

Copy