LUKA 19

Yezu lia kɔ tɔa 'da Zakayo

1Yezu hɔa kɔ le Yeriko, nɛ a ma ngɔ ba 'da le. 2Nɛ mbe wele zi kpo di ni, li a a Zakayo, a a nwa ngɔ owi futa takonɔ kɔ le ni, nɛ a zi a wi kpamɔ. 3Nɛ a fa zi na, ɛ zɔ Yezu, nɛ nde ma wè gɔ, we kɛ a dɛ dɔ wena, nɛ owinɔ wa dɛlɛ zi wena. 4Nɛ a yu dɛ dati, nɛ a kũ dɛ ngɔ te sikɔmɔrɛ, #19.4 Sikɔmɔrɛ, ma ɔ nɛ te mangge ni. takɔ a zɔ Yezu, kɛ a nɛ la do di ni ni. 5Kɔ Yezu hɔa dɛ fala Zakayo kũ do te ni, nɛ a ba li a ngɔ, nɛ a tɔ̃ hã a na: “Zakayo, mɔ zĩ́lĩ́ dɔ̃! We kɛ sɔɛ gɛ, mi ɔ sɛ kɔ tɔa 'da mɔ.”

6Nɛ Zakayo zĩlĩ do ti, nɛ wa la do Yezu dɛ kɔ tɔa 'da a i do yangga. 7Kɔ winɔ wa nɛa we zɔ ni, nɛ wa ma ngɔ lungu we, nɛ wa na: “Wi gɛ nɛ ɔ 'da wi dɛ 'dã mɛ gɛ nde?”

8Wa hɔa i mɔ ni, nɛ Zakayo kulu ngɔ, nɛ a tɔ̃ hã Nwa Yezu na: “Aa Nwa, mi kɔ̃a we gɔnɔ sanga kpamɛnɔ 'da mi dɛ gbogbo, nɛ mi hã mbee nɛ hã Owi sãnɔ. Kɔ fala kɛ mi ɔlɔ zi wele, kɔ mi kala mbili kɔ̃ a nde, nɛ mi gese sɛ olo nɛ hã a fala nalɛ.”

9Nɛ Yezu tɔ̃ hã a na: “Sɔɛ gɛ, Gale kpasa mɔ, kɛ mɔ a be zã Abrahama ni. 10We kɛ mi Be 'da Wele, mi tɛa we fa owinɔ kɛ wa yɔa zi wala ni, takɔ mi kpasa wa.”

Gba we ngɔ mbili

(Mat. 25.14-30)

11Yezu nɛa we kɔlɔ do Yeruzalɛmɛ, nɛ owinɔ kɛ wa tɛa we zele bia we 'da a ni wa lingga na, Gale nɛ ndo dɛa to nwa 'da a ngangga ni. Ma kɛ Yesu tɔ̃a gba we hã wa na: 12“Mbe wele zi kpo, a a wi nu fɛlɛ ogã wi, nɛ a nɛa kɔ gele le nyɛlɛ wena, takɔ winɔ i mɔ ni wa e a do nwa, sɛ nɛ a kpolo tɛ̃ a de. 13Dati kɛ na a la ni, nɛ a sa mɔ hã Owi dɛa tonɔ 'da a zu wa 'bu, nɛ a kala mbili, nɛ a kɛ̃ dɛ kɔ̃ wa kpo kpo we kɔ̃. #19.13 Mbili kɛ wele kpo kpo kpa zi ni, mɛ a gã mbili. Ma wia we futa wi dɛa to zɛkɛ talɛ. Nɛ a tɔ̃ hã wa na: ‘Nɛ dɛ́ buliye do mbilinɔ gɛ gbaa na mi si, sɛ nɛ de.’ Nɛ a la. 14Nɛ nde owinɔ ngɔ nùi 'da a ni, wa kɔ̃̀ zi gɛnɛ a gɔ. Nɛ wa tumba Owele 'do a, takɔ wa tɔ̃ i mɔ na, lo kɔ̃̀ na, a hɔ nwa 'da lo gɔ.

15“Nɛ gɛnɛ kɔ na mɛ ni, nɛ wa ia a do nwa. 'Do nɛ, nɛ a kpula tɛ̃ a dɛ ngɔ nùi 'da a nga. Nɛ a sa mɔ hã Owi dɛa tonɔ 'da a, kɛ a hã zi mbili hã wa ni, nɛ a aka wa we mbili kɛ wa kpa ma olo a nga ni. 16Nɛ wele kɛ dati ni tɛa, nɛ a tɔ̃ na: ‘Nwa, mi kpa ngɔ kɛ mɔ hã zi hã mi ni fala 'bu.’ 17Nɛ nwa ni tɔ̃ hã a na: ‘Ma de wena. Mɔ a dia wi dɛa to. Ɔ nɛ kɛ mɔ dɛa be mɛnɔ do wala olo nɛ ni, mi ia mɔ gã wi ngɔ le 'bu.’ 18Nɛ bɔa wi dɛa toe tɛa, nɛ a tɔ̃ na: ‘Nwa, mi kpa ngɔ kɛ mɔ hã zi hã mi ni fala mɔlɔ.’ 19Nɛ a tɔ̃ hã wele lá ni na: ‘We mɔ, mi ia mɔ gã wi ngɔ le mɔlɔ.’

20“Nɛ mbé nɛ tɛa, nɛ a tɔ̃ na: ‘Nwa, mbili 'da mɔ kɛ! Mi usu zi ma kɔ tuli 'da mi. 21Mba gɔ, mi dɛa zi kili mɔ, we kɛ tɛ mɔ kolo wena. Mɔ ba mɔ kɛ wele nɛ a mɔ́ mɔ gɔ, nɛ mɔ 'bɛ̃lɛ̃ kpalɛ kɛ mɔ a mɔ mì ma gɔ ni.’ 22Nɛ nwa ni tɔ̃ hã a na: ‘Mɔ a 'dã wi dɛa to. Mi nɛ yolo dɛ ngɔ olo nu mɔ, we 'bili do we 'da mɔ. Mɔ ĩ zi na, tɛ mi kolo wena, nɛ mi ba mɔ kɛ wele nɛ a mɔ́ mi gɔ, nɛ mi 'bɛ̃lɛ̃ kpalɛ kɛ mi a mi mì ma gɔ ni. 23Kɔ ma wia zi na, mɔ a mbili 'da mi kɔ bankɛ, nɛ mi si sɔ na mɛ gɛ, nɛ mi kala do kpa ngɔ nɛ!’ 24Nɛ 'do nɛ, nɛ a tɔ̃ hã winɔ di ni ni na: ‘Nɛ kálá mbilinɔ kɔ̃ a, kɔ nɛ ha ma hã wele kɛ a kpa ngɔ kɛ 'da a fala 'bui ni.’ [25Nɛ wa tɔ̃ hã a na: ‘Nwa, kɛ a 'bɔ do mbili kɔ̃ a 'bu ni nde?’] 26Nɛ a gese hã wa na: ‘Mi tɔ̃ hã nɛ na, wi kɛ a do mɔ kɔ̃ a boe ni, nɛ a kpa sɛ 'bɔ mbé nɛ dɛ ngɔ nɛ. Nɛ nde wele kɛ a do mɔ kɔ̃ a bina ni, nɛ wa kala sɛ 'bɔ bi 'bulu kɛ kɔ̃ a ni do'do. 27Kɔ we Owi sɛnɛ mi, kɛ wa kɔ̃̀ zi na mi hɔ nwa 'da lo gɔ ni, nɛ kálá wa tɛ do wa, kɔ nɛ gbɛ́ wa dɛ dati mi gɛ!’ ”

Yezu lia kɔ le Yeruzalɛmɛ

(Mat. 21.1-11; Mar. 11.1-11; Yoa. 12.12-19)

28Yezu wila wenɔ ni do'do, nɛ a kpia dati owinɔ we la dɛ Yeruzalɛmɛ i. 29A nɛa, nɛ a kɔlɔ do le Bɛtfaze do Betani, kɛ ma ti nyanga kala Olivɛ ni. 30Nɛ a sa mɔ hã Owi yambala mɛnɔ 'da a bɔa, nɛ a tɔ̃ hã wa na: “Nɛ nɛ́ kɔ le dati gɛ. Kɔ nɛ hɔ i mɔ, nɛ nɛ kpa sɛ be punda kpo. Wele tɛ kṹ kuti ngɔ a gɔ, nɛ wa kpua a kpua. Nɛ nɛ yálá a tɛ do a hã mi. 31Kɔ fala kɛ wele aka nɛ na: ‘Gulu kɛ nɛ yala a we ge nde?’ Nɛ nɛ tɔ̃ hã wi ni na, wi tumba we a wi a Nwa.”

32Nɛ Owi yambala mɛnɔ wa nɛa, nɛ wa hɔ i mɔ, nɛ wa kpa be punda ɔ nɛ kɛ Yezu tɔ̃a hã wa ni. 33Kɔ wa ma ngɔ yala fɛlɛ tɛ be punda ni, nɛ Owele a wa aka wa na: “Nɛ yala a we ge nde?”

34Nɛ wa gese na: “Nwa Yezu a tumba we a.”

35Nɛ wa nɛa do be punda ni hã Yezu. Nɛ wa kala gba tulunɔ 'da wa, nɛ wa gu li 'do a, nɛ wa e Yezu dɛ ngɔ a. 36Kɔ a nɛa we la nɛ, nɛ owinɔ wa ma ngɔ a gba tulunɔ 'da wa dɛ ngɔ wala na, a la do ngɔ nɛ. 37Nɛ wa nɛa we kɔlɔ do Yeruzalɛmɛ, tɛ zĩlĩ kala Olivɛ, nɛ gba gili owinɔ 'da a wa dɛ yangga wena. Nɛ wa ma ngɔ dɔnggɔ Gale do nga gɛlɛ, we duzu ɔngbamɛnɔ vɛ̃ kɛ wa zɔa ni. 38Nɛ wa he mɔ na: “E kɔ Nwa Gale wele nu ɛ tɛ Nwa kɛ a tɛ do zu li a ni! E kɔ dungu fio ɔ tɛ li nza i, nɛ Gale kpa dɔ̃lɔ̃ li i mɔ.”

39Mɛ ni nɛ nde ombe Fariziɛnɔ wa zi sanga owinɔ ni boe. Nɛ wa tɔ̃ hã Yezu na: “Wi be mɔ, mɔ tɔ̃́ hã owinɔ 'da mɔ, kɔ wa kpe nu wa.”

40Nɛ Yezu gese hã wa na: “Mi tɔ̃ hã nɛ na, fala kɛ wa kpe nu wa, nɛ otanɔ gɛ wa he sɛ mɔ we dɔnggɔ mi.”

Yezu hia 'bako tɛ owi Yeruzalɛmɛ

41Yezu kɔla do Yeruzalɛmɛ, kɔ a nɛa we zɔ le, nɛ a ma ngɔ he kɔ̃a tɛ nɛ na: 42“Aa nɛ, owi Yeruzalɛmɛ, ɔ do kɛ nɛ ĩ sɔ ti mɛ ma nɛ hã dungu fio hã nɛ ni, nɛ ma de sɔ wena! Nɛ nde ma usu tɛ̃ ɛ do nɛ do'do, nɛ nɛ wè tɛ zɔ ma gɔ! 43Nɛ ĩ́ na, ngba soenɔ kɛ ma tɛ sɛ 'do gɛ, nɛ owi sɛnɛ nɛ wa linggi sɛ le 'da nɛ, nɛ wa zĩ gba ngbo 'do nɛ, nɛ wa bi sɛ nɛ, 44nɛ wa kumu nɛ. Wa 'danga sɛ le 'da nɛ vɛ̃, tɔa kpo 'báná sɛ ngɔ gɔ. We duzu kɛ nɛ ĩ̀ zi ti ngba soe kɛ Gale tɛa we gala do nɛ ni gɔ!”

Yezu nɛa kɔ Tɛmpɛlo

(Mat. 21.12-17; Mar. 11.15-19; Yoa. 2.13-22)

45Nɛ Yezu lia kɔ tɔa Tɛmpɛloe, nɛ a kpa owinɔ wa be golenɔ 'da wa dɛ di ni ni, nɛ a ndaka wa dɛ nza. 46Nɛ a tɔ̃ hã wa na: “Wa kɔma olo nu Gale kɔ 'Buki na: ‘Wa sa sɛ li tɔa 'da mi na, mɛ a tɔa dɔnggɔ do mi.’ Nɛ nde nɛ, nɛ kifi ma do fala usu tɛ wi mɔ́ Owi zũ!”

47Nɛ tũ kpo kpo, Yezu zi tɛ be we kɔ tɔa Tɛmpɛloe i. Nɛ onwa nganganɔ, do owi be mbulanɔ, do ogã winɔ, wa ma ngɔ fa wala we gbɛ a. 48Nɛ nde wa ĩ̀ ti wala kɛ wa wia we ba do a ni gɔ, we kɛ owinɔ wa zele zi kpo a kɛ a tɔ̃ ni iko.

Currently Selected:

LUKA 19: NGB

Highlight

Copy