LUKA 14

Yezu kpasa wi zɛlɛ do tũ ɔmɔ tɛ wi

1Mbe tũ ɔmɔ tɛ wi kpo, nɛ Yezu nɛa we nyɔngɔ mɔ 'da mbe nwa ngɔ Fariziɛnɔ. Nɛ ombe winɔ di ni ni, wa ma ngɔ soko a. 2Nɛ mbe wi zɛlɛ gba lì tɔkɔ tɛa, nɛ a yolo dɛ dati Yezu ni. 3Nɛ Yezu aka owi be mbulanɔ do Ofariziɛnɔ na: “Mbula 'da lɛ hã wala na, lɛ kpasa wele do tũ ɔmɔ tɛ wi, tabi lɛ tɛ kpàsà a gɔ nde?”

4Nɛ nde wa kɔ̃̀ we gese nu nɛ gɔ. Nɛ Yezu ba wi zɛlɛ ni, nɛ a kpasa a, nɛ a gese a. 5Nɛ a tɔ̃ hã wa na: “Sanga nɛ gɛ, wi kɛ mbe be 'da a, tabi ngɔmbɔ mɔ́ a te kɔ kɔ̃ lì do tũ ɔmɔ tɛ wi, nɛ nde a wɛ́lɛ́ sɛ tɛ̃ a we mana a dɛ nza do ti gɔ ni a wio nde?” 6Nɛ wa wè zi tɛ gese nu we ni hã a gɔ.

Dɛa mɔ tɛ wele 'da fala mɔ dɔ

7Yezu zɔa owinɔ kɛ wa sa mɔ hã wa tɛ mɔ dɔ, nɛ nde wa tɛ saka odia fala dungunɔ, nɛ a tɔ̃ hã wa do gba we na: 8“Fala kɛ wele sa mɔ hã mɔ tɛ mɔ dɔ ba ngba wi, kɔ mɔ nɛ, nɛ mɔ tɛ fà we dungu tɛ fala dɔ̃lɔ̃ li gɔ. We kɛ mbe gɔ, nɛ nde wa sa tɛ mɛ 'bɔ mɔ hã mbé gele wele kɛ a nɛa ngɔ mɔ ni. 9Nɛ wele mɔ dɔɛ ni, a tɛ sɛ, nɛ a tɔ̃ hã mɔ na: ‘Mɔ kúlú ngɔ, kɔ mɔ la fala ti mɔ gɛ hã wi gɛ.’ Nɛ sape ma ba sɛ li mɔ wena, nɛ mɔ nɛ sɛ we dungu nù gbaa do ngɔ go'do winɔ i. 10Nɛ nde fala kɛ wele sa mɔ hã mɔ, nɛ mɔ nɛ́, nɛ mɔ dùngù gbaa do ngɔ go'do winɔ i. Nɛ wi kɛ a sa mɔ hã mɔ ni, a tɛ sɛ, nɛ a tɔ̃ hã mɔ na: ‘Aa mbaa, mɔ tɛ́, hã mɔ dungu nù tɛ dia fala dati nga.’ Nɛ mɔ sɛ do dĩ li ongba mɔ kɛ wa tɛa we nyɔngɔ mɛ ni wena. 11Nɛ ĩ́ na, wi kɛ a ba tɛ̃ a dɛ ngɔ, nɛ Gale a fi sɛ a nù. Nɛ wi kɛ a ba tɛ̃ ɛ dɛ nù, nɛ Gale a ba sɛ a dɛ ngɔ.”

12'Do nɛ, nɛ Yezu tɔ̃ hã wi sa mɔ hã a we nyɔngɔ mɛ ni na: “Fala kɛ mɔ dɛ mɔ dɔ, nɛ mɔ tɛ sà mɔ hã ongba mɔ, do onya mɔ, do nu fɛlɛ mɔ, do Owi kpamɛnɔ kɛ zã mɔ ni gɔ. We kɛ do 'do, nɛ wa sa sɛ tɛ mɛ 'bɔ mɔ hã mɔ, nɛ wa gese sɛ olo de dɛa mɛ kɛ mɔ dɛa hã wa ni. 13Nɛ nde fala kɛ mɔ kɔ̃ we dɛ mɔ dɔ nde, nɛ mɔ sá mɔ hã owi sã, do owi kunda, do owi nɛa ku, do owi ua li. 14Nɛ mɔ sɛ do yangga, we kɛ wa wé sɛ tɛ gese olo nɛ hã mɔ gɔ. Nɛ nde wi nɛ gese sɛ olo nɛ hã mɔ, wi a Gale, do 'da fala a tunu sɛ owi bɔlɔ zunɔ kɔ fio ni.”

Gba we ngɔ gbalimɔ

(Mat. 22.1-10)

15Nɛ mbe wele kpo sanga winɔ nu nyɔngɔmɛ ni zila we Yezu tɔ̃a ni, nɛ a tɔ̃ hã Yezu na: “Yangga wena do wi kɛ a nyɔngɔ sɛ mɔ dɔ tɛ kɔ le nwa 'da Gale ni.”

16Nɛ Yezu gese hã a na: “Mbe wele kpo, a 'dafa gbalimɔ, nɛ a sa mɔ hã Owele tɛ nɛ wena. 17Kɔ ma hɔa 'da fala nyɔngɔmɛ, nɛ a tumba wi dɛa toe 'da a na: ‘Mɔ nɛ́, kɔ mɔ sá mɔ hã winɔ na, wa tɛ́, we kɛ lɛ 'dafa mɛnɔ vɛ̃ ia.’ 18Nɛ nde wele kpo tɛ̀ gɔ. Wele do wele gɔa mbɔkɔ wi kɔ̃ wi dɛa toe ni. Wele kɛ dati tɔ̃a na: ‘Mɔ mbɔ́kɔ́ mi, we kɛ mi hɛa fɔ, kɔ mi nɛ nɛ we zɔ ma.’ 19Nɛ mbe nɛ na: ‘Mɔ mbɔ́kɔ́ mi, we kɛ mi hɛa ongɔmbɔ 'bu, kɔ mi nɛ nɛ we yamba wa, we zɔ na, wa tabi a nga nde.’ 20Nɛ mbe nɛ tɔ̃ 'bɔ na: ‘Mɔ mbɔ́kɔ́ mi, we kɛ mi ba wuko da dɔ̃ gɛ iko, kɔ mi wè tɛ nɛ nɛ gɔ.’

21“Nɛ wi dɛa toe ni kpula tɛ̃ ɛ 'da wele a i, nɛ a tɔ̃ gulu wenɔ ni hã a vɛ̃. Nɛ zã wele a nɔ̃lɔ̃ wena, nɛ a tɔ̃ hã a na: ‘Mɔ nɛ́ dɔ̃ tɛ ngɔ zando i, do li gba walanɔ, kɔ mɔ sa mɔ hã owi sãnɔ, do owi kundanɔ, do Owi ua linɔ, do owi nɛa kunɔ.’ 22Wi toe ni nɛa, nɛ a kpolo tɛ̃ a, nɛ a tɔ̃ na: ‘Nwa 'da mi, mi dɛa toe mɔ tumba sɔ mi we nɛ ni ia. Nɛ nde wila falanɔ 'bana.’ 23Nɛ wele tɔa ni tɔ̃ hã a na: ‘Mɔ lá 'bɔ tɛ li wala fɔnɔ do zamɛnɔ i, kɔ mɔ hɛ̃lɛ̃ winɔ na, wa tɛ, kɔ wa le, hã tɔa dunu. 24Mi tɔ̃ hã nɛ do gbãlã we na, sanga winɔ sɔ mi sa mɔ hã wa dati ni, wele kpo nyɔ́ngɔ́ sɛ mɛ 'da mi gɔ.’ ”

Tɛlɛ tɛ kɛ wele wia we ɔ wi 'da Yezu ni

(Mat. 10.37-38)

25Nɛ gba gili Owele, wa tɛ yɛnggɛ do Yezu. Nɛ Yezu siki tɛ̃ a, nɛ a tɔ̃ hã wa na: 26“Fala kɛ wele tɛ 'da mi, takɔ a hɔ wi 'da mi, kɔ a bɛ gɛnɛ baa a, do naa a, do kɛnɛ a, do benɔ 'da a, do onya a, do kili tɛ̃ a wele nɛ gɔ, nɛ nde a wè wi 'da mi gɔ. 27Wi kɛ a bà tole finda te 'da a, kɔ a tɛ 'do mi gɔ, nɛ nde a wè wi 'da mi gɔ. 28Fala kɛ mbe wele sanga nɛ gɛ kɔ̃ we dɛ ngala tɔa, nɛ nde a lénggé sɛ ngɔ nɛ dati gɔ nde? A dungu sɛ nù, nɛ a tɔlɔ mbili kɛ a nɛ dɛ do tɔa ni, we zɔ na, ma we sɛ to tɔa nde. 29Kɔ fala kɛ a dɛ ní gɔ, kɔ a a nyanga tɔa iko, kɔ dɛa nɛ gana a, nɛ owinɔ wa zɔ ma ni, wa mɔmɔ sɛ a na: 30‘Nɛ zɔ́ wi gɛ! A ndua nyanga dɛ tɔa, nɛ ma gana a do'do!’ 31Ma 'bɔ na mɛ ni, 'da fala kɛ mbe nwa kpo kɔ̃ we bi bolo do ngba a, nɛ ma wia na, a dungu nù, nɛ a yambala we zɔ na, tabi a wia we kala Owele koto 'bu, we bi do ngba a nwa, kɛ a gɔnɔ dati a do owinɔ 'da a koto 'bu wa bɔa ni, nɛ ma we sɛ nde. 32Kɔ fala kɛ a zɔ na, ma wé sɛ gɔ, kɔ a 'bana ndũu, nɛ a tombo sɛ owi to hã ngba a nwa ni na, wa 'dafa sanga tɛ ngba wa.”

33Nɛ Yezu tɔ̃ 'bɔ na: “Ma 'bɔ na mɛ ni, fala kɛ wele sanga nɛ gɛ kɔ̃ we hɔ wi 'da mi, nɛ ma wia na, a bɛ̃ gɛnɛ kpamɛnɔ 'da a vɛ̃.”

Tɔ̃ kɛ wa wè 'bɔ tɛ dɛ ma do mɔ gɔ

(Mat. 5.13; Mar. 9.50)

34“Tɔ̃ mɛ a de mɔ, kɔ 'da fala kɛ ma zãlã, nɛ nde wa wè tɛ dɛ 'bɔ na, ma dãlã dɛ olo nɛ gɔ. 35Nɛ wa wè 'bɔ we 'dafa do nù, tabi do zubu gɔ. Ma wia na, wa a nù iko. Wi kɛ zala a boe, nɛ a zélé!”

Currently Selected:

LUKA 14: NGB

Highlight

Copy