LUKA 13

Ma wia na nɛ kifi sila nɛ

1Do 'da fala ni, nɛ ombe wele wa tɛa 'da Yezu, nɛ wa tɔ̃ sako kɛ Pilatɛ gbɛa zi do mbe obe Galile, do 'da fala wa zi tɛ dɔ sa'de ngɔ gbagala we dɔnggɔ do Gale ni. 2Nɛ Yezu gese hã wa na: “Nɛ lengge na, obe Galilenɔ kɛ Pilatɛ gbɛa zi wa ni, wa dɛa 'dã mɔ nɛa ngɔ tala obe Galile vɛ̃ nde? 3Go! Nɛ nde mi tɔ̃ hã nɛ na, fala kɛ nɛ kìfì sila nɛ gɔ, nɛ nɛ vɛ̃ nɛ fe sɛ ɔ nɛ owinɔ ni. 4Nɛ nɛ lengge na, owinɔ 'bu ngɔ wa ngbɛ'dɛ'dɛ, kɛ gba du tɔa tɛ Siloe gbini zi dɛ ngɔ wa, nɛ ma gbɛa wa ni, wa dɛa 'dã mɔ nɛa ngɔ tala owi Yeruzalɛmɛ vɛ̃ nde? 5Gɔ! Nɛ nde mi tɔ̃ hã nɛ na, fala kɛ nɛ kìfì sila nɛ gɔ, nɛ nɛ vɛ̃ nɛ fe sɛ ɔ nɛ owinɔ ni.”

Gba we ngɔ te kɛ ma wálá gɔ

6'Do nɛ, nɛ Yezu tɔ̃a gba we gɛ hã wa na: “Mbe wele kpo mi te figɛ kɔ fɔɛ 'da a #13.6 Te figɛ wa tɔ̃ nɛ ni, wa sa a li Oyudanɔ. Nɛ 'da fala kpo, nɛ a tɛa we fa wala nɛ, nɛ a kpà gɔ. 7Nɛ a tɔ̃ hã wi kɛ a dɛ toe kɔ fɔ figɛ ni na: ‘Mɔ zɔ́ te gɛ, ma la di ni sabɛlɛ talɛ, mi tɛ we fa wala nɛ, nɛ nde mi kpá gɔ. Kɔ mɔ gɔ́mɔ́ ma! We kɛ ma kpe wila fala kɔ fɔɛ 'da mi iko.’ 8Nɛ wi toe ni gese na: ‘Nwa 'daa, mɔ lá 'bɔ ma sabɛlɛ gɛ, mi nɛ zã gulu nɛ, kɔ mi so zubu dɛ tɛ nɛ. 9Kɔ mbe gɔ, nɛ ma wala sɛ sabɛlɛ 'do gɛ. Kɔ ma wàlà wá gɔ, sɛ nɛ mɔ gɔmɔ ma de.’ ”

Yezu kpasa wuko wi kunda do tũ ɔmɔ tɛ wi

10'Da fala kpo, do tũ ɔmɔ tɛ wi, nɛ Yezu zi tɛ be we kɔ mbe tɔa mbula kpo. 11Nɛ nde mbe wuko wi zɛlɛ zi dɛ di ni. 'Dã hi wi lia kɔ a, nɛ a bili 'do a, nɛ a wè tɛ bɔlɔ tɛ̃ a gɔ. Nɛ a ɔa do zɛlɛ ni sabɛlɛ 'bu ngɔ nɛ ngbɛ'dɛ'dɛ. 12Kɔ Yezu nɛa we zɔ a, nɛ a sa mɔ hã a, nɛ a na: “Aa wuko, mɔ kpasa ia!” 13Nɛ Yezu a kɔ ɛ ngɔ wuke ni, nɛ a bɔlɔ tɛ̃ a do ti, nɛ a ma ngɔ dɔnggɔ Gale.

14Kɔ nwa ngɔ tɔa mbula nɛa we zɔ na, Yezu kpasa wele do tũ ɔmɔ tɛ wi ni, nɛ zã a nɔ̃lɔ̃ wena. Nɛ a tɔ̃ hã gba gili winɔ na: “Kɔ pɔsɔ kpo, tũ dɛa to ma gazɛlɛ. Kɔ ma wia na, nɛ tɛ do kɔ̃ tũnɔ ni, hã wa kpasa nɛ, nɛ nɛ tɛ tɛ̀ do tũ ɔmɔ tɛ wi gɔ!”

15Nɛ Nwa Yezu gese hã a na: “Nɛ, wi ɔlɔ winɔ gɛ! Sanga nɛ gɛ, wi kɛ a yálá mbe ngɔmbɛ tabi punda 'da a, nɛ a nɛ we hã lì hã a do ngba soe ɛngga gɔ ni a wio nde? 16Kɔ wuke gɛ, kɛ a a be zã Abrahama, nɛ Satana ɛnza a, nɛ a ɔa do zɛlɛ gbaa sabɛlɛ 'bu ngɔ nɛ ngbɛ'dɛ'dɛ gɛ, nɛ mi wè tɛ kpasa a do tũ ɔmɔ tɛ wi gɔ nde?” 17Nɛ gisa we 'da Yezu hã sape hã owi sɛnɛ a wena. Nɛ gba gili winɔ wa dɛ yangga wena we ɔngbamɛnɔ kɛ a dɛ ni.

Gba we ngɔ gbãlã te mutardɛ

(Mat. 13.31-32; Mar. 4.30-32)

18Nɛ Yezu tɔ̃a hã wa na: “Mi kɔ̃a we tɔ̃ gulu dɛa to nwa 'da Gale hã nɛ. Kɔ mi nɛ we ma do ge nde? 19Dɛa to nwa 'da Gale ma wia kɔ̃ do mbe be gbãlã te kpo, li nɛ a mutardɛ. #13.19 Marko tɔ̃a na, gbãlã mutardɛ ma bi sĩ nɛa ngɔ tala ombe gbãlã kpalɛnɔ vɛ̃. Nɛ mbe wele ba ma, nɛ a mi kɔ fɔɛ 'da a, nɛ ma hɔ, nɛ ma ngala, nɛ ma dɛ gã te. Nɛ onɔɛ wa tɛa, nɛ wa ma ngɔ dɛ tɔanɔ 'da wa ngɔ ogbakɔ̃ nɛ.”

Gba we ngɔ ina hana mapa

(Mat. 13.33)

20Nɛ Yezu tɔ̃ 'bɔ hã wa na: “Dɛa to nwa 'da Gale, ma wia kɔ̃ do ge nde? 21Ma wia kɔ̃ do ina hana mapa kɛ wuko so ma, nɛ a zanga do farini 'bu kilo bɔa ngɔ nɛ mɔlɔ, nɛ ma hana ma vɛ̃ ni.”

Li wala le 'da Gale

(Mat. 7.13-14,21-23)

22Yezu ma ngɔ la dɛ Yeruzalɛmɛ i, nɛ do li wala gɛ, a tɛ be we kɔ ogã lenɔ do obe lenɔ. 23Nɛ mbe wele kpo aka a na: “Wi be mɔ, mɛ a gbãlã we na, winɔ kɛ Gale a kpasa sɛ wa ni wa dɔ̀ gɔ nde?”

Nɛ Yezu gese hã wa na: 24“Nɛ dɛ́ nganda na, nɛ le do nu tɔa kɛ ma bi sĩ iko ni. We kɛ mi tɔ̃ hã nɛ do gbãlã we na, gba gili wele wa fa sɛ we le nɛ, nde ma wé sɛ gɔ. 25Nɛ wele tɔa a kulu sɛ ngɔ, nɛ a kpe nu tɔa, nɛ a kã ma. Do 'da fala ni, nɛ nde nɛ sɛ a 'do nu tɔa nza i, nɛ nɛ ma sɛ ngɔ ngbolo 'do nu tɔa, tɛ tɔ̃ na: ‘Nwa, mɔ hṹi nu tɔa hã lɛ!’ Nɛ a gese sɛ hã nɛ na: ‘Mi ĩ̀ ti nɛ gɔ, nɛ a wio nde?’ 26Nɛ nɛ gese sɛ na: ‘Lɛ nyɔngɔ zi mɔ, nɛ lɛ nɔ dɔ̃ do mɔ, nɛ mɔ bia zi we hã lɛ li fandanɔ kɔ le 'da lɛ.’ 27Nɛ a gese sɛ hã nɛ na: ‘Nɛ fó tɛ nɛ li mi! Mi ĩ̀ ti nɛ gɔ, nɛ a Owi dɛ 'dã mɔ!’ 28Kɔ fala kɛ nɛ zɔ sɛ Abrahama, do Izaka, do Yakɔbɔ, do owi gba olo nu Gale vɛ̃ tɛ kɔ le nwa 'da Gale i ni, nɛ Gale a da sɛ nɛ nza. Nɛ nɛ ma sɛ ngɔ he kɔ̃a do nyɔngɔ li gogo nɛ. 29Nɛ owele wa yolo sɛ nyanga nza gɛ vɛ̃, nɛ wa tɛ we nyɔngɔ mɔ kɔ le nwa 'da Gale. 30Nɛ nde mbe sanga owinɔ kɛ wa a owi ngɔ go'do ni, wa sɛ a owi dati, nɛ ombe winɔ kɛ wa a Owi dati ni, wa sɛ a owi ngɔ go'do.”

Yezu ala nu a we le Yeruzalɛmɛ

(Mat. 23.37-39)

31Do 'da fala ni, nɛ ombe Fariziɛnɔ wa tɛa, nɛ wa tɔ̃ hã Yezu na: “Mɔ fó tɛ mɔ kɔ le gɛ do'do, kɔ mɔ lá dɛ gele fala, we kɛ Herodɛ fa we gbɛ mɔ.”

32Nɛ Yezu gese hã wa na: “Nɛ nɛ́, kɔ nɛ tɔ̃́ hã Herodɛ kɛ a do 'dã hã ɔ nɛ gbɛgbɛ ni na, sɔɛ gɛ do bindɛ, mi 'bana tɛ fo o'dã hi wi kɔ winɔ do kpasa owi zɛlɛnɔ. Kɔ mbasa, nɛ nde toe 'da mi ia ia. 33Kɔ ma wia na, mi gɔnɔ 'bɔ wala 'da mi sɔɛ gɛ do bindɛ do mbasa. We kɛ ma wè na, wi gba olo nu Gale kpo fe gele fala gɔ. Ma wia na, a fe do kɔ le Yeruzalɛmɛ i.

34“Aa nɛ, owi Yeruzalɛmɛ, nɛ gbɛ owi gba olo nu Gale fai, nɛ nɛ lo owinɔ kɛ Gale tombo wa hã nɛ ni do ta. Mi kɔ̃a zi wena na, mi ngɛmɛ li nɛ dɛ ti mi, ɔ nɛ kɛ naa kɔla ngɛmɛ do li obenɔ 'da a dɛ ti sala 'baka a ni. Nɛ nde nɛ kɔ̃̀ gɔ! 35Kɔ nɛ zɔ́! Gale a da sɛ li a ngɔ le 'da nɛ do'do. Mi tɔ̃ hã nɛ na, nɛ zɔ́ sɛ 'bɔ mbé tɛ mi gɔ, gbaa we hɔ ngba soe kɛ nɛ he sɛ mɔ na: ‘E kɔ Nwa Gale wele nu e tɛ wele kɛ a te tɛ do zu li a’ ni.”

Currently Selected:

LUKA 13: NGB

Highlight

Copy