Marke 7

Bibidilu bia bankambua

(Mat 15.1-9)

1Baparushe ne balongeshi bakuabu ba mikenji batumine ku Yerushalayime, kudikungujabu muaba uvua Yezu. 2Kumonabu bamue ba ku balongi bende badia biakudia kabayi bowa bianza, bu muvuabu bafunde mu mikenji ya Mvidi Mukulu.

3Bualu Baparushe ne bena Yuda bonsu bakuabu bavua balama dilongesha divuabu bapete kudi bankambua babu. Kabavua badia kabayi bowa mayi ku bianza biabu ne mankenda nansha.#7.3 Fuanyikija ne Luk 11.38. 4Padibu batumine mu tshisalu, kabena mua kudianza kudia kabayi bowa mayi nansha. Badi balonda bibidilu bikuabu bia bungi bidibu balama: bu mudi kusukula makopu, mabungu, ngesu ya tshiamu tshikunze ne malalu.#7.4 padibu bafumina…kudianza: mu mikanda mikuabu mbafunde ne: kabena mua kudia kantu nansha kamue kadi kafumina mu tshisalu kabayi banji kukasukula. — ne malalu: kabena bafunde miaku eyi mu imue mikanda ya mu buena ngreke to.

5Baparushe ne balongeshi ba mikenji kukonkabu Yezu ne:

— Balongi bebe kabena balonda bibidilu bia bankambua betu bua tshinyi? Badi badia kabayi bowa bianza bimpe bua tshinyi?

6Yezu kubandamuna ne:

— Nuenu bena mpala ibidi, Yeshaya uvua mudianze kuambilamu bualu buenu, pavuaye mufunde ne:

“Mvidi Mukulu udi wamba ne:

Bantu aba badi bantumbisha amu ku mishiku,

kadi muoyi wabu kawena kundi.

7Bantu aba badi bantendelela tshianana,

bualu badi balongesha mikenji miela kudi bantu,

mienza bu malongesha a Mvidi Mukulu!#7.7 Yesh 29.13, ke muvuabu bandamune mu buena ngreke ku kale.”

8Yezu kubambila ne: Nudi nulekela mikenji ya Mvidi Mukulu, nulonda malongesha a bantu.

9Pashishe Yezu kubambila kabidi ne:

— Bulelela, nudi nubenga mikenji ya Mvidi Mukulu bua kulonda dilongesha dienu nuenu! 10Bualu Moshe uvua muambe ne: “Unemeke tatuebe ne mamuebe,” kabidi ne: “Muntu udi utshipa tatuende nansha mamuende, bamushipe.#7.10 Tangila Tshim 20.12 ne Diel 5.16; Tshim 21.17 ne Lev 20.9.” 11Kadi nuenu, nudi nulongesha bantu ne: Padi muntu wambila tatuende nansha mamuende ne: “Bintu bimvua mua kukuambuluisha nabi, bidi Korbane,#7.11 Korbane: muaku wa mu buena arame.” (mmomumue ne: “Ndi mubilamine bua kulambula Mvidi Mukulu,”) 12kena wambuluisha tatuende nansha mamuende muvuaye ne bua kuenza. 13Nenku nudi nunyanga lumu lua muaku wa Mvidi Mukulu ku dilongesha dinudi nulongesha bantu bakuabu. Nudi nuenza kabidi malu makuabu a bungi a mushindu ewu.

Mudi bantu bapia mikiya

(Mat 15.10-20)

14Pashishe Yezu kubikila bantu tshiakabidi, kubambilaye ne:

— Nuenu bonsu, nunteleje, mimanye bimpe ne: 15Kakuena tshintu nansha tshimue tshia pambidi pa muntu tshidi tshibuela munda muende bua kumunyanga. Kadi tshidi tshipatuka mu muoyi wa muntu ke tshidi tshimunyanga. [ 16Telejayi bimpe, udi ne matshi a kumvua, asangane kumvua#7.16 Kanungu aka kakena mu mikanda mivule ya kale to. anyie!]

17Yezu mumane kushiyangana ne bantu, kubuelaye mu nzubu, balongi bende kumukonka bua kubajinguluilaye lusumuinu alu. 18Kubakonkaye ne:

— Nuenu kabidi, kanuena bamanye mua kujingulula anyi? Kanuena bajingulula ne: kakuena tshintu nansha tshimue tshia pambidi pa muntu tshidi tshibuela munda muende bua kumunyanga? 19Bualu tshintu etshi katshiena tshibuela mu muoyi wende. Kadi tshidi tshibuela mu difu diende, pashishe tshipatuka.

(Pavuaye wakula nanku, uvua ubambila ne: biakudia bionsu, bantu badi mua kubidia.#7.19 Fuanyikija ne MM 10.9-16.)

20Yezu kubambila kabidi ne:

— Tshidi tshipatuka munda mua muntu ke tshidi tshimunyanga. 21Bualu munda mua muntu, mu muoyi wende, mudi mupatuka meji mabi, buendenda, buivi, dishipangana, 22buenji bua malu a bundu, lukuka, tshikisu, budimu, ditupa dia mikenji, lubabu lua bintu bia bende, bipendu, ditambisha ne dipanga dia lungenyi. 23Malu mabi onsu aa adi apatuka munda mua muntu, amubipisha.

Mukaji udi kayi muena Yuda udi witaba Yezu

(Mat 15.21-28)

24Pashishe Yezu kumuka aku, kuya mu ditunga divua pabuipi ne tshimenga tshia Tire. Kubuelaye mu nzubu. Kavua musue bua muntu amanye ne: udimu. Kadi kavua mua kushala musokome. 25Mukaji mukuabu uvua ne muana wa bakaji uvuabu batatshisha kudi mukishi mubi. Mukaji awu kumvuaye lumu lua Yezu. Kuyaye kudiye diakamue, kudiela ku makasa ende. 26Mukaji awu uvua muenyi, bavua bamulelela mu Fenisiya wa mu Arame. Kusengelelaye Yezu bua kuipataye mukishi mubi munda mua muanende wa bakaji. 27Kadi, Yezu kumuambila ne:

— Lekela, bana banji kudia buukuta. Bualu kabiena bimpe kuangata biakudia bia bana kubielela mbua.

28Kadi mukaji kumuandamuna ne:

— Mfumu, mbua idi idia bisunsukila bidi bana bantatshisha muinshi mua mesa!

29Ke Yezu kumuambila ne:

— Bu muudi muandamune nanku, udi mua kupingana kuebe. Mukishi mubi mmumane kupatuka munda mua muanebe wa bakaji!

30Mukaji kupingana kuende, kusanganaye muanende wa bakaji mudiolola pa bulalu; mukishi mubi mumane kupatuka munda muende.

Yezu udi ujikija mapapa ne tshidimi bia muntu

31Pashishe Yezu kumuka mu ditunga dia Tire, kupitshila ku Sidone, kupingana ku dijiba dia Ngalileya, mu buloba bua Bimenga Dikumi. 32Bantu kumutuadila muntu muikale ne mapapa ne tshidimi. Kulombabu Yezu bua kumutenteka tshianza. 33Yezu kumuka nende munkatshi mua bantu, kuya nende pa nkayende. Kuelaye minu mu matshi a muntu, kutuilaye mate, kumulenga nawu ku ludimi. 34Pashishe Yezu kutangila mulu, witshija mioyi, wambila muntu ne:

— Efata!#7.34 Efata: muaku wa mu buena arame. (mmomumue ne “Jibuka.”)

35Diakamue, matshi a muntu kujibuka, ludimi luende kuambuluka, kubangaye kuakula bimpe. 36Yezu kukandika bantu bonsu bua kabambidi muntu bualu ebu. Kadi pavuaye ubakandika bualu, ke pavuabu benda babuambila bantu kabidi. 37Bantu bonsu bavua bakema bikole bamba ne:

— Malu onsu adiye muenze adi amu mimpe: bena mapapa badi bumvua, tumama kabidi tudi tuakula!

Currently Selected:

Marke 7: TSH96

Highlight

Copy