Marke 4
4
Lusumuinu lua mumiaminyi wa ntete
(Mat 13.1-9; Luk 8.4-8)
1Yezu kubanga kulongesha tshiakabidi ku dijiba dia Ngalileya. Bantu bavule kudisangisha, kumuela munkatshi. Yeye kubuela mu buatu, kusomba. Buatu buvua pa mayi, bantu bonsu bavua ku muelelu wa dijiba. 2Yezu uvua ubalongeha malu a bungi mu nsumuinu. Mu dilongesha diende uvua ubambila ne:
3— Telejayi! Kuvua muntu muye bua kumiamina ntete. 4Pavuaye umiamina ntete mu budimi buende, mikuabu kumata ku muelelu wa njila, nyunyi kufika, kuyidia. 5Mikuabu kumata pa buloba bua mabue pavua kapayi buloba bua bungi. Ntete kutoloka, diakamue bu muvua buloba kabuyi bondoke. 6Padi diba dibanda mulu, kuoshadi bisekiseki bivua bitoloke, kumabi bualu kabivua ne miji minene. 7Ntete mikuabu kumata mu mionji ya meba. Mionji ya meba kulepa, kukulakaja bisekiseki bimpe, mushindu udibi kabiyi mua kukuama. 8Kadi ntete mikuabu kumata mu buloba buimpe. Bisekiseki kutolokabi, kukola, kuela miepu: mikuabu ivua ne miepu ya ntete makumi asatu, mikuabu makumi asambombu ne minga lukama.
9Yezu kuamba ne:
— Udi ne matshi, asangane kumvua anyie!
Yezu udi wakula mu nsumuinu bua tshinyi?
(Mat 13.10-17; Luk 8.9-10)
10Pavua Yezu mumane kushala nkayende, bantu bavua bamuele munkatshi ne balongi bende dikumi ne babidi kumulombabu bua kubumvuija nsumuinu. 11Ke Yezu kubandamuna ne:
— Nuenu, Mvidi Mukulu mmunumanyishe malu masokome a Bukalenga buende. Kadi bantu bakuabu badi bumvua malu onsu aa bu badi babambilawu mu nsumuinu, 12bua ne:
“Bajooja bimpe kabayi bamona tshintu,
bateleja bilenga, kabayi bajingulula bualu,
kadi bafuane mua kupingana kudi Mvidi Mukulu,
Mvidi Mukulu kuvua kubafuila luse!#4.12 Yesh 6.9-10; ke muvuabu bandamune mu buena ngreke ku kale.”
Yezu udi umvuija lusumuinu lua mumiaminyi
(Mat 13.18-23; Luk 8.11-15)
13Pashishe Yezu kubakonka ne:
— Kanuena nujingulula lusumuinu elu anyi? Kadi munudi mua kujingulula nsumuinu mikuabu mbishi? 14Mumiaminyi udi umiamina muaku wa Mvidi Mukulu. 15Bantu bakuabu mbafuanangane ne ku mielelu ya njila, muaba uvua muaku mumatshile: diakamue padibu baumvua, diabolu udi ufika, umusha muaku uvuabu bamiamina munda muabu. 16Bantu bakuabu bidi mumue ne ntete ivua imata mu buloba bua mabue. Padibu bumvua muaku ewu, badi bawitaba ne disanka. 17Kadi kabena baushindamija munda muabu. Badi baulama amu tshitupa tshipi. Padi ntatu ibakuata, nansha babakengesha bua muaku wa Mvidi Mukulu, badi bajimija ditaba diabu lukasa. 18Bantu bakuabu, mmumue ne ntete idibu bamiamina mu mionji ya meba: bobu badi bumvua muaku, 19kadi disumpakana dia malu a panu, lukuka lua biuma ne majinga makuabu, bidi bibabuela munda, bikutakaja muaku, badi bapanga mua kukuama bimuma. 20Kadi bantu bakuabu mbafuanangane ne ntete idibu bamiamina mu buloba buimpe. Ke badi bumvua muaku, bawitaba, bakuama bimuma bamue makumi asatu, bakuabu makumi asambombu banga lukama.
Lusumuinu lua muinda
(Luk 8.16-18)
21Pashishe Yezu kubakonka ne:
— Muntu udi wangata muinda bua kuuteka muinshi mua kapanza nansha mua bulalu anyi? Kena uuteka pa tshitekelu tshia muinda#4.21 Fuanyikija ne Mat 5.15; Luk 11.33. anyi? 22Bualu buonsu bua mu musokoku, nebumanyike patoke. Kabidi tshionsu tshidi tshisokoka netshimanyike, batshipatule patoke. 23Nenuikale ne ntema, muena matshi a kumvua asangana kumvua anyie!
24Yezu kubambila kabidi ne:
— Nuadimuka panudi numvua bualu! Mvidi Mukulu neanupime ne tshipimu tshinudi nupima natshi bakuabu, nebanusakidile tshikuabu kabidi.#4.24 Mvidi Mukulu neapime…kabidi: mu mikanda mikuabu mbafunde ne: Mvidi Mukulu neanulumbuluishe ne tshipimu tshinudi nupima natshi bakuabu, pamue ne disu dikole. 25Bualu muntu udi ne tshintu, neapete bipite, kadi udi kayi ne tshintu nebamunyenge ne tshikese tshidiye utekemena ne: ndi natshi.
Lusumuinu lua lutete lua tshidimenena
26Yezu kubambila kabidi ne:
— Telejayi, Bukalenga bua Mvidi Mukulu mbufuanangane ne muntu udi umiamina ntete mu budimi buende. 27Pashishe udi ulala tulu butuku bujima, kabidi ujuka dituku dionsu, kadi ntete musangu awu idi imena, ikola yeye kayi umanya mudibi bienzeka. 28Buloba nkayabu ke budi bumenesha lutete: kumpala muonji wa lutete udi wanji kupatuka, pashishe muepu, ku ndekelu ntete imueneka ku muepu. 29Padi ntete ipia, muntu udi utuadija kunowa ne muele, bualu tshikondu tshia kupola ntshimane kufika.#4.29 Fuanyikija ne Yowe 4.13.
Lusumuinu lua lutete lua mutshi wa lusanga
(Mat 13.31-32,34; Luk 13.18-19)
30Yezu kuamba ne:
— Tudi mua kufuanyikija Bukalenga bua Mvidi Mukulu ne tshinyi? Tudi mua kubuamba bufuanangane ne lusumuinu kaayi? 31Budi bufuanangane ne lutete lua mutshi wa lusanga, padibu balukuna mu buloba, ludi lupite bukese ku ntete yonsu ya biakudia. 32Bobu bamane kulukuna, ludi lulepa, lukola lupita mitshi yonsu. Ludi luela matamba manene adi nyunyi ilua kuibakila masua ayi mu dileji diawu.
33Yezu uvua ulongeshila bantu mu nsumuinu ya bungi ya mushindu ewu. Uvua ubalongesha mushindu udibu mua kumvua. 34Uvua wakula nabu mu nsumuinu. Kavua uyukila nabu kayi wela nsumuinu. Kadi patataye ushala nkayende ne balongi bende, uvua ubumvuija bionsu.
Yezu udi ubatamija tshipepele pa mayi
(Mat 8.23-27; Luk 8.22-25)
35Dilolu dia dituku adi, Yezu kuambila; balongi bende ne:
— Tusabukayi dia muamua dia dijiba.
36Kumukabu pavua bantu. Balongi kubuela mu buatu buvua Yezu mumane kubuela, kuyabu nende. Matu makuabu avua pamue nende. 37Tshipepele tshikole kutuuta. Mavuala kudiela mu buatu, buatu buvua buenda buwule tente ne mayi. 38Yezu uvua musombele ku muelelu kua buatu, mulale tulu, muteka mutu pa musamu. Balongi bende kumubisha ku tulu, bamba ne:
— Mulongeshi, tudi mua kufua, wewe kuena umona bu bualu anyi?
39Yezu utabuluka, kukanyinaye bikole tshipepele, kuambilaye mayi a dijiba ne:
— Puwa! Batanta!
Tshipepele kutuya, bionsu kubalama menemene. 40Pashishe Yezu kubakonka ne:
— Nudi ne bowa nenku bua tshinyi? Kanuena ne ditaba anyi?
41Kadi batua ne bowa bukole. Bavua bakonkangana ne:
— Muntu udi tshipepele nansha mayi a dijiba bitumikile nenku nnganyi?#4.41 Fuanyikija ne Mis 65.8; 89.10; 107.23-32.
Currently Selected:
Marke 4: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
