Marke 14

Badi belela Yezu tshifufu tshibi

(Mat 26.1-5; Luk 22.1-2; Yow 11.45-53)

1Kutshivua kushala matuku abidi bua tshibilu tshia Dipita dia Maweja-Nangila ne tshia mampa kaayi mela#14.1 Tangila Tshim 12.1-27. buanga kuenzekatshi. Bamfumu ba batuangaji ne balongeshi ba mikenji bavua bakebela pa kukuatshila Yezu mu musokoku ne kumushipa. 2Bavua bambilangana ne:

— Katuena mua kumukuatshila munkatshi mua tshibilu to. Bualu bantu badi mua kujula mutoyi.

Mukaji udi wela Yezu manananshi mu mutu

(Mat 26.6-13; Yow 12.1-8)

3Yezu utshivua ku Betanya, mu nzubu mua Simone muena nsudi. Pavuaye musombe bua kudia, mukaji kubuela ne mulangi tente wa manananshi#14.3 mulangi wa manananshi: tangila Mat 26.7 ne diumvuija . a mushinga mukole, kaayi masangisha ne tshintu tshikuabu. Kuukangulaye, kuelaye Yezu manananshi mu mutu. 4Bamue ba ku bantu bavua muaba awu kufikabu munda, babambila ne:

— Tshidibu banyangila aa manananshi nenku ntshinyi? 5Bavua mua kuapana ku mushinga mupite ku nkanu nkama isatu ya tshiamu tshitoke tshia mushinga mukole,#14.5 nkanu ya tshiamu tshitoke: tangila 6.37 ne diumvuija. bua kumona mua kupesha bapele.

Bavua badiwula mukaji ewu bikole. 6Kadi Yezu kuamba ne:

— Mulekelayi. Nudi numutatshishila tshinyi? Tshidiye mungenzele ntshimpe. 7Bualu nenuikale#14.7 Fuanyikija ne Diel 15.11. ne bapele matuku onsu, nenku misangu yonsu inudi basue nudi mua kubenzela bimpe. Kadi meme kanuena nanyi matuku onsu to. 8Yeye mmuenze muende muvuaye namu. Mmudianjile kulaba mubidi wanyi manananshi bua kuujika.#14.8 Bibidilu bia bena Yuda, bavua balaba tshitalu manananshi pa kutshijika. 9Ndi nnujadikila ne: mu buloba bujima miaba yonsu idibu balongesha Lumu lua Disanka, bantu nebalonde kabidi bidi mukaji ewu muenze, bua kumuvuluka.

Yudase udi utungila Yezu tshitungu

(Mat 26.14-16; Luk 22.3-6)

10Pashishe Yudase Iskariyote, umue wa ku balongi dikumi ne babidi, kuyaye kudi bamfumu ba batuangaji bua afile Yezu mu bianza biabu. 11Bobu kusanka bikole. Kumulayabu bua kumupesha makuta. Ke Yudase kubanga kukeba mushindu muimpe uvuaye mua kufila Yezu mu bianza biabu.

Didia dia Dipita dia Maweja-Nangila

(Mat 26.17-25; Luk 22.7-14,21-23; Yow 13.21-30)

12Dituku dia kumpala dia tshibilu tshia mampa kaayi mela buanga, divuabu balambula bana ba mikoku bua didia dia tshibilu tshia Dipita dia Maweja-Nangila, balongi ba Yezu kumukonka ne:

— Udi musue tukulongoluele didia dia tshibilu tshia Dipita dia Maweja-Nangila penyi?

13Ke Yezu kutuma balongi babidi ba ku balongi bende, ubambila ne:

— Nuye mu tshimenga. Nenusambakene ne muntu mulume muambule mulondu wa mayi. Numulonde. 14Muaba wabuelaye, nuambile muena lubanza ne: “Mulongeshi udi ukonka ne: tshibambalu tshindi mua kudila didia dia Dipita dia Maweja-Nangila ne balongi banyi, tshiepi?” 15Yeye neanuleje kulu kua nzubu, tshibambalu tshinene, tshimane kulongolola ne bintu biamu bionsu. Ke muaba unuatulongoluela didia awu.

16Balongi kuya, kufikabu mu tshimenga. Kusanganabu bionsu bu muvua Yezu mubambile. Kulongololabu didia dia tshibilu tshia Dipita dia Maweja-Nangila. 17Dilolu, Yezu kufika ne balongi dikumi ne babidi. 18Pavuabu badia ku mesa, Yezu kuamba ne:

— Ndi nnujadikila ne: umue wa kunudi, utudi tudia nende, neantungile tshitungu.#14.18 Fuanyikija ne Mis 41.10.

19Balongi kubanga kunyingalala, bamukonka ku muntu ku muntu ne:

— Udi mua kuikala meme anyi?

20Yezu kubandamuna ne:

— Mmuntu umue wa ku nuenu dikumi ne babidi, utudi tutua nende diampa diende mu dilongu disalame.#14.20 Bantu bavuabu babikila mu didia bavua badiangatshila biakudia mu dilongu bobu nkayabu. 21Bulelela, Muana wa muntu neafue bilondeshile mudibu bafunde mu Mukanda wa tshijila bualu buende.#14.21 Tangila Mis 22.2-19; Yesh 53. Kadi muntu udi uyila Muana wa muntu tshitungu, mmuena dikasa dibi! Bivua kuikala bitambe buimpe bua kabaledi muntu awu to.

Didia dia Mfumu

(Mat 26.26-30; Luk 22.14-20; 1 Kor 11.23-25)

22Pavuabu badia, Yezu kuangata diampa, yeye mumane kuela Mvidi Mukulu tuasakidila, kudikosololaye, kudiabanyinaye balongi bende, ubambila ne:

— Angatayi etshi, mmubidi wanyi.

23Pashishe kuangataye kabidi dikopu dia maluvu a nwinyo, yeye mumane kuela Mvidi Mukulu tuasakidila, kudipeshaye balongi bende, bobu kunuinamu bonsu. 24Yezu kubambila ne:

— Etshi mmashi anyi, avua mapumuka bua ba bungi, bua kushindika ndondu uvua Mvidi Mukulu mutue ne bantu.#14.24 Fuanyikija ne Tshim 24.8; Yirm 31.31-34. 25Ndi nnujadikila ne: tshiena mua kunua kabidi maluvu a nwinyo too ne ku dituku dindi mua kunua nwinyo mupiamupia mu Bukalenga bua Mvidi Mukulu.

26Pashishe kuimbabu misambu ya kuela Mvidi Mukulu tuasakidila,#14.26 Mis 115-118 bavua bayimba kunyima kua didia dia tshibilu tshia Dipita dia Maweja-Nangila. kuyabu ku mukuna wa Olive.

Yezu udi wambila Petro ne: neumvile

(Mat 26.31-35; Luk 22.31-34; Yow 13.36-38)

27Yezu kuambila balongi bende ne: Nenuye bonsu, nenunshiye. Bualu mbafunde mu Mukanda wa tshijila ne: “Nenshipe mulami wa mikoku, mikoku itangalake.#14.27 Zek 13.7.”

28Kadi, Yezu kubambila kabidi ne:

— Pangikala mubiike ku lufu, nendianjile kumpala kuenu mu Ngalileya.

29Petro kumuambila ne:

— Nansha bakuabu bonsu bakushiye, meme tshiena mua kukushiya nansha.

30Nanku Yezu kumuandamuna ne:

— Ndi nkujadikila ne: lelu, butuku ebu mene, tshitala katshiyi tshianji kusama misangu ibidi, wewe newikale munwile misangu isatu ne tshiena mumumanye to.

31Kadi Petro kushindika bikole kabidi ne:

— Nansha bua kufua nebe, tshiena mua kukuvila ne tshiena mukumanye to.

Balongi bakuabu bonsu kuambabu bia momumue.

Mu lupangu lua Ngetsemani

(Mat 26.36-46; Luk 22.39-46)

32Kufikabu ku muaba udibu babikila ne: Ngetsemani.#14.32 Tangila Mat 26.36 ne diumvuija . Yezu kuambila balongi bende ne:

— Sombayi apa, ntshidi nya kutendelela.

33Kuangataye Petro, Yakobe ne Yowanane. Kubangaye kumvua buowa ne dipampakana dikole, 34kubambilaye ne:

— Muoyi wanyi udi tente ne dibungama too ne ku lufu. Shalayi apa, ikalayi batabale.

35Kuyaye kule kakese, kudiela panshi, utendelela bua bu biobi mua kuenzeka, dikenga adi kadifiki kudiye to. 36Uvua wamba ne:

— Tatu wanyi,#14.36 Tatu wanyi: mu mikanda ya kale mbafunde ne: Aba. kakuena tshidi mua kukukolela to. Ungumushile dikopu edi dia dikenga. Kadi kabienzeki mundi musue, bienzeke amu muudi musue wewe!

37Kupinganaye kudi balongi basatu, kubasangana balale tulu. Kuambilaye Petro ne:

— Simone, udi mulale anyi? Kuena ne bukole bua kushala mutabale nansha diba dimue anyi? 38Shalayi batabale nutendelele, bua kanulenduki. Muoyi wa muntu udi mulongolole mua kuenza bionsu, kadi mubidi wende udi ne butekete.

39Yezu kuya tshiakabidi, kutendelela wambulula miaku ya momumue. 40Pashishe kupinganaye kudi balongi bende, kubasangana balale tulu. Mesu abu avua abungila ne tulu. Bavua amu bamuandamuina ku tulu.

41Kupinganaye musangu muisatu, ubambila ne:

— Nutshidi balale tulu, bikishe? Biakumbanyi. Diba diakanyi. Tangilayi, nebafile Muana wa muntu mu bianza bia bantu babi. 42Jukayi, tuye! Muntu udi untungila tshitungu mmumane kufika!

Badi bakuata Yezu

(Mat 26.47-56; Luk 22.47-53; Yow 18.3-12)

43Diakamue patshivua Yezu wakula, ke Yudase, umue wa ku balongi dikumi ne ba bidi kufikaye pamue ne bantu bavule, bikale ne miele ya nwita ne mitshi. Bavua babatume kudi bamfumu ba batuangaji, balongeshi ba mikenji ne bakulu. 44Yudase uvua mutangile Yezu tshitungu uvua mumane kuambila bantu abu tshimanyinu tshivuaye ne bua kubaleja ne: “Muntu ungela mu tshitupa awu ke yeye unudi nujinga. Numukuate, nuye nende bamulame bimpe.” 45Diakamue Yudase ufika, kusemenaye kudi Yezu, umuamba ne:

— Mulongeshi!

Pashishe kumuelaye mu tshitupa. 46Bakuabu kukuatabu Yezu. 47Ke umue wa ku bavua nende kutula muele wende wa nwita, kutapa muena mudimu wa mutuangaji munene, kumukosa ditshi.#14.47 Fuanyikija ne Yow 18.26. 48Yezu kubakonka ne:

— Meme ndi bu muivi panudi balue ne miele ya mvita ne mitshi bua kunkuata anyi? 49Matuku onsu mvua munkatshi muenu, nnulongeshila mu nzubu wa Mvidi Mukulu, kanutua bankuate nansha. Kadi bidi bienzeka nenku bua bidibu bafunde mu Mukanda wa tshijila bikumbane.

50Ke balongi bonsu kumushiya nkayende, kunyemabu.#14.50 Fuanyikija ne 14.27.

51Umue nsongalume uvua ulonda Yezu, uvua mutuale anu tshilamba tshia kudibuikila pa kulala. Bavua basue kumukuata, 52kadi yeye kushiya tshilamba tshia kudibuikila pa kulala atshi, kunyema butaka.

Badi baya ne Yezu mu Tshipangu tshikulu

(Mat 26.57-68; Luk 22.54-55,63-71; Yow 18.13-14,19-24)

53Kuyabu ne Yezu kua mutuangaji munene. Muaba uvuabu basangile kudi bamfumu bonsu ba batuangaji, bakulu ne balongeshi ba mikenji. 54Petro uvua ulonda Yezu pa bule. Kubuelaye munda mua lubanza lua nzubu wa mutuangaji munene. Muaba awu, kusombaye ne balami, ota kapia.

55Bamfumu ba batuangaji ne bonsu bena Tshipangu tshikulu bavua bakeba bualu bua kushiminyina Yezu, bua kumonabu mua kumufundila tshibawu tshia lufu, kadi kabatua babupeta nansha. 56Bantu ba bungi bavua basonguela Yezu,#14.56 Fuanyikija ne Mis 27.12; 35.11. kadi kabatua bajadika bualu bua momumue to. 57Bakuabu batua bajuka, bamushiminyina ne:

58— Tutua bumvue wamba ne: “Nengupule nzubu wa Mvidi Mukulu ewu utua bantu base, mu matuku asatu nengase mukuabu udi bantu kabayi basa.#14.58 Tangila Yow 2.19.”

59Kadi nansha ku miaku ya nanku mene, kabatua bajadika bualu bua momumue nansha.

60Mutuangaji munene kujuka munkatshi mua bantu bonsu, kukonka Yezu ne:

— Kuena wandamuna bualu nansha bumue anyi? Bantu aba badi bakusonguela bua tshinyi?

61Kadi Yezu utua mupuwe, kavua wandamuna to. Mutuangaji munene kumukonka tshiakabidi ne:

— Udi Meshiya, Muana wa Mvidi Mukulu utudi mua kutumbisha anyi?

62Yezu kuandamuna ne:

— Eyowa, mmeme. Kabidi nenumone Muana wa muntu musombe ku dia balume dia Mvidi Mukulu wa bukole buonsu. Nenumumone kabidi uluila mu mavuba a mu diulu.#14.62 Mis 110.1; Dan 7.13.

63Ke mutuangaji munene kudipanda bilamba, wamba ne:

— Katuena tukengela kabidi bajadiki ba tshilumbu to. 64Nudi badiumvuile mudiye upenda Mvidi Mukulu. Nudi nuela meji kaayi?

Bonsu kuambabu ne: bamufundile tshibawu tshia lufu.#14.64 Tangila Lev 24.16

65Bamue ba kudibu kubanga kutuila Yezu mate pambidi, bamubuikila tshilamba ku mpala, bamutuuta bisusu bamuamba ne:

— Jandula udi ukuenza nanku awu.

Basolayi kumuangata, kumutuuta mapi.#14.65 Fuanyikija ne Yesh 50.6.

Petro udi uvila Yezu

(Mat 26.69-75; Luk 22.56-62; Yow 18.15-18,25-27)

66Petro utshivua panshi mu lubanza. Umue wa ku bakaji bena mudimu ba mutuangaji munene kufika. 67Kumonaye Petro ota kapia, kumujojaye, umuamba ne:

— Wewe kabidi uvua ne Yezu wa mu Nazarete.

68Kadi Petro kumuyila wamba ne:

— Tshiena mumanye, tshiena mujingulule tshiudi musue kuamba.

Pashishe kuyaye pambelu, ku mushiku wa lupangu. Tshitala kusama.#14.68 Tangila mu 14.30. 69Kadi muena mudimu mukaji uvua mumumone. Kubangaye tshiakabidi kuambila bantu bavua muaba awu ne:

— Muntu ewu udi wa ku bobu!

70Kadi Petro kumuyila tshiakabidi. Katupa kapite, bantu bavua muaba awu kuambabu kabidi Petro ne:

— Bushuwa, udi wa ku bobu, bualu kabidi udi muena Ngalileya.

71Ke Petro kuditshipa, wamba ne:

— Tshiena mumanye muntu unudi nuamba awu to. Pangikala nshima, Mvidi Mukulu annyoke!

72Pa diba adi, tshitala kusama musangu muibidi. Ke Petro kusuluka bisua Yezu mumuambile ne: “Bangabanga ne tshitala kusama misangu ibidi, wewe newikale mumane kunwila misangu isatu ne: tshiena mumumanye to.” Ke Petro kubanga kudila.#14.72 Mu mikanda mikuabu mbafunde ne: kupatukaye lukasa lukasa udila.

Currently Selected:

Marke 14: TSH96

Highlight

Copy