Marke 15

Badi baya ne Yezu kua Pilate

(Mat 27.1-2,11-14; Luk 23.1-5; Yow 18.28-38)

1Patshiatshia, bamfumu ba batuangaji ne bakulu pamue ne balongeshi ba mikenji kudisangishabu ne bena Tshipangu tshikulu bonsu bua kukosabu tshilumbu. Kusuikabu Yezu mionji, kua kumufila kua Pilate. 2Pilate kumukonka ne:

— Udi mukalenga wa bena Yuda anyi?

Yezu kumuandamuna ne:

— Anu bu muudi wamba amu.

3Bamfumu ba batuangaji bavua basonguela Yezu ne malu a bungi. 4Pilate kumukonka tshiakabidi ne:

— Kuena wandamuna bualu nansha bumue anyi? Udi mumvue mudibu bakusonguela!

5Kadi Yezu kasua muandamune kabidi to. Pilate kukema.

Badi bafundila Yezu tshibawu tshia lufu

(Mat 27.15-26; Luk 23.13-25; Yow 18.39—19.16)

6Ku tshibilu tshionsu tshia Dipita dia Maweja-Nangila, Pilate uvua upatula mu lukanu muena lukanu umue usua bantu badisunguile. 7Kadi, kusua muntu uvuabu babikila ne: Barabase. Usua mu lukanu pamue ne bantomboji nende bavua bashipe muntu diba divua bantu bajula ndululu. 8Bantu bavule kusemena, kubanda kudi Pilate, kubanga kumulomba bua kubenzelaye muvuaye wenza misangu yonsu. 9Pilate kubandamuna ne:

— Nudi basue nnupatuile mu lukanu mukalenga wa bena Yuda anyi?

10Bualu uvua mumanye ne: bamfumu ba batuangaji mbafile Yezu mu bianza biende bualu bavua nende ne lubabu. 11Kadi, bamfumu ba batuangaji kusonsola bantu bua balombe Pilate, bua abapatuile mu lukanu anu Barabase. 12Pilate kukonka bantu tshiakabidi ne:

— Kadi nudi basue ne ngenzele unudi nubikila ne mukalenga wa bena Yuda tshinyi?

13Bobu kumuandamuna bela mbila ne:

— Umupopele pa mutshi mutshiamakane!

14Pilate kubakonka ne:

— Ntshilema kaayi tshibi tshidiye muenze?

Kadi bobu kuela kabidi mbila bikole ne:

— Umupopele pa mutshi mutshiamakane!

15Pilate uvua musue kusankisha bantu pa kubapatuila Barabase mu lukanu. Pashishe, yeye mumane kukumisha Yezu mikaba, kumufilaye bua bamupopele pa mutshi mutshiamakane.

Basolayi badi baseka Yezu

(Mat 27.27-31; Yow 19.2-3)

16Basolayi kuyabu ne Yezu munda mua lubanza (mmomumue ne: mu lubanza lua nzubu wa mulombodi wa buloba). Kubikilabu basolayi bonsu. 17Kuvuadikabu Yezu tshinkutu tshikunze.#15.17 Tshinkutu tshikunze: ke tshilamba tshia mushinga mukole tshivua bua bakalenga ne bantu baneme. Kulukabu tshifulu tshia bukalenga tshia mionji ya meba, kumuasa ku mutu. 18Pashishe kubangabu kumuela muoyi ne:

— Mukalenga wa bena Yuda! Muoyi awu!

19Bavua bamutuuta lukodi ku mutu, bamutuila mate pambidi, bamutuila binu panshi kumpala kuende bua kumukukuila. 20Bobu bamane kumuseka, kuntuvulabu tshinkutu tshikunze, kumuvuadikabu bilamba biende. Pashishe kuyabu nende ku mpenga kua tshimenga bua kumupopela pa mutshi mutshiamakane.

Badi bapopela Yezu

(Mat 27.32-44; Luk 23.26-43; Yow 19.17-27)

21Muntu mukuabu uvua upita mu njila, utumina ku budimi, diende Simone muena mu Sirene, uvua tatuende wa Aleksandre ne Rufuse.#15.21 Fuanyikija ne Rom 16.13. Basolayi kumuenzeja bua kuambulaye mutshi mutshiamakane wa Yezu. 22Kuyabu ne Yezu muaba uvuabu babikila ne Ngolgota, mmomumue ne: “Muaba wa kabalubalu ka Mutu.” 23Bavua basue kumupesha nwinyo musambakaja ne buanga budi bukuata bu diamba pamue ne mire. Kadi Yezu kubenga kunua. 24Pashishe kumupopelabu pa mutshi mutshiamakane. Kuabanyanganabu bilamba biende, bavua batshinka bua kumanya tshidi muntu yonsu ne bua kuangata.#15.24 Tangila Mis 22.19. 25Pavuabu bamupopela pa mutshi mutshiamakane, diba dikavua pa tshitema wa dinda. 26Pa kabaya kavua kaleja tshibawu tshiyuabu bamufundile, bavua bafundepu ne: “Mukalenga wa bena Yuda.” 27Bavua bapopele bantomboji babidi ku nseke yonsu ya Yezu: umue ku dia balume diende, mukuabu ku dia bakaji diende. [ 28Amu bua kukumbaja miaku idibu bafunde mu Mukanda wa tshijila ne: “Bavua bamuteka munkatshi mua benji ba malu mabi.#15.28 Kanungu aka kakena mu mikanda mivule ya kale. — Tangila Luk 22.37 ne Yesh 53.12.”]

29Bantu bavua bapitshila muaba awu bavua banyukisha mitu, bamupenda, bamuamba ne:

— Akia! Wewe uvua musue kupula nzubu wa Mvidi Mukulu ne kuasa mukuabu mu matuku asatu,#15.29 Tangila Mis 22.8; Mar 14.58; Yow 2.19. 30udisungidile, utuluke ku mutshi mutshiamakane!

31Bamfumu ba batuangaji ne balongeshi ba mikenji kabidi bavua baseka Yezu, bambilangana ne:

— Uvua usungidilangana, kadi mupange mua kudisungidila yeye mene! 32Meshiya mukalenga wa bena Izrayele atuluke ku mutshi mutshiamakane mpindiewu! Patuamona nanku, netumuitabe!

Bantu bavuabu bapopela ku mutshi mutshiamakane pamue ne Yezu bavua bamupenda kabidi.

Yezu udi ufua

(Mat 27.45-56; Luk 23.44-49; Yow 19.28-30)

33Diba dia dikumi ne dibidi munda munya, miidima kuenzeka mu ditunga dijima, kunengayi too ne ku diba isatu wa ku mapingaja. 34Diba dia isatu, Yezu kuela lubila lukole ne:

— Eloyi, Eloyi, lama sabaktanyi? (mmomumue ne: “Mvidi Mukulu wanyi, Mvidi Mukulu wanyi, udi mundekele bua tshinyi?#15.34 Mis 22.2, mbafunde mu buena arame.”)

35Bamue bantu bavua muaba awu kumvuabu, kuambabu ne:

— Telejayi, udi ubikila Eliya!

36Umue wa kudibu kuya lubilu, kuzabika musukulampampa mu maluvu a buanji, kuusuika ku lusongu lua lusokola, kupesha Yezu bua kunuaye,#15.36 Fuanyikija ne Mis 69.22. wamba ne:

— Lekelayi tumone Eliya ne udi mua kulua kumutulula ku mutshi mutshiamakane.

37Kadi Yezu kuela tshiona tshikole, kukulaye muoyi.

38Tshilamba tshivua tshilembeleja mu nzubu wa Mvidi Mukulu#15.38 Tshim 26.31-33. kupandikatshi pankatshinkatshi biangatshile kulu too ne panshi. 39Mulombodi wa basolayi wa bena Rome uvua muimane buludiludi ne Yezu, umone muakudi Yezu muoyi#15.39 Bu muakudiye muoyi, mu imue mikanda mbafunde ne: pavuaye wela lubila: (nunku). kuambaye ne:

— Muntu awu uvua Muana wa Mvidi Mukulu bulelela!

40Bakaji bakuabu bavua kabidi muaba awu, bavua batangidile pa bule. Munkatshi muabu muvua Mariya wa mu tshimenga tshia Magdala, ne Mariya mamuende wa Yakobe mukese ne wa Yose, kabidi ne Salome. 41Bavua balonda Yezu kabidi bamuambuluisha pavuaye mu Ngalileya. Kuvua bakaji bakuabu bavule kabidi bavua babande nende mu Yerushalayime.

Badi bajika Yezu

(Mat 27.57-61; Luk 23.50-56; Yow 19.38-42)

42-43Diba dikavua ku dilolu, divua dia didilongolola, momumue ne divua dia muladilu wa dituku dia Dikisha. Yozefe muena mu tshimenga tshia Arimateya,#15.42-43 Arimateya: tangila Mat 27.57 ne diumvuija. uvua ne muanzu munene mu Tshipangu tshikulu tshia bena Yuda. Uvua kabidi mutekemene Bukalenga bua Mvidi Mukulu. Uvua ne muoyi mukole bua kuya kudi Pilate bua kumulomba tshitalu tshia Yezu. 44Kadi Pilate uvua mukeme pumvuye ne: Yezu mmumane kufua. Nenku kubikidishaye mfumu wa basolayi, kumukonka ne: Yezu ukadi mumane kufua musangu mule anyi? 45Mulombodi wa basolayi mumane kuandamuna Pilate ne: mmomu, ke yeye kuitabaye bua Yozefe angate tshitalu. 46Yozefe kusumba tshilamba tshia kudibuikila tshia buanda bua mitshi, kutululaye tshitalu tshia Yezu ku mutshi mutshiamakane, kutshijingilaye tshilamba tshia kudibuikila, kutshilonga mu lukita luvuabu bumbule mu lubuebue. Pashishe kubungulujaye dibue dinene bua kubuikila ku mushiku wa lukita. 47Mariya muena mu Magdala ne Mariya mamuende wa Yose bavua bamona muaba uvuabu bajike Yezu.

Currently Selected:

Marke 15: TSH96

Highlight

Copy