Marke 12

Lusumuinu lua bena mudimu babi ba mu budimi bua nwinyo

(Mat 21.33-46; Luk 20.9-19)

1Yezu kubanga kubambila malu mu nsumuinu ne:

— Kusua muntu mukune mionji ya nwinyo mu budimi. Kubuelaye mu lupangu, kumbulaye tshiina tshia tshikaminu tshia tumuma, kuibakaye kazubu ka batentekedi.#12.1 Fuanyikija ne Yesh 5.1-2.” Pashishe kushilaye bafutshidi budimi abu, kuyaye ku luendu. 2Padi tshikondu tshia kupola tumuma tshikumbana, kutumaye muena mudimu wende kudi bafutshidi ba budimi abu, bua kupeta tuende tumuma tua nwinyo kudi bafutshidi. 3Bafutshidi kukuata muena mudimu, kumutuuta, kumuipata bianza bitupu. 4Muena budimi kutuma muena mudimu mukuabu. Bobu kumutuuta bintu ku mutu, bamupenda. 5Muena budimi kutuma muena mudimu mukuabu kabidi, bafutshidi kumushipa. Kuenzelabu bena mudimu bakuabu ba bungi mushindu awu: kutuutabu bamue, kushipa bakuabu. 6Muena budimi uvua mushale amu ne muntu umue, ke muanende wa balume uvuaye munange bikole. Kumutumaye kudi bafutshidi ku ndekelu, wela meji ne: “Nebanemeke muananyi.” 7Kadi bafutshidi kuambilangana ne: “Ke washala ne bumfumu bua budimi pashishe wawa. Tuyayi banushipe, budimi bushale buetu!” 8Kukuatabu muana, kumushipa, kuimanshabu tshitalu tshiende ku mpenga kua budimi.

9Yezu kubakonka ne: Nenku muena budimi bua nwinyo udi mua kuenza tshinyi? Muena budimi bua nwinyo nealue, neashipe bafutshidi ba budimi bua nwinyo, neafile budimi kudi bantu bakuabu. 10Kanuena banji kubala bulelela, mudi Mukanda wa tshijila, wamba ne:

“Ke dibue divua bibaki bimanshe,

dikadi dibue didi dishindika nzubu.

11Maweja-Nangila ke udi muenze nanku,

bidi bikemesha patudi bitangila!#12.11 Mis 118.22-23.”

12Bamfumu ba bena Yuda bavua bakeba mushindu udibu mua kukuata Yezu. Bualu bavua bamanye muvuaye wela lusumuinu elu bualu buabu. Kadi bavua batshina bantu, nenku bobu kumulekela kuyabu.

Tshitadi tshia Kezare

(Mat 22.15-22; Luk 20.20-26)

13Kutuminabu Yezu bamue Baparushe ne bamue bantu ba mu tshisumbu tshia bena Erode#12.13 bantu ba mu tshisumbu tshia Erode: tangila 3.6 ne diumvuija . bua kumuteta. 14Kufikabu, bamuambila ne:

— Mulongeshi, tudi bamanye ne: udi wamba bulelela. Kuena utshina bidi bantu bela meji. Bualu kuena utangila bua mpala wa muntu, kadi udi ulongesha bulelela mudi Mvidi Mukulu musue bua muntu enza. Tuambilaku: mikenji yetu mmianyishe bua kufuta mukalenga wa bakalenga wa bena Rome tshitadi anyi? Tudi mua kumufuta anyi katuena mua kumufuta?

15Kadi Yezu uvua mumanye ne: mbasokoke meji abu malelela. Kubandamunaye ne:

— Nudi nunteta bua tshinyi? Ndejayi lukanu lunudi nalu, ndumone.

16Kumutuadilabu lukanu lumue. Yeye kubakonka ne:

— Mpala ne dina bidibu bazolapu mbia nganyi?

Bobu kumuandamuna ne:

— Mbia mukalenga wa bakalenga.

17Yezu kubambila ne:

— Futayi mukalenga wa bakalenga bintu bidi biende. Kadi lambulayi Mvidi Mukulu kabidi bidi biende.

Kukemabu bikole bua diandamuna diende.

Bafue nebabiike anyi?

(Mat 22.23-33; Luk 20.27-40)

18Basaduke bakuabu kuya kudi Yezu. (Bobu ke badi balongesha bantu ne: bafue kabena mua kubiika ku lufu#12.18 Fuanyikija MM 23.8.). Kumukonkabu ne:

19— Mulongeshi, Moshe uvua mutuelele mukenji ne: “Pikala muntu ne muanabu wa balume mufue, mushiye mukaji kayi mulele nende bana, bidi bimpe muanabu wa balume awu apiane mukamba awu, alelele muanabu mufue awu bana.#12.19 Tangila Diel 25.5-6.” 20Kuvua bana ba balume muanda mutekete. Wa kumpala kusela mukaji, kufuaye kayi mushiye bana. 21Muibidi kuangata mukamba uvua mushale awu, kufuaye kabidi kayi mulele bana. Muisatu kubalonda kabidi amu nanku. 22Buonsu muanda mutekete bavua bangate mukaji, balondangana kutuabu kabayi bashiye bana. Ku ndekelu kua bonsu, mukaji kubalonda kabidi. 23Dituku diabiika bantu ku bafue, udi mua kuikala muena mukaji awu munkatshi muabu amu nnganyi? Bualu buonsu muanda mutekete bavua bamuangate!

24Yezu kubandamuna ne:

— Ke panudi nutupakana, bualu kanuena bajingulule, nansha Mukanda wa tshijila, nansha bukole bua Mvidi Mukulu. 25Pashishe pabiika bantu ku lufu, bantu balume ne bantu bakaji kabena mua kuselangana nansha, kadi nebikale bu mudi batumibue ba Mvidi Mukulu mu diulu. 26Kadi bua bantu bafue, ne bua dibiika diabu ku lufu. Kanuena babale mu mukanda wa Moshe bivua Mvidi Mukulu muambe mu tshipuka tshitema kapia anyi? Mbafundemu ne: Mvidi Mukulu uvua muambile Moshe ne: “Ndi Mvidi Mukulu wa Abrahame, Mvidi Mukulu wa Izake, ne Mvidi Mukulu wa Yakobe.#12.26 Tangila Tshim 3.2, 6.”

27Yezu kuamba kabidi ne:

— Mvidi Mukulu udi Mvidi Mukulu wa bantu badi ne muoyi, kena wa bafue nansha. Nudi batupakane bikole.

Mukenji udi mupite mikuabu

(Mat 22.34-40; Luk 10.25-28)

28Mukuabu mulongeshi wa mikenji uvua mumvue muvuabu belangana mpata. Kumonaye ne Yezu uvua muandamune Basaduke bimpe. Kusemenaye kudiye, umukonka ne: Ku mikenji yonsu, mmukenji kaayi udi mupite mikuabu?

29Yezu kumuandamuna ne:

— Mukenji udi mupite mikuabu udi ne: “Izrayele, teleja! Maweja-Nangila Mvidi Mukulu wetu udi Maweja-Nangila nkayende.#12.29 Maweja-Nangila…Maweja-Nangila: mu mikanda mikuabu mbafunde ne: Maweja-Nangila udi Mvidi Mukulu wetu, Maweja-Nangila nkayende. 30Unange Maweja-Nangila Mvidi Mukulu webe ne muoyi webe onsu, ne lungenyi luebe luonsu, ne meji ebe onsu, ne bukole buebe buonsu.#12.30 Diel 6.4-5.” 31Mukenji muibidi udi ne: “Unange muntu nebe bu muudi mudinange wewe mene.#12.31 Lev 19.18.” Kakuena mukenji mukuabu udi mupite mikenji ibidi eyi nansha.

32Mulongeshi wa mikenji kuambila Yezu ne:

— Mbimpe bitambe, Mulongeshi! Biudi muambe mbia bulelela. Maweja-Nangila ke Mvidi Mukulu nkayende. Kakuena Mvidi Mukulu mukuabu amu yeye.#12.32 Fuanyikija ne Diel 4.35. 33Nenku, muntu udi ne bua kunanga Mvidi Mukulu ne muoyi wende onsu, ne lungenyi luende luonsu ne bukole buende buonsu. Udi ne bua kunanga kabidi muntu nende bu mudiye mudinange yeye mene. Kuenza nanku nkupita kuoshila Mvidi Mukulu nyama pa tshilambuilu ne kumulambula milambu ya mishindu yonsu.#12.33 Fuanyikija ne Osh 6.6.

34Yezu umona ne mmuandamune ne lungenyi, kumuambilaye ne:

— Wewe udi pabuipi ne bukalenga bua mu diulu.

Abi bimane kuenzeka, muntu nansha umue kavua ne dikima dia kumuela lukonku kabidi nansha.

Meshiya ne Davide

(Mat 22.41-46; Luk 20.41-44)

35Pavua Yezu ulongesha mu nzubu wa Mvidi Mukulu, kukonkaye ne:

— Mudi balongeshi ba mikenji mua kuamba ne Meshiya udi wa ku ndelanganyi ya Davide mbishi? 36Bualu Davide nkayende mulombolakudi Mueyelu wa Tshijila, uvua wamba ne:

“Maweja-Nangila Mvidi Mukulu uvua wamba Mfumu wanyi ne:

Luaku usombe ku diboku dianyi dia balume,

too ne pandi nteka baluishi bebe muinshi mua makasa ebe.#12.36 Mis 110.1.”

37Davide mene udi umubikila “Maweja-Nangila.” Mudi Meshiya mua kuikala kabidi wa ku ndelanganyi ya Davide mbishi?

Dimukayi ku bidi balongeshi ba mikenji balongesha

(Mat 23.1-36; Luk 20.45-47)

Bantu ba bungi bavua bateleja Yezu ne disanka. 38Uvua wambila bantu bavuaye ulongesha ne:

— Nudimukile balongeshi ba mikenji. Badi banange mua kuendakana bavuale mintumpu mile, banange bua bahele mioyi ya kanemu miaba idi bantu basangile. 39Badi basungula nkuasa ya lumu mu nzubu ya kutendelela ya bena Yuda ne mu miaba ya kudia ya bibilu. 40Badi banyenga bakaji bakamba bionsu bidibu nabi, kabidi badi batendelela mutantshi mule bua kumuenekabu bantu bakane. Kadi nebabanyoke bikole bipite.

Mulambu wa mukaji mukamba

(Luk 21.1-4)

41Yezu uvua musombe buludiludi ne mushete wa milambu ya mu nzubu wa Mvidi Mukulu, kumonaye muvua bantu bavule belamu makuta. Bantu babanji ba bungi bavua bela makuta a bungi. 42Mukaji mukamba mupele kufika. Kuelaye makuta a tshiamu tshikunze abidi, mikale ne mushinga wa nseki.#12.42 Mu mikanda ya kale mbafunde ne: nseki ibidi, tukula tukese tua mushinga. 43Ke Yezu kubikila balongi bende, ubambila ne:

— Ndi nnujadikila ne: mukaji mukamba mupele ewu mmuele mu mushete mulambu mupite wa bantu bakuabu bonsu. 44Bualu bantu bakuabu bonsu mbele makuta mavule avuabu nawu. Kadi yeye ewu ne bupele buende, mmulambule kende konsu kavuaye naku.

Currently Selected:

Marke 12: TSH96

Highlight

Copy