Marke 11
11
Yezu udi ubuela mu Yerushalayime
(Mat 21.1-11; Luk 19.28-40; Yow 12.12-19)
1Pasuabu bamane kusemena pamue ne Yerushalayime, pabuipi ne musoku wa Betfaje ne wa Betanya, kufikabu ku mukuna wa Olive.#11.1 Betefaje: luseke ludi diba dipatukila lua Olive, kilometre mikese ne Yerushalayime. — Betanya: udi pepi nawu. — mukuna wa Olive: kudi diba dipatukila ne Yerushalayime. Yezu kudianjila kutuma balongi babidi, 2ubambila ne:
— Ndayi mu musoku udi kumpala wawa. Panudi nufika anu momu, nenusangane muana wa nyama wa mpunde musuike, udi muntu nansha umue kayi muanji kubanda. Numusulule, nulue nende muaba essu. 3Muntu yeye munukonke ne: “Nudi nuenza nanku bua tshinyi?” Numuambile ne: “Mfumu udi nende dijinga, neamupingaje mpindiessu.#11.3 Mfumu: mu mikanda mikuabu mbafunde ne: Mulongeshi nansha Mfumuende.”
4Kuyabu kusangana muana wa mpunde, musuike pambelu pabuipi ne tshiibi, mu musesu. Bobu kumusulula. 5Bamue bantu bavua muaba assu kubakonka ne:
— Nudi nuenza tshinyi? Nudi nusulula muana wa nyama wa mpunde ewu bua tshinyi?
6Balongi kuandamuna amu umvua Yezu mubambile, nanku bantu abu kubalekela bobu kuya. 7Kuyabu ne muana, wa nyama wa mpunde kudi Yezu, kuteka bilamba biabu pa nyama, Yezu kusombapu.#11.7 Fuanyikija ne Zek 9.9. 8Bantu ba bungi kuadija bilamba mu njila, bakuabu kumuteka bisala bibishi bisuabu bakose mu madimi.#11.8 2 Bak 9.13, tshilamba tshia lumu tshidibu badija panshi. 9Bavua bapita kumpala kua Yezu ne bavua bamulonda, bavua bela mbila ne:
— Tutumbishayi Mvidi Mukulu! Mvidi Mukulu alabe muntu udi uvua mu dina dia Maweja-Nangila, lupemba! 10Mvidi Mukulu ele bukalenga budi buvua lupemba, bukalenga bua nkambua wetu Davide! Tutumbishayi Mvidi Mukulu mu diulu!#11.10 Fuanyikija ne Mis 118.25-26. — Tumbishayi (kan. 9) …Tumbishayi (kan. 10): tangila Mat 21.9 ne diumvuija .
11Yezu kubuela mu Yerushalayime, kuyaye mu nzubu wa Mvidi Mukulu. Yeye mumane kutangila bionsu, kuyaye ku Betanya ne balongi bende dikumi ne babidi, bualu diba dikavua dimane kuya.
Yezu udi utshipa mutshi wa mfiku
(Mat 21.18-19)
12Butshia, bobu bamane kumuka mu Betanya, Yezu kumvua nzala. 13Kumonaye mutshi wa mfiku pa bule musampile. Kuyaye kutangila bua kumona ne udiku mua kuikala mukuama bimuma. Kadi ufika pabuipi ne mutshi, kusanganaye amu mabeji, bualu katshivua tshikondu tshia mutshi wa mfiku kukuama nansha. 14Yezu kutshipa mutshi awu ne:
— Kashidi muntu nansha umue kena mua kudia bimuma biebe! Balongi bende bavua bamuteleja.
Yezu mu nzubu wa Mvidi Mukulu
(Mat 21.12-17; Luk 19.45-48; Yow 2.13-22)
15Pashishe kufikabu mu Yerushalayime. Yezu kubuela mu nzubu wa Mvidi Mukulu. Kubangaye kuipatamu bavua basumbisha ne bavua basumba bintu muaba awu. Kutonkolaye mesa a bashintudi ba makuta ne nkuasa ya basumbishi ba nkudimba.#11.15 Muaba uvua benyi basombe. — Bashintudi ba makuta: bivua bua kusumba bia milambu, nansha kufuta tshitadi tshia nzubu wa Mvidi Mukulu. 16Kavua muanyishe bua muntu kuambulaye tshintu upitshila mu nzubu wa Mvidi Mukulu. 17Pashishe kubalongeshaye wamba ne:
— Mu Mukanda wa tshijila mbafunde ne: “Nebabikile nzubu wanyi ne: nzubu udi bantu ba bisamba bionsu mua kutendelela.” Kadi nuenu nudi bamuenze muaba udi bivi mua kusokomena!#11.17 Fuanyikija ne Yesh 56.7; Yirm 7.11.
18Batuangaji banene ne balongeshi ba mikenji bumvua bualu abu, kukebabu mushindu wa kushipesha Yezu. Kadi bavua bamutshina, bualu bantu bavule bavua bakema bikole bua dilongesha diende.
19Ku dilolu, Yezu ne balongi bende kupatukabu mu tshimenga.#11.19 Mu mikanda mikuabu mbafunde ne: tuipatshile ku dilolu, Yezu ne balongi bende kupatukabu mu tshimenga.
Yezu ne mutshi wa mfiku muume
(Mat 21.20-22)
20Butshia dinda, pavuabu bapita mu njila, kumonabu mutshi wa mfiku mumane kuuma onsu ne ku miji. 21Petro kuvuluka bivua bienzeka, kuambilaye Yezu ne:
— Mulongeshi, tangila mutshi wa mfiku uuvua mutshipe, mmumane kuuma onsu.
22Yezu kuambila balongi bende ne:
— Ndi nnujadikila ne: Nuenu, itabayi Mvidi Mukulu! 23Muntu muambile mukuna ewu ne: “Umuka udiele mu mayi manene.” Padiye kayi ne mpata mu muoyi wende, kadi muitabe ne: tshidiye wamba netshienzeke, tshiotshi netshienzeke. 24Ke pandi nnuambila ne: Panudi nutendelela bua kulomba tshintu, nuitabe ne: nudi bamane kutshipeta kundi, nebanupeshetshi. 25Ne panudi bimane kulu bua kutendelela, panudi bajilangana ne muntu kampanda, numutuile luse, bua Tatu wenu udi mu diulu anulekele mibi yenu kabidi. [ 26Kadi panudi kanuyi nulekela bakuabu mibi yabu, Tatu wenu udi mu diulu kena mua kunutekela yenu mibi kabidi.#11.26 Kanungu aka kakena mu mikanda mivule ya kale. Tangila Mat 6.15.]
Bumfumu bua Yezu mbufume penyi?
(Mat 21.23-27; Luk 20.1-8)
27Kupinganabu kabidi mu Yerushalayime. Pavua Yezu wendakana mu nzubu wa Mvidi Mukulu, bamfumu ba batuangaji, balongeshi ba mikenji ne bakulu kuyabu kudiye, 28bamukonka ne:
— Udi wenza malu aa ne bukenji kaayi? Udi mukuambile bua kuenza nnganyi?
29Yezu kubandamuna ne:
— Meme kabidi nennuele amu dikonka dimue, nuenu bangandamune, nennuambile bukenji bundi ngenza nabu malu aa. 30Uvua mutume Yowanane bua kutua#11.30 Tangila 1.4-5. bantu mu mayi nnganyi? Udi mua kuikala Mvidi Mukulu, anyi mbantu? Ngandamunayi.
31Bobu kubangabu kuelangana mpata munkatshi muabu, bambilangana ne:
— Tuetu bandamuna ne: “Mvidi Mukulu, ke uvua mumutume,” neatukonke ne: “Kanuvua bitabe Yowanane bua tshinyi?” 32Kadi tuetu bamba ne: “Bantu mbavua bamutume…”
(Bavua batshina bantu, bualu buonsu bavua bela meji ne: Yowanane uvua muambi mulelela.)
33Ke kuandamunabu Yezu ne:
— Katuena bamanye to.
Ke Yezu kabidi kubambila ne:
— Meme kabidi tshiena nnuambila bukenji bundi ngenza nabu malu aa nansha.
Currently Selected:
Marke 11: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
