Matayi 21

Yezu udi ubuela mu Yerushalayime

(Mar 11.1-11; Luk 19.28-40; Yow 12.12-19)

1Yezu ne balongi bende basemena mu Yerushalayime, kufikabu pabuipi ne musoku wa Betfaje, ku mukuna wa Olive.#21.1 Tangila Mar 11.1 ne diumvuija . Yezu kutuma balongi bende babidi, 2kubambila ne:

— Nuye mu musoku ewu udi kumpala kuenu. Nenusanganemu diakamue mpunde mukaji musuika pamue ne muanende. Nuyisulule, nuvue nayi kundi. 3Pikalabu bamba bualu, nuandamune ne: “Mfumu#21.3 Mfumu: badi mua kuandamuna kabidi ne: mulongeshi, nansha: muena nyama. udi nayi dijinga.” Nebanyishe musangu umue bua nuenu kuya nayi.

4Ebi bivua bienzeka bua kukumbaja miaku ya muambi ya ne:

5“Ambilayi bena mu Siyone ne:

Ke mukalenga wenu awu udi ufika kunudi.

Udi mudipuekeshe bikole,

mubande pa nyama wa mpunde mukaji,

ne pa muana wa nyama wa mpunde.#21.5 Zek 9.9.”

6Nanku balongi kuya. Kuenzabu bivua Yezu mubambile. 7Kufikabu ne nyama wa mpunde mukaji ne muanende. Kutekabu bilamba biabu pa nyama ayi. Yezu kubandapu. 8Bantu bavule kuadija bilamba biabu panshi mu njila. Bakuabu bavua bakosa mabeji a mitshi, baela mu njila.#21.8 Fuanyikija ne 2 Bak 9.13. 9Bavua benda kumpala kua Yezu, ne bavua bamulonda mu nyima, bonsu kuela mbila ne: “Lumu tuikale kudi Muana wa Davide! Udi uvua mu dina dia Maweja-Nangila, Mvidi Mukulu amuele lupemba! Lumu bikale kudi Mvidi Mukulu mu diulu!#21.9 Fuanyikija ne Mis 118.25-26. — Lumu…Lumu: mu tshiena ebrewu, mbafunde muaku wa “Hosanna”, udi umvuija ne: ufike bua kutuambuluisha (Mis 118.25). Kadi muaku awu ukavua bu makumbu adibu bela Mvidi Mukulu bua kumutumbisha.

10Pavua Yezu mubuele mu Yerushalayime, bantu bonsu bavua bapampakana, bakonkangana ne:

— Ewu nnganyi?

11Bantu bakuabu bavua bandamuna ne:

— Yezu, muambi, muena Nazarete wa mu Ngalileya.

Yezu mu nzubu wa Mvidi Mukulu

(Mar 11.15-19; Luk 19.45-48; Yow 2.13-22)

12Yezu kubuela mu nzubu wa Mvidi Mukulu. Kuipataye mu nzubu amu bantu bonsu bavua basumbisha bintu, ne bavua babisumba. Kutonkolaye mesa a bashintudi ba makuta, ne nkuasa ya basumbishi ba nyunyi ya nkudimba. 13Pashishe kubambilaye ne:

— Mikanda ya tshijila idi yamba ne: “Nebi-nyike nzubu wanyi ne: ngwa ditendelela.” Kadi nuenu nukadi bamuandamune muaba wa buivi!#21.13 Fuanyikija ne Yesh 56.7; Yirm 7.11. 14Bampofu ne batebuki kusemena kuvua Yezu mu nzubu wa Mvidi Mukulu. Kujikijaye masama abu. 15Bamfumu ba batuangaji, ne balongeshi ba mikenji, kufika munda pa kumona malu a dikema avua Yezu wenza, ne bana bavua bela mbila mu nzubu wa Mvidi Mukulu ne: “Lumu tuikale kudi Muana wa Davide!” 16Kukonkabu Yezu ne:

— Udi mumvue mudibu bamba anyi?

Yezu kubandamuna ne:

— Eyowa. Kadi kanuena babale Mukanda wa tshijila anyi? Badi bafundamu ne: “Uvua muenze bua bana batekete mene, nansha batshidi bamua mabele, bakutumbishe.#21.16 Mis 8.3, muvuabu bandamune miaku ayi mu tshiena ngreke.”

17Pashishe kubashiyaye, kupatuka mu tshimenga, kuya mu Betanya. Kulalaye muaba awu.

Yezu udi utshipa mutshi wa mfiku

(Mar 11.12-14,20-24)

18Butshia dinda, pavua Yezu upingana mu tshimenga, kumvuaye nzala. 19Kumonaye mutshi wa mfiku ku muelelu wa njila. Kuyaye pabuipi nawu, kusangana anu mabeji. Ke kutshipaye mutshi awu ne:

— Wewe kuakukuama kabidi bimuma kashidi! Diakamue mutshi kuumawu. 20Balongi bamona nanku, kukemabu. Kuebejabu Yezu ne:

— Mutshi wa mfiku ewu mmuume anu lukasa nanku bua tshinyi?

21Yezu kubandamuna ne:

— Ndi nnujadikila bulelela ne: nuenu bikale ne ditaba, kanuyi nuela mpata, kanuakuenza anu tshindi muenzele mutshi wa mfiku ewu nansha. Kadi diba adi nenuambile mukuna ewu ne: “Umuke paudi apu, uye kudiela mu mayi manene,” mukuna neuye. 22Bu nuenu nuitaba, nenupete bionsu binudi nulomba mu ditendelela.

Bumfumu bua Yezu mbufume penyi?

(Mar 11.27-33; Luk 20.1-8)

23Yezu kubuela mu nzubu wa Mvidi Mukulu. Pavuaye mutuadije kulongesha, bamfumu ba batuangaji, ne bakulu ba bena Yuda, kusemena kudiye, bamukonka ne:

— Malu audi wenza aa, udi muenze ne bumfumu kaayi? Udi mukupeshe bumfumu ebu nnganyi?

24Yezu kubandamuna ne:

— Meme kabidi ndi musue kunuela lukonku amu lumue. Nuenu bangandamune, nanku nennuambile bumfumu bundi ngenza nabu bionsu ebi. 25Yowanane, udi mumutume bua kutua bantu mu mayi, Mvidi Mukulu anyi mbantu?#21.25 Tangila 3.6.

Kadi kuelanganabu meji munkatshi muabu nkayabu ne:

— Tuetu bandamune ne: “mMvidi Mukulu nguvua mumutume,” neatuebeje ne: “Kadi kanuena bitabe Yowanane bua tshinyi?” 26Tuetu bambe ne: “Bantu ke bavua bantumine,” tudi ne bua kutshina bantu. Bitalu bonsu badi anu bitabe ne: Yowanane mmuambi!

27Ke kuandamunabu Yezu ne:

— Katuena bamanye to.

Nanku Yezu kubandamuna kabidi ne:

— Meme panyi tshiena nnuambila bumfumu bundi ngenza nabu bionsu ebi.

Lusumuinu lua bana ba balume babidi

28Yezu kubakonka kabidi ne:

— Bua lusumuinu elu, nudi nuamba penu bishi? Muntu uvua ne bana ba balume babidi. Kuambilaye wa kumpala ne: “Muananyi, lelu uye kuenza mudimu mu budimi buanyi bua nwinyo.” 29Muana kubenga ne: “Tshiena musue to.” Kadi pashishe kunyingalalaye bua miaku yende ayi, kuyaye mu budimi. 30Ke tatu awu kulomba kabidi muana muibidi, bua aye ku budimi. Muana kuitaba lukasa ne: “Eyowa, mfumu.” Kadi nanshaye kuya to. 31Ku bana babidi aba, udi muenze tshivua tatuende musue nnganyi?

Kumuandamunabu ne:

— Anu muana wa kumpala.

Nanku Yezu kubambila ne:

— Ndi nnujadikila bulelela ne: balambuishi ba bitadi, ne bakaji bena buendenda, nebanudianjidile mu Bukalenga bua Mvidi Mukulu. 32Bualu Yowanane-Batiste mmufike kunudi, bua kunuleja njila mululame. Kadi kanuena bamuitabe to. Balambuishi ba bitadi, ne bakaji bena buendenda, bakamuitaba. Kadi nansha nuenu bamone bobu benza nanku, kanuena banyingalala nansha kakese, bua numone mua kumuitaba.

Lusumuinu lua bena mudimu babi ba mu budimi bua nwinyo

(Mar 12.1-12; Luk 20.9-19)

33— Telejayi lusumuinu lukuabu. Kuvua muntu ne budimi buende. mMukunemu mionji ya nwinyo. Kunyungululaye budimi abu ne lupangu. Kumbulaye kabidi tshiina bua kuasamu tshikaminu tshia maluvu. Kuasaye kazubu katumbuke ka batentekedi.#21.33 Fuanyikija ne Yesh 5.1-2. Pashishe kushilaye bena mudimu budimi buende bua nwinyo ebu. Kuyaye ku luendu. 34Tshikondu tshia kupola tumuma tshikumbana, kutumaye bena mudimu bende kudi bavuaye mushile budimu abu, bua kupeta tuende tumuma. 35Kadi bantu abu kukuata bena mudimu bende abu, kukuma umue, kushipa mukuabu, muisatu kumuasabu mabue. 36Ke muena budimi kutuma tshiakabidi bena mudimu bakuabu ba bungi bapite ba kumpala. Kadi bavua ne budimi, kubenzela anu mushindu umue. 37Ku ndekelu kubatuminaye muanende, wela meji ne: “Nebanemeke muananyi.” 38Kadi bavua ne budimi bamona muana, kuambilanganabu ne: “Ke washala muena budimi wawa. Tuyayi, mmushipe! Nanku netushale ne budimi buende kashidi!” 39Kumukuatabu, kuyabu kumushipela ku mpenga kua budimi.

40Yezu kubakonka ne:

— Pafika muena budimi, neenze tshinyi ne bavuaye mushile budimi aba?

41Kumuandamunabu ne:

— Kakumvuila bantu babi aba luse to. Neabashipe bonsu. Neashile bantu bakuabu budimi buende, bua bamupeshe pa diba tshiende tshitupa tshia bimuma bidibu banowa.

42Ke Yezu kubambila ne:

— Kanuena banji kubala mukanda wa Mvidi Mukulu anyi? Mbafundemu ne:

“Dibue divua bibaki bimansha,

ndishale dibue didi dishindika nzubu.

Ke mudi Maweja-Nangila muenze nanku.

Bualu bua dikema butuvua bamone!#21.42 Mis 118.22-23.

43— Ke Yezu kuamba kabidi ne: ke pandi nnujadikila ne: nebanunyenge Bukalenga bua Mvidi Mukulu, bua kubupesha tshisamba tshidi mua kukuama bimuma bilenga. [ 44Muntu wadishinda pa dibue edi, neatshibukilepu. Kadi pikala dibue diponena muntu, nedimuvingutule.#21.44 Mu mikanda mikuabu ya kale kanungu aka kakenaku to. Tangila Luk 20.18.]

45Bamfumu ba batuangaji ne Baparushe kumvua nsumuinu ya Yezu. Kujingululabu ne: udi utuamba tuetu. 46Nenku kukebabu muvuabu mua kumukuata. Kadi bavua batshina bantu, bualu bantu bavua bitabe ne: Yezu mmuambi.

Currently Selected:

Matayi 21: TSH96

Highlight

Copy