Matayi 19

Yezu udi ulongesha malu a pa dibaka

(Mar 10.1-12)

1Yezu mumane kuamba malu onsu aa, kumukaye mu Ngalileya, bua kuya mu buloba bua Yudeya, dia muamua dia musulu wa Yardene.#19.1 dia muamua dia Yardene: mmumue ne: luseke ludi diba dipatukila lua Yardene. 2Bantu bavule bavua bamulonda kuine aku. Yezu uvua ujikijamu babeedi masama.

3Baparushe bakuabu kusemena kuvua Yezu bua kumuteta. Kumukonkabu ne:

— Bilondeshile mikenji yetu, mulume udi mua kuipata mukajende pa bualu buonsu anyi?

4Yezu kuandamuna ne:

— Kanuena babale tshidi mukanda wa Mvidi Mukulu ulongesha anyi? Badi bafundamu ne: “Ku tshibangidilu, Mufuki wakabenza ewu mulume, ewu mukaji.#19.4 Tshib 1.27; 5.2.” 5Pashishe Mufuki kuamba ne: “Ke mudi mulume ushiya tatuende ne mamuende, bua balamatangane ne mukajende. Nanku bonsu babidi nebenze muntu umue.#19.5 Tshib 2.24.” 6Kabatshiena babidi, kadi badi muntu umue. Nanku muntu kapanduludi tshidi Mvidi Mukulu musange.

7Baparushe kumukonka ne:

— Kadi Moshe uvua muele mukenji, bua mulume apeshe mukajende mukanda wa dishipa dia dibaka, padiye musue kulekelangana nende, bua tshinyi?#19.7 Tangila Diel 24.1; Mat 5.31.

8Yezu kuandamuna ne:

— Moshe uvua muanyishe bua nuenu kubenga bakaji benu, bualu nudi ne muoyi mupape. Kadi ku tshibangidilu kabivua nanku to. 9Ndi nnujadikila ne: muntu yonsu udi ubenga mukajende, usela mukuabu, udi muena tshiendenda (Katuena tuamba bua bantu badi bangatangana mu buendenda).

10Balongi bende kumuambila ne:

— Padi bualu bua mulume ne mukaji buikale nanku, ki mbimpe kusela to.

11Yezu kubandamuna ne:

— Bantu bonsu kabena mua kuanyisha dilongesha edi to, kadi amu badi Mvidi Mukulu mupeshe lungenyi lua kudiumvua. 12Kudi malu mashilangane adi apangisha bantu bua baselangane. Bamue bantu kabena mudi balume, katshia babalela kudi bamamuabu. Bakuabu mbabenze nanku kudi bantu. Banga kabena basela ku budisuile buabu, bualu bua Bukalenga bua mu diulu. Udi mua kumvua dilongesha edi, wasangana kudiumvua anyiee? (Umvuee!)

Yezu udi wela bana batekete lupemba

(Mar 10.13-16; Luk 18.15-17)

13Bantu kuya ne bana kudi Yezu, bua abatenteke bianza, abalombele kudi Mvidi Mukulu. Kadi balongi ba Yezu kutandisha bantu abu. 14Yezu kuamba ne:

— Lekelayi bana bavue kundi. Kanubakandiki to. Bualu Bukalenga bua mu diulu mbua badi bu bana.

15Kubatentekaye bianza. Pashishe kumukaye muaba awu.

Nsongalume muena mpetu

(Mar 10.17-31; Luk 18.18-30)

16Muntu kampande uvua muye kudi Yezu, umukonka ne:

— Mulongeshi, bua meme kupeta muoyi wa kashidi, ndi ne bua kuenza bualu buimpe kaayi?

17Yezu kumuebeja ne:

— Udi unkonka bua kumanya bualu budi buimpe bua tshinyi? Udi muimpe udi amu umue. Pawikala musue kupeta muoyi kudiye, itaba ku mikenji yende.

18Muntu awu kukonka ne:

— Ngitabe ku mikenji kaayi?

Yezu kuandamuna ne:

— Kushipi muntu. Kubueledi mukaji wa bende mu nzubu. Kuibi. Kushiminyinyi muntu bualu. 19Nemeka tatuebe ne mamuebe. Nanga mukuebe muudi mudinange wewe mene.#19.19 Tangila Tshim 20.12-16; Diel 5.16-20; Lev 19.18.

20Nsongalume kumuandamuna ne:

— Ndi mukumbaje mikenji yonsu ayi. Tshindi ne bua kuenza kabidi ntshinyi?

21Yezu kumuandamuna ne:

— Paudi musue kuikala muakane tshishiki,#19.21 Fuanyikija ne 5.48. uye kupana bionsu biudi nabi, wambike bapele makuta abi. Nanku newikale ne biuma mu diulu. Pashishe ufike bua kundonda.

22Kadi nsongalume umvua nanku, kuyaye mubungame bikole, bualu uvua ne mpetu ya bungi.

23Pashishe Yezu kuambila balongi bende ne:

— Ndi nnujadikila bulelela ne: bidi bikole bua muena biuma kubuela mu Bukalenga bua mu diulu. 24Ndi nnujadikila kabidi ne: bu mudibi bikole bua nyama wa kamelu kubuela mu disu dia kashingi, ke mudibi bikole bipite bua muena mpetu kubuelaye mu Bukalenga bua Mvidi Mukulu.

25Balongi bumvua miaku eyi, kukemabu bikole, bakonka ne:

— Nanku udibu mua kusungila nnganyi?

26Yezu ubatangila, kubambilaye ne:

— Ebi bidi bikolela bantu. Kadi bionsu bidi biteketela Mvidi Mukulu.

27Ke Petro kuebeja Yezu ne:

— Mona, tuetu tudi bashiye bionsu bua kukulonda. Kadi tshituapeta ntshinyi?

28Yezu kubambila ne:

— Ndi nnujadikila bulelela ne: pasomba Muana wa muntu mu nkuasa wende wa lumu mu buloba bupiabupia,#19.28 Fuanyikija ne Dan 7.14. nuenu bavua bandonde, nenusombe penu mu nkuasa dikumi ne ibidi, bua kulumbuluisha bisamba dikumi ne bibidi bia bena Izrayele. 29Kabidi muntu yonsu udi ushiya mu dina dianyi nzubu yende, bana babu ba balume ne ba bakaji, tatuende, mamuende, bana badiye mulele, nansha madimi ende, neapete bipite misangu lukama. Neapete kabidi muoyi wa kashidi. 30Kadi ba bungi badi mpindiewu ba kumpala, nebikale ba ndekelu. Ba bungi badi mpindiewu ba ndekelu, nebikale ba kumpala.

Currently Selected:

Matayi 19: TSH96

Highlight

Copy