Matayi 17

Balongi basatu mbamone butumbi bua Yezu

(Mar 9.2-13; Luk 9.28-36)

1Matuku asambombu mamane kupita, Yezu kuangata Petro, Yakobe ne Yowanane, muanabu ne Yakobe, kuya nabu ku mukuna mutumbuke. Kuine aku bavua amu nkayabu. 2Yezu kuandamuka mpala, balongi bende bamone. Mpala wende kukenka bu diba. Bilamba biende kutoka too.#17.2 Fuanyikija ne 2 Pet 1.16-18. 3Diakamue balongi kumona Moshe ne Eliya, bayukila ne Yezu. 4Ke Petro kuambila Yezu ne:

— Mfumu, ndisanka kaayi dia kuikala muaba ewu! Bu wewe musue, nengase apa ntenta isatu, umue webe, wa Moshe umue, ne munga wa Eliya.

5Patshivua Petro wakula, divuba dikenka kubabuikila. Diyi kumvuika mu divuba ne:

— Ewu ke Muananyi menemene, undi munange. Yeye udi unsankisha bikole. Numuteleje.#17.5 Tangila 3.17 ne diumvuija .

6Balongi bumvue nanku, kudielabu mpala panshi. Bowa kubakuata bikole. 7Ke Yezu kusemena kudibu, kubalenga, wamba ne:

— Jukayi! Kanutshinyi!

8Balongi babanduluka, kabatua bamona muntu mukuabu, kadi anu Yezu nkayende.

9Patuabu bapueka ku mukuna, Yezu kubakandika ne:

— Kanuambidi muntu malu anudi bamone aa, too ne pabika Muana wa muntu ku bafue.

10Pashishe balongi kukonka Yezu ne:

— Balongeshi ba mikenji badi balongesha ne: Eliya udi ne bua kudianza kufika, bua tshinyi?#17.10 Fuanyikija ne Mal 3.23.

11Yezu kuandamuna ne:

— Bulelela, Eliya udi ne bua kufika bua kuakaja bionsu. 12Kadi ndi nnujadikila ne: Eliya ukadi mumane kufika. Bantu kabatua bamujingulula, kadi batua bamuenzela muvuabu basue. Ke muakengeshabu kabidi Muana wa muntu.

13Balongi kumanya ne: udi utuambila bua Yowanane-Batiste.

Muana muena tshiseke

(Mar 9.14-29; Luk 9.37-43a)

14Bamane kufika pabuipi ne bantu, ke muntu kusemena kudi Yezu, kumufuila binu panshi, 15wamba ne:

— Mfumu, umtuileku muananyi wa balume luse. Udi ne disama dia tshiseke,#17.15 Tangila 4.24 ne diumvuija . ukenga bikole. Misangu mitule udi upaluka, udishinda mu kapia, nansha mu mayi. 16Mvua mumufikishe kudi balongi bebe. Kadi kabatua ne bukole bua kujikija disama diende.

17Yezu kuandamuna ne:

— Nuenu nudi bantu babi, badi kabayi bitaba Mvidi Mukulu! Nenshale nenu kabidi matuku bungi munyi? Nengikale amu ndengulula malu enu too ne ku diba kaayi? Semenayi ne muana kundi apa.

18Ke Yezu kukanyina mukishi mubi. Kupatukawu munda mua muana. Disama dia muana kujika amu pa diba adi.

19Nanku balongi kusemena kudi Yezu pa nkayabu, bamukonka ne:

— Tuetu tuvua bapange kupatula mukishi mubi ewu bua tshinyi? 20Ke Yezu kubandamuna ne:

— Bualu ditaba dienu kadiena dikumbane to. Ndi nnujadikila bulelela ne: bu nuenu ne ditaba bunene bua lutete lua mutshi wa lusanga,#17.20 bunene bua lutete lua mutshi wa lusanga: tangila 13.32. Mu tshiena ebrewu, mbafunde ne: bunene bua lutete lua mutshi wa sinapi (moutarde). Lutete lua mutshi awu luvua lumueneka bu lukese ku yonsu. malu onsu adi anuteketela. Diba adi, nenutumine mukuna ewu diyi ne: “Umuke apa, uye papa,” mukuna kuya! [ 21Kadi mukishi mubi wa mushindu ewu, badi baupatula anu ku ditendelela, ne ku dijila dia biakudia.#17.21 Kabena basangana kanungu aka mu mikanda yonsu ya kale to.]

Yezu udi umanyisha tshiakabidi lufu ne dibika

(Mar 9.30-32; Luk 9.43b-45)

22Dituku dikuabu balongi kusangila bonsu pamue mu Ngalileya. Yezu kubambila ne:

— Bantu nebakuatshishe Muana wa muntu. 23Nebamushipe. Kadi dituku disatu neabike ku bafue.

Balongi bumvue nanku, kubungamabu bikole.

Tshitadi tshia nzubu wa Mvidi Mukulu

24Yezu ne balongi bende bafike mu Kefamawume, balambuishi ba tshitadi tshia nzubu wa Mvidi Mukulu kusemena kudi Petro, bamukonka ne:

— Mulongeshi wenu kena ulambula tshitadi tshia nzubu wa Mvidi Mukulu anyi?#17.24 Tangila Tshim 30.11-16.

25Ke Petro kubandamuna ne:

— Eyowa, utu utshilambula.

Kadi pavua Petro ubuela mu nzubu, ke Yezu kudianza kumukonka ne:

— Simone, udi wela meji munyi? Panuapa, badi ne bua kuteta bakalenga ba matunga bitadi ne milambu mbanganyi? Bena diku diabu anyi, peshi mbantu bakuabu?

26Petro kuandamuna ne:

— Bantu bakuabu ke badi bateta.

Ke Yezu ne:

— Nanku bena diabu kabena bateta nansha. 27Kadi bua katubafikishi munda, uye mu dijiba, ela ndobu. Mushipa uwadianza kukuata, uubulula mukana. Neusanganemu makuta. Uangate, uye kuteta tshitadi tshiebe, ne tshianyi.

Currently Selected:

Matayi 17: TSH96

Highlight

Copy