Matayi 16

Baparushe ne Basaduke badi balomba tshishima

(Mar 8.11-13; Luk 12.54-56)

1Baparushe ne Basaduke kuya kudi Yezu bua kumuteta. Bavua bamulomba bua abaleje ne tshishima mudi bumfumu buende bufume kudi Mvidi Mukulu. 2Kadi Yezu kubandamuna ne:

— Dilolu, nuenu bamona kulu kukunze, nudi nuamba ne: “Maloba nekuikale kulenga.” 3Mu dinda, padi kulu kufikuluke, nudi nuamba kabidi ne: “Lelu mvula nealoke.” Nanku nudi bamanye mua kujingulula bidi bienzeka padi kulu kuandamuke. Kadi munudi kanuyi mua kujingulula bidi bienzeka matuku aa mbishi?#16.3 Mu mikanda mikuabu ya kale, ki mbafunde miaku ya Yezu itudi tubala mu kan. 2 ne kan. 3 nansha. 4Bena lelu, nansha bobu bantu babi, badi kabayi bitaba Mvidi Mukulu, badi amu balomba tshishima. Kadi kabakubaleja tshishima tshikuabu to, amu tshia Yona.#16.4 Fuanyikija ne 12.39-40.

Yezu kubashiya nanku, kuya.

Balongi kabena ne lubatshi

(Mar 8.14-21)

5Pavua balongi basabuka dishiya dia dijiba, bavua bapue muoyi bua kuangata mampa. 6Yezu kubambila ne:

— Dimukayi, kanuangatshi buanga bua mampa bua Baparushe ne Basaduke.

7Balongi bumvua nanku, kuambilanganabu ne:

— Udi wamba nanku, bualu katuena bangate mampa.

8Yezu kumanya tshiyuabu bambilangana, kubebejaye ne:

— Nudi nuamba ne: mbua patudi katuyi ne mampa, bua tshinyi? Nudi ne ditaba dikese! 9Kanuena banji kujingulula malu anyi? Kanutshiena bavuluke mampa atanu, amvua mukosoluele bantu binunu bitanu, ne bisaka bia bisunsukila binuvua basangishe anyi?#16.9 Tangila 14.15-21. 10Kanutshiena bavuluke mampa muanda mutekete, amvua mukosoluele bantu binunu binayi, ne bisaka bia bisunsukila binuvua basangishe anyi?#16.10 Tangila 15.32-38. 11Munudi kanuyi bumvue mbishi? Tshivua muakule bua mampa to! Dimukayi. Kanuangatshi buanga bua mampa bua Baparushe ne Basaduke.

12Ke balongi kushisha kumvua ne: kavua mubambile bua badimuke ku buanga bua mampa, kadi amu ku dilongesha dia Baparushe ne Basaduke.

Wewe udi Kristu! Wewe udi Petro!

(Mar 8.27-30; Luk 9.18-21)

13Yezu kuya mu buloba buvua pabuipi ne tshimenga tshia Kezareya wa Filipe. Kukonkaye balongi bende ne:

— Bantu badi bamba ne: Muana wa muntu nnganyi?

14Kumuandamunabu ne:

— Bamue badi bamba ne: udi Yowanane-Batiste, bakuabu ne: udi Eliya, badipu kabidi ne: udi Yirmeya, nansha muambi mukuabu.

15Yezu kubakonka kabidi ne:

— Kadi nuenu, nudi nungamba ne: ndi nganyi?

16Simone Petro kuandamuna ne:

— Wewe udi Kristu, Muana wa Mvidi Mukulu udi ne muoyi.

17Pashishe Yezu kumuambila ne:

— Wewe Simone, muana wa Yowanane, udi wa diakalenga, bualu udi mukujanduile bulelela ebu, ki mmuntu wa mubidi ne mashi to, kadi nTatu wanyi udi mu diulu. 18Kadi meme ndi nkuambila patoke ne: wewe udi Petro, dibue. Nanku pa dibue edi nengasepu Tshisumbu tshia bantu banyi. Nansha lufu mene kaluakutshibutula to.#16.18 Fuanyikija ne Ef 2.20. — Petro: mu tshiena ngreke muaku “Petra” udi umvuija: dibue, lubuebue. — Lufu: mu tshiena ngreke mbafunde: biibi bia kandondu ka bafue. 19Nenkupe nsapi ya Bukalenga bua mu diulu: tshiwakandika pa buloba, nebatshikandike ne mu diulu; tshiwanyisha pa buloba, nebatshianyishe ne mu diulu.#16.19 Fuanyikija ne 18.18; Yow 20.23.

20Pashishe Yezu kukandika balongi bende bua kabambidi muntu ne: Yezu udi Kristu.

Yezu udi umanyisha bua lufu luende ne dibika

(Mar 8.31—9.1; Luk 9.22-27)

21Bituadijila ku tshikondu atshi, Yezu kubanga kumanyisha balongi bende patoke ne: — Ndi ne bua kuya mu Yerushalayime. Muine amu bakulu, batuangaji banene, ne balongeshi ba mikenji, nebankengeshe bikole. Nebanshipe, kadi dituku disatu nembike ku bafue.

22Ke Petro kuya nende ku luseke, kutuadija kumutandisha, wamba ne:

— Mfumu, Mvidi Mukulu akuepule ku bualu ebu! Bualu bua nanku kabinuenzekedi!

23Kadi Yezu kukudimuka, kuambila Petro ne:

— Umbuka kundi, uye kule, diabolu! Udi ukeba kundenduisha! Bualu meji audi wela ki nga kudi Mvidi Mukulu to, kadi nga kudi bantu.

24Pashishe Yezu kuambila balongi bende ne:

— Pikala muntu musue kuenda nanyi mu njila, anji kudibenga, ambula wende mutshi mutshiamakane, andonde. 25Bualu muntu udi musue kusungidila muoyi wende, neaujimije. Kadi wajimija muoyi wende bualu buanyi, neaupete. 26Muntu udi upeta buloba bujima, kadi ujimija muoyi wende, nebimuambuluishe ku tshinyi? Kakuena tshidi muntu mua kufila bua kupeta tshiakabidi muoyi wende. 27Bualu Muana wa muntu neafike, mu butumbi bua tatuende, pamue ne batumibue bende. Diba adi neafute muntu yonsu, bilondeshile malu avuaye muenze.#16.27 Fuanyikija ne Mis 62.13; Rom 2.6. 28Bulelela, ndi nnuambilamu ne: bamue batudi nabu apa, kabakufua kabayi bamona Muana wa muntu ufika mu Bukalenga buende.

Currently Selected:

Matayi 16: TSH96

Highlight

Copy