Baruke 3
3
1“Maweja-Nangila muena bukole buonsu, Mvidi Mukulu wa Izrayele, tudi mu dikenga, kabidi tudi batekete mu maboku, tudi tukubikila bua utuambuluishe. 2Maweja-Nangila ututeleje, umvue luse bualu tudi bakuenzele bibi. 3Wewe udiku kashidi. Kadi tuetu tudi mu njila wa kujimina kashidi kashidi. 4Nenku wewe, Maweja-Nangila muena bukole buonsu, Mvidi Mukulu wa Izrayele, uteleje dilomba dietu, tukadi bu bantu bafue. Tudi ndelanganyi ya bantu bavua bakutombokela, bavua kabayi bateleja diyi dia Maweja-Nangila Mvidi Mukulu wetu. Ke padi makenga matukuate. 5Kuena mua kuvuluka buenzayi bua bankambua betu. Kadi lelu, uvuluke amu bukole buebe ne lumu luebe, 6bualu wewe udi Maweja-Nangila Mvidi Mukulu wetu! Tudi tukutumbisha! 7Ke patudi bitabe bua kunemeka bukalenga buebe ne kukutendelela. Tuetu bikale mu bupika, tudi tukutumbisha, bualu tudi bele nyima ku malu mabi avua bankambua betu bakuenzela. 8Tuetu tudi lelu kule mu ditunga dia bende muudi mututangalaje. Bantu badi batupenda, batuela milawu. Kadi tudimu bua tudilengeje, tulekela buenzayi buonsu bua bankambua betu bavua bakubenga wewe, Maweja-Nangila Mvidi Mukulu wetu.”
MEJI
Bena Izrayele badi bapetula Meji
9Nuenu bena Izrayele, telejayi mibelu
idi mua kunupetesha muoyi.
Teyayi matshi bua mibelu eyi,
ibuele munda muenu, nupete meji.
10Nuenu bena Izrayele, munudi mu ditunga dia baluishi mbishi?
Munudi nukulakajila mu buloba bua bende mbishi?
11Nuenu bena Izrayele, munudi nulenga bantu bafue, nupia mikiya,
kabidi mudi bantu banubadila mu mulongu
wa badi bamana kubuela mu kandondu ka bafue mbishi?#3.11 Kabena bajadika miaku idi mu kanungu aka bimpe.
12Bualu nudi bamane kupetula mpokolu wa meji.
13Bu nuenu balonde njila wa Mvidi Mukulu,
nuvua mua kusomba ne ditalala kashidi.
14Kebayi mua kumanya muaba unudi mua kupetela meji, bukole ne lungenyi.
Nanku nenumanye kabidi diakamue muaba unudi mua kupetela muoyi,
bua nulale panu, nuboboke, nuikale ne ditalala,#3.14 Tun. 9-14: fuanyikija ne Diel 30.15-20; Nsum 4.20-22; Sir 32.14; 34.14. mesu enu aleja disanka.
Muntu nansha umue kena mua kutandula muaba udi Meji
(Yob 28.12-17; Nsum 1.1-9)
15Muntu ukadi musangane muaba udi Meji masombe nnganyi?
Ukadi mubuele muaba udiwu masokome nnganyi?
16Mbamfumu ba matunga anyi?
Mbantu badi bamuna nyama ya difu anyi?
17Nansha badi mua kuikala bantu badi banaya ne nyunyi ya mulu anyi?
Badi mua kuikala nansha bantu badi bakungija tshiamu tshitoke tshia mushinga mukole,
ne mpawungi, bidi bantu batekemena, anyi?
18Badi mua kuikala bena midimu ya bianza,
badi batula bintu ne tshiamu tshitoke tshia mushinga mukole,
bakemesha bantu bua mudimu wabu anyi?
19Bonsu abu mbamane kubutuka, mbapueke mu kandondu ka bafue.
Bantu bakuabu mbamana kubapingana.
20Bavua balela ne bana,
babu bana abu badi panu,
kadi kabena bamanye njila udi ufika ku Meji nansha.
21Kabena bajingulula njila udibu mua kuapetela.
Kabena banji kuapeta.
Bana babu menemene bavuabu balele bavua bapambuke
mu njila uvua batatuabu balonda.
22Bantu kabavua bumvua baatela, mu ditunga dia Kenaane.
Bantu kabavua baamona mu tshimenga tshia Temane.#3.22 Fuanyikija ne Yirm 49.7.
23Kabidi nansha ndelanganyi ya Agare,
ivua yakeba panu, bangenda mushinga ba bena Madiyane ne bena Temane,#3.23 Agare: tangila Tshib 16.15. — Madiyane: kabena bajadike miaku eyi bimpe, mu buena ngreke mbafunde ne: Merane, ntshitupa tshia buloba tshidibu kabayi bamanye muaba nansha umue.
kabidi ne beedi ba nsumuinu ne bena Meji mapiluke,
kabena bamanye njila udi ufikisha ku Meji to.
Kabena mua kudimukila nansha njila idi ifika ne ku meji nansha.
24Eyi! Bena Izrayele,
nudi nzubu udi Mvidi Mukulu munene wa bukole buonsu musombe.
Buloba buende mbualabale!
25Buloba buende kabuena ne nshikidilu.
Budi butumbuke, bantu kabena mua kubupima.
26Ku buloba aku, ke kudi kufumina bantu ba mfiondu ba ku tshibangidilu.
Bavua bantu bale, bamanye mua kuluangana myita.#3.26 Fuanyikija ne Tshib 6.1-4; Mj 14.6.
27Kadi Mvidi Mukulu kavua mubasungule,
nansha mubaleje njila udi ufika kudi Meji to.
28Kadi bavua babutuka, bualu kabavua bamanye mua kusunguluja malu to.
Bavua badibutuisha bua butatakane buabu.
29Muntu uvua mubande mulu bua kuangata Meji,
kupueka nawu panshi nnganyi?
30Muntu uvua musabuke mayi manene, kuya dia muamua,
pashishe kuasumba ku mushinga wa mpawungi wa mushinga mukole, nnganyi?
31Kakuena muntu nansha umue udi mumanye njila wa kupetela Meji.
Kakuena muntu nansha umue udi mua kubiika mushindu udibu mua kuapeta!#3.31 Tun. 29-31: fuanyikija ne Diel 30.11-14; Sir 1.2-6; Yow 3.13; Rom 10.6-8.
Mvidi Mukulu nkayende ke udi upa Izrayele Meji
32Kadi Mvidi Mukulu mumanyi wa bionsu ke udi mumanye Meji.
Amu bua lungenyi luende, yeye kutandula muaba udi Meji.#3.32 Fuanyikija ne Yob 28.27; Sir 1.8-9.
Kulongololaye buloba kashidi.
Pashishe kutekayemu nyama.
33Mvidi Mukulu kutuma butoke, bobu kubanga luendu!
Padiye ububikila, budi butumikila diyi diende, buzakala!
34Mitotu idi ikenkela miaba idiyi ne disanka.
35Padi Mvidi Mukulu uyibikila, idi itaba ne: “Tudipu!”
Dibulunge dionsu didi diela nsese ne musangelu bua kusankisha udi mudifuke.#3.35 Tun. 34-35: fuanyikija ne Yesh 40.26; Mis 19.2; Yob 38.7; Sir 43.9-10.
36Utua muyifuke awu, ke Mvidi Mukulu wetu!
Kakuena mukuabu to, amu yeye!
37Amu yeye ke udi mutandule njila onsu udi ufika ku Meji.
Uvua mumuleje bena tshisamba tshia Yakobe, muntu wende,
ne tshisamba tshia Izrayele, badiye munange.
38Biangatshile ku tshikondu atshi, bantu kumona Meji pa buloba.
Meji kusomba munkatshi mua bantu.#3.38 Tun. 37-38: fuanyikija ne Sir 24.8,10-12.
Currently Selected:
Baruke 3: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996