2 Bamakabe Diumvuija
Diumvuija
— Mukanda muibidi wa Bamakabe ki ntshitupa tshibidi tshia mukanda wa kumpala to. Kadi tshitupa tshinene tshia mukanda ewa ntshikosu tshia mukanda mukuabu wa bitupa bitanu, uvuabu bafunde kudi Yasone wa mu tshimenga tshia Sirene, muena Yuda, uvua mufunde mu ngakuilu wa bena Ngreke. Mukanda ewu udi utulondela malu avua menzeke biangatshile ku ndekelu kua bukalenga bua Seleyuside IV, uvua Antiyokuse IV Epifane mupingane mu bukalenga, too ne ku lufu lua Nikanore, mulombodi munene wa bena mvita ba Demetriyuse I, uvua Yudase Makabe mutshimune mu 160 bgbg ne Y.K. (tangila Diumvuija dia 1 Mak).
Kafundila ka mukanda nka kulomba bena Yuda badi basomba mu Ejipitu bua bavuluke pabu TSHIBILU tshia DIJIDILA dia nzubu wa Mvidi Mukulu wa mu Yerushalayime (tangila Yow 10.22). Yudase Makabe uvua munyenge baluishi nzubu awu, mumujidile tshiakabidi mu 165 nansha 164 bgbg ne Y.K. Kafundila aka kadi kamueneka patoke mu ntuadijilu wa mukanda (bit. 1 ne 2) mu mikanda ibidi idi bamfumu ba batuangaji ba bena Yuda ba mu Yerushalayime batumina bena Yuda ba mu Ejipitu.
Mu tshitupa tshibidi (bit. 3-7), badi batulondela muvua bena Ngreke, nansha bantu bavua baditua ku tshiabu, bibe binta bia tshijila bivua mu nzubu wa Mvidi Mukulu, babueja mu nzubu amu ditendelela dia nwidie ya bisamba bikuabu, bakengesha kabidi bena Yuda bua bayile ditaba diabu, bangate bibidilu ne ditendelela dia nwidie bia bena Ngreke.
Mu tshitupa tshisatu (bit. 8-15), mukanda udi utulondela muvua Yudase Makabe ne bena mvita bende batombokela biluilu bia bena Ngreke, babitshimune. Ke muvuabu mua kujidila nzubu wa Mvidi Mukulu, kupingajilulamu ditendelela dia bena Yuda. Pashishe mukanda udi utulondela muvua Yudase mutshimune baluishi bende misangu ne misangu, ne Nikanore mene, mulombodi munene wa bena mvita ba Demetriyuse I.
Mukanda udi utulondela bimpe amue malu adi kabidi mu mukanda 1 Makabe. Kadi bu mudi mufundi ne kipatshila kakuabu, kena ujadika bimpe misangu yonsu muvua malu enzeka ne tshidimu tshivuawu enzeka. Mudi kabidi malu abidi atudi tusangana amu mu mukanda ewu: Yudase udi utendelela Mvidi Mukulu bua bantu bafue, ulambula kabidi mulambu bua Mvidi Mukulu abajimijile mibi yabu (tshit. 12). Udi kabidi umona mu lungenyi, mudi mutuangaji munene wa kale Onyase ne muambi Yirmeya, bantu babidi ba tshijila ba kale, bakuila kudi Mvidi Mukulu bantu badi mu njiwu (tshit. 15). Ke malu abidi adi bena Mishyonyi kabayi batangile bu malu a ditaba.
Currently Selected:
2 Bamakabe Diumvuija: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996