2 Bamakabe 1
1
Mukanda wa kumpala mutumina bena Yuda badi mu Ejipitu
1“Bena Yuda badi mu Yerushalayime ne badi mu ditunga dia Yudeya, badi batumina bana babu badi mu Ejipitu#1.1 Bena Yuda bavua basomba mu Ejipitu biangatshile ku tshikondu tshia Yirmeya (tangila Yirm 43.2-7). mukanda, babajingila bupole ne diakalenga.
2“Mvidi Mukulu anuenzele bimpe! Avuluke ndondu uvuaye mutue ne bena mudimu bende, bavua bamulamate: Abrahame, Izake ne Yakobe. 3Anuambike bonsu muoyi wa kumukukuila, kabidi ne wa kuenza mudiye musue ne muenu muonsu. 4Anumanyishe diyi diende ne mikenji yende. Abueje bupole kunudi! 5Ateleje malomba enu, anulekele mibi yenu. Kanulekedi diba dia dikenga to! 6Ke tshitudi tulomba bualu buenu muaba ewu ne mpindiewu.
7“Mu tshidimu tshia 169, pa bukalenga bua Demetriyuse, tuetu bena Yuda tuvua banufundile ne: Bidimu ebi, dikenga ne lutatu bivua bibuele munkatshi muetu bua Yasone ne badi batua ku tshiende, bavua banyange Buloba bua Tshijila, ne bua Mukalenga#1.7 tshidimu tshia 169: tshikondu tshia Seleyuside: 143-142 bgbg ne Y.K. (tangila diumvuija mu 1 Mak 1.10). — Demetriyuse: mmomumue ne Demetriyuse II, mukalenga wa ba Seleyuside (tangila 1 Mak 1.8) uvua mu bukalenga mu 145-138, pashishe mu 129-125 bgbg ne Y.K. — Yasone: tangila 4.7-20. Mvidi Mukulu wetu. 8Kuoshabu tshiibi tshinene tshia nzubu wa Mvidi Mukulu. Kabidi kushipabu bantu bavua kabayi kalu. Ke patuvua batendelele Maweja-Nangila. Kutumvuaye. Tuetu kulambula milambu ya diosha ne ya ntete ya bukula. Tuetu kutemesha miendu ya mu nzubu wa Mvidi Mukulu, kuteka mampa a tshijila.”
9“Kadi mpindiewu, tudi Umulomba bua nuikale nuenza tshibilu tshia tuzubu tua Bisasa mu ngondu wa Kislewu#1.9 Tshibilu tshia tuzubu tua Bisasa tshitata mu ngondu wabu wa muanda mutekete (ngondu wa tshitema ne wa dikumi); badi batela ngondu wa Kislewu (ngondu wa dikumi ne umue ne wa dikumi ne muibidi) mmomumue ne dijidila dia nzubu wa Mvidi Mukulu (fuanyikija ne 10.5-6). matuku malondangana muanda mutekete.
10“Mu tshidimu tshia 188.#1.10 Mumue ne tshidimu tshia 124 bgbg ne Y.K.”
Mukanda muibidi: bena Yuda badi batumbisha Maweja-Nangila, panyima pa lufu lua Antiyokuse
“Bena Yuda badi mu Yerushalayime ne badi mu Yudeya, Tshipangu tshia bakulu ne Yudase, badi batumina Aristobule wa mu tshisamba tshia batuangaji ba Maweja-Nangila, mufidi wa ngenyi wa mukalenga Ptolemeye, ne bena Yuda badi mu Ejipitu mukanda, babajingila diakalenga ne bukole bua mubidi.#1.10 Yudase: Yudase Makabe muana wa mutuangaji Matatiyase (tangila 1 Mak 2.4 ne diumvuija). — Aristobule: muena Yuda wa mu Aleksandriya. — Ptolemeye: Ptolemeye VI Filometore; mukalenga wa bena Ejipitu (tangila diumvuija mu 1 Mak 1.8).
11“Mvidi Mukulu mmumpandishe ku njiwu minene. Tudi tumuanyisha bikole, bualu waluishi mukalenga bualu buetu.#1.11 mukalenga: Antiyokuse IV Epifane: tangila kan. 14 ne 1 Mak 1.10. 12Maweja-Nangila wipatshi bonsu bavua mu tshimenga tshia tshijila, bafika ne bia lufu bua kuluisha benamu. 13Mukalenga Antiyokuse uvua muye mu Persa ne tshiluilu tshiende tshivua tshimueneka katshiyi mua kukimina. Batuangaji ba nwidie mukaji, Naneya kushipabu ne budimu mukalenga ne tshiluilu tshiende.#1.13 Naneya: nwidie mukaji wa bena Mezopotamiya, bavua bamufuanyikija ne Artemise. 14Bualu Antiyokuse mushindikija kudi balunda bende, kubuelabu mu nzubu wa nwidie awu bua kumusela. Pine apu uvua ne dijinga dia kuangata mpetu mipite bungi ivua mu nzubu wanwidie awu. 15Batuangajibamu nzubu wa Naneya kuleja mpetu yonsu patoke. Mukalenga Antiyokuse ne balunda bende bakuabu kubuela munda mua nzubu wa nwidie. Kadi batuangaji kuinjila muaba wabu wa tshijila pabuedi Antiyokuse. 16Kunzululabu tshiibi tshia mu tshisasa tshia nzubu, kuasabu mukalenga ne bantu bende mabue. Kubakosabu bidimba ne mutu, kuelelabu bavua pambelu mitu yakakosabu ayi. 17Mvidi Mukulu atumbe kashidi, bualu yeye ngudi mushipeshe badi bamutombokela! Atumbe tshiendelele!
Tshishima tshia kapia ka tshilambuilu
18“Tudi tuenza tshibilu tshia dijidila dia nzubu wa Mvidi Mukulu ne tshia tuzubu tua Bisasa mu matuku makumi abidi ne atanu a ngondu wa Kislewu. Tudi tunumanyisha bua nuenze penu tshibilu etshi. Ke munudi mua kuvuluka kapia kavua kamueneka diba divua Nehemiya, mumane kuasulula nzubu wa Mvidi Mukulu ne tshilambuilu,#1.18 tuzubu tua Bisasa: fuanyikija ne 1.9 ne diumvuija. — kuasulula…: bualu ebu kabuena bufuanangana ne butudi bamanye miaba mikuabu to. Bualu tshilambuilu tshivua tshiasulula mu 538, nzubu wa Mvidi Mukulu mu 515 bgbg ne Y.K. Kabidi midimu ivua Nehemiya muenze ivua mituadija mu 445 too ne ku 425 bgbg ne Y.K., (tangila Ezr 3.1; 6.14). mulambule milambu. 19Bualu, diba divuabu baye ne batatuetu ku Persa,#1.19 baye…Persa: mmumue mu bupika mu Babilone; Persa udi uleja ditunga dionsu didi luseke ludi diba dipatukila lua musulu wa Perate. bamue batuangaji balamatshi ba Mvidi Mukulu kuangatabu kapia ka tshilambuilu, kukateka mu musokoku mu lubuebue luvua bu tshiina katshiyi ne mayi. Bavua basokoke kapia bikole mushindu uvua muntu nansha umue kayi mua kukamona. 20Bidimu bivule bimane kupita, ku bulongolodi bua Mvidi Mukulu, mukalenga wa bena Persa kutumaye Nehemiya mu Yerushalayime. Awu kulomba kudi bena diku dia batuangaji bavua basokoke kapia bua baye kukakeba. 21Kadi bu muvuabu batumvuija ne: kakuena kapia to, anu bintu bia muendundu bikuatakana bu mafuta, Nehemiya kutuma diyi bua bamutuadile tshitupa tshia bintu abi. Diba dituabu balongolole bintu bia kulambula, Nehemiya kutumina batuangaji diyi bua bamiamine bintu abi pa nkunyi ne pa milambu ivua mitekapu. 22Benza nanku, dibungi ditangalaka, munya utema, kapia kanene kutema, bantu bonsu kukema. 23Diba divua kapia aku kuosha milambu, batuangaji bavua batendelela pamue ne bantu bakuabu bonsu. Yonatane uvua wakula, pashishe bonsu bavua bapunguluja pamue ne Nehemiya.#1.23 Yonatane ewu udi mua kuikala mutuangaji munene udibu bafunde mu Neh 12.11. — Fuanyikija ne Yudt 15.13-14. 24Ditendelela adi divua nenku:
“Maweja-Nangila, Maweja-Nangila Mvidi Mukulu wetu, Mufuki wa binta bionsu, wa kutshina, wewe udi mukole, muakane, muena luse. Wewe nkayebe udi mukalenga, wewe udi muimpe. 25Wewe nkayebe udi ne luse, kabidi udi ne muoyi muakane, udi muena bukole bonsu ne wa kashidi, ukeba amu bua kupandisha bena Izrayele ku bubi buonsu. Wewe ke uvua musungule bankambua betu bua bikale bantu bebe, mubateke pa nkayabu bua bakuenzele mudimu. 26Anyisha mulambu ewu utudi tulambula bua bantu bebe bena Izrayele bonsu. Ubalame bualu mbantu bebe, ubambuluishe bua bakuenzele mudimu. 27Pingaja munkatshi muetu bonsu bavua batangalaja.#1.27 Fuanyikija ne Diel 30.3-5. Patula mu bupika badi kua bende. Fuila bantu bebe badibu bapepeja, bakengesha luse, bua bukua matunga bukumanye muudi Mvidi Mukulu wetu. 28Nyoka bonsu badi batukengesha, batufuisha bundu padibu baditambisha. 29Teka tshisamba tshiebe mu ditunga diebe dia tshijila bu mutua Moshe muambe ne: Newenze.#1.29 Fuanyikija ne Tshim 15.17.”
30“Pashishe batuangaji kuimba misambu. 31Milambu mimane kupia yonsu mijike, Nehemiya kutuma diyi bua bitshikijile binta bia muendundu bitua bishale pa mabue manene. 32Bitshikija amu nanku, kapia kujikuka, kadi dinkenke diaku divua dishadile ku dia kapia kavua katema ku tshilambuilu.
33“Bualu butua buenzeka kutangalaka mu buloba bujima. Mukalenga wa bena Persa kumvuaye muvuabu basangane binta bia muendundu muaba uvua batuangaji batuabu baye nabu ku bupika basokoke kapia. Kumvuaye kabidi mutua Nehemiya ne balunda bende bangate binta bia muendundu bua kuosha nabi mulambu pa tshilambuilu. 34Nanku, mukalenga mumane kukenketa bualu abu, mmujadike, kueleshaye lupangu muaba awu, bua bautangile bu muaba wa tshijila. 35Muaba awu uvuile muaba wa tshimuenenu tshia binta bitule bia mukalenga. Utua usankisha nabi bantu batua pa diende.
36“Nehemiya ne bantu bende batua babikila binta abi ne: Neffare, mmumue ne: ‘Diumusha mikiya,’ kadi bantu ba patupu badi babikila ne: ‘Nafte.#1.36 Mufundi wa bualu ebu mmumanye kabidi ne bena Persa bavua batendelela kadilu (tangila kan. 34).’ ”
Currently Selected:
2 Bamakabe 1: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996