2 Bamakabe 7
7
Bana muanda mutekete ne mamuabu badi bafuila ditaba
1Dituku dikuabu kukuatabu bana muanda mutekete pamue ne mamuabu. Kubafundilabu mfimbu ne mikaba, kubakengeshabu bikole bua badie munyinyi wa ngulube mukandika kudi Mvidi Mukulu.#7.1 munyinyi wa ngulube: tangila diumvuija mu 6.18. 2Umue wa kudibu kuebejaye mukalenga mu dina dia bonsu ne:
— Tshiudi musue kukonka ne kumanya kutudi ntshinyi? Umanye ne: tukadi pa kufua pa mutu pa kubenga meyi a bankambua betu.
3Mukalenga kumvua tshiji tshikole. Kutumaye diyi bua bateke nkanu ne ngesu pa kapia kanene. 4Bionsu bipie bikunze, kutumaye diyi bua bakose ludimi lua uvua wakula mu dina diabu awu, bamuvule ne dikoba dia ku mutu, bamukose bianza ne makasa, bana babu ne mamuende kabidi batangila. 5Bamukosa bionsu bajikija, mukalenga kutuma kabidi diyi bua bamusemeje pabuipi ne kapia, yeye mutshikale ne muoyi, bamuteke pa nkanu. Muinshi kumuangalaka ku nkanu. Diba adi bakuabu ne mamuabu kukoleshangana ku muoyi pamue, mua kufua ne bukitu, bambilangana ne:
6— Maweja-Nangila Mvidi Mukulu wetu udi umona makenga etu. Bulelela neatufuile luse, bu muvua Moshe muambe kale bua kudiwula badi basue kuvila Mvidi Mukulu ne: “Neafuile badi bamukuatshila mudimu luse.#7.6 Tangila Diel 32.36.”
7Muana wa kumpala ufua mushindu awu, kufikabu ne muibidi pa muaba wa tshishipelu awu. Bamane kuvula dikoba dia mutu ne nsuki, ke kumukonkabu ne:
— Udi udia munyinyi wa ngulube anyi, peshi udi musue bua bakukose bidimba biebe bionsu ku tshimue ku tshimue?
8Kadi kuandamunaye mu ngakuilu#7.8 Ke muakulu wa bena Ebrewu, nansha muvuabu bakula nangananga muakulu wa bena Arame mu tshikondu atshi. wabu ne:
— Katshia tshiena mudie bintu abi to.
Ke kumukengeshabu muvuabu bakengesha wa kumpala amu. 9Pa kukula muoyi kuambaye mukalenga ne:
— Mushipianganyi wee! Udi utumbusha mu muoyi wa ku bantu eku, kadi Mukalenga wa bionsu, muena meyi atudi tufuila neatubishe bua tupete muoyi wa kashidi.#7.9 muoyi wa kashidi: fuanyikija ne Dan 12.2; Ebr 11.35.
10Kubangabu kukengesha muisatu. Kutumabu diyi bua apatule ludimi. Yeye kulupatula lukasa. Kuololaye bianza kayi utshina lufu. 11Ke kuambaye ne bukitu ne:
— Mvidi Mukulu wa mu diulu mmumpe bidimba ebi. Ndi ngitaba bua kubilambula bua meyi ende. Ndi ntekemena se: yeye neabimpingajile!
12Mukalenga ne bonsu bavuaye nabu bavua amu bakema bua muoyi mukole wa nsongalume, uvua umvua bisama kabiyi bimuenzela kalu nansha kamue.
13Yeye mumane kufua, ke kutuadijabu kukengesha muana muinayi amu ne tshikisu tshia mushindu wa mumue awu. 14Pa kukula muoyi, kuambaye mukalenga ne:
— Ndi ne disanka bua padi bantu banshipa, bualu tudi bashindike se: Mvidi Mukulu neatubishe ku bafue bu nuwuaye mulaye. Kadi wewe Antiyokuse kuakubika ku bafue bua kupeta muoyi to.
15Kufikabu ne muitanu. 16Awu mutangila mukalenga talalaa, kumuamba ne:
— Udi amu ne bumfumu bua kuenzela bantu biudi musue, kadi neufue pebe bu bobu. Kuedi meji ne: Mvidi Mukulu mmulekela tshisamba tshietu to. 17Wewe anji kuindila, neumone bukole buende. Neakukengeshe ne ndelanganyi yebe.#7.17 Badi batela lufu lubi lua Antiyokuse kabidi ne lufu lua tshinyangu lua bana bende ne lua biikulu bende (tangila tshit. 9; 14.2; 1 Mak 11.17; 13.31).
18Kufikabu ne muisambombu, pakavuaye pa kufua, kuambaye mukalenga ne:
— Kuena mua kudidinga patupu to! Tudi bapete makenga bualu bena tshisamba tshietu bavua benzela Mvidi Mukulu bibi. Ke padi bipupu bibi ebi bitukuata.#7.18 Fuanyikija ne kan. 32; 5.17. 19Kadi umanye wewe pebe nebakunyoke, bualu wabangi kuluisha Mvidi Mukulu nkayende!
20Munkatshi muabu utuvua mua kutamba kukema malu ende, kabidi kulama tshifukilu tshiende ke mamuabu. Nansha yeye mumone bana bende muanda mutekete bafile mu dituku dimue, uvua mumvue bionsu ne bukitu, bualu uvua utekemena kudi Maweja-Nangila. 21Mamu uvua ubela muana yonsu mu ngakuilu wabu. Uvua unanga bana bende ne muoyi wa bu mamu, kadi ubaleja kabidi ne bukitu bu bua muntu mulume, ubambila ne:
22— Tshiena mumanye munudi bavue kungikila. Ki mmeme udi munupe mueyelu nansha muoyi to. Kabidi ki mmeme udi mukuatakaje bitupa bia mubidi wenu to. 23Nenku, Mufuki wa bintu bionsu, ke udi muenze muntu. Bionsu bidi mu bianza biende. Kadi bu mudiye ne luse, neanupingajile mueyelu ne muoyi, bualu nudi nubilambula mpindiewu bua numone mua kulama mikenji yende.
24Antiyokuse kuela meji ne: mamu awu udi umpepeja, umpenda. Nanku bu muvua muana mukala mutshikale ne muoyi, mukalenga kuenza muonsu bua muana anyishe bua kulekela kulonda bibidilu bia bankambua babu. Uvua mumulaye, muditshipe bua kumupa biuma ne muanzu, kumuteka mu mulongu wa “balunda ba Mukalenga,#7.24 Bu muvuaye kayi mumanye muakulu wa bena Ebrewu, Antiyokuse kavua mumanye tshivua mukaji wamba (fuanyikija ne kan. 27). — balunda ba Mukalenga: tangila 1 Mak 2.18 ne diumvuija.” kumupa ne mudimu munene, pikalaye mubenge bionsu abi. 25Nsongalume kavua muteleje bivua mukalenga wamba abi to. Ke mukalenga kubikidisha mamuende, bua kubelaye nsongalume bua apande. 26Bakabela mamu mutantshi mule, mamu kuitaba pende bua kuyukila ne muanende. 27Mamu kubenga bionsu bivua mukalenga wa tshikisu muambe abi, kuinama kudi muanende, kuambila muana mu ngakuilu wabu ne:
— Muananyi, mfuilaku luse. Meme mvua nebe ngondu tshitema, meme kukuamusha bidimu bisatu, kukudisha ne kukukolesha too ne ku mpindiewu. 28Ndi nkusengelela muananyi: Tangila mulu ne panshi, mona bionsu bidipu, umanye se: Mvidi Mukulu mmubifuke amu patupu. Nansha bantu uvua mubafuke amu mushindu awu. 29Kutshinyi mushipianganyi awu to. Kadi udileje pebe mupuangane bu bana benu. Anyisha bua kufua, bua nakusangane nabu dituku didi Mvidi Mukulu ne bua kutufuila luse.
30Mamu utula amu meyi, nsongalume kuamba ne:
— Nudi bindile tshinyi? Tshiena ngitaba meyi a mukalenga to. Ndi ngitaba amu diyi dia Mvidi Mukulu divua Moshe mupeshe batatuetu. 31Kadi wewe mukebi wa tshipupu tshidi tshishipa bena Ebrewu, tshianza tshia Mvidi Mukulu netshikutape! 32Bualu, tudi tukenga amu bua buenzayi buetu tuetu nkayetu.#7.32 Fuanyikija ne kan. 18; 5.17. 33Pikala Maweja-Nangila udi ne muoyi, mutufikile munda, mutunyoke bua kutulengeja, neadie tshiakabidi tshibalu ne tuetu bena mudimu bende. 34Kadi wewe, muena tshikisu, kabidi mupite bonsu ku lonji, kudiedi mulu patupu, kuditambishi bua bena mudimu ba Mvidi Mukulu baudi ushipa nansha! 35Bualu kuena mua kunyema dinyoka didi Mvidi Mukulu, muena bukole buonsu, udi umona bionsu, mua kukupa to. 36Bualu bana betu mbafue bua ndondu yetu ne Mvidi Mukulu. Bobu bamane kumvua makenga a tshitupa tshikese, bakadi bamane kufika ku muoyi udi kauyi ujika.#7.36 Kanungu aka kakena kumvuika bimpe mu buena ngreke, kabidi kabena bajadike menemene mudibu mua kukandamuna. Kadi buebe wewe, Mvidi Mukulu neakulumbuluishe, akunyoke bua ditambisha diebe. 37Buanyi meme bu bana betu ndi ndifila ne mubidi ne muoyi bua kunemeka meyi a bankambua. Ndi ndomba Mvidi Mukulu bua afuile tshisamba tshietu luse. Akutumine makenga bua ujadike, umanye wewe nkayebe patoke mudiye Mvidi Mukulu nkayende. 38Bana betu ne meme tuikale ba ndekelu ku bena tshisamba tshietu badi Mvidi Mukulu unyoka amu kunyoka pa kanyokela.
39Mukalenga mubinduluke bua miaku ivuabu bamuamba abi, kunyokaye muana wa ndekelu bipite bia bakuabu. 40Nsongalume kufua kayi uvila ditaba diende nansha kakese, mutekemene amu kudi Maweja-Nangila. 41Ke mamu kushisha kufua bamane kushipa bana bende.
42Tudi tushikidila apa ne dinulondela mutotabu bakengesha bena tshisamba tshietu bikole, basue kubadisha ku bukole bintu bia mikiya bidi mikenji yetu mibenga.
Currently Selected:
2 Bamakabe 7: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996