2 Bamakabe 6
6
Nzubu wa Mvidi Mukulu udi upia mikiya
(1 Mak 1.41-64)
1Matuku apita makese, mukalenga kutuma Ngeronte, muena Atene mu Yerushalayime,#6.1 Ngeronte: badi mua kuamba kabidi ne: muntu mukulumpe. bua enzeje bena Yuda malu ku bukole, bua balekele kulonda bibidilu bia bankambua babu, kabidi ne mikenji ya Mvidi Mukulu. 2Utata ne bua kunyanga kabidi nzubu wa Mvidi Mukulu mu Yerushalayime, kumuenza nzubu wa nwidie Zeyuse wa pa mukuna wa Olimpe. Nzubu wa Mvidi Mukulu wa pa mukuna wa Ngarizime, ku dilomba dia bena muabu#6.2 nwidie Zeyuse wa pa mukuna wa Olimpe: mu buloba bua bena Ngreke, Zeyuse uvua mvidie mupite mikuabu, uvua muasa pa mukuna wa Olimpe. uvua ne bua kushala wa nwidie Zeyuse, tshiala benyi.
3Bavua bakengesha nanku bena ditunga bikole bipite. 4Bena matunga a bende bavua babuela mu nzubu wa Mvidi Mukulu, bakuatshikilamu maluvu, benzamu malu mabi onsu: bendelamu ne bundumba, babuejamu bintu bidibu kabayi mua kubuela nabi mu nzubu wa Mvidi Mukulu. 5Bavua bateka milambu mibi idi ne mikiya pa tshilambuilu. 6Bavua bakandika bantu bua kunemeka dituku dia Dikisha, nansha bua kulama matuku a bibilu bia bankambua, nansha bua kuditela ne tudi bena Yuda. 7Bavua bafundila bantu bua kuenza tshibilu ku ngondu ku ngondu dia mufikilu wa diledibua dia mukalenga, babenzeja amu ku bukole. Pavua bibilu bia Diyonisose, nwidie#6.7 Diyonisose: nwidie wa bena Ngreke wa budimi bua nwinyo ne wa maluvu a nwinyo mene. wa mionji ya nwinyo bikumbane, bavua babenzeja ku bukole bua bende luendu lua mazengu ne tshikata tshia mionji ya ntentemu ku mitu yabu.
8Bena tshimenga tshia Ptolemayise bavua balomba bua#6.8 Ptolemayise: tangila diumvuija mu 13.24 ne 25. belele bantu ba bimenga bia bena Ngreke bivua mutumba ne Yudeya diyi bua benzeje pabu bena Yuda ba muabu malu ku bukole, bua badie pabu bintu bia mu milambu yabu mibi. 9Bawa ne bua kushipa muena Yuda yonsu wabenga mua kulama bibidilu bia bena Ngreke. Bonsu bavua amu mua kumona ne: makenga neatukuate.
10Bawa bafila bakaji babidi ku tshilumbuluilu bua pavuabu batekesha bana babu panshi. Bakabendesha tshimenga tshijima, bana balembeleja ku mabele. Pashishe bakabimansha kuinshi kua bimana bia tshimenga. 11Bakuabu bena Yuda bavua baya mu mbuebue ya pabuipi nabu bua kutendelela mu musokoku, dituku dia Dikisha. Filipe umanya bualu, kubuosha bonsu pamue, bualu kabawa basue kuluangana mvita, basue amu kunemeka dituku dia tshijila adi.#6.11 dituku dia tshijila: fuanyikija ne 1 Mak 2.32-38 ne diumvuija dia mu kan. 34.
Dikenga, didi tshimanyinu tshia luse lua Mvidi Mukulu
12Nanku ndi ngambila bonsu badi babala mukanda ewu, bua kabatekeshi mu maboku bua bungi bua makenga aa to. Kadi bamanye se: makenga aa adiku ki mbua kubutula tshisamba#6.12 Tun. 12-17: fuanyikija ne 5.17-20. tshietu to, kadi mbua kutshilengeja. 13Padi bantu kabayi bashala mutantshi mule mu bubi buabu, kadi bapeta dinyoka lukasa, bidi bidileja mudi Mvidi Mukulu ubananga. 14Bua kunyoka bikuabu bisamba, Maweja-Nangila wa bukole buonsu udi windila too ne pakumbajabu buenzayi buabu buonsu. Kadi buetu tuetu kena wenza netu nanku to. 15Udi utunyoka katuyi banji kuenza bibi bipite bua kadifiki ku ndekelu.#6.15 Bua buakane ebu bua Mvidi Mukulu (tun. 14-15), tangila Tshib 15.16; Mj 11.10; 12.20-22; 1 Tes 2.16. 16Ke padiye utufuila tuetu bantu bende luse. Nansha yeye mutunyoke udi musue kutulongesha, kadi kena ulekela bantu bende to. 17Meme mumane kunuvuluija malu aa, nenku mpindiewu tupinganayi ku bualu buetu.
Eleyazare udi ufuila ditaba
18Ku balongeshi banene ba diyi dia Mvidi Mukulu, kuwa muntu dina diende Eleyazare, muntu mukulumpe kabidi muneme menemene. Bawa bamuenzeja ku bukole, bamuela munyinyi wa ngulube#6.18 munyinyi wa ngulube: bavua batangila munyinyi wa ngulube bu udi ne mikiya (tangila Lev 11.7-8). mukana. 19Uvua ujinga kufua ne lumu pa mutu pa kuenda ne bundu. Ke pawaye udiyila mutangila ku tshishipelu ne muoyi mukole, ubenga munyinyi. 20Kutuilaye munyinyi uvuaye nawu mukana panshi. Uvua uleja bantu mudibu ne bua kubenga kudia bintu bidi ne mikiya, nansha baluishi basue kubashipa.
21Bavua balongolola didia dia bintu bia nwidie, bivua bikandika kudi diyi dia Mvidi Mukulu. Bakuabu balunda ba kale ba Eleyazare kuyabu nende ku luseke. Kumulombabu bua bamutuadile minyinyi idibu banyisha kudi diyi dia Mvidi Mukulu, bua yeye adipikule nkayende. Kadi enze amu bu udi udia minyinyi ya ngulube ivua mukalenga mufunda bua kudia. 22Bua pikalaye muenze nanku, balunda bende ba kale bamone mua kumupandisha ku njiwu ya lufu ayi.
23Kadi Eleyazare kuangata dipangadika dinene, divua dikumbanyina bukole buende, bu muvuaye muikale kabidi ne nsuki mitokela mu mudimu. Katshia bamutela uvua amu ulonda meyi ne mikandu bia tshijila, bienza kudi Mvidi Mukulu muine. Nenku wakamba patoke ne: nuntume ku lufu lukasa. 24Kusakidilaye kabidi miaku wamba ne:
— Mu tshikondu tshinkadi, tshiena mua kudinga bantu. Bualu bansonga ba bungi badi mua kuitaba ne Eleyazare, muntu ne mvula makumi tshitema, uvua amu muangate ngikadilu ya benyi. 25Pandi tshiyi ndeja ditaba dianyi patoke, ndi mua kupambula bantu bavule. Mbundu kaayi kabidi mbipendu kaayi bikalabu nabi bualu buanyi, mukulumpe ushima bua kushala ne muoyi kabidi matuku makese! 26Kadi nansha meme mupanduka lelu ku dinyoka dia bantu edi, nansha meme mushala ne muoyi nansha meme mufue, tshiena mua kupanduka ku dinyoka dia Mvidi Mukulu, muena bukole buonsu. 27Nanku ndi mudilongolole mua kufua mu bukitu bu mukulumpe wa bushuwa. 28Neushile bansongalume tshilejilu tshia lufu luimpe, ludibu ne bua kufua ne disanka bua tumone mua kunemeka meyi ne mikandu bietu bia tshijila. Utula meyi awu, kuyaye buludi ku tshishipelu. 29Kadi bantu bavua nende, kuandamunabu ngenzelu yabu. Ke bakavua nende ne muoyi mubi, bualu bakavua bumvua diyuki diende bu dia muntu mupale. 30Kadi pakavuaye pa kukula muoyi bua bukole bua mituutu, kuambaye witshija mioyi ne:
— Maweja-Nangila udi mumanye bionsu ne dimanya diende dijima. Udi mumanye mumvua mua kupanduka ku lufu. Kadi udi mumanye kabidi mundi ngumvua bisama bikole bia mituutu mu mubidi wanyi. Kadi mu muoyi wanyi, ndi ngumvua ne disanka bualu ndi mudifile kudi Mvidi Mukulu.
31Ke mudi Eleyazare mufue nanku. Lufu luende ndushile bansonga ne bantu ba bungi ba mu ditunga tshilejilu tshia muntu wa muoyi mukole ne tshia muenji wa malu mimpe.
Currently Selected:
2 Bamakabe 6: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996