1 Bamakabe 7
7
Demetriyuse I udi unyenga bukalenga
(2 Mak 14.1-10)
1Demetriyuse, muana wa Seleyukuse, kunyemena ku Rome mu tshidimu tshia 151. Kuyaye ne bantu bakese mutangile ku tshimenga kampanda tshia ku muelelu wa mayi manene.#7.1 tshidimu tshia 151: mu 161 bgbg ne Y.K. — tshimenga…mayi manene: ke Tripoli (tangila 2 Mak 14.1). Kushalaye mukalenga mu tshimenga atshi. 2Ubuela amu mu nzubu wa bukalenga bua tatuende nanku, ke bena mvita bende kukuata Antiyokuse V ne Lisiyase, bakeba mua kufika nabu kudiye. 3Kadi bobu bamane kumanyisha Demetriyuse bualu ebu, yeye kubambila ne: tshiena musue kubamona to. 4Ke bena mvita kushipa Antiyokuse ne Lisiyase. Nanku Demetriyuse kusomba ne dikisha mu nkuasa wende.
5Ke kufikabu kudiye kudi bena Izrayele bonsu bavua kabayi ne ditaba, kabayi kabidi banemeka mikenji. Nenku muntu wa kudibu uvua ujinga mua kuikala mutuangaji munene#7.5 mutuangaji munene: tangila 2 Mak 14.3; mu tshikondu atshi batuangaji banene bavua bapeta mianzu kudi mukalenga (tangila 10.20; 2 Mak 4.7,10,24), kadi bavua babasungula munkatshi mua bena diku dia batuangaji. kubafila. Diende dina Alkime. 6Bafika, kusonguelabu bena Yuda bakuabu kudi mukalenga, bamba ne:
— Yudase ne bana babu mbabutule balunda bebe, mbatutangalaje. Katutshiena mu ditunga dietu. 7Tumaku muntu wa ku diebe bua kumona bualu ebu, mudi Yudase munyange buloba buetu ne bua mukalenga. Nenku umuambile anyoke Yudase ne bonsu badi bamuambuluisha.
Bakidese ne Alkime badi mu Yudeya
8Mukalenga Demetriyuse kusungula umue wa ku “balunda ba Mukalenga” diende Bakidese, uvua ne muanzu wa mulunda wa mukalenga, muikale ulombola kabidi buloba bunene bua Siriya.#7.8 mulunda wa Mukalenga: tangila diumvuija mu 2.18. Yeye ke uvua muntu munene mu bukalenga, uvua ulamata kabidi mukalenga. 9Kumutumaye ne muntu uvua ubenga mianda ya Mvidi Mukulu diende divua Alkime. Mukalenga kupa Alkime mudimu wa mutuangaji munene, umufundila kabidi bua kusombuela bena Izrayele. 10Kuyabu ne tshiluilu tshiende, kufika mu bena Yuda. Kutuminabu Yudase ne bana babu mikenji ya dishima bu bantu badi bakeba bupole. 11Bena Yuda kubenga mikenji ayi, bualu bavua babamona ne tshiluilu tshinene.
12Kadi tshisumbu tshia bamue balongeshi ba diyi dia Maweja-Nangila kudisanga ne Bakidese ne Alkime bua kukeba mushindu wa kujikija bualu abu. 13Bena Izrayele bavua bakeba mua kuikala ne bupole abu ke bena Aside.#7.13 Tangila 2.42. 14Bavua bambilangana ne: Alkime udi mulue ne tshiluilu, mmutuangaji wa mu diku dia Arone. Nanku kakutuenzela bibi to.
15Ke Alkime kubashindikila ne mutshipu, wamba ne:
— Katuakunuenzela kalu nansha kamue. Nansha balunda benu bine, katuena nabu kalu.
16Kumuitababu. Kadi kukuatshishaye bantu makumi asambombu munkathi muabu. Kubashipeshaye bonsu mu dituku dimue bu mudi Mukanda wa tshijila wamba#7.16 Tangila Mis 79.2-3. ne: 17“Bavua bapumuna mashi a bena mudimu bebe, batangalaja bitalu biabu miaba yonsu ya pepi ne Yerushalayime, kakuena udi mua kubajika.” 18Ke bowa ne luzakalu kukuata tshisamba tshijima, kuambabu ne: “Bantu aba mbena dishima, bapanga buakane, bualu kabena banemeka mutshipu ne ndondu bivuabu benze bobu mene.” 19Bakidese kushiya Yerushalayime, kuya kuasa mitanda yende mu tshimenga tshia Bete-Zayite.#7.19 Tshimenga tshidi pa buipi ne tshia Bete-Sure: tangila 4.29. Kutumaye bantu bua kukuata bantu bavule bavua bitaba, batua ku tshiende, ne bakuabu ba mu tshisamba ba patupu. Kubashipaye, kubelesha mu tshiina tshinene. 20Kupaye Alkime bumfumu bua tshitupa tshia buloba atshi. Kumupaye kabidi ne tshiluilu bua kumuambuluishatshi. Pashishe Bakidese kupingana kudi mukalenga.
21Alkime pende kuenza muende muonsu bua bamuanyishe bu mutuangaji munene. 22Bonsu bavua bakengesha bantu, kudisanga nende. Ke muakapetabu mushindu wa kutangila ditunga dijima dia Yudeya ne kutatshishabu bena Izrayele bikole. 23Yudase kumona ne malu mabi avuabu babenzela kudi Alkime ne balunda bende, avua mapite bubi ne ku malu avua bena matunga a benyi babenzele. 24Nanku Yudase kuendakana mu tshitupa tshijima tshia buloba bua bena Yuda. Kusombuelaye bantu bonsu bavua babenga malu a ditaba diabu, kubapangishaye mua kuendakana mu ditunga. 25Alkime mumane kumona ne: Yudase ne bena diende mbakole bapite, tshiena ne bukole bua kubapita, ke kuyaye kudi mukalenga, ubasonguela ne malu a tshianana mapite bungi.
Mukalenga udi utuma Nikanore bua kuluisha bena Yuda
(2 Mak 14.5-36)
26Ke mukalenga kutuma Nikanore#7.26 Tangila 3.38 ne 4.12-15. umue wa ku banene ba tshiluilu tshiende, uvua mukine bena Izrayele bikole, bua abutule tshisamba etshi kashidi. 27Nikanore kufika mu Yerushalayime ne musumba munene wa bena mvita. Kuambilaye Yudase ne bana babu malu a dishima, bu udi ukeba diumvuangana nabu. 28Kubambilaye ne: “Munkatshi muetu nebe kamuikadi mvita to. Ndi mfika ne bena mvita bakese bua bamfile, bua tumvuangane nenu mu bupole.” 29Kufikaye kudi Yudase. Kuelanganabu muoyi bu mudi balunda benza! Kadi bena tshiluilu ba Nikanore bavua badilongolola bua kubakula Yudase, kuya nende. 30Kadi Yudase umona ne Nikanore uvua ne lungenyi lua kumuenzela bibi, kumvuaye bowa pa kumumona. Kubengaye bua kuyukila nende. 31Nikanore umona ne Yudase mmutandule budimu buende, kuyaye bua kumuluisha pepi ne tshimenga tshia Kafarsalama.#7.31 Lelo ke Kirbet Selma. 32Bantu nkama itanu ba Nikanore kufua mu mvita ayi. Bashadile kunyema batangile mu tshimenga tshia Davide.
33Nikanore kushisha kuya mu mukuna wa Siyone. Ke batuangaji ne bakulu kupatuka mu nzubu wa Mvidi Mukulu bua kumusekelela, bamuleja ne milambu ya kuosha ivuabu balambula bua mukalenga wabu. 34Kadi Nikanore kuseka batuangaji ne bakulu, kubela ne mate, kubapisha mikiya, kabidi ubadiombola ne miaku ya didisua. 35Kuditshipaye ne tshiji wamba ne:
— Panuikala babenga mua kumpa Yudase ne tshiluilu tshiende lelu, kadi pambikala meme muine mumane kuditshimuina Yudase, nempingane bua kuosha nzubu wa Mvidi Mukulu ewu.
Pashishe kupatukaye ne tshiji tshikole. 36Batuangaji kubuela kabidi mu lupangu lua muaba wa tshijila. Kuimanabu kumpala kua tshilambuilu bamba badila ne:
37— Eyi Mvidi Mukulu, wewe ngusunguile nzubu ewu bua ikale nzubu wa kutendelela, kabidi muaba utudi tukusengelela. 38Muntu ewu Nikanore ne tshiluilu tshiende ubasombuele. Bafue bonsu ku muele wa mvita. Vuluka nsenda yabu. Kabashadi kabidi ne muoyi to.
Badi batshimuna Nikanore, bamushipa
(2 Mak 15.1-36)
39Nikanore mupatuke mu Yerushalayime kuasaye mitanda mu Betorone.#7.39 Tangila 3.16. Ke muvuile tshiluilu tshia bena Siriya kudisanga kudiye. 40Yudase pende kuasa yende mitanda mu Adasha#7.40 Tangila Yosh 15.37. ne bantu binunu bisatu. Yudase kutendelela wamba ne: 41“Pavua bantu bavua mukalenga kampanda mutume basendeka Mvidi Mukulu, mutumibue webe kuvua kubashipa binunu lukama ne makumi muanda mukulu ne bitanu. 42Mushindu awu ke uudi mua kubutula tshiluilu etshi, tuetu batangile, bu muuvua muenze bakuabu abu, bua bantu ba muoyi bamanye ne udi unyoka bantu badi basendeka muaba webe wa tshijila. Unyoke Nikanore bilondeshile tshikisu tshiende.”
43Bena nwita kubanga nwita mu matuku dikumi ne asatu a ngondu wa Adare.#7.43 Bu mu 28 mars 160 bgbg ne Y.K. Tshiluilu tshia Nikanore kubutuka. Yeye muine ke wakadianjilabu kushipa mu mvita amu. 44Bena mvita bamona ne: Nikanore wafu, kuimanshabu bia lufu, kunyema lubilu. 45Bena Yuda kubalondakaja mu dituku dijima, kutuadija ku Adasha too ne ku Ngezere.#7.45 Tangila 4.15. Pavuabu babalondakaja apu, bavua bela mpungi bua bena Yuda nabu balue kubambuluisha mu mvita. 46Mu misoku ya bena Yuda ya pabuipi, bantu kupatuka, kujinga baluishi, kubapingaja tshianyima. Bonsu kufua ku muele, nansha muntu umue kavua munyeme to. 47Kupawulabu bintu bivua nabi bena mvita ne bia lufu biabu. Kukosabu mutu ne tshianza tshia balume tshia Nikanore, tshianza tshia bukole tshivuaye muele mulu diba divuaye muakule ne ditambisha. Kuyabu nabi bua kubileja bantu mu Yerushalayime. 48Bantu bonsu kusanka, kutangilabu dituku adi bu dituku dia disanka dinene. 49Kuelabu diyi bua dituku dia 13 dia Adare#7.49 Tangila 7.43. dishale tshibilu ku tshidimu ku tshidimu. 50Bena Yuda kushala mu bupole matuku mulongu.
Currently Selected:
1 Bamakabe 7: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996