1 Bamakabe 8
8
Bena Rome badi baditambisha
1Yudase kupeta lumu lua ne: bena Rome mbantu ba bukitu bua mvita, badi bakidila bonsu badi bakeba mua kumyuangana nabu. Bonsu badi babavuila, badi badia nabu bulunda. 2Kulondelabu Yudase muvua bena Rome bamanye mua kuluangana, bamuambila malu onsu avuabu benzele tshisamba tshia bena Gaule.#8.2 Gaule: bavua basomba ku mutu kua Italiya. Bena Rome kubatshimuna, kubatekesha, bashala babalambula milambu. 3Mu buloba bua Espanye, bavua bakuate miaba ivua bantu bumbula mpawungi ne biamu bitoke bia mushinga mukole. 4Bavua bakuate ditunga dijima adi, nansha diodi dikale mutantshi mule ne diabu, ku ditalama ne ku disuminyina diabu. Bena Rome bavua batshimuna kabidi ne bamfumu bavua bafume kule bua kubaluisha. Bena Rome bavua babatekesha bikole. Bavua bashala ne muoyi bavua babalambula milambu ku tshidimu ku tshidimu. 5Bavua batshimuna bakalenga ba bena Masedoniya, Filipe ne Perseyuse,#8.5 Bena Rome kutshimuna Filipe mu 197, Perseyuse mu 168 bgbg ne Y.K. kabidi ne bonsu bavua babatombokela. Bobu kubatekesha menemene. 6Antiyokuse Munene, mukalenga wa bena Aziya#8.6 Antiyokuse Munene: Antiyokuse III uvua mutshimune mu Manyesiye wa Sipile mu 189 bgbg ne Y.K. — Aziya: bukalenga bunene bua Antiyokuse III buvua bualabale ku ndekelu kua bidimu nkama isatu bgbg ne Y.K., ku Aziya Mukese ne ku Induse. uvua musemene kudibu bua kubaluisha ne nyama ya tupumbu lukama ne makumi abidi, ne babandi ba pa tubalu tua mvita ne bena matempu, kabidi ne tshiluilu tshinene. Kadi bena Rome kubatshimuna. 7Kukuatabu mukalenga ne muoyi. Kumufundilabu yeye ne bakuabu bavua bamupingana mu nkuasa wa bukalenga mulambu mupite bunene. Bavua ne bua kufila kabidi bantu ku lukola. 8Bavua banyenga Antiyokuse matunga a Inde, a Madayi, a Lidiya ne bimue bitupa bilenga bia buloba buende, bua kubipa mukalenga Emene.#8.8 Inde ne Madayi: bantu bakuabu badi bela meji ne: mbimpe kubala ne Yoniye ne Misiye. 9Bena Ngreke bavua bajadika bua kubutula bena Rome. 10Kadi pakumvua bena Rome bualu abu, kutumabu mulombodi wa tshiluilu anu umue bua kubaluisha. Bena Ngreke kufua bavule. Bena Rome kukuata bakaji ne bana kuya nabu ku bupika. Kupawulabu bintu biabu, kutekesha matunga, kubumbula miaba mikolesha ne bimana, kuandamuna bena Ngreke bapika babu too ne ku lelu.#8.10 Dibueja dia bena Ngreke mu buloba bua bena Rome, divua dituadija mu 146 bgbg ne Y.K. 11Bavua babueja kabidi mu bupika bantu ba matunga makuabu ne ba mu bidila bavua bakandamana kudibu, babutula matunga abu. 12Kadi bavua bashala balunda ba bushuwa, ba bantu bavua basue kudia nabu malunda. Bavua batekesha bakalenga ba matunga avua nabu mutumba, ne ba matunga a kule. Bonsu bavua bumvua lumu luabu, bavua babatshina. 13Bena Rome bavua bateka mu bumfumu amu bantu bavuabu basue, bavua babambuluisha kabidi. Kadi bakuabu, bavua babumusha mu bumfumu. Bena Rome kupeta dikanda divule dipite. 14Nansha muvuabi nanku, nansha umue wa kudibu kavua muase tshifulu tshia bukalenga nansha tshilamba tshia bukalenga bua ikale uditemba. 15Bavua base nzubu wa tshimamuende wa bukalenga. Ke muaba uvua bantu nkama isatu ne makumi abidi basangila ku dituku dionsu, batangila malu a bantu, bakeba mua kulongolola malu a mu ditunga bimpe. 16Ku tshidimu tshionsu bavua basungula muntu umue wa kudibu#8.16 umue wa kudibu: bumfumu buvua kudi bamienampala. uvua ne bua kuludika bena Rome, kudia bumfumu miaba yonsu. Bena mu bukalenga buende buonsu bavua bamuitaba amu yeye kabayi bamubaba, nansha bamujana.
Bena Rome badi batua ndondu ne bena Yuda
17Yudase kusungula Epoleme, muana wa Yowanane, muikulu wa Akose, ne Yasone, muana wa Elazare, kubatuma mu Rome bua kudia nabu bulunda, kutua kabidi nabu ndondu. 18Yudase uvua wela meji mua kumusha bena Yuda ku bupika bua bena Siriya, bualu bena Siriya bavua babueja bena Izrayele mu bupika. 19Epoleme ne Yasone kuyabu ku Rome. Njila uvua mule. Bavua babuela mu tshimamuende wa bukalenga, kuambilabu bena Rome ne: 20— Yudase Makabe, bana babu ne bena Yuda, mbatutume kunudi bua kutua nenu ndondu bua ku mesu a bantu bonsu tuikale balunda benu bavua badia nenu tshioyu.
21Bualu kulengelela bena mu tshimamuende wa bukalenga tshia bena Rome. 22Telejayi muvua mukanda uvuabu bafunda pa tshitata tshikunze, batuma mu Yerushalayime bua ushale tshivulukilu tshia diumvuangana adi.
23— Bena Rome ne bena Yuda, nansha bobu benda pa mayi manene, nansha bobu basombe pa buloba, basangana kashidi ku mundundu kukuata anyie! Mvita kayibuedi mu matunga abu! Baluishi kabafiki muabu! 24Kadi pikala mvita midianjila kukuata Rome, nansha bena diende mu buloba budi bena Rome batangile, 25ditunga dia bena Yuda nediluangane pamue ne bena Rome muadi muonsu bua kusungidila bena dietu, mushindu wikale bualu bumueneka. 26Bu mutudi bashindika mu Rome ne: nansha ntete ya bukula, nansha bia lufu, nansha nkanu mitoke ya mushinga mukole, nansha majuwa, bena Yuda kabena bapa nansha basombesha baluishi ba bena Rome. Bena Yuda badi ne bua kulama meyi ne mikandu bia ndondu eyi katuyi tubafuta. 27Mbia momumue padi mvita midianjile kukuata bena Yuda, bena Rome nebayiluangane pabu ne muoyi mujima, mushindu udi bualu bumueneka. 28Bena Rome kabena mua kupa baluishi nansha ntete ya kuenza bukula, nansha bia lufu, nansha nkanu mitoke ya mushinga mukole, nansha majuwa, bu mutudi bashindike mu Rome. Kadi bena Rome badi ne bua kulama meyi ne mikandu bia ndondu eyi kabayi bakeba difutu kudi bena Yuda to.
29Ke mushindu udi bena Rome batua ndondu ne bena Yuda nanku. 30Pikala aba nansha baba, mu matuku avuavua, basue kusakidila, nansha basue kumusha bualu ku aa, nebenze ne dianyisha dietu bonsu. Diba adi disakidila nansha diumusha adi nedikuate bonsu. 31Bua makenga avuabu nawu, mapeta kudi mukalenga Demetriyuse, tudi bafundila mukalenga mukanda ne miaku eyi: “Udi ukengesha bena Yuda balunda betu, kabidi bena dietu, bua tshinyi? 32Bobu bakusonguela kabidi kutudi, tudi tuma ku tshiabu, netukuluishe miaba yonsu, mu mayi nansha ku mukuna.”
Currently Selected:
1 Bamakabe 8: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996