1 Bamakabe 14
14
Mukalenga wa bena Madayi udi ukuata Demetriyuse II
1Mukalenga Demetriyuse II kusangisha tshiluilu tshiende, mu tshidimu tshia 172, bua kuya ku ditunga dia Madayi. Uvua ukeba diambuluisha bua amone mua kuluisha Trifone.#14.1 172: tshidimu tshia 140 bgbg ne Y.K. 2Arsake#14.2 Arsake mmukuate Demetriyuse mu 139 bgbg ne Y.K. mukalenga wa bena Persa ne bena Madayi umvua ne: Demetriyuse mmubuele mu buloba buanyi, kutumaye umue wa ku banene ba tshiluilu tshiende ne bena mvita bua kukuata Demetriyuse ne muoyi. 3Awu kuyaye kuluisha tshiluilu tshia Demetriyuse, kumukuata, kuya nende kua Arsake. Awu kumuela mu lukanu.
Badi batumbisha Simeyone
4Ditunga dia Yudeya kushala talalaa mu tshikondu tshivua Simeyone mudie bukalenga. Simeyone uvua ukeba bua ditunga dilengele. Bantu bende kuanyisha bukalenga buende ne lumu luende matuku onsu avuaye ne muoyi awu. 5Lumu luende kuvula pavuaye mukuate tshisabu tshia Yope;#14.5 Tangila 10.75. munzuluile bena Yuda njila wa kuya ku bidiila bia Ngreke. 6Kudiundishaye mikalu ya ditunga diende, kulama ditunga dine bimpe. 7Kupingajaye bantu bavule bavua bakuata ku bupika mu ditunga. Kukuataye tshimenga tshia Ngezere, tshia Bete-Sure#14.7 Ngerere: tangila 4.15. ne nzubu mukolesha wa Yerushalayime. Kadi kumbushaye mikiya yonsu ivuaku. Muntu nansha umue kavua utua nkanana kumpala kuende. 8Bantu kudima ne ditalala. Bia pa madimi kuika, mitshi ya mu mpata kukuama. 9Bakulu ba mu ditunga pavuabu basombe mu bialu bavua balonda amu malu a disanka. Bansonga bavua batuala bilamba bia mvita ne disanka. 10Simeyone utua upa bantu batua mu bimenga bia kudia, kabidi ne bia lufu bua kulama nabi ditunga. Nenku batua batela dina diende too ne ku ndekelu kua buloba. 11Kubuejaye bupole mu ditunga, bena Izrayele kusanka bikole. 12Muntu yonsu uvua musombe muinshi mua mitshi yende ya nwinyo ne ya mfiku mu bupole. Muntu nansha umue kavua ubakuatshisha bowa.#14.12 Fuanyikila ne 1 Bak 5.5; Mi 4.4; Zek 3.10. 13Baluishi bonsu kumuka mu Yudeya. Kuipatabu bakalenga ba matunga a bantu benyi. 14Simeyone uvua wambuluisha bapele bonsu ba mu tshisamba tshiende. Utua ulama meyi a Mvidi Mukulu, wipata bena Yudabonsu batua babenga kuitaba meyi awu. 15Kutumbishaye nzubu wa Mvidi Mukulu ne lumu lunene, kutekaye mu nzubu amu bintu bitule bia tshijila.
Bena mu Sparte badi batumina Simeyone mukanda
16Bena Rome ne bena Sparte kumvuabu lumu ne: Yonatane wafu, kumudilabu bikole. 17Kadi bavua bamanye ne: muanabu Simeyone mutuangaji munene, utua mumupingane pa muaba wende. Uvua mudie kabidi bukalenga mu ditunga dijima dia Yudeya ne mu bimenga biadi. 18Kumufundilabu miaku pa bitata bia tshiamu tshikunze, idi iyuluija ndondu ne bulunda bivuabu batue ne bana babu: Yudase ne Yonatane.#14.18 Ebi bivua bienzeka mu 142 bgbg ne Y.K. 19Kubalabu bitata ebi bena Yerushalayime bonsu basangile. 20Telejayi mutua miaku itua bena Sparte bafunde:
— Tuetu bamfumu ne bena tshimenga tshia Sparte, tudi tutumina Simeyone, mutuangaji munene, pamue ne bakulu, batuangaji ne bena Yuda bonsu mukanda. Bana betu: Muoyi wenu ewu.
21Mienampala yenu inuvua batutumina kunu, mmituambile muvuabu banutumbishe, banunemeke. Tudi basanke bua luendu luabu alu. 22Tuafundi bionsu bidibu bakula mu mikanda ya ditunga ne: Numenyuse, muana wa Antiyokuse, kabidi ne Antipatere, muana wa Yasone,#14.22 Tangila 12.16. mienampala ya bena Yuda ivua mifike kunu bua kuenzulula netu ndondu ne bulunda. 23Bualu ebu bavua busankisha bena tshimenga tshietu. Batua bakidila ne musangelu mienampala ayi, bateka mukanda wa malu avuabu bamba mu tshilaminu tshia mikanda ya ditunga, bua bena Sparte bashale ne tshitulukilu. Batua batumine kabidi Simeyone, mutuangaji munene mukanda mutentulula miaku ya mukanda awu.
24Pashishe,#14.24 Tangila 14.18. ke Simeyone kutuma Numenyuse ku Rome ne ngabu munene wa mpawungi wa mushinga wa kilo 500 ya tshiamu tshitoke tshia mushinga mukole, bua kushindika ndondu yabu ne bena Rome.
Simeyone mutuangaji munene, mfumu wa bena Yuda
25Bena Yuda bumvua lumu lua malu onsu awu, kuambilanganabu ne:
— Mutudi mua kuela Simeyone ne bana bende tuasakidila mbishi? 26Bualu yeye ne bana babu, kabidi ne diku dia tatuende dijima, mbadileje bilobu bia mvita. Kuipataye baluishi ba bena Izrayele, kubatshimuna. Tshisamba tshietu kupeta budikadidi.
Kufundabu miaku pa bitata bia tshiamu tshikunze, kubilamika ku makunji manene avua pa mukuna wa Siyone. 27Monayi muvua miaku ya mu mukanda yamba:
— Mu dituku dia dikumi ne muanda mukulu dia ngondu wa Elule, wa tshidimu tshia 172, mu tshidimu tshisatu tshia bulombodi bua Simeyone, mutuangaji munene,#14.27 Mu septembre 140 bgbg ne Y.K. 28batuangaji, bena tshimenga, bamfumu ne bakulu ba mu ditunga bavua basangile pamue mu tshipangu. Bavua bajadika bidi bilonda ebi: 29Munkatshi mua nwita mivule ivua mikuate ditunga, Simeyone, muana wa Matatiyase, wa ku ndelanganyi ya Yoyaribe#14.29 Tangila diumvuija mu 2.1. ne bana babu, bavua badifila mu njiwu, baluisha bena lukuna ba ditunga diabu. Bavua basue kusungidila nzubu wetu wa Mvidi Mukulu ne mikenji yetu. Ke padi kabidi ditunga dietu ne lumu lunene. 30Yonatane kusangisha tshisamba tshietu mu bobumue. Kupetaye muanzu wa mutuangaji munene bangabanga ne lufu luende. 31Baluishi ba bena Yuda kujinga mua kubuela mu ditunga dietu bua kudinyanga, kunyanga kabidi ne nzubu wa Mvidi Mukulu. 32Ke Simeyone kuangata bumfumu, kubaluisha bua kusungidila ditunga diabu. Wakatula tshitupa tshinene tshia bintu biende. Kupaye bena mvita ba ditunga bia lufu ne difutu bua benzele ditunga diabu mudimu. 33Kukoleshaye bimana bia bimenga bia Yudeya ne, ku mikalu ya ditunga, Bete-Sure,#14.33 Tangila 11.65. tshimenga tshivua baluishi balamina bia mvita. Kutekayemu tshisumbu tshia bena mvita ba bena Yuda. 34Kukoleshaye tshimenga tshia Yope tshivua ku muelelu wa mayi manene, kabidi tshimenga tshia Ngezere tshivua pamue ne Asdode#14.34 Tangila 10.75. muaba uvua baluishi basomba bangabanga. Simeyone kuteka momu bena Yuda, kuteka kabidi mu bimenga bionsu bibidi bintu bivua bantu bakengela. 35Bantu kumona muvua Simeyone ne muoyi umue, ujinga kupetesha ditunga lumu, kumutekabu mfumu ne mutuangaji munene. Bavua benza nanku bua bilenga bionsu bivuaye wenzela ditunga, bua buakane buende, kabidi bualu uvua uditatshisha ku dituku ku dituku amu bua ditunga diende diye kumpala. Simeyone uvua ukeba mishindu yonsu bua bantu bende bapete lumu. 36Patshivuaye ne muoyi, kuipatabu benyi bonsu bavua basomba mu Yudeya, ne bonsu bavua basomba mu Yerushalayime, mu tshimenga tshia Davide. Bantu aba bavua bibaka nzubu wa bimana bikolesha; bavua bapatukamu bua kunyanga ku mpenga kua nzubu wa Mvidi Mukulu ne kupetesha muaba wa tshijila mikiya. 37Simeyone kuteka bena mvita ba bena Yuda mu nzubu mukolesha, bua balame nzubu awu, bua ditunga ne bena mu Yerushalayime bikale ne bupole. Kutumbulaye kabidi bimana bia mu tshimenga mulu.
38Pa kumona bionsu abi, ke mukalenga Demetriyuse II, kushindika Simeyone mu muanzu wa mutuangaji munene. 39Kumutekaye mulongu wa “mulunda wa Mukalenga,” kumupa lumu. 40Bualu uvua mumane kumvua ne: bena Rome badi bumvuangana ne bena Yuda, babatangila bu balunda babu, batua nabu ndondo babanemeka bu bana babu, bakidila mienampala ya Simeyone ne disanka. 41Bavua bambilakabidi Demetriyuse ne: bena Yuda ne batuangaji babu#14.41 Bakuabu badi bafunda amu ne: Diba adi bena Yuda ne batuangaji babu… mbateke Simeyone mfumu kabidi mutuangaji munene, banyishe nanku kabidi bua ndelanganyi yende too ne ku diba diafika muambi mulelela. 42Bavua bateka Simeyone mfumu munene wa bena mvita, mutangidi wa nzubu wa Mvidi Mukulu, muikale ne mudimu wa kusungula bamfumu ba midimu, bantu bavua ne bua kulongolola malu a ditunga, kabidi ne batangidi ba tshiluilu ne balami ba nzubu ya bena mvita. 43Simeyone uvua mulombodi wa mianda ya mu nzubu wa Mvidi Mukulu, bantu bonsu bavua ne bua kumuitaba. Mikanda yonsu ya malu a mu ditunga bavua ne bua kuyifunda mu dina diende. Uvua ne bukenji bua kuvuala bilamba bikunze bia tshibilu, kabidi ne bimanyinu bia tshiamu tshia mpawungi. 44Muntu wa mu ditunga nansha mutuangaji, kena mua kudiwula tshidi Simeyone mulongolole, nansha kuamba bishilangane ne tshidi meyi ende amba, nansha kuenza tshisangilu mu ditunga kayi ne dianyisha diende, nansha kuvuala bilamba bia bumfumu, nansha kudiasa bimanyinu bia mpawungi.#14.44 Tangila 10.89. 45Muntu yonsu udi ubenga meyi aa nansha wakupula, nebamulumbuluishe.
46Bantu kuitaba diyi bua Simeyone enze bilondeshile meyi onsu aa. 47Simeyone kuanyisha bua kushala mutuangaji munene, muludiki wa tshiluilu, kabidi mfumu wa ditunga dia bena Yuda ne wa batuangaji. Ke muvuaye mushale ku mutu kua bonsu nanku.
48Bena Yuda kujadika bua miaku eyi bayifunde pa bitata bia tshiamu tshikunze, babiteka patoke mu lubanza lua nzubu wa Mvidi Mukulu. 49Batua batentule mukanda ewu, bateka mikanda mitentula mu tshilaminu tshia biuma, mu nzubu wa Mvidi Mukulu, bua Simeyone ne bana bende ba balume bamone mua kuyibala.
Currently Selected:
1 Bamakabe 14: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996