1 Bamakabe 13
13
Simeyone udi upingana Yonatane mu bukalenga
1Simeyone kupeta lumu muvua Trifone musangishe bena mvita bavule bua kuya kunyangakaja ditunga dia bena Yuda. 2Uvua mumone kabidi muvua bantu ne bowa, bazakala bua mvita. Ke kuyaye mu Yerushalayime bua kusangisha bantu. 3Kuambilaye bantu, ubashindikila ne:
— Nuenu bonsu nudi bamanye bituvua bakumbaje bana betu ne meme muine, ne bonsu bena diku dianyi, bualu bua diyi dia mikenji yetu ne bua nzubu wa Mvidi Mukulu. Nudi bamanye mvita ituvua basangane ne makenga atuvua bapete. 4Bana betu bonsu mbafuile tshisamba tshietu tshia bena Izrayele. Meme ndi mushale amu nkayanyi. 5Meme tshiena ngela meji bua kudipandisha mu tshikondu etshi tshia dikenga. Bualu tshiena mupite bana betu bonsu abu ku bulenga to. 6Kadi meme nendumbuluile ditunga dietu, nzubu wetu wa Mvidi Mukulu, bakaji benu ne bana benu. Bualu bu mudibu ne lukinu, bantu ba bisamba bikuabu mbumvuangane bua kutubutula.
7Simeyone wamba amu miaku ayi, bonso kukola muoyi. 8Pashishe bena Yuda kumuandamuna bela mbila ne:
— Amu wewe ke mulombodi wetu mpindiewu pa mutu pa bana benu aba Yudase ne Yonatane. 9Lombola mvita. Tuetu netuenze muonsu muwatuambila. 10Ke Simeyone kusangisha bena mvita bonsu. Kuluijakajaye bua kuibaka bimana bia tshimenga tshia Yerushalayime kumana. Kukoleshaye tshimenga nseke yonsu. 11Kutumaye Yonatane muana wa Absalome mu Yope#13.11 Tangila 10.75. pamue ne musumba munene wa bena mvita. Yonatane ufika, kuipata bena tshi menga, kuasamu.
Trifone udi ushima Simeyone, ushipa Yonatane
12Trifone uvua mumbuke mu tshimenga tshia Ptolemayise,#13.12 Tangila 5.15. ne bena mvita basule bua kubuela mu ditunga dia Yudeya. Pine apu uvua ne Yonatane muanabu ne Simeyone, uvuaye mukuate mu mvita. 13Simeyone kuvuaye kuasa yende mitanda mu Adida#13.13 Tangila 12.38. ku mpenga kua mpata. 14Trifene umvua ne: Simeyone wapinganyi muanabu Yonatane mu bumfumu, kabidi ne udi udilongolola mua kuluangana mvita, ke kutuminaye Simeyone bantu ne mukenji, wamba ne:
15— Midimu ivua muanenu Yonatane ukuata, uvua ne bua kufuta mukalenga, kadi kavua mufute to. Ke patudi bamukuate mu lukanu. 16Nenku, tumaku nkanu mitoke ya mushinga mukole ya kilo 2.700 ne bana bende ba balume babidi bu tshieya. Bualu tudi tutshina bua patuikala bamupatula mu lukanu kavu kutomboka. Kadi Patuamona bana, nenku netumupatule mu lukanu.
17Simeyone uvua mumanye ne: miaku ayi nya dishima. Kadi kutumaye amu bantu bua bangate nkanu ne bana, utshina bua kupangakana ne bena Yuda. 18Bavua mua kuamba ne: “Yonatane wafu amu bualu Simeyone, kena mutumine Trifene bana ne nkanu mitoke ya mushinga mukole.” 19Ke kutumaye bana ne nkanu mitoke ya mushinga mukole kilo 2.700. Kadi Trifene uvua ushima, kena mupatule Yonatane mu lukanu to.
20Nanku Trifene kubanga luendu bua kukuata ditunga ne kudinyanga. Kubendaye njila wa ku Adora,#13.20 Musoku udi kilometre 8 ne Ebrone. yeye ne bena mvita bende. Kadi Simeyone ne tshiluilu tshiende tshivua amu tshimulondakaja, tshimutatshisha bikole. 21Pine apu, bantu bavua balame nzubu mukolesha mu tshimenga tshia Yerushalayime, kutumina Trifene mukenji, bamubikila lukasa bua ayile ku tshipela bua kupetangana nabu, kabidi abatumine bia kudia. 22Trifene uvua ulongolola tshiluilu tshijima tshia babandi ba pa tubalu bua kuya ku luendu alu. Kadi butuku abu, mvula mukole wa neje kuloka, kumupangisha mua kuyaye ku luendu alu. Nanku kuyilaye njila wa ditunga dia Ngilaade.#13.22 Bakuabu badi bafunda Ngalileya. 23Ufika pepi ne Baskama,#13.23 Pa buipi ne Karmele. kushipaye Yonatane. Kumujikaye muine amu. 24Pashishe Trifene kupingana mu ditunga diabu.
25Simeyone kutuma bantu bua bangate tshitalu tshia Yonatane. Kutshijikaye mu Modine,#13.25 Modine: tangila diumvuija mu 2.1. tshimenga tshia bankambua bende. 26Bena Izrayele bonsu kudila Yonatane, kuenza madilu matuku mavule. 27Simeyone kuibakisha bibumba pa lukita lua tatuende ne pa ya bana babu, bua bantu bikale bayimuena kule. Kumpala nansha kunyima kuvua kulamika mabue mafinunuke. 28Kuimanyikaye bibumba muanda mutekete mu mulongu, bua tatuende, mamuende, ne bua bana babu ba balume banayi. 29Uvua mubielele lupangu bua makunji manene. Ku makunji eku uvua muzoleku bia lufu bia bena mvita, bua bikale batuluka matuku onsu Bamakabe. Ku luseke lua bia lufu, uvua muzoleku majuwa a miongumiongu, bua bonsu bavua bayile mu mayi manene#13.29 Ki mbajadike bimpe mudibu mua kuandamuna miaku idi mu kanungu aka. babimone. 30Ke mudi nkita ivua Simeyone muibakishe mu Modine nanku. Itshidiku too ne ku lelu.
Demetriyuse II udi ujadika ndondu ne bena Yuda
31Tshikondu atshi, Trifene ne budimu bupite, kushipesha ne Antiyokuse mukalenga mutshikale muana.#13.31 Ke Antiyokuse VI, tangila 11.39. 32Kudiaye bukalenga buende bua mu buloba bunene bua Siriya, #13.32 buloba bunene bua Siriya: ke Palestine, Lebanone, ne tshitupa tshia kuinshi tshia Siriya wa lelo. kuasa tshifulu tshia bukalenga. Ditunga kupeta makenga mavule bualu bua mukalenga awu.
33Simeyone kuasulula nzubu ya bimana bikolesha ya mu Yudeya, kuyinyungulula ne tuleya tule, ne bimana bikole, bikale ne biibi bipayika mabaya. Ke kutekeshaye ne bia kudia mu nzubu amu. 34Pashishe Simeyone, kutumina mukalenga Demetriyuse II ba mienampala, umulomba bua bena Yuda kabalambudi bitadi mu ditunga, bualu Trifone uvua munyangakaje bintu bia ditunga diabu. 35Ke mukalenga Demetriyuse kuanyisha, kuandamuna miaku eyi mu mukanda udi ulonda ewu:
36— Meme mukalenga Demetriyuse, ndi ntumina Simeyone, mutuangaji munene, kabidi mulunda wa bakalenga, pamue ne bena Yuda ne bakulu ba ditunga muoyi. 37Tuapetshi nkata wa mpawungi ne dilala dia butumbi binudi batutumina bu tshintu tshia disanka. Tudi basue bua tutue ndondu bua bupole buikale munkatshi muetu. Netufundile bena mudimu ba mu bukalenga bua kabanulambuishi bitadi. 38Bionsu bitudi bamane kuamba bualu buenu, tudi tubishindika.#13.38 Tangila 11.30-37. Kabidi nzubu ya bimana bikole inudi base idi ishala yenu. 39Tudi Umufuila luse bua tulema ne ntupakanyi yenu binudi benze too ne mpindiewu. Katuena tulomba kabidi tshitadi tshimvua ne bua kufuta, nansha bitadi bikuabu bivuabu balomba ne ku lelu mu Yerushalayime. 40Pikala ba kunudi bakanyine kudifundisha mu bena mvita ba mukalenga, bidi amu bimpe bua tuetu nenu tuikale ne bupole!
41Mu tshidimu tshia 170,#13.41 tshidimu tshia 170: ke 142 bgbg ne Y.K. bena Izrayele bavua bapatuka mu bupika bua matunga a bende. 42Bavua batuadija kufunda mu mikanda ne: “Mu tshidimu tshia kumpala tshia Simeyone, mutuangaji munene, mulombodi wa bena mvita, mfumu wa bena Yuda.”
Simeyone udi ukuata Ngezere ne nzubu wa bena mvita mu Yerushalayime
43Mu matuku awu, Simeyone kunyungulukila Ngezere#13.43 Tangila diumvuija mu 4.15. ne tshiluilu tshiende, kuibaka kaleya kadibu mua kuendesha, bua kuya naku kumpala mu mvita, kukasemeja pepi ne tshimenga. Kuluishaye kamue kaleya ka mu tshimenga. Kukakuataye. 44Bantu bavua mu kaleya ka kuendesha kudiela panshi mu tshimenga. Bowa bunene kukuata bantu bonsu. 45Bena mu tshimenga, pamue ne bakaji ne bana, kubanda pa tshimana. Kupandabu bilamba biabu, bela mbila mikole, balomba Simeyone bua abafuile luse. 46Bavua bamba ne: — Kusombodi bua bubi butuvua benze, kadi utufuile luse!
47Simeyone kuitaba, kulekeshaye mvita. Kadi kubipataye mu tshimenga. Kumushaye mikiya ivua ku nzubu ivuabu batendelala nwidie. Pashishe kubuelaye ne bena mvita bende mu Ngezere bimba misambu, batumbisha Mvidi Mukulu. 48Kumushaye bubi buonsu mu tshimenga. Kutekayemu bantu bavua balamate Mvidi Mukulu. Kukoleshaye bimana bia tshimenga, kuasamu nzubu wende.
49Kadi bonsu bavua mu nzubu wa bimana bikolesha mu Yerushalayime, bavua bapanga mua kupatuka bua kuya kusakula mu ditunga,#13.49 Tangila 12.36. nansha kupingana mu nzubu. Nanku nzala kubasuma bikole kushipa bantu bavule. 50Kulombabu Simeyone bua abapeshe ditalala. Yeye kuanyisha. Kubipataye mu nzubu wa bimana bikolesha. Kumushaye mikiya ivuamu. 51Bena Yuda kubuelabu mu nzubu wa bimana bikolesha awu mu matuku makumi abidi ne asatu a ngondu muibidi wa tshidimu tshia 171.#13.51 171: ke tshidimu tshia 141 bgbg ne Y.K. Bavua babuelamu bela tunkunduluila bambula malala ne lunkombe, lumembu ne lunzenze bienda bidila, misambu ikungula, bualu Izrayele wabutulu muluishi wende munene wamuipatshi. 52Simeyone kutuma diyi bua tshidimu tshionsu, padi dituku adi dikumbana, benza tshibilu ne disanka. Kukoleshaye mukuna wa tshijila uvua mutangilangane ne nzubu wa bimana bikolesha. Kusombaye popu ne bena mvita bende. 53Simeyone umona ne muanende Yowanane wakolu, kuelaye meji mua kumuteka mfumu wa tshiluilu. Yowanane uvua muye kusombela mu Ngezere.
Currently Selected:
1 Bamakabe 13: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996