1 Bamakabe 12
12
Yonatane udi utua ndondu ne bena Rome, kabidi ne Sparte
1Yonatane umona nuwuaye mupete dikasa dimpe mu mvita, kusungulaye bamienampala. Kubatumaye ku bena Rome bua kujadika ne kukolesha diumvuangana dia bulunda buabu ne bena Rome.#12.1 Fuanyikija ne 8.17-32.
2Mikanda ya mushindu umue, kuyituminaye kabidi bena Sparte ne bikuabu bimenga kabidi.
3Bamienampala kuya mu Rome. Bafika, kubabuejabu mu nzubu wa tshimamuende wa bukalenga. Kuambabu miaku eyi:
— Yonatane, mutuangaji munene, ne bena Yuda, mbatutume kunudi bua kukolesha bulunda ne diumvuangana nenu, bu muvuabi bangabanga.
4Bena tshimamuende wa bukalenga, kubapa mikanda ya kupa bamfumu ba matunga onsu avuabu ne bua kukosolola, bua bamfumu bambuluishe bamienampala, bua bapingane kuabu bimpe.
5Telejayi muvua mukanda uvua Yonatane mutumine bena Sparte:
6— Meme Yonatane, mutuangaji munene, pamue ne Tshipangu tshia bakulu ba ditunga, batuangaji ne bana betu bakuabu bonsu bena Yuda, tudi tutumina bana#12.6 Tangila kan. 21. betu bena Sparte mukanda ewu. Muoyi wenu bonsu. 7Ku kale, mukalenga Areyose, uvua mudie bumfumu munkatshi muenu, uvua mutumine Onyase mutuangaji munene wetu mukanda. Uvua mufunde ne: tudi bana benu. Bua kujadika, tangila miaku ya mukanda utudi tusakidila ku wetu.#12.7 Areyose I uvua ne bumfumu mu Sparte mu 309 too ne ku 265 bgbg ne Y.K. 8Onyase kuakidila ne musangelu muntu uvua mufike ne mukanda. Kubalaye mukanda uvua uleja patoke dijinga dia mfumu dia kumyuangana netu ne kudia netu tshioyu. 9Kadi, katuena tukengela kudia tshiovu ne bantu, bualu mikanda ya tshijila itudi nayi idi bukole buetu. 10Kadi tuvua basue kutuma bantu bua kubanga tshiakabidi diumvuangana ne bulunda buetu nenu. Katuena basue kuikala benyi kunudi. Bualu bidimu bivule biapitshi, katshia nuatutumina bantu, 11tudi amu tunuvuluka mu bibilu ne matuku makuabu, misangu yonsu itudi tulambula milambu, tutendelela. Ke mudi bena muntu ne bua kuenzelangana. 12Tudi tusanka bua lumu luenu. 13Kadi tuetu, makenga ne mvita biatupitshi. Kabidi bakalenga ba ku mitumba yetu bavua amu batuluisha. 14Mu mvita eyi katuvua basue kunusuya, nansha bantu bakuabu batudi batua nabu ndondu, nansha balunda betu. 15Amu Mvidi Mukulu ke uvua mutuambuluishe. Mmutusungidile kudi baluishi betu, bobu kufua bundu.
16Ke patudi basungule Numenyuse, muana wa Antiyokuse, ne Antipatere, muana wa Yasone, bua tuetu kubatuma kudi bena Rome bua kubangulula bulunda ne diumvuangana dietu dia bangabanga. 17Tuvua babafundile kabidi bua bafike ne kuenu aku. Banuele muoyi, banupe ne mukanda wetu wa dibangulula dia tshioyu ne dia diumvuangana dietu. 18Anyishayi bua nutuandamune pa bualu ebu. 19Ke mukanda uvuabu batumine Onyase ku kale ewu:
20— Meme Oreyose, mukalenga wa bena Sparte, ndi ntumina Onyase, mutuangaji munene, mukanda ewu. Muoyi webe awu. 21Tuamonyi mu mukanda wa kale mudi bena Sparte bikale bana babu ne bena Yuda. Bonsu buetu tudi ndelanganyi ya Abrahame. 22Kadi mpindiewu, bu mutuamanyi nanku, bidi bimpe bua nutufundile, nutumanyishe malu a kuenu aku. 23Tudi tunumanyisha ne: “Tudi basue bua bimuna bietu, nansha biuma bietu bikale bu bienu. Nanku biuma bienu nebikale bu bietu.” Tudi bafundile mienampala yetu bua banumanyishe meji atudi bele.
Tshiluilu tshia Demetriyuse tshidi tshinyema Yonatane
24Yonatane kumvua ne: bamfumu banene ba bena mvita ba Demetriyuse mbafike tshiakabidi ne musumba mupite wa kumpala, bua kumuluisha. 25Kumukaye diakamue mu Yerushalayime bua kusangila nabu mu buloba bua Amate.#12.25 Amate: buloba buvua ku mikalu ku mutu kua Siriya munene. Bualu kavua musue bua bapete mushindu wa kubuela mu ditunga diende to.
26Kutumaye batentekedi mu mitanda yabu. Bapingana kumuambilabu muvua baluishi badilongolole muabu muonsu bua kujula mvita butuku. 27Dilolu, Yonatane kuambila bena mvita bende bua batabale, bikale ne bia lufu mu bianza, bindila mvita. Kutekaye kabidi bena mvita nseke yonsu bua kulama ne kutentekela mitanda. 28Baluishi bumvua muvua Yonatane mubindile bua mvita, buowa kubakuata ne luzakalu, kutemeshabu kapia mu mitanda, kunyemabu.#12.28 kunyemabu: mu mikanda miluabu ya kale ki mbafunde miaku eyi to. 29Yonatane ne bena diende mbalue kumanya diumbuka dia baluishi mu mitanda amu dinda, bualu bavua bamona kapia kashale katema mu mitanda. 30Ke Yonatane kubalondakaja. Kadi kena mubapete, bualu bakavua bamane kusabuka musulu wa Eletere.#12.30 Tangila diumvuija mu 11.7.
31Yonatane kukudimukila bena Arabe bavuabu babikila ne: bena Zabade.#12.31 bena Zabade: bavua basombe muaba udi lelo tshimenga tshia Zebedani. Kubatshimunaye, kupawula ne bintu biabu. 32Pashishe, kutulabu mitanda. Kuendakananganabu tshitupa tshia buloba atshi tshijima. Kufikabu ne ku Damase. 33Simeyone pende uvua ukosolola ditunga too ne ku Askalone ne ku bimenga bikolesha bia pabuipi. Kufikaye kabidi mu Yope,#12.33 Tangila 10.86. kuasaye momu. 34Bualu uvua mumvue ne bena ditunga badi basue kupa Demetriyuse tshimenga. Ke yeye kuteka mu Yope tshisumbu tshia bena mvita bua kutshilama.
Yonatane udi ukolesha bimana bia Yerushalayime
35Yonatane upingana mu Yerushalayime, kusangishaye bakulu ba ditunga, kushindika nabu bua kukolesha bimana bidi mu Yudeya, 36bua kubandisha bimana bia Yerushalayime, kabidi ne bua kuasa tshimana tshile tshidi tshikosolola tshimenga ne nzubu wa bena mvita, bua bena mvita ba Demetriyuse bashale amu mu nzubu, kabamonyi mua kupana nansha kusumba bintu biabu. 37Bantu kusangila bua kuasulula tshimenga, bualu luseke ludi diba dipatukila lua tshimenga, tshitupa tshia tshimana tshivua tshiupuke. Kulongololabu kabidi bilenga tshitupa tshia tshimenga tshivuabu babikila ne: Kafenata.#12.37 Kafenata: bumue ke tshitupa tshipiatshipia tshia tshimenga. 38Simeyone kuasulula kabidi tshimenga tshia Adida#12.38 Adida: kilometre 6 ku mutu kua Lida (tangila 11.34). mu mpata. Kutshikoleshaye, kuelaku biibi ne mabaya.
Trifone udi ukuata Yonatane lukola mu mvita
39Trifone uvua ukeba kudia bumfumu mu buloba bunene bua Siriya, ukeba bua kuikala mukalenga pa mutu pa mukalenga Antiyokuse VI.#12.39 Antiyokuse VI: ke muana wa Aleksandre Balase. 40Kadi uvua utshina ne: Yonatane udi mua kumujikila njila, kabidi kumuluisha. Nenku kukebaye mua kukuata Yonatane bua kumushipa. Kuyaye mu Bete-Sheyane.#12.40 Tangila 5.52. 41Yonatane kuangata bena mvita binunu makumi anayi, bavua bamanye mvita bapiluke bua kuya kumuluisha. Kufikabu mu Bete-Sheyane. 42Trifone umona ne: Yonatane udi ne bena mvita bavule, kupangilaye mua kumuluisha. 43Trifone kuakidila Yonatane ne musangelu, kumuleja balunda bende, kumupa malambi. Kutuminaye balunda bende ne tshiluilu tshiende diyi dia kutumikila Yonatane, amu bu mudibu bamutumikila yeye muine. 44Kuambilaye Yonatane ne:
— Udi upungijija bantu bebe bonsu aba, patudi katuyi ne mvita bua tshinyi? 45Tuma bena mvita kuabu, angata amu badi ne bua kukulama. Tuetu tuye nebe mu Ptolemayise. Ndi nkupa tshimenga atshi ne nzubu ya bena mvita idi mu bimenga bikuabu, ne bisumbu bia bena mvita ne banene ba mu bukalenga. Pashishe nempingane kuanyi. Ke bualu bundi muvuile abu.
46Yonatane kuanyisha. Kuenzaye mumuambidi Trifone amu. Kutangalajaye tshiluilu. Kutshipingajaye ku bena Yuda. 47Kulamaye bantu binunu amu bisatu. Kutekaye binunu bibidi mu Ngalileya. Kushala ne tshinunu bua kumulamatshi. 48Kadi Yonatane ubuela amu mu tshimenga tshia Ptolemayise, bantu ba mu tshimenga kuinjila biibi. Kumukuatabu, kushipa bonsu bavua babuela nende. 49Trifone kutuma bisumbu bia bena mvita ne bia babandi ba pa tubalu mu Ngalileya ne mu Mpata munene#12.49 Tangila 5.52. bua kushipamu bena mvita bakuabu ba Yonatane. 50Bavua mu Ngalileya kujadika ne mbakuate mutuangaji munene, kabidi mbashipe ne bonsu bavuaye nabu. Kukoleshanganabu ku muoyi. Kuyabu mu mvita basuikakanangana, badilongolola ku mvita. 51Baluishi babu bavua babalondakaja, bamona ne: bena mvita badi bakeba kuluangana mvita muabu muonsu, kupinganabu. 52Ke bena mvita ba bena Yuda kupingana bonsu bilenga mu Yudeya. Kudiabu Yonatane ne bavuaye nabu. Kudiumvuabu ne bowa bunene. Bena Izrayele bonsu bavua mu madilu manene. 53Diba adi bena mutumba babu bonsu bena bisamba bikuabu bavua bakeba mua kubabutula. Bavua bamba ne: “Tubaluishayi mpindiewu, netubabutule pa buloba. Kabatshiena nansha ne mfumu, nansha ne udi mua kubambuluisha kabidi to. Nanku muntu kakubavuluka kabidi panu to.”
Currently Selected:
1 Bamakabe 12: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996