Luka 9
9
Etomelo ea ba-jom lʼafe
(Mt 10.5-15; Mk 6.7-13)
1Aoleta ba-jom lʼafe, ko aolakaya mpamba la mpifo ele bademona bauma ko la mbaikya ea nkangi. 2Ko aolatoma wae bongoza likulaka ja Nzakomba ko baikyʼanto. 3Ko aolasangela, Talotombake yomba ya lokendo, nko bonkando, nko ntombi, nko mampa, nkʼosolo, ko taloatake kasakʼife. 4Ko ilombe indotswʼinyo, lokongʼoyala nkʼeko ko lokenda limʼeko. 5Ko wiji bofʼanto oambʼinyo, andimanʼinyo limʼonanga boko, lotitola biucu limʼakaka bakinyo nga lotaza lofotsa joi elʼiyo. 6Ko iyo baokenda, baokaana benanga, baosanga nsango eʼolotsi, ko baikyakʼanto biiji beuma.
Bokakaano wa Elode
(Mt 14.1-12; Mk 6.14-29)
7Ko Elode, vice-gouverneur, aoloka nsango ea baoyiʼauma bakelamaki, ko aokakaza bouke, eki bantoʼamo osangaka wae Yoane aokunjwa limʼiwa. 8Ko bamo baokela wete Eliya aolenya, ko lʼamʼankina wae omo owa bateli baki kalakala aokunjwa. 9Lolo Elode asanga wete, ntenaki Yoane botsa, lolo bontʼone ondokʼemi baoyiʼane akusʼoyalema na? Ko aolasa wae oene.
Yesu aleya banto nkotʼitano toma
(Mt 14.13-21; Mk 6.30-44; Yoa 6.1-14)
10Akiʼyʼutaka, bikima baolosangela elenge ea belemo bekiʼyʼokambaka. Ko aolakola nkʼiyo lʼende, ko aoleta ndʼonanga botangema Betesaida. 11Aki banyenga eaka, baolokima nkʼeko. Ko aolaamba, aosoola lʼiyo ndʼeloko ea likulaka ja Nzakomba. Ko aikyaki baso bandelaki wela wʼeikyelo. 12Lolo jefa joangʼoselama, ko ba-jom lʼafe baoyʼelʼende, baokela, Fanzola linyenga kela bakende ndʼenanga lʼasala batutsi, betame ko batane toma ta ndala; elʼiso tolʼane ndʼitenela yʼetekeleke. 13Lolo aolakela, Inyo mongo lakaya toma ta ndala. Lolo baoloutola, Toma tole lʼiso o mampa itano la nse ife kika – imola nko tocwa osombela bantʼane bauma toma! 14Baende baki eko ngole nkoto itano. Nkako aokela bakimiʼakae, Lasangele wae bakitase ndʼeloi, tu boloi ngʼanto ntuku itano. 15Bakelaki ngoko; ko iyʼauma baokitase. 16Yesu aokola mampʼiko itano la nse ikʼife, aosangya baiso nda loola, asakaki toma toko bokako wa swa, nkako aotena toko ko aokayʼakimi wete balekezʼanto bʼetukuluku. 17Ko iyʼauma baleki, ko baokinda. Ko baolambola bitei bikociki tofole jom la tofe.
Imezelo ea Petelo wae Yesu ale Masiya
(Mt 16.13-19; Mk 8.27-29)
18Ekekʼemo aondʼende beondo mbulama, bakimi baki lʼende. Ko aolauola, Banyenga bʼanto batanga wae emi nde na? 19Iyo baoloamba wae, Yoane-Wini, ko bamo Eliya, ko bankina, omo owa bateli baki kalakala oyokunjwa. 20Ko aolakela, Lolo inyo mongo lotanga wae emi nde na? Ko Petelo aoloamba wete, Masiya ea Nzakomba.
Yesu atela iwa lʼeetswelo
(Mt 16.20-23; Mk 8.30-33)
21Ko aolafeka ko aolaaka wae bafosangelʼontʼomo joi line. 22Aokongʼosanga wete, Bonʼowʼonto acwʼenʼelo lʼaoyiʼauke, ko atandolama la bingambi la nkanga ya joso la bakoci bʼenkanda ko aomama, ko mpanga akunjwa nda mbile eʼisato.
Bokimi owa Yesu ifoyafima ende mongo
(Mt 16.24-28; Mk 8.34–9.1)
23Ko aotefeelʼantʼauma, Ayaka bonto nko loswele alanga ankime, kela ayafimʼende mongo, ko kela ambole ekulusu ekande wengi mbile ko ayonkimʼemi. 24Ele osʼolanga lofonga loiko lokae, ifocweya loko; lolo osʼocweya loiko lokae ndʼeloko ekami, ifofonga loko. 25Wenaka bonto akitola bokili bouma nkito, lolo acweya bomongo, nkinʼende mongo afitane, ndako ekande ele nko? 26Ele osʼondokʼemi lʼaoyiʼakami nsoi, Bonʼowʼonto ifookʼende nsoi aʼendʼoya nda jilangi likande la jʼIse la ja bikima biʼoeko. 27Lolo nsangelʼinyo la nsosolo, bamo bʼako bandemi ane bafaokita ndʼiwa atafʼiyʼena likulaka ja Nzakomba.
Efaningwelo ea Yesu
(Mt 17.1-8; Mk 9.2-8)
28Ngole bembile mwambi ndʼafeka ba bitefeelo bine aokola Petelo la Yoane la Yakobo, ko aounda lʼiyo nda ngongo wae aondʼeko. 29Ko aondʼende, enyelo eʼelongi ekande eofaningwa, ko benkoto bekae beoyala fe mongo, o ngesingesi. 30Ko bala bantʼafe baosoola lʼende, wete Mose lʼEliva. 31Iyo baolenya nda jilangi ko baotefela nda ncina ea imanelo ekae ecwʼende imana nda Yelusalema. 32Petelo lʼiyʼaki lʼende baolokʼolito wʼaisilo, lolo akiʼyʼoetswakʼolotsi, baolena jilangi likae, ko la bantʼakʼafe bakemi lʼende. 33Ko acwʼivo olena lʼende ndalena Petelo aotefeela Yesu, Nkolo, joi jʼolotsi elʼiso ane mo! Kela totonge bisele bisato; emoko ekawe lʼemoko ea Mose, ko lʼemoko eʼEliya ntakotola joi litefelʼende. 34Nkʼatefelʼende baoyiʼane, litute joyʼakuka: ko baolokʼofoju andotswʼiyo nda litute. 35Ko lolaka loya lima litute, lotefelaki, One ale Bonʼokami osonami lʼemi; lokozʼende. 36Ko aki lolaka osilaka. Yesu aotanema nkʼende kika. Ko iyo baoyala wai, ko ndʼembilʼeko ntabasangela bontʼomoko joi limo jʼaoyi bakiʼyʼenaka.
Eikyelo ea bonolu oki la bonsinga
(Mt 17.14-18; Mk 9.14-27)
37Ko nda mbile ea lobi, akiʼyʼokitelaka lima ngongo, linyenga jʼonene jʼanto baokumana lʼende. 38Ko bala bontʼomo lima linyenga aobeleza, Bolaki nkoonda, lendakʼonʼokami owa jende, elʼende ale bonʼokami owa likinda. 39Ko bala, bolimo boyokandʼende, ko sasimo abeleza; ko bolimo boyobilingola, ko ende ayoza mpulo ndʼomwa, ko ntutama la bikeke biuma bolimo akongʼokundʼende nkakunda. 40Ko mbondaki bakimiʼake wae booza, lolo ntabakuseya. 41Yesu aolamba, aokela, O lʼeotswelo esambʼimeezo lʼea bocilingano! Mpanga njale lʼinyo, ko ndikʼotema lʼinyo elingi na? Yela bonʼoke ane. 42Ayʼende demona aolofukusa la bolo ko aolobilingola. Lolo Yesu aofangwela bolimo boko wa linyamo, ko aobikya bonoju, ko aolokitsʼise ekae. 43Ko iyʼauma baokamwa la mpamba eleki ea Nzakomba.
Lotelo jʼiwa ya Yesu
(Mt 17.22-23; Mk 9.30-32)
Lolo akamwʼantʼauma lʼelemo beuma bekiʼndʼokelaka, aosangela bakimiʼakande, 44Lokongʼoka baoyiʼane ndʼatoi bakinyo; ele Bonʼowʼonto aocwa olekyama ndʼakata bʼanto. 45Lolo iyo ntabakotola etefeelo ene, ko eko eolakukamela wae bafaosifola eko, ko bokakʼooma jouolʼende ncinʼea etefeelo ene.
Bonto olekola na?
(Mt 18.1-5; Mk 9.33-37)
46Ko ekoji eolola ndʼetei ekiyo, wete bontʼokiyo olekola na. 47Lolo aki Yesu eaka bikoji biki ndʼetemʼekiyo, aokola iyonoju, aoloemya ndongama lʼende, 48ko aolakela, Osʼondamba iyonoju ine nda lina likami, anjambʼemi; ko osʼonjambʼemi ambʼende ontomaki; ko elʼinyʼauma, osʼoleki isisi, ende ale owʼonene.
Bonto ofosukʼinyo ale ndʼolongʼokinyo
(Mk 9.38-40)
49Yoane aolamba, aokela, Nkolo, tenaki bontʼomo ondozaki bademona nda lina like, ko tolofekaki, efʼende okimane lʼiso. 50Lolo Yesu aolokela, Talofekake, elʼontʼofosukʼinyo, ale ndʼolongʼokinyo.
Yesu aocwa Yelusalema, ko Ba-Samalia bafolange
51Aki bekolo oangʼokoka wae ambeme ndʼaliko, ende mongo aoleleza elongi ekande wae acwe nda Yelusalema. 52Ko aotoma bikima nda joso likande, ko iyo baokenda ko baolotswa ndʼonangʼomo wa Ba-Samalia, wae bezʼeko baoyi ndʼeloko ekande. 53Ko banto bʼonangʼoko ntabimeza oambʼende eki elongi ekae ekolongi wae akende nda Yelusalema. 54Akiʼyʼenaka ngoko, bakimi Yakobo la Yoane baolouola, Nkolo olanga nde wae tete tsa tokitele lima loola ko tofitʼiyo? 55Lolo aokengwanʼelʼiyo ko aolafela. Ko aolakela, Inyo lofea elenge ea bolimʼokinyo. Ele Bonʼowʼonto ntayakʼofitʼanto lolo oikyʼiyo. 56Ko baocwa ndʼonanga bonkina.
Bisengamelo biʼanto balangʼokima Yesu
(Mt 8.19-22)
57Akendʼiyo nda mboka, bontʼomo aolokela, Emi njifokokima wiji nko loswele bocwa we. 58Yesu aoloamba wete, Bemanga bele la ntoka, ko tofulu ta loola tole la baumbu, lolo Bonʼowʼonto afa la ambyelo ea botsʼokande. 59Aosangelʼomo, Onkime. Lolo ende aolamba. Oncike wae ncwe joso okunda ise ekami. 60Yesu aoloambʼende, Kela bawei bakunde baweiʼakiyo, lolo we, kendaka yongoza likulaka ja Nzakomba. 61Bontʼonkina aolokela, Nkolo njifokokima, lolo kela nsesane joso lʼiyʼale ndʼola bokami. 62Lolo Yesu aolosangelʼende, Nkʼontʼondila likata ndʼefeko ea lofuso, nkako alenda ndʼafeka, eji la likulaka ja Nzakomba.
Currently Selected:
Luka 9: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
