Toango 21

Eotswelo ea Yisaka. Angala ndʼete keleke. Bokolo ndatsa Abalayama la Abimileke

1Ko Yawe aolofwa joi likiʼndʼosangelaka Sala, ko Yawe aolokeela joi likiʼndʼocikelakʼende elaka. 2Sala aofoswa jemi, ko aootela Abalayama bona owa jende, akiʼnde okitaka ekota, o ndʼekeke eʼelaka eki Nzakomba ocikelakʼende. 3Ko Abalayama aolila bonʼokae owa jende oki Sala ootelakʼende lina Yisaka. 4Aki bona okitaka bembile mwambi Abalayama aolotena nsonge, ngoki Nzakomba osisakʼende bosise. 5Aki bona okae Yisaka ootswʼelʼende, Abalayama aokita mbula bonkama. 6Ko Sala aokela, “Nzakomba aonsekya tola; wengiʼonto ondoka ifoseka lʼemi.” 7Ko aokongotefela, “Bontʼale nko okanelaki wae bifotefeela Abalayama Sala ifolomya bona baele? Siki nde njootelʼende bona owa jende akiʼndʼokitaka mpaka.”

8Ko bona aosekwa, ko baolokiza baele. Ko Abalayama aolamba elambo eʼenene nda mbile ekʼiyʼokizaka Yisaka baele. 9Ko Sala aolena bona owa Angala bosi Ejipeto, okiʼndʼootelaka Abalayama ayetola Yisaka jeto. 10Ko aokeela Abalayama, “Ozaka bokwalʼone owʼomoto lʼona okande, ele bona ow’ okwala one owʼomoto afaamana la bona okami Yisaka nda lisango.” 11Abalayama aoloka joi line lokeseli mongo la ncina ea bonʼokande. 12Lolo Nzakomba aotefeela Abalayama, “Tokeselake ndʼeloko ea bonolu lʼokwala oke owʼomoto. Okoza Sala ndʼaoyi bauma bakosangelʼende, ele booci wʼanaʼakawe wifoandema limʼele Yisaka. 13Ko limʼele bonʼowʼokwala owʼomoto njifemaza boociʼomo ngoko, la ncina wae ende ale bona okawe.”

14Nkesa eʼafeka, Abalayama aoetswa la nkesa mongo, aokola mampa lʼolangi wʼasi, aokaya Angala toma toko, aolafya toko nda lisoko likande, ko la bonʼokande ngoko, ko aolatoma wae bakende. Ko Angala aolimanʼeko, ko aolesesa ndʼete keleke ea Bela-Seba. 15Aki basi osilaka ndʼolangi, aolambyʼonolu ndʼase bʼitamba, 16ko aocwʼokitase ndongama lʼende, esi nga wonya wa likula; elʼende aokela, “Mpoyene iwa ya bonʼokami oyei!” Ko aokitase ndongama lʼende; ko aosangya lofoso ko aolela o ndalela. 17Lolonde Nzakomba aoloka lolaka jʼonolu, ko ekima ea Nzakomba aoleta Angala lima loola, aolokela, “Angala, likambo like na? Toangake, ele Nzakomba aoloka lilelo jʼonolu limʼitenela indambʼende. 18Emala, kola bonolu, ko wʼokite la likata; elʼemi njifokela lʼende booci wʼonene wʼanto.” 19Ko Nzakomba aolifola baiso bakae, ko aolena etoko eʼasi, ko aocwa oyozabolangi lʼasi, ko aomeza bonolu basi bako.

20Ko Nzakomba aki lʼonolu oko. Ende aosekwa, ko aofetsa ndʼete keleke, ko aoyalema wonyi owʼakula owa wanya mongo. 21Aofetsa ndʼete keleke ea Palana. Ko nyango aolokoela waji limʼese ea Ejipeto.

22Ndʼekekʼeko Abimeleke, la Fikola, capitaine ea soldats ikande baokela Abalayama wete, “Nzakomba ale la we ndʼelemo beuma bekamba we. 23Ndʼewelʼeko onsimbelʼane nsimbi la Nzakomba wae ofaonkakatanya emi la banaʼakami, ko lʼankanaʼakami, lolo wifonja emi boya, ko la ese ene eki wʼoyaka oyala bofaya, o ngokiʼmi okokeelaka we boya.” 24Ko Abalayama aokela, “Njifosimba nsimbi ngoko.” 25Ko Abalayama aofela Abimeleke lofeli ndʼewelʼea etoko eʼasi eki basali ba Abimeleke ofonolakʼende la wale. 26Ko Abimeleke aokela, “Emi mpea bontʼokelaki joi line, ko we ntonsangela; ko emi ncoka joi liko imola nko mbilʼene.” 27Ko Abalayama aokola mpate la ngombo ko aokaya Abimeleke iko nganji; ko iyʼakʼafe baolembʼokolo. 28Ko Abalayama aobuza bana ba mpate bʼamato nsambo. 29Ko Abimeleke aoluola Abalayama, “Banʼane nsambo ba mpate baki wʼouzaka bale la ncina na?” 30Ko Abalayama aokela, “Wifokola bana bane ba mpate bʼamato nsambo lima likata likami, wae bayale témoins ikami, wete emi ncimaki etoko ene.” 31Ndʼewelʼeko aotanga itenelʼiko Bela-Seba; ekʼiyʼafe osimbaka nsimbi eko. 32Ko baolembana bokolo nda Bela-Seba. Nkako Abimeleke aolemala, ende la Fikola, capitaine ea soldats ikande, ko baoluta ndʼese ea Ba-Pelesete. 33Ko Abalayama aolona botamba wa tamarisk nda Bela-Seba. Ko aoleta lina ja Yawe Nzakomba ea bikeke bia seko ndʼoondo. 34Ko Abalayama aoyala bofaya ndʼese ea Ba-Pelesete bembile beuke.

Currently Selected:

Toango 21: LOL87

Highlight

Copy