Toango 20

Esimbelo ea Abalayama nda Ngelala

1Limʼako Abalayama aocwa ndʼese ea sud, ko aokitase ndatsa Kadesa la Sula, ko aoyala nda Ngelala ngʼofaya. 2Ko Abalayama aokela ndʼeloko ea Sala waji okae, “Ende ale nkana ekami.” Ko Abimeleke, roi ea Ngelala, aokola Sala. 3Lolo Nzakomba aoya ele Abimelake nda liloto lʼotso, aolokela, “Bala, we ole ngolʼonto owei, la ncina ea bomoto oki wʼokolaka; elʼende ale waji owʼonto.” 4Lolo Abimeleke atatutamʼelʼende, ko aokela, “Nkolo, we wifooma nde ese ea banto bafa lʼekwa eʼobe? 5La jende mongo ntansangela, ‘Ende ale nkana ekami’? Ko bomoto mongo aosanga, ‘Ende ale nkana ekami.’ Nkelaki joi line lʼotema wa ci, ko lʼakata basamba eloko.” 6Nkako Nzakomba aolokela nda liloto, “Onde, njea wete okelaki joi line lʼotema wa ci, ko emi mongo nkosukaki wete ofaonkeelʼemi bobe; ndʼewelʼeko ncikokaya elekelo wae ofomwʼende. 7Ko aeyoko, uteya waji owʼontʼoko, elʼende boteli; mpanga ende akoondele, ko wifoika. Lolo ngʼofouteya, fonga jea wae wifowa, la we la bakawe bauma.”

8Ko Abimeleke aoetswa la nkesa mongo, ko aoleta basaliʼakae bauma, ko aolasangela baoyiʼako bauma. Ko bantʼako baoloka bofoju mongo. 9Nkako Abimeleke aoleta Abalayama, ko aolokela, “Joi line liki we otokeelaka na? Ko joi jʼobe likiʼmʼokokeelaka we na, wae ondiezʼemi la likulaka likami bobeʼone wʼonene? Onkeela baoyi batakelamaka.” 10Ko Abimeleke aokela Abalayama, “Joi liki wʼokanelaka na eki we okelaka joi line?” 11Ko Abalayama aokela, “Nkelaki joi line ekiʼmʼokanelaka, Boangi wa Nzakomba bofa ndʼesʼene nye, ko bifomboma ndʼeloko ea waji okami. 12Limo wae, ende ale nkana ekami nsosolo. Ale bona owa ise ekami, lolo afa bona owa nyango ekami; ko aoyʼoyalema waji okami. 13Ko aki Nzakomba ondimolaka limʼilombe yʼise ekami, ko aondete tsa ndʼokili, ndokelakʼende, ‘Line liota lie wʼonjeneyʼemi wae nda wengi wiji bocwʼiso, wifotefela ndʼewelʼekami, Ende ale nkana ekami.’ ” 14Nkako Abimeleke aokola mpate la ngombo yʼaende, la bakwala bʼaende la bʼamato, ko aokaya Abalayama bako; ko aolouteya Sala waji okae. 15Ko Abimeleke aolokela, “Bala, ese ekami ele nda joso like; yala ndʼeko wijibolangawe.” 16Ko aokela Sala, “Bala, njokaya nkana eke bitei bia argent nkoto emoko; eko ele lotaza jʼeyengwelo ekawe ndʼaiso bʼantʼauma bale la we; ko we oyengwa lima likambo nda joso jʼantʼauma.” 17Ko Abalayama aoonda Nzakomba, ko Nzakomba aoikya Abimeleke la waji okae la bakwala bakae bʼamato, wae baote bana. 18Eki Yawe okombaka bakunju bʼamato bauma bʼilongo ya Abimeleke la ncina ea Sala, waji owa Abalayama.

Currently Selected:

Toango 20: LOL87

Highlight

Copy