Marko 9

1Man ewacu igi kumae, Andha ayero iwu kumae, Jumoko nuti kind ju m’ucungo keni, ma gibibilo tho ki ngo, cil ma gineno ko ker pa Mungu bino ku tego.

Kit Yesu Lokre

(Mt 17:1-13; Lk 9:28-36)

2 # 2 Pet 1:17, 18 Yo ng’ei ceng’ abusiel Yesu gamu Petro giku Yakobo, man Yohana, man eterogi kakendgi wi got ma wiu: e kite lokre i wang’gi; 3e kendi pare rieny, udoko tar pr, ma jabodho moko mbe m’i ng’om ma copo dwoke tar kumeca. 4E Elia giku Musa giwok i wang’gi: gibeweco giku Yesugi. 5E Petro loko lembe ewacu ni Yesu kumae, Japonji, ber iwa kum wani keni: wek watim odbak adek; acel iri, acel ni Musa, acel ke ni Elia. 6Kum eng’eyo ngo lem m’eloki, kum lworo benegogi dit. 7#Mt 3:17; Mk 1:11; Lk 3:22Afuru bino ketho tipo i wigi: dwal uai i afuru de wacu kumae, Maeni Woda ma jamerna: wuwinje. 8E eni eni nik ginen kun ku kun, gineno ng’atu moko ngo kendo, ndhu Yesu kende re gikugi.

9Kinde ma gibeloro got, eng’olo igi ya ku giyer pi gin ma gineno ni ng’atu moko, ento ka Wod dhanu bicer kendo ku kind ju m’utho. 10E gikanu lembene, gipenjri gigi rama thelembe mi cer kendo ku kind ju m’utho bedo ko. 11#Mal 4:5; Mt 11:14E gipenje, giwacu kumae, Ebedo nenedi ma jugorcik giwacu nia Elia bikolar bino be e? 12Man ewacu igi kumae, Elia lar ubino andha, man edwoko gin ceke: pi Wod dhanu ke jugoro nenedi, nia ebisendre ku gin dupa jubidwoke doko mananu de? 13Ento awacu iwu, nia Elia daru bino, man gitimo gin ceke ma giyenyo i kume, cil calu egore pire.

Yesu Wodho Tipo M’ucido kud i Nyathin

(Mt 17:14-21; Lk 9:37-43)

14E ka gibino ba julub, gineno udul dhanu ma dit ung’ino i kumgi, jugorcik de ma gibepenjri gikugi. 15Ndhu ndhu nica udul dhanu ceke, ka ginene, igi wang’ lii, man giringo aringa i bang’e gimothe. 16Man epenjogi kumae, Wupenjru kugi ku lembang’o? 17E ng’atu acel ma kind udul dhanu dwoko lembe ire kumae, Japonji, akelo woda i beng’i, m’ubedo ku tipo m’ajuba; 18man ka ma tek tipo te re i ie ceke, eredhe piny: voyo de dhure i dhoge, man ekayu lake, emoge de: e awacu ni julubni ya giwodhe woko; e ecopre igi ngo. 19Man eloko lembe igi ewacu kumae, E dhanum’utuk ma yioyic umbe kugi, abibedo kudu rokani? abitwio cwinya i kumwu rokani? kele i bang’a. 20Gikele de i bang’e: e kan enene, e eni eni tipone yece dit; man epodho i ng’om, emaku ng’iele’ voyo de wok. 21E epenjo won kumae, Gin maeni make ugambre awene? Man ewacu ire kumae, Ma fodi e nyathin. 22Ebederedhe i mac kud i pi bende wang’ udul, nik enyothe: ento tek icopo timo gin moko, bed ku ngisi i kumwa, ikonywa. 23Yesu wacu ire kumae, Tek icopo! Gin ceke copre ni ng’atu m’uyio. 24E ndhu ndhu nica won nyathin ukok, ewacu kumae, Ayio; konya ku yioyic para m’umbe. 25E ka Yesu neno nia udul dhanu gibering’ni karacelo, ejuko tipo m’ucido, ewacu ire kumae, In i tipo ma weco ngo ma winjo de ngo, ang’olo iri wok woko kud i ie, kud i dong’ imond i ie kendo. 26Kan ekok, ejake ma tek, e eai woko: man nyathin ubedo calu ng’atu m’utho; ketho nia dhanu kucel ma dit giwacu kumae, Etho. 27Ento Yesu maku cinge, eting’e ko malu; e eai. 28E kan emondo i ot, julubne gipenje nyalwe kumae, Nedi wacopo wodhe ngo? 29ewacu igi kumae, Wagi gino wodhre ku gin moko ngo, ndhu ku rwo.

Yesu Nyutho pi Tho Pare Kendo

(Mt 17:22-23; Lk 9:43-45)

30E giai kuca, gikadhu ku kind Galilaya; eyenyo ngo ya ng’atu moko ng’ei. 31Kum eponjo julubne, ewacu igi kumae, Wod dhanu jumie i cing’ dhanu, man gibinege; ka junege de, yo ng’ei ceng’ adek ebicer kendo. 32Ento ging’eyo thelembe nini ngo, lworo de cerogi ku penje.

Ng’a ma Dwong’ ma Sagu?

(Mt 18:1-5; Lk 9:46-48)

33E gibino Kapernaum: kan eni i ot epenjogi kumae, Ande wuporo lembang’o i gengi? 34#Lk 22:24Ento gibedo ling’: kum ande gipiembri i yo, nia ng’a ma dit ma sagu. 35#Mt 20:26, 27; 23:11; Mk 10:43, 44; Lk 22:26Ebedo piny, man elwong’o juapar wi ario; ewacu igi kumae, Tek ng’atu moko yenyo ebed ma kwong’ane, ebibedo cen ma sagu ceke, man jatic mi ceke. 36E egamu nyathin ma nyanok, ekethe i kindgi: e kan eting’e wi bote, ewacu igi kumae, 37#Mt 10:40; Lk 10:16; Yoh 13:20Ng’atu ma tek bijolo acel mi wagi nyithindho ma thindho ku nyinga, nwang’u ejolo an; man ng’atu ma tek ujolo an, nwang’u ejolo an ungo, ento ng’atu m’uora.

Ng’atu ma Jadhogwa Ngo En e Jabang’wa

(Lk 9:49-50; Mt 10:42)

38Yohana wacu ire kumae, Japonji, waneno ng’atu acel m’ubewodho pajogi ku nyingi; e wacere, kum elubowa ngo. 39Ento Yesu wacu kumae, Kud wukwere: kum ng’atu moko mbe ma bitimo tic ma dit ku nyinga, ma bicopo yero pira rac pio pio. 40#Mt 12:30; Lk 11:23Kum ng’atu ma tek ubedo jadhogwa ngo nwang’u en e jabang’wa. 41#Mt 10:42Kum ng’atu ma tek bimio iwu pi i kikombe wumadhi, kum wu ju pa Kristu, andha ayero iwu, nia sukulia pare birwinyo ire ki ngo. 42Man ke ng’atu ma tek biketho ng’atu acel ma kind nyithi ju maeni ma giyia ukier, ni ng’atuca cika jung’ab pom ma dit i ng’ute, jubaye ko i nam.

Gin ma Ketho Jukier

(Mt 18:6-9; Lk 17:1-2)

43 # Mt 5:30 Man tek cingi ketho ikier, thume woko: cika imond i kwo kud abala, sagu ma tek icidho i gehena ku cingi ario, i mac ma negre ngo, 44ka ma ukoko migi tho ngo, macne de negre ngo. 45Man tek tiendi ketho ikier, thume woko: cika imond i kwo kud abala sagu ma tek ibedo ku tiendi ario ma jubibei ko i gehena, 46ka ma ukoko migi tho ngo, macne de negre ngo. 47#Mt 5:29Man ke tek weng’i ketho ikier, fudhe woko: cika imond i ker pa Mungu ku weng’i acel sagu ma tek ibedo ku weng’i ario ma jubei ko i gehena, 48#Isa 66:24ka ma ukoko migi tho ngo, macne de negre ngo. 49Kum ku ba dhanu jubimulogi ku kadu ku mac. 50#Mt 5:13; Lk 14:34, 35Kadu ber: ento tek kadu lake tho, wubidwoko lake kud ang’o? Wubed ku kadu i iwu giwu, cwinywu de kwi wuku juwedu.

Currently Selected:

Marko 9: AB1970

Highlight

Copy