Marko 8

Cam ni Dhanu Rubanga Ang’wen

(Mt 15:32-39)

1I ceng’ maeno, kan udul dhanu ma dit gicokri kendo, cam migi de mbe, elwong’o julubne i bang’e, man ewacu igi kumae, 2Ngisi benega kum udul dhanu, kum gibedo i bang’a kawono doko ceng’ adek, ma cam umbe kugi: 3tek alalugi ya gidok thugi ku kec, gibivoc i yo; jumoko m’i kindgi de giai bor. 4Julubne giloko ire lembe kumae, I ka ma ngele keni jucopo nwang’u kwen m’ang’ina ma ci yeng’o dhanu maeni kani? 5Epenjogi de kumae, Lungu kwen adi ma ni i beng’wu? Giwacu kumae, Abiro. 6Man eng’olo ya udul dhanu gibed piny i ng’om: man eting’o lungu kwen abiro, kan emio foyofoc de, eng’weko ie, emio de ba julubne, giketh i wang’gi: e gikethogi i wang’ udul dhanu. 7Nwang’u rec moko ma thindho ni i bang’gi: e kan emio mugisa i wie, eng’olo ya juketh maeni bende i wang’gi. 8Gicamu de, giyeng’: man gicoko padune m’udong’, katoko abiro. 9Man giyenyo romo rubanga ang’wen: e elalugi. 10E eni eni eidho i combo ku julubne de, man ebino i ng’et Dalmanutha.

Gipenjo Giranyutha M’i Polo

(Mt 16:1-4; Lk 12:54-56)

11 # Mt 12:38; Lk 11:16 E Jufarisayo giwok, man gimaku penjri gikugi, gibeyenyo giranyutha i polo i bang’e gibidhe ko. 12#Mt 12:39; Lk 11:29Man egamu cwinye kwede kud i ie, ewacu kumae, Dhanum’utuk maeni gibeyenyo giranyutha nedi? andha awacu iwu kumae, Giranyutha moko mbe m’umire ni dhanum’utuk maeni. 13E ewekogi, eidho i combo kendo ekadhu ko lokaca.

Thobi mi Jufarisayo ku pa Herode

(Mt 16:5-12)

14E wigi wil ku ting’o kwen; gimbe kude i combo ndhu lungu kwen acel pii. 15#Lk 12:1Man eng’olo igi, ewacu kumae, Wubed ku weng’wu, wukuru ni thobi mi Jufarisayo ku thobi pa Herode. 16E giporo lembe i kindgi, giwacu kumae, Kwen umbe kudwa. 17E Yesu m’ung’eyo maeni ewacu igi kumae, Wuporo lembe nedi, kum kwen mu mbe? fodi wuneno ngo, kadok ang’eya de wung’eyo ngo? adundewu doko nwang’i? 18#Yer 5:21; Eze 12:2; Mk 4:12Wubedo ku weng’wu, wuneno de ngo? man wubedo ku ithwu, wuwinjo de ngo? wupoi de ngo? 19Kinde m’ang’weko i lungu kwen abic ni dhanu rubanga abic, wucoko padune m’udong’ upong’o katoko adi? Giwacu ire kumae, Apar wi ario. 20Man abiro i kind rubanga ang’wen, wucoko padune katoko adi? Giwacu ire kumae, Abiro. 21Man ewacu igi kumae, Fodi wukung’eyo ngo?

Yesu Yabu Wang’ Abinga i Bethsaida

22Giwok Bethsaida. Man jukelo ng’atu m’abinga i bang’e, gikwaye de emul kume. 23E emaku cing’ ng’atu m’abinga, man ewodhe woko kud i pacu; e kan eng’ulo lau i wang’e, eketho cinge de i kume, epenje kumae, Ineno piny moko? 24Eting’o wang’e malu, man ewacu kumae, Aneno dhanu; kum anenogi va yen, m’ubewotho. 25E elund eketho cinge kendo i wang’e; ng’atuca de neno piny tel, man edok kakare, edong’ eneno gin ceke terere. 26Man eore edok thugi, ewacu kumae, Kadok i pacu de kud imondi.

Petro Tuco pi Yesu

(Mt 16:13-20; Lk 9:18-21)

27E Yesu ai, ku julubne, gicidho i pacu Kaisaria Filipi: i kinde ma gini i yo epenjo julubne, ewacu igi kumae, Dhanu giwacu ya an a ng’a? 28#Mk 6:14, 15; Lk 9:7, 8E giyero ire, giwacu kumae, Yohana ma Jabaputisi; jumange de, Elia; ento jumange re, Acel ma kind jubila. 29#Yoh 6:68, 69Man epenjogi kumae, Wun ke wuwacu ya an a ng’a? Petro dwoko lembe ewacu ire kumae, In i Kristu. 30Man eng’olo igi ya ku giyer pire ni ng’atu moko.

Yesu Nyutho pi Tho Pare

(Mt 16:21-28; Lk 9:22-27)

31Emaku ponjogi de, nia Wod dhanu bikosendre be ku gin dupa, judongo ku julam ma dongo ku jugorcik de gibikwere, jubinege de, man ka ceng’ adek ukadhu ebicer kendo. 32Man eyero lembene igi kele. E Petro make, emaku kwere. 33Ento elokre, e kan eneno julubne, ejuko Petro, ewacu kumae, Dok i ng’eya Jok; kum ii pido pi gin pa Mungu ngo, ento gin mi dhanu. 34#Mt 10:38; Lk 14:27E elwong’o udul dhanu gibin i bang’e ku julubne, man ewacu igi kumae, Tek ng’atu moko yenyo elub ng’eya, wek ekwere gire, eting’ yen m’athara pare, elub ng’eya. 35#Mt 10:39; Lk 17:33; Yoh 12:25Kum ng’atu ma tek uyenyo ebodh kwo pare ebirwinye; ng’atu ma tek birwinyo kwo pare de pira ku lembanyong’a ma juboth ko de e ebibodhe. 36Kum kuloka ang’o ni dhanu, kadok egam ng’om ngung’, ma kwo pare ke rwinyo? 37Kum girang’o ma ng’atu moko biwilo ko kwo pare? 38Kum ng’atu ma tek lewic binege i kuma kum lembe para de i kind dhanum’utuk maeni mi gier ku dubo de, Wod dhanu bende lewic binege i kume, kan ebino i dwong’ pa Won ku malaika maleng’ de.

Currently Selected:

Marko 8: AB1970

Highlight

Copy