Malaki 2

1Man kawono, E wu julam, lembang’ola maeni en e piwu. 2Tek wubiwinjo ngo, man tek wubiketho cwinywu i kume ngo, kara wumi yung ni nyinga, Yehova mir udul uwacu, abilund oro kwong’ i wiwu, man abikwong’o mugisa mu; eyo, adaru kwong’ogi, kum wuketho cwinywu i kume ngo. 3Nen, abijuko kodhi mu, man abiwiro weyo i weng’wu, en e weyo mir agba mu; e jubikabuwu woko, karacelo kude. 4#Wel 3:11-13Man wubing’eyo nia aoro lembang’ola maeni iwu an, kara lembariba para bed ku Lawi, Yehova mir udul uwacu. 5#Wel 25:12Lembariba para bedo kude mi kwo man mi kwiocwiny; man amiogi ire kara lworo nege; e elwora, man ndiri make kum nyinga. 6Cik mi lemandha ni i dhoge, man gondri nwangre ngo i dendhoge: wawotho wakude i kwiocwiny man atira, man eloko dhanu dupa kud i kier. 7Kum maku dendhu jalam ugwok ng’eyong’ec, man maku giyeny cik i dhoge; kum en e jakwenda pa Yehova mir udul. 8Ento wukier kud i yo; wuketho dhanu dupa podho i cik; wunyotho lembariba pa Lawi, Yehova mir udul uwacu. 9Ka kumeno an bende adwokowu ni gin mi cac ku gin ma ng’ic i wang’ dhanu ceke, calku yo para ma wugwoko ngo, ento dhanu bedo tung’ tung’ iwu i cik.

Jucimo Israel kum Bedo Mandha Ngo Migi

10Wan ceke wegwa acel ungo? Mungu acel ucwiowa ngo? nedi watimo kud awondi ng’atuman ku wadi man ku wadi, ma wacido ko lembariba pa kwaruwa? 11Yuda timo kud awondi, man ginmajudagu utimbre i Israel man i Yerusalem: kum Yuda cido leng’ pa Yehova m’emaru, man egamu nya mungu ma wi rok. 12Ng’atu m’utimo maeni, Yehova bithume cen, ng’atu m’uceu ku ng’atu m’udwoko lembe, kud i hema pa Yakobo, man ng’atu m’uthiero girathiera ni Yehova mir udul. 13Man wutimo maeni kendo: wuumo pemblam pa Yehova ku piwang’, ku ywak, man ku gamucwiny, ketho nia eneno girathiera kendo ngo, kadok ajola de ejole ku mutoro ngo kud i cingwu. 14Ento wuwacu kumae, Nedi? Kum Yehova en e jamulembe i kindwu wuku dhaku mir aradu peri, m’itimo ire kud awondi, kadok en e wedu, man dhaku mi lembariba peri. 15Man etimo acel ungo, kadok ebedo ku dong’ Tipo? Man acel mir ang’o? Eyenyo kodhi mi koth Mungu. Ka kumeno gwok cwinyi, man ng’atu moko kud utim awondi kum dhaku mir aradu pare. 16Kum adagu landumon, Yehova, Mungu mir Israel uwacu, man ng’atu ma umo kendi pare ku rop, Yehova mir udul uwacu: ka kumeno wugwok cwinywu, kara kud wutim awondi.

Ceng’ mi Pokolembe ni Ceng’ni

17Wuolo Yehova ku lembe mu. Ento wuwacu kumae, Waole kud ang’o? Kum wuwacu kumae, Ku ba dhanu ceke ma timo dubo ebedo ber i wang’ Yehova, man anyong’a nege i kumgi; kadi Mungu mi pokolembe eni kani?

Currently Selected:

Malaki 2: AB1970

Highlight

Copy