Malaki 1

Mer pa Yehova ba Yakobo

1Ewolembe mi lembe pa Yehova ni Israel ni kum Malaki.

2 # Rum 9:13 # Isa 34:5-17; 63:1-6; Yer 49:7-22; Eze 25:12-14; 35:1-15; Amo 1:11, 12; Oba 1:1-14 Amaruwu, Yehova wacu. Ento wuwacu kumae, Imaruwa ni kum ang’o? Esau en e umin Yakobo ngo? Yehova wacu: ento amaru Yakobo: 3ento Esau adagu, man adwoko gudi pare ni uvuru, man amio camupacu pare ni utho m’i yamba. 4Kadok Edom uwacu kumae, Junyonowa piny, ento wabidwogo man wabigomo ka m’udong’ ni uvuru; Yehova mir udul uwacu kumae, Gibigomo, ento abirwombo piny; man dhanu bilwong’ogi kumae, Kieu mi dubo, man kumae, Dhanu ma ng’ecwiny unego Yehova i kumgi nja. 5E weng’wu bineno, man wubiwacu kumae, Dong’ juyung Yehova loka kieu mir Israel.

Yehova Juko Julam

6Wod yungo won, man jatic jadit pare: ka kumeno tek an a wego, yung para ni kani? man tek an a jadit, lworo para ni kani? Yehova mir udul upenjowu, E julam, ma wucayu nyinga. Man wuwacu kumae, Wacayu nyingi kum ang’o? 7Wuthiero kwen m’ucido wi pemblam para. Man wuwacu kumae, Wacidi kum ang’o? Kum wuwacu kumae, Mesa pa Yehova bedo mi cac. 8#Poi 15:21Man ka wuthiero abinga ni lam, en e dubo ngo? man ka wuthiero gin m’abala mi tielo ni i kume ku gin ma kume ju tho, maeni en e dubo ngo? Thiere kawono ni jabim peri; anyong’a binege i kumi? kadi ebijolo kumi? Yehova mir udul uwacu. 9Man kawono, akwayuwu, wukwai ngisi pa Mungu, kara ebed ku bero i kumwa: gin maeni wok ni kumwu: ebijolo kind kumwu moko? Yehova mir udul uwacu. 10A tek ng’atu acel ni i kindwu ma biciko dhugola, kara kud wukudh mac mananu wi pemblam para! mutoro nega ngo i kumwu, Yehova mir udul uwacu, kadok lam mi cingwu de abijolo ngo. 11Kum ugambre i wok mi ceng’ cil kum mwony mi ceng’ nyinga bibedo dwong’ i kind Thekdhanumange; man i kaka ceke jubithiero udok ma ng’wice ng’ar ni nyinga, man lam ma leng’: kum nyinga bibedo dwong’ i kind Thekdhanumange, Yehova mir udul uwacu. 12Ento wucide; kum wuwacu kumae, Mesa pa Yehova cido, ku nyingene de, cil cemo pare, en e mi cac. 13Wuwacu bende kumae, Nen, gin maeni olojo kumeni! man wucwaku umwu i kume, Yehova mir udul uwacu; man wukelo gin ma jugamu ku rop, ku gin m’abala mi tielo ni i kume, ku gin ma kume ju tho; wukelo girathiera kumeno: maku ajol maeni kud i cingwu? Yehova wacu. 14Ento kwong’ ubed wi jabombi, m’ebedo ku co i udul rombe pare, man eng’olo lembang’ola, elamu ni Rwoth de gin ma poyo ni i kume; kum an a Ubimo ma dit, Yehova mir udul uwacu, man nyinga en e ung’oindiri i kind Thekdhanumange.

Currently Selected:

Malaki 1: AB1970

Highlight

Copy