Thangambere 44

Kikombe M’urwinyo

1Man eng’olo ni jakurot pare, ewacu kumae, Pong’ usau mi dhanune ku cam, calu ma gicopo yeyo, man iketh sente mi dhanune ceke kubang’gi kubang’gi pa ng’atuman dhu usau pare. 2Man iketh kikombe para, kikombe mi mola ma tar, i dhu usau pa cogo, man sente mi cam pare. Man etimo calku lembe ma Yusuf uyero. 3Kinde ma piny uru, juoro dhanune gicidho, gin ku kana migi. 4E kinde ma giai woko kud i adhura, man ma fodi gini bor ungo, Yusuf uwacu ni jakurot pare kumae, Ai, lub tok dhanunegi; man kinde m’inwang’ugi, wac igi kumae, Nedi wudwoko gin ma rac pi gin ma beri? 5Maeni en e gin ma rwoth para madhu kudo ngo, m’eewo kudo lembe de ngo andha? wutimo rac kum wutimo kumeni. 6E erubogi, man eyero igi lembe maeni. 7Man giwacu ire kumae, Nedi rwoth para yero wadi lembe ma kumeni? Dong’ ebed bor i kum jutic peri nia gitim wadi gin maeni. 8Nen, sente, ma wanwang’u i dhu usau mwa, wakelo kendo i beng’i kud i ng’om Kanan: ka kumeno wabikwalu mola ma tar kadi mola ma kwar de nenedi kud i ot pa rwoth peri? 9Ng’atu ma tek junwang’e i bang’e i kind jutic peri, wek etho, man wan bende wabibedo ni ng’eca pa rwoth para. 10Man ewacu kumae, Kawono bende wek ebed calku lembe mu: ng’atu ma junwang’e i bang’e ebibedo ng’eca para; e lembe bibedo i wiwu ngo. 11Gilund gitimo pio, man giketho usau migi i ng’om kubang’gi kubang’gi, e giyabu usau mi dhanu ceke kubang’gi kubang’gi. 12Man eyenyo, ugambre kum ma kayu, man ejik kum cogo: e junwang’u kikombe i usau pa Benyamin. 13Gilund giyeco kendi migi, man gidwoko ter wi kana migi kubang’gi kubang’gi, e gidok i adhurane.

14E Yuda ku utumin mire gibino ba ot pa Yusuf; man en fodi enuti keca: man gipodho i wang’e i ng’om. 15Man Yusuf uwacu igi kumae, Gin maeni ang’o ma wutimo? wung’eyo ngo nia ng’atu ma calu an copo ewo lembe andha? 16Man Yuda wacu kumae, Wabiwacu ang’o ni rwoth para? wabiyero ang’o? kadi wabikabu lembe m’i wiwa nenedi? Mungu nwang’u kier mi jutic peri: nen, wan wa ng’eca pa rwoth para, wan, wa ku ng’atu ma junwang’u kikombe i bang’e bende. 17Man ewacu kumae, Dong’ ebed bor i kuma nia atim kumeno: ng’atu ma junwang’u kikombe i cinge, ebibedo ng’eca para; ento wun, wuidh malu ku kwiocwiny ba wegwu.

Yuda Kwayu pi Benyamin

18E Yuda lund ubind ceng’ni i bang’e, man ewacu kumae, A, rwoth para, akwei, wek jatic peri yer lembe i ith rwoth para, man kud iyi ng’ecwiny peri op kum jatic peri; kum in i calu Farao. 19Rwoth para penjo jutic pare, ewacu kumae, Wegwu nuti, kadi umegwu? 20E wawacu ni rwoth para kumae, Wegwa nuti, en e ng’atu m’uti, man nyathin mi tio pare, en e ng’atu ma nok; e umin utho, man edong’ e kende ka pa min; man won umare. 21Man iwacu ni jutic peri kumae, Wukele piny i bang’a, kara anene. 22Man wawacu ni rwoth para kumae, Nyathinne copo weko won ungo: kum tek eweko won, won bitho. 23Man iwacu ni jutic peri kumae, Tek umegwu ma nok uloro piny karacelo kudu ngo, wubineno wang’a kendo ngo. 24E etimbre kinde ma w ai dho malu ba jatic peri ma vwa, wayero ire lembe pa rwoth para. 25E wegwa wacu kumae, Wucidh kendo, wung’ieu iwa cam moko nyanok. 26Man wawacu kumae, Wacopo loro piny ungo: tek umegwa ma nok ni kudwa, e wabilund loro piny; kum wacopo neno wang’ ng’atuca ngo, tek umegwa ma cogo ni karacelo kudwa ngo. 27Man jatic peri ma vwa wacu iwa kumae, Wung’eyo nia dhaku para nyolo ira nyithindho ma co ario: 28man acel uai kud i bang’a, man awacu kumae, Juyece nziki nziki andha; e anene kendo ngo: 29man tek wukabu maeni bende kud i bang’a, man gin ma rac upodho i wie, wubitero lwar mi wia ku can i liel. 30Ka kumeno kan abino ba jatic peri ma vwa, man nyathinne ni karacelo kudwa ngo; kum kwo pare ribre ku kwo pa wode; 31ebitimbre, kinde m’eneno nia nyathin umbe kudwa, nia ebitho: man jutic peri bitero lwar ma wi jatic peri ma wegwa ku can i liel. 32Kum jatic peri goyo kore pi nyathin ni vwa, ewacu kumae, Tek akele i beng’i kendo ngo, lembe bilund bedo i wia mi nja ba vwa. 33Ka kumeno kawono, wek jatic peri, akwei, ubed ng’eca ni rwoth para ka nyathinne; man wek nyathin uidh malu ku utumin mire. 34Kum abiidho malu ba vwa nenedi, tek nyathin umbe i bang’a? amaru neno gin ma rac ma biwok i kum vwa.

Currently Selected:

Thangambere 44: AB1970

Highlight

Copy