Thangambere 45

Yusuf Utucfe ni Utumin Mire

1 # Tic 7:13 E Yusuf copo kayu cwinye ngo i wang’ dhanu ceke ma gicungo i vute; man ekok kumae, Keth dhanu ceke kubang’gi kubang’gi giai woko i vuta. E ng’atu moko mbe m’ucungo kude, kinde ma Yusuf utucre gire ni utumin mire. 2Man eywak ku dwande: e Jumisiri winjo, man ot pa Farao de winjo. 3E Yusuf uwacu ni utumin mire kumae, An a Yusuf; fodi vwa bedo kwo? Man loko lembe voyo utumin mire; kum cwinygi ng’abre ni kume. 4Man Yusuf uwacu ni utumin mire kumae, Wucor ceng’ni i bang’a, akwayuwu. Man gicoro ceng’ni. Man ewacu kumae, An a Yusuf m’umegwu, ma wung’iewo i Misiri. 5Man kawono can kud unegwu, kadi ng’ecwiny de kud unegwu i kumwu giwu, nia wung’iewa keni: kum Mungu ora i weng’wu kara agwok kwo. 6Kum rundi ario maeni ndru bedo i ng’om: man edong’ rundi abic, ma kadok fur kadi palacam de bibedo ie mbe. 7Man Mungu ora i weng’wu kara agwokwu ni donge m’udong’ i ng’om, man abodhwu ma kwo ku both ma dit. 8Ka kumeno en e wun ungo ma wuora keni, ento Mungu: man edwoka ni wego ni Farao, man rwoth wi ot pare ceke, man jabim ma wi ng’om mi Misiri ceke. 9#Tic 7:14Wutim pio, man wuidh malu ba vwa, wuwac ire de kumae, Yusuf ma wodi wacu kumae, Mungu dwoka ni rwoth mi Misiri ceke: lor piny i bang’a, kud igal; 10man ibibedo i ng’om mi Gocen, e ibibedo ceng’ni an, in, ku nyithindho peri, man nyithindho mi nyithindho peri, kud udul rombe peri, man udul dhok peri, ku gin ceke m’ibedo ko: 11e abigwoki keca; kum ndru fodudong’ rundi abic; imaru doko jacan, in, ku juodi, man gin ceke m’ibedo ko. 12Man, nen, weng’wu neno, man wang’ Benyamin m’umira, nia en e dhoga m’uweco i beng’wu. 13Man wubiyero ni vwa pi dwong’ para ceke ma i Misiri, man ku gin ceke ma wuneno: man wubitimo pio kara wukel vwa piny keni. 14Man epodho wi ng’ut Benyamin m’umin, e eywak; man Benyamin uywak wi ng’ute. 15Man ecwio limb utumin mire ceke, e eywak i kumgi; man yo ng’ei maeni utumin mire giweco gikugi.

16Man rwonglembene winjre i ot pa Farao, giwacu kumae, Utumin Yusuf gibino: man enyayu mutoro i Farao, ku jutic pare. 17E Farao wacu ni Yusuf kumae, Wac ni utumeru kumae, Wutim maeni: wuketh ter wi lim mu mi ter, man wucidhi, wucidh i ng’om Kanan; 18e wugam wegwu ku juudiwu, man wubin i bang’a: e abimio iwu ng’om ma ber mi Misiri, man wubicamu mio mi ng’om. 19Nie jung’olo iwu, wutim maeni: wugam magali kud i ng’om Misiri pi nyithindho mu ma thindho, man pi mon mu, e wukel wegwu, man wubin. 20Man kendo weng’wu kud ubed kum piny mu; kum ng’om ma ber mi Misiri ceke en e mu.

21E wot Israel gitimo kumeca. E Yusuf umio igi magali, calku lembang’ola pa Farao, man emio igi cemo mi yo. 22Emio kendi m’aloka igi ceke kubang’gi kubang’gi; ento emio sente mi mola ma tar dak adek ni Benyamin, ku kendi m’aloka abic. 23Man eoro piny ma kumeni ba won: kana apar m’uyeyo gin ma ber mi Misiri, man mege kana apar m’uyeyo cam ku kwen man cemo ni won mi woth. 24Kum kumeno eoro utumin mire ucidho, man giai: e ewacu igi kumae, Wunen nia kud wudhau dhu yo. 25E giidho malu ku i Misiri, man gibino i ng’om Kanan ba Yakobo ma weggi. 26Man giyero ire, giwacu kumae, Yusuf fodi ubedo kwo man en e jabim mi ng’om Misiri ceke. Man tipone ringo, kum eyiogi ngo. 27E giyero ire lembe pa Yusuf ceke, m’eyero igi: man kinde m’eneno magali ma Yusuf uoro kara uyeye, tipo Yakobo ma weggi dwogo: 28man Israel uwacu kumae, Eromo; Yusuf ma woda fodi ubedo kwo: abicinene ma fokatho ngo.

Currently Selected:

Thangambere 45: AB1970

Highlight

Copy