Thangambere 32

Yakobo Yikre pi Rombo kud Esau

1E Yakobo cidho i yo pare, man malaika pa Mungu girombo gikude. 2Man ka Yakobo nenogi ewacu kumae, Maeni udul pa Mungu: man elwong’o nying’ kakeca Mahanaim.

3E Y akobo oro kwenda i wang’e bang’ Esau m’umin mire ba ng’om mi Seir, ma podho pa Edom. 4Man eng’olo igi ewacu kumae, Wubiwacu kumeni ni rwoth para ma Esau: Jatic peri ma Yakobo wacu kumae, Abedo ni umondo ba Laban, man cil ku kawono de adong’: 5man abedo ku koni dhiang’, ku kana, man udul lim, ku jumiru, man bong’: e aoro kara juyer ni rwoth para, kara anwang’ bero i weng’i. 6Man jukwenda gidwogo ba Yakobo, giwacu kumae, Wawok bang’ umeru ma Esau, man kendo ebebino rombo kudi, ku dhanu dak ang’wen ma ni kude. 7E ang’abacwiny ku lworo lund utimo Yakobo dit: man epoko dhanu ma ni i bang’e, man udul rombe, kud udul dhiang’, kud udul ngamia, ni ungu ario; 8man ewacu kumae, Tek Esau bino bang’ ungu acel, man egoye, ungu m’udong’ bilund both. 9Man Yakobo wacu kumae, E Mungu pa kwara ma Ibrahim, man Mungu pa vwa ma Isak, E Yehova, m’iwacu ira kumae, Dok ba ng’om ma thu, man ba wat peri, man abitimi ber: 10aromo ngo ku mer mi bero ma nok ceke man mi lemandha ma nok ceke, m’inyutho ni jatic peri; kum akadhu ku wi Yordan maeni kud uluth para; man kawono adoko ni ungu ario. 11Akwei, bodha kud i cing umira, kud i cing Esau: kum alwore, emaru bino goya, meg nyithindho ku nyithindho. 12#Tha 22:17E iwacu kumae, Abitimi ber andha, man abiketho kodhini calu kwio ma dhu nam, ma copo kwandre ngo ni udulne.

13E egonjo keca i diewor maeca, man egamu kum piny m’ebedo ko ni moth ni Esau m’umin mire: 14mege diegi dak ario man nyogi diegi pier ario, ku mege rombe dak ario, man nyogi rombe pier ario, 15mege ngamia ma weg cak pier adek ku nyithindhgi, mege dhiang’ pier ang’wen ku thwoni apar, mege kana pier ario man thwonine apar. 16Man emiogi i cing’ jutic pare, udul kubang’gi kubang’gi tung’ tung’, man ewacu ni jutic pare kumae, Wukadh lokaca i wang’a, man wuwek kind udul ubed thwolo. 17Man eng’olo ni ng’atu m’utelo yo, ewacu kumae, Kinde ma Esau m’umira rombo kudi, man epenji, ewacu kumae, In i pa ng’a? man icidho kani? man maeni pa ng’a i weng’i? 18ibilund wacu kumae, Gi pa jatic peri ma Yakobo: en e giramia ma juoro ni rwoth para ma Esau: man, nen, en bende eni i ng’eiwa. 19Man eng’olo ni mir arionde bende, man ni mir adege, man ni dhanu ceke m’ulubo udulne, ewacu kumae, Wubiweco kumeni ni Esau, ka wurombo kugi; 20man wubiwacu kumae, Man kendo, nen, Yakobo ma jatic peri ni i ng’eiwa. Kum ewacu kumae, Abiyiko kindwa ku giramia m’ucidho i wang’a, man yo ku ng’eye abineno wang’e; kuno nyo ebijola. 21Kum kumeno giramia kadhu i wang’e: man en gire egonjo i diewor maeca i kind ungu.

Yakobo Ginyego i Penuel

22Man eai malu i diewor maeca, man egamu mon pare ario, ku bong’ pare ario, man nyithindho pare apar wi acel, e ekadhu lokaca ku wi kakadhu mi kulo Yabok. 23E egamugi, man eketho gikadhu kulone, man eketho piny m’ebedo ko bende kadhu. 24#Hos 12:3, 4E Yakobo dong’ kende; man ng’atu moko nyego kude keca cil ma piny uru ko. 25E kan eneno nia esage ngo, emulo ng’et bambe; e ng’et bamb Yakobo wil, kinde ma ginyego gikude. 26Man ewacu kumae, Wek acidhi, kum piny ulero. Man ewacu kumae, Abiweki ngo icidhi, tek imio ira mugisa ngo. 27Man ewacu ire kumae, Nyingi ng’a? Man ewacu kumae, Yakobo. 28#Tha 35:10E ewacu kumae, Jubilwong’o nyingi Yakobo kendo ngo, ento Israel: kum inyego ku Mungu man ku dhanu, e isagu. 29#Pok 13:17, 18Man Yakobo penje ewacu kumae, Akwei, wac ira nyingi. Man ewacu kumae, Nedi ipenjo nyinga? E emio mugisa ire keca. 30Man Yakobo Lwong’o nying’ kakeca Penuel: kum, ewacu kumae, Aneno Mungu wang’ ku wang’, man kwo para both. 31Man ceng’ udongo i wie kan ekadhu Penuel, man ekomo akoma ni bambe. 32Kum kumeno nyithindho mir Israel gicamu ler mi dir ma ni wi ng’et bamb ungo, cil i ceng’ maeni: kum emulo ng’et bamb Yakobo i ler mi dir.

Currently Selected:

Thangambere 32: AB1970

Highlight

Copy