Thangambere 28

1Man Isak ulwong’o Yakobo, e emio mugisa ire, man eng’olo ire, ewacu ire kumae, Ibigamu dhaku i kind nyig Kanan ungo. 2Ai malu, cidh i Padan-aram, ba ot pa Bethuel ma won meru; man igam iri dhaku ku kuca i kind nyig Laban ma neru. 3E Mungu ma Jategokpo mi mugisa iri, man eketh inyai, emedi de, kara idok ni udul kodhidhanu; 4#Tha 17:4-8man emi iri mugisa pa Ibrahim, iri, man ni kodhini karacelo kudi: kara igam ng’om m’ibedo ni umondo i ie ni aba, ma Mungu mio ni Ibrahim. 5Man Isak uoro Yakobo cidho: man ecidho ba Padanaram ba Laban, ma wod Bethuel ma Jacami, m’umin Rebeka, ma meg Yakobo kud Esau.

Esau Gamu Dhaku Mange

6Nie Esau neno nia Isak umio mugisa ni Yakobo man eore Padan-aram, kara egam ire dhaku ku kuca; man nia kan emio mugisa ire emio ire ng’ol, ewacu kumae, Ibigamu dhaku i kind nyig Kanan ungo; 7man nia Yakobo woro won ku min, man ecidho Padan-aram: 8man Esau neno nia nyig Kanan unyayu mutoro i Isak ma won ungo; 9e Esau cidho ba Icmael man egamu Mahalath ma nyar Icmael ma wod Ibrahim, ma nyamin Nebaioth, udoko ni dhaku pare umedo mon m’ebedo ko.

Lek pa Yakobo i Beth-el

10E Yakobo ai Ber-ceba, man ecidho yo ba Haran. 11Man ewok ka moko, ebedo keca de diewor soro, kum ceng’ upodho; man eting’o kidi acel ma kakeca, man ekethe the wie, e evuto i kakeca, kara enindi. 12#Yoh 1:51Man eleko; man, nen, raidh juting’o ecungo wi ng’om, man wie tundo i polo; man, nen, malaika pa Mungu beidho man ubeloro kud i kume. 13#Tha 13:14, 15Man, nen, Yehova cungo i wie, man ewacu kumae, An a Yehova, Mungu pa Ibrahim ma kwaru, man Mungu pa Isak: ng’om m’ivuto i wie, abimie iri, man ni kodhini; 14#Tha 12:3; 22:18man kodhini bibedo calu utur m’i ng’om, e ibimoiri foo yo reto, man yo nyangu, yor ariwa ma malu de, man yor ariwa ma piny: man wat ceke m’i ng’om binwang’u mugisa ni kumi ni kum kodhini de. 15Man, nen, wanuti wakudi, man abigwoki ka ma tek icidho i ie, e abikeli kendo i ng’om maeni: kum abiweki ngo, ma fok’atimo lembe m’ayero pire iri ngo. 16E Yakobo ceu ku wang’ nindo pare, man ewacu kumae, Andha Yehova ni i ka maeni: man ang’eye ngo. 17E lworo nege, man ewacu kumae, Ka maeni en e mi lworo ma dit: maeni gin mange ngo ndhu ot pa Mungu, man maeni en e dhugang’ mi polo.

18E Yakobo ai pir kugweno, e eting’o kidi m’eketho the wie, man eketho ecungo ni mbegi, man ekonjo mo i wie. 19Man elwong’o nying’ ka maeno Beth-el, ento nying adhurane ma kwong’a Luz.

20E Yakobo ng’olo lembang’ola, ewacu kumae, Tek Mungu bibedo karacelo kuda, man ebigwoka i yo m’acidho i ie, man ebimio ira kwen mi cemo, man kendi m’arony, 21ketho nia adwogo kendo ba ot pa vwa ku kwiocwiny, e Yehova bilund bedo Mungu para, 22e kidi maeni m’aketho malu ni mbegi, bilund bedo ot pa Mungu: man kind gin ceke m’ibimio ira abimio apaje iri andha.

Currently Selected:

Thangambere 28: AB1970

Highlight

Copy