Ai 9

Masendi wi Lim

1Yehova lund uwacu ni Musa kumae, Mond ba Farao, man iwac ire kumae, Yehova, Mungu mi Juebrania, uwacu kumae, Wek dhanu para gicidhi, kara gitim ira. 2Kum tek ikwero weko gicidhi, man icerogi asu, 3nen, cing’ Yehova ni wi lim peri ma gini i thim, wi riuni, wi kana, wi ngamia, wi udul lim, man wi udul rombe: thong’om ma rac dit bibedo nuti. 4E Yehova bikoyo lim mir Israel ku lim mi Misiri; man gin moko mbe ma bitho ma en e mi nyithindho mir Israel. 5E Yehova ng’olo nindo ma juketho, ewacu kumae, Urwo Yehova bitimo gin maeni i ng’om. 6E Yehova timo gin maeno urwone; man lim ceke mi Misiri tho; ento lim mi nyithindho mir Israel acel de mbe m’utho. 7E Farao oro kwenda, man, nen, kind lim mi Juisraeli acel de mbe m’utho. Ento adunde Farao bedo tek, e ekwero weko dhanu cidhi.

Masendi mi Vur

8E Yehova wacu ni Musa man ni Harun kumae, Wugam vuru mir uka pong’ cing’, man wek Musa kire yor i polo i wang’ Farao. 9E ebidoko ni ng’ili utur i ng’om Misiri ceke, man ebibedo ni vur ma luro kum dhanu man kum lim, i ng’om Misiri ceke ndri. 10#Nyu 16:2E gigamu vuru mir uka, man gicungo i wang’ Farao; e Musa kire malu yor i polo; man edoko ni vur ma luro kum dhanu man kum lim. 11E weg ajoga copo cungo i wang’ Musa ngo ni kum vurne; kum vur ni i kum weg ajoga, man i kum Jumisiri ceke. 12E Yehova dwoko adunde Farao nwang’, man ewinjo gi ngo; calu Yehova yero ni Musa.

Masendi mi Pei

13Man Yehova wacu ni Musa kumae, Ai pir kugweno, man icung i wang’ Farao, man iwac ire kumae, Yehova, Mungu mi Juebrania, uwacu kumae, Wek dhanu para gicidhi, kara gitim ira. 14Kum i kinde maeni abioro masendi para ceke wi adundeni, man wi jutic peri, man wi dhanu peri; kara ing’ei nia ng’atu moko mbe i ng’om ngung’ ma calu an. 15Kum kuno di i nindo maeni arieyo cinga, man agoi ku dhanu peri ku thong’om, man kuno di jukebi woko kud i ng’om: 16#Rum 9:17ento andha pi lembe maeni aketho icungo, kara anyuth iri tego para, man kara juyer pi nyinga i ng’om ngung’. 17Fodi itingri asu kum dhanu para, ketho ikwero weko gicidhi? 18Nen, urwo unyoni abikonjo pei ma rac dit, wadi ma fodi ubedo mbe i Misiri ugambre i ceng’ ma juketho ecungo i ie cil kawono de. 19Ka kumeno kawono or kwenda, ucok lim peri pio ku gin ceke m’ibedo ko i thim; kum ku ba dhanu ceke ku lim de ma junwang’u i thim, ma jukelo pacu ngo, pei bicore i wigi, e gibitho. 20Ng’atu m’ulworo lembe pa Yehova i kind jutic pa Farao eketho jutic pare ku lim pare giringo i udi: 21man ng’atu m’uparu pi lembe pa Yehova ngo eweko jutic pare ku lim pare i thim.

22E Yehova wacu ni Musa kumae, Riei cingi yor i polo, kara pei bed nuti i ng’om Misiri ceke wi dhanu man wi lim, man wi uboko m’i thim kubang’e kubang’e i ng’om Misiri ndri. 23E Musa rieyo uluth pare yor i polo: man Yehova oro morpolo ku pei, e mac uloro piny i ng’om; man Yehova eoro pei wi ng’om Misiri. 24#Nyu 8:7; 16:21Kum kumeno pei nuti, man mac ubemoc i pei, gire rac dit, wadi ma fodi ubedo mbe i ng’om Misiri ceke ugambre m’edoko ni thek. 25E pei kilo gin ceke ma ni i thim i ng’om Misiri ndri, dhanu ku lim bende; e pei kilo uboko m’i thim kubang’e kubang’e, man eturo yen m’i thim kubang’e kubang’e. 26Pei mbe i ng’om Gocen kende, ka ma nyithindho mir Israel ni i ie.

27Man Farao oro kwenda, man elwong’o Musa giku Harun, man ewacu igi kumae, Adubo i nindo maeni: Yehova e pwe, man an ku dhanu para wa rac. 28Kwai Yehova; kum morpolo maeni pa Mungu romo man pei; man abiweko wucidhi, e wubidong’ kendo ngo. 29E Musa wacu ire kumae, Kinde m’abiai kud i adhura, abithang’u cinga i wang’ Yehova; e morpolo biling’, kadok pei de bibedo nuti kendo ngo; kara ing’ei nia ng’om en e pa Yehova. 30Ento ang’eyo piri ku jutic peri, nia fodi wubilworo Yehova Mungu ngo. 31Man jugoyo pamba ku nganu ma ju yuke: kum nganu ma ju yuke ng’ok, pamba de thiwo. 32Ento nganu ku nganu ma tung’ jugoyo ngo: kum fodi gidongo ngo. 33E Musa ai woko kud i adhura ku ba Farao, man ethang’u cinge i wang’ Yehova: e morpolo ku pei jik, man koth ukonjre ngo wi ng’om. 34E kinde ma Farao neno nia koth ku pei ku morpolo jik, edubo m’usagu, man edwoko adundene nwang’, en ku jutic pare. 35E adunde Farao doko nwang’, man eyio ngo nyithindho mir Israel ucidhi; calu Yehova yero ku dhu Musa.

Currently Selected:

Ai 9: AB1970

Highlight

Copy