Ai 8

1E Yehova wacu ni Musa kumae, Mond ba Farao, man iwac ire kumae, Yehova wacu kumae, Wek dhanu para cidhi, kara gitim ira. 2Man tek ikwero weko gicidhi, nen, abigoyo kieu peri ceke kud ungwal: 3e kulo bipong’ kud ungwal, ma biidho malu bimondo i udi peri de, man i kusika mi kavuto peri, man wi kavuto peri, man i udi mi jutic peri, man wi dhanu peri man i kendo peri, man i jambng’ino kwen peri: 4ungwal bibino i wii de, man wi dhanu peri, man wi jutic peri ceke. 5E Yehova wacu ni Musa kumae, Wac ni Harun kumae, Riei cingi kud uluth peri wi kulo, man wi pi, man wi kut, man keth ungwal uidh wi ng’om mi Misiri. 6E Harun urieyo cinge wi pi mi Misiri; man ungwal uidho, e giumo ng’om mi Misiri. 7E weg ajoga de gitimo kumeca kud ajoga migi, e gikelo ungwal wi ng’om Misiri.

8Farao lund ulwong’o Musa giku Harun, man ewacu kumae, Wukwai Yehova, kara ekab ungwal woko kud i bang’a, man ku ba dhanu para; e abiweko dhanu cidho, kara gilam lam ni Yehova. 9E Musa wacu ni Farao kumae, Bed ku dwong’ maeni i wia: ng’ol nindo m’abikwayu piri i ie, man pi jutic peri, man pi dhanu peri, kara ungwal unyothre kud i beng’i man kud i udi peri, man gidong’ i kulo kende. 10E ewacu kumae, Urwo. Man ewacu kumae, Ebed calku lembe peri; kara ing’ei nia ng’atu moko mbe ma calu Yehova Mungu mwa. 11Man ungwal biai kud i beng’i, kud i udi peri de, man ku ba jutic peri, man ku ba dhanu peri; gibidong’ i kulo kende. 12E Musa giku Harun giai ku ba Farao: e Musa lwong’o Yehova pir ungwal m’ekelo wi Farao. 13E Yehova timo calku lembe pa Musa; man ungwal utho kud i udi, kud i lelagang’, man kud i pothi. 14E gicokogi ni ungu ungu; e ng’om ung’wi. 15Ento ka Farao neno nia kayom nuti, edwoko adundene tek, man ewinjogi ngo; calu Yehova yero.

Masendi mi Nyogo

16Man Yehova wacu ni Musa kumae, Wac ni Harun kumae, Riei uluth peri, man igoi utur mi ng’om, kara edok ni nyogo i ng’om mi Misiri ceke. 17E gitimo kumeca; e Harun urieyo cinge kud uluth pare, man egoyo utur mi ng’om, e nyogo bedo nuti kum dhanu, man kum lim; utur ceke mi ng’om udoko ni nyogo i ng’om Misiri ceke ndri ndri.

18E weg ajoga gitimo kumeca kud ajoga migi kara gikel nyogo, ento gicopo ngo: man nyogo bedo nuti kum dhanu, man kum lim. 19#Lk 11:20Weg ajoga lund uwacu ni Farao kumae, Maeni lwet Mungu: e adunde Farao doko nwang’, man ewinjogi ngo; calu Yehova yero.

Masendi mir Ulwang’ni

20Man Yehova wacu ni Musa kumae, Ai pir kugweno, man icung i wang’ Farao; nen, ebino ba pi; man iwac ire kumae, Yehova wacu kumae, Wek dhanu para gicidhi, kara gitim ira. 21Kadi, tek ikwero weko dhanu para cidhi, nen, abioro udul ulwang’ni i wii, man i wi jutic peri, man i wi dhanu peri, man i udi peri: e udi mi Jumisiri bipong’ kud udul ulwang’ni, ku ng’om bende ma gini i wie. 22Man abikoyo ng’om Gocen i ceng’ maeca, ma dhanu para bedo i ie, kara udul ulwang’ni moko kud ubed kuca; kara ing’ei nia an a Yehova i die ng’om. 23Man abiketho apoka i kind dhanu para ku dhanu peri: giranyutha maeni bibedo nuti urwo. 24E Yehova timo kumeca; e udul ulwang’ni ma rac ubino i ot pa Farao, man i udi mi jutic pare: man i ng’om mi Misiri ceke ng’om unyothre ni kum udul ulwang’ni.

25E Farao lwong’o Musa giku Harun, man ewacu kumae, Wucidhi, wulam lam ni Mungu mu i ng’ombe. 26E Musa wacu kumae, Timo kumeno maku piny ungo; kum wabilamu lam mi ginmajudagu mi Jumisiri ni Yehova Mungu mwa: nen, wabilamu lam mi ginmajudagu mi Jumisiri i wang’gi, e gibicanyuwa ku kidi ngo? 27Wabicidho mi woth mi ceng’ adek i langa, e wabilamu lam ni Yehova Mungu mwa, calu ebing’olo iwa. 28E Farao wacu kumae, Abiweko wucidhi, kara wulam lam ni Yehova Mungu mu i langa; ento wubicidho bor hai ungo: wukwai pira. 29E Musa wacu kumae, Nen, aai i beng’i, man abikwayu Yehova ya udul ulwang’gi ai ku ba Farao, ku ba jutic pare, man ku ba dhanu pare, urwo: ento Farao kud utim kud abombi kendo kum kwero dhanu ya ku gicidh nilamu lam ni Yehova. 30E Musa ai ku ba Farao, man ekwayu Yehova. 31E Yehova timo calku lembe pa Musa; man ekabu ulwang’ni ku ba Farao, ku ba jutic pare, man ku ba dhanu pare; acel de mbe m’udong’. 32E Farao dwoko adundene nwang’ i nindo maeni bende, man eweko dhanu gicidho ngo.

Currently Selected:

Ai 8: AB1970

Highlight

Copy