Luke 8

Mbasiafo a Wɔnye Jesus Nantsewee

1Na yinom ekyir no, ɔbaa dɛ annkyɛr biara na okoduaduaa nkurow mu nye nkuraase kɛkaa Nyankopɔn n’ahenman no ho asɛmpa no kyerɛe; nna duebien no ka no ho, 2nye mbaa bi so a woetu hɔn esunsum bɔn na wɔasa hɔn ahoɔmberɛw yarba: Mary a wɔfrɛ no Magdalene a mbɔnsam esuon efi no mu no, 3nye Joana, Herod no somfo panyin Kusa ne yer no, nye Susanna, nye dodowara so a wɔdze hɔn ahodze bi soom no no.

Ogufo no ho Abɛbu no

(Matthew 13.1-9; Mark 4.1-9)

4Na nyimpadodow pii boaa ano, na hɔn a wofii nkurow nyina mu baa ne nkyɛn no, obuu hɔn bɛ dɛ, 5Ogufo no kɔree koguu n’aba: na ɔrotow petse no, bi koguu kwan nkyɛn, na wotsiatsiaa do, na wimu nnoma bɔsosɔwee. 6Bi so koguu ɔbotan do, na ofifirii no, ɔkyenkyenee, osiandɛ onnyi fawin ntsi. 7Na bi so koguu nsoɛ finimfin, na nsoɛ no nye no fifirii, na omiaa no. 8Bi so koguu asaase pa do, na ofifirii na ɔsoow aba mbɔho ɔha. Na ɔkaa yinom no, ɔtseaa mu dɛ, Nyia ɔwɔ aso a wɔdze tsie no, ma ontsie.

Bɛ no N’asekyerɛ

(Matthew 13.10-17; Mark 4.10-12)

9Na n’esuafo no bisaa no dɛ bɛ yi n’ase nye dɛn? 10#Isa 6.9 Na ɔsee dɛ, Hom dze, wɔdze ama hom dɛ hom nhu Nyankopɔn ahenman no mu esumasɛm; na nkaa no dze, wɔdze ma hɔn mbɛbu mu, ama wɔhwɛ a, woeennhu, na wɔtse a, wɔaanntse ase. 11Na bɛ no n’asekyerɛ nye yi: aba no nye Nyankopɔn n’asɛm no. 12Hɔn a wɔwɔ kwan nkyɛn no nye hɔn a woetsie; na abɔnsam ba, na obeyi asɛm no fi hɔn akoma mu, ma wɔaanngye enndzi na wɔaanngye hɔn nkwa. 13Na hɔn a wɔwɔ ɔbotan do nye hɔn a wotsie a, wɔdze dɛw gye asɛm no; na yinom wonnyi ndwow, na wɔgye dzi ma ɔkyɛr kakra, na nsɔhwɛber ba a nna wɔhwe ase. 14Na dza okoguu nsoɛ mu no, yinom nye hɔn a woetsie na wɔrokɔ no, ɔbra yi mu akɔdadwen nye ahonya nye enyigyedze mia hɔn, ma wɔnnsow aba ma ɔmmber yie. 15Na dza ɔwɔ asaase pa mu no, yinom nye hɔn a wɔdze akoma pa a oye etsie asɛm no, wɔdze sie, na wɔnam abotar mu sow aba.

Wɔmmfa Kandzea Nnsi Senaba Ase

(Mark 4.21-25)

16 # Mat 5.15; Luk 11.33 Obi nnsɔ kandzea na ɔmmfa kuruw mmbua do, anaa ɔmmfa nnsi mpa ase; na ɔdze si kandzeadua do, ma hɔn a wɔkɔ mu hɔ eehu ne kan. 17#Mat 10.26; Luk 12.2 Na biribi nnsuma a wonnkeyi no edzi, na onnhunta a wonnkohu na ɔnnkɛda gua. 18#Mat 25.29; Luk 19.26 Dɛm ntsi hom nhwɛ yie mbrɛ hom dua tsie; na obiara a ɔwɔ no, wɔbɛma no, na obiara a onnyi no, dza osusu dɛ ɔwɔ mpo wɔbɛgye ne nsamu.

Jesus ne Na nye no Nuanom

(Matthew 12.46-50; Mark 3.31-35)

19Na ne na nye no nuanom baa ne nkyɛn, na woenntum ammbɛn no wɔ nyimpadodow no ntsi. 20Na wɔbɛkaa kyerɛɛ no dɛ, Wo na nye wo nuanom gyina abow enyim rohwehwɛ ehu wo. 21Na obuae see hɔn dɛ, Me na nye mo nuanom nye woyi a wotsie Nyankopɔn asɛm na wɔyɛ.

Jesus Ma Ehum Taa Dzinn

(Matthew 8.23-27; Mark 4.35-41)

22Na ɔbaa dɛ da bi ɔnye n’esuafo no kɔr hɛmba mu, na ɔsee hɔn dɛ, Hom mma yentwa nkɔ esuegya no ho, na wɔkwanee kɔree. 23Na wɔrokɔ no ɔdae; na mframa kɛse bɔɔ huu baa esu no do, na nkyɛ nsu rehyɛ hɔn hɛmba no ma, nna wɔwɔ amandzehu mu. 24Na wɔdze nkekamu baa ne nkyɛn benyaan no see dɛ, Owura, Owura, yɛrehera! Na onyanee no, ɔbraa mframa no nye nsu no ne begyabegya no, na ogyaae, na hɔ taa dzinn. 25Na obisaa hɔn dɛ, Hom gyedzi wɔ hen? Na wosuroi, na ɔyɛɛ hɔn nwanwa, na wɔsesee hɔnho dɛ, Woana nye yi a ɔhyɛ mframa nye nsu mpo ma wotsie no yi?

Banyin bi a Mbɔnsam Afa no

(Matthew 8.28-34; Mark 5.1-20)

26Na wodur Gerasafo asaase do a ɔwɔ Galilii tsentsendo. 27Na ofii hɛmba mu kɔr daadze no, ɔbarimba bi a ɔwɔ sunsum fi puei fi kurow no mu behyiaa no: na mber pii nna ɔnnhyɛ atar, ɔnntsena fie biara mu, na mbom abodan mu wɔ esiei na ɔtse. 28Na ohun Jesus no, ɔkaa mu, na ɔhwee n’enyim daadze, na ɔdze ndze kɛse see dɛ, Menye wo wɔ ebɛn yɛ, Jesus, Ɔsorsor Nyankopɔn Ba? Meserɛ wo dɛ mma nnhaw me. 29Osiandɛ nna Jesus aka akyerɛ sunsum fi no dɛ omfi nyimpa no mu. (Osiandɛ mber pii ɔkyer no, na wɔdze nkɔnsɔnkɔnsɔn nye mpokyerɛ to no weɔn no; naaso obubu dza wɔdze kyekyer no no mu, na sunsum no pam no kɔ sar do.) 30Na Jesus bisaa no dɛ, Wo dzin dze dɛn? Na ɔsee dɛ, Legyin, osiandɛ mbɔnsam pii ahɛn no mu. 31Na esunsum bɔn no serɛɛ no dɛ mma ɔnnhyɛ hɔn dɛ wɔnkɔ bun no mu. 32Na mprekokuw kɛse bi wɔ hɔ a woridzidzi wɔ kokwaa no do; na esunsum no serɛɛ no dɛ ɔmma hɔn kwan ma wɔnkɔ hɔn mu. Na ɔmaa hɔn ho kwan. 33Na esunsum bɔn no fii nyimpa no mu kɔr mpreko no mu, na okuw no faa twitwi kesiaan ɔbo kronn koguguu nsu no mu, na wɔtseetsee wui. 34Na hɔn a wɔrenyɛn hɔn no hun dza aba no, woguanee na wɔkɛkae wɔ kurow no mu na no nkwaado. 35Nna wopuei bɔhwɛɛ dza aba no, na wɔbaa Jesus nkyɛn bohun nyimpa a sunsum bɔn fii no mu kɔree no dɛ ɔtsena Jesus n’anan ho, hyɛ atar, na n’adwen mu atsew no, na wosuroi. 36Na hɔn a wohunii no kaa mbrɛ ɔyɛe ma nyia nkyɛ sunsum bɔn wɔ no mu no no ho sanee no kyerɛɛ hɔn. 37Na Gerasafo nkurow a etwa ehyia nyina mu nkorɔfo bɛserɛɛ Jesus dɛ omfi hɔn nkyɛn nkɔ, osiandɛ hu kɛse kaa hɔn. Na ɔkɔfoow hɛmba sanee kɔree. 38Na nyimpa a sunsum bɔn fii no mu kɔree no serɛɛ no dɛ ɔnye no bɛtsena; naaso Jesus gyaa no kwan dɛ, 39San kɔ wo fie, na kɛka ndzɛmba akɛse a Nyankopɔn ayɛ ama wo kyerɛ. Na osii mu kɔree kɛkaa ndzɛmba a Jesus ayɛ ama no wɔ kurow no nyina mu.

Jairus ne Babaa na Basia a Bɔgya gu no no

(Matthew 9.18-26; Mark 5.21-43)

40Na ɔbaa dɛ Jesus sanee kɔree no, nyimpadodow no gyee no, osiandɛ nna hɔn nyina rotweɔn no. 41Na hwɛ, ɔbarimba bi a ne dzin dze Jairus a ɔyɛ nhyiamudan mu panyin no bae; na ɔbɔhwee Jesus n’ananadze, na ɔserɛɛ no dɛ ɔmbra ne fie; 42na ɔwɔ babaa kor a oedzi bɛyɛ mfe duebien na ɔda hɔ ruwu. Na ɔrokɔ no nyimpadodow no kyeer no do.

43Na ɔbaa bi a oenya bɔgyaagu mfe duebien, na ɔahwer n’adze nyina ama eduyɛfo, na eso obiara enntum annsa no yarba, 44bae bedzii n’ekyir kaa n’atar ano ndwow; na amonmu hɔ ara na no bɔgyaagu twae. 45Na Jesus see dɛ, Woana na ɔkaa me no? Na hɔn nyina resan no, Peter nye hɔn a wɔka no ho no kaa dɛ, Yewura, nyimpadodow akyer wo do na worimia wo. 46Na Jesus see dɛ, Obi aka me, na mehu dɛ ahoɔdzen bi efi mo mu kɔ. 47Na ɔbaa no hun dɛ oennsuma no, ɔdze ahopopo bae, na ɔbɔhwee n’enyim, na ɔkaa adze kor a osian ntsi ma ɔkaa no, na mbrɛ no ho yɛɛ no dzen amonmu hɔ ara kyerɛɛ no wɔ nkorɔfo no nyina enyim. 48Na ɔsee no dɛ, Babaa, wo gyedzi agye wo: kɔ asomdwee mu.

49Na ɔrekasa no, obi fi nhyiamudan mu panyin no ne fie bae bɛsee dɛ, Wo babaa no ewu: mma nnhaw Kyerɛkyerɛfo no. 50Na Jesus tsee no, obuaa no dɛ, Mma nnsuro, na gye dzi ara, na obenya nkwa. 51Na ɔbaa fie no mu no, ɔamma kwan mma obiara annkɔ mu, gyedɛ Peter, nye John, nye James, nye abofra no n’egya nye ne na. 52Nna hɔn nyina rusu na woridzi awerɛhow. Na ɔsee dɛ, Mma hom nnsu: onnwui, na ɔada. 53Na wɔsereew no twee, osiandɛ wonyim dɛ oewu. 54Na ɔnodze osuoo ne nsamu, na ɔfrɛɛ no dɛ, Ababaawa, nyan. 55Na no sunsum sanee baa bio, na ɔsoɛɛr ntsɛmara. Na Jesus hyɛɛ dɛ wɔmma no biribi ma ondzi. 56Na n’awofo no ho boow hɔn; naaso ɔbraa hɔn dɛ mma wɔnnka dza wɔayɛ no nnkyerɛ obiara.

Currently Selected:

Luke 8: MFANBRPC

Highlight

Copy