John 15

Jesus Nokwar Wenyindua no

1 Emi nye nokwar wenyindua no, na m’Egya nye okuafo no. 2Mo ho abaw biara a ɔnnsow aba no, oyi no; na biara a ɔsow aba no, oyiyi ho ma ɔaasow aba pii. 3Hom ho atsew dada wɔ asɛm a maka akyerɛ hom no ntsi: 4hom ntsena mo mu, na mo so mentsena hom mu. Dɛ mbrɛ abaw nntum mmfi noara no mu nnsow aba, gyedɛ ɔtsena wenyindua no mu no, dɛmara so na hom runntum, gyedɛ hom tsena mo mu. 5Emi nye wenyindua no; hom nye abaw no: nyia ɔtse mo mu, na metse no mu no, ɔnoara na ɔsow aba pii; sɛ hom kwetsi me a, hom nnkotum ayɛ hwee. 6Sɛ obi anntsena mo mu a, wotwa no kyen dɛ abaw, na ɔkyenkyen, na wɔboaboa ano kogu gya mu, na ɔhyew. 7Sɛ hom tsena mo mu, na me nsɛm tsena hom mu a, hom mbisa biribiara a hom pɛ, na wɔbɛyɛ ama hom. 8Iyi mu na wɔahyɛ m’Egya enyimnyam, dɛ hom sow aba pii, na hom bɛyɛ m’esuafo. 9Dɛ mbrɛ Egya no dɔ me no, na mo so madɔ hom: hom ntsena mo dɔ mu. 10Sɛ hom sie me mbransɛm a, hom bɛtsena mo dɔ mu, dɛ mbrɛ mo so mesie m’Egya ne mbransɛm na metsena no dɔ mu. 11Maka yinom akyerɛ hom ama me dɛw aatsena hom mu, na hom dɛw aahyɛ ma.

12 Iyi nye me mbrasɛm, dɛ hom ndodɔ homho nkorkor, dɛ mbrɛ madɔ hom. 13Obi nnyi dɔ a ɔso kyɛn iyi, dɛ obi dze no nkwa bɔto hɔ ama n’anyɛnkofo. 14Sɛ hom yɛ dza mehyɛ hom a, hom yɛ m’anyɛnkofo. 15Mennda ho mmfrɛ hom nkowaa, osiandɛ akowaa nnyim dza no wura yɛ; na mafrɛ hom anyɛnkofo, osiandɛ ndzɛmba a metsee no m’Egya hɔ nyina makyerɛ hom mu. 16Nnyɛ hom bi na hom yii me, na emi na miyii hom, na medze hom sii hɔ dɛ hom nkɔ nkɔsow aba, ma hom aba aatsena hɔ, na biribiara a hom bɛserɛ Egya no wɔ me dzin mu no, ɔdze aama hom. 17Iyi na mehyɛ hom, dɛ hom ndodɔ homho.

Wiadze Tan Kraest

18Sɛ wiadze tan hom a, hom nyim dɛ ɔatan me ansaana ɔretan hom. 19Sɛ hom fi wiadze mu a, nkyɛ wiadze bɔdɔ nankasa nedze; na osiandɛ hom mmfi wiadze, na miyii hom fii wiadze mu ntsi, na wiadze tan hom. 20#Mat 10.24; Luk 6.40; Joh 13.16 Hom nkaa asɛm no a mesee hom no, Akowaa nnkyɛn no wura. Sɛ wohiahiaa mo ho a, wobehiahia hom so ho; sɛ wosiee m’asɛm a, wobesie homdze bi. 21Na yinom nyina me dzin ntsi na wɔdze bɛyɛ hom, osiandɛ wonnyim nyia ɔsomaa me no. 22Sɛ mammba mammbɛkasa annkyerɛ hɔn a, nkyɛ wonnyi bɔn; na afei dze, wonnyi hɔn bɔn do nkatado. 23Nyia ɔtan me no, ɔtan m’Egya so. 24Sɛ mannyɛ wɔ hɔn mu ndwuma a obiara annyɛ bi da a, nkyɛ wonnyi bɔn; na afei woehu na wɔatan emi nye m’Egya so. 25#Dwom 35.19; 69.4 Na iyi aba mu ma dza wɔakyerɛw no hɔn mbra mu no aahyɛ ma dɛ, Wɔatan me kwa. 26Na Okyigyinafo no a mibefi Egya no nkyɛn masoma no hom hɔ no, nokwar Sunsum a ofir Egya no mu no, sɛ onya ba a, ɔno na obedzi mo ho dase. 27Na hom so dzi me dase, osiandɛ hom fitsi ahyɛse ka mo ho.

Currently Selected:

John 15: MFANBRPC

Highlight

Copy