Gyenesis 49

Jakob Hyira Ne Mba

1Na Jakob frɛɛ ne mbabanyin, na ɔsee dɛ: Hom mboa hom ano, na menka dza ndaamba ɔbɛba hom do nkyerɛ hom.

2Hom nhyia, na wontsie, hom Jakob mba;

Na wontsie hom egya Israel.

3Reuben, ɔwo nye m’abakan,

mo tum, nye m’ahoɔdzen ahyɛse;

Nyia ɔkyɛn wɔ enyidzi mu

na nyia ɔkyɛn wɔ tum mu.

4Ihihim dɛ nsu, ennkɛkyɛn;

Osiandɛ efoow w’egya ne mpa:

Nna iguu ho fi: efoow m’adae.

5Simeon nye Levi wɔyɛ enuanom;

Hɔn mfona yɛ enyiber akodze.

6Ao me kra, mma mmba hɔn apam mu;

M’enyimnyam, mma mmfora hɔn mboano mu;

Osiandɛ hɔn ebufuw mu na wokum nyimpa,

Na hɔn ahopɔw mu na wotwitwaa nantwi anantsir.

7Ndom nka hɔn ebufuw, osiandɛ ɔyɛ hyew;

Na hɔn enyiber, osiandɛ no mu yɛ dzen:

Mebɛpaapaa hɔn mu wɔ Jakob mu,

Na mabɔ hɔn apetse wɔ Israel mu.

8Juda, ɔwo na wo nuanom beyi wo ayɛw:

Wo nsa bɛhyɛ w’atamfo hɔn kɔn do;

W’egya mba bɔbɔ hɔn mu adze wɔ w’enyim.

9Juda yɛ ogyata ba;

Abɔgyanam ara na edze enyin, me ba:

ɔkotowee, obutuuw hɔ dɛ ogyata,

Na dɛ ogyataber; woana na obekenyan no?

10Ahempoma nnkefi Juda nsa,

Nna mbrahyɛfo poma nnkefi n’anan ntamu,

Kɛpem dɛ Siloh bɛba;

Na ɔno na aman bɛyɛ setsie ama no.

11Ɔdze n’asoasopɔnkɔba amontan wenyindua,

Na n’asoasopɔnkɔber ba wɔ wenyindua pa ho;

ɔahor ne ntar wɔ wenyin mu,

Na n’akataho wɔ wenyinamba bɔgya mu:

12N’enyiwa yɛ dɛnn sen nsa memen,

Na numfonsu ama ne se ho ahoa fitaa.

13Zebulun bɛtsena po berekyir:

Na ɔbɛyɛ mbrɛ ahɛn gyinagyina;

Na ɔnye Zidon bɔbɔ ɔhe.

14Isakar yɛ asoaso a no ho yɛ dzen,

Obutuuw nguamban ntamu:

15Na ohun ahomgye bea dɛ oye,

Na asaase no dɛ ɔyɛ fɛw;

Na ɔbrɛɛ n’abatsir adze dze soae,

Na ɔbɛyɛɛ ɔsomfo wɔ edwumadzen mu.

16Dan bobua no nkorɔfo atsɛn,

Dɛ Israel mbusuakuw mu kor.

17Dan bɛyɛ ɔwɔ a ɔbew kwan mu,

Ehurutsia a ɔda akwantsen,

ɔsɔw ɔpɔnkɔ nantsir,

na no do atsefo no obu dua n’ekyir.

18EWURADZE, matweɔn wo nkwahosan.

19Gad, dɔm bɛhyɛ no do:

Na ɔno so bɛhyɛ hɔn etsia hɔn anantsir.

20Aser n’edziban fi no mu bɔtɔ angoa,

Na ɔbɛma ahemfo adɔkɔdɔkɔdze.

21Naftali yɛ ɔtrɔmber a woegyaa no:

ɔka ahomkasɛm.

22Josef yɛ dua a ɔsow,

Abaw a ɔsow wɔ nsunyiwa ho;

No nkorbata tratra ban.

23Egyentofo no eyi no awerɛhow kɛsenara,

Na wɔatotow no, na wɔayɛ no enyienyi:

24Na n’egyen dze ɔwɔ hɔ pintsinn,

Na ne nsa n’abasa no mu yɛ dzen,

ɔnam Jakob no Tumfo Kor no ne nsa do,

Hɔ na oguanhwɛfo no, Israel no bo no ofi.

25Mekyerɛ w’egya ne Nyankopɔn a ɔbɔboa wo no,

Na Otumfo a ɔdze ɔsor nhyira,

Bun a ɔda daadzetsirmu ne nhyira,

Enumfo mu, nye yafun mu nhyira,

Behyira wo no,

26W’egya ne nhyira

Akyɛn daa mbepɔw ne nhyira

ɔdze kodu tsetse mbepɔw no n’ano no ho ara:

ɔbɛtsena Josef n’etsifi,

Nyia wɔtseew no fii no nuanom ho no n’etsifi pampamu.

27Benjamin yɛ pataku a ɔtsetsew mbowa mu:

Obedzi abɔgyanam anapa,

Na ewimbir no ɔakyɛ asadze.

Jakob No Wu

28Woyinom nyinara nye Israel mbusuakuw duebien no: na iyi na hɔn egya kaa kyerɛɛ hɔn na ɔdze hyiraa hɔn no; hɔn nyinara mbrɛ hɔn nhyira tsetsee nkorkor, na ohyiraa hɔn. 29Na Jakob hyɛɛ hɔn, na ɔsee hɔn dɛ, ɔwɔ dɛ wɔdze me kɛka mo nkorɔfo ho: wonsie me m’egyanom nkyɛn wɔ ɔbo tu a ɔwɔ Efron Hetnyi no, ne haban mu no mu, 30#Gye 23.3-20 wɔ ɔbo tu a ɔwɔ Makepela haban mu no a, ɔwɔ Mamre enyim, wɔ Keenan asaase do no a Abraham dze kaa haban no ho tɔɔ no wɔ Hetnyi Efron hɔ, dze yɛɛ efunsiebea no no mu: 31#Gye 25.9, 10; Gye 35.29 hɔ na wosiee Abraham nye ne yer Sara; hɔ na wosiee Isaak nye ne yer Rebeka; na hɔ na misiee Leah: 32haban no nye ɔbo tu a ɔwɔ mu no a wɔtɔɔ no wɔ Hetmba hɔ no a. 33#Ndwu 7.15 Na Jakob wiee ne nsamansew a ɔhyɛɛ ne mba no ara, nna ɔkaa n’anan boaa ano dze guu mpa no do, na ogyaa no sunsum mu, na otsiiw n’egyanom wɔ samanadze.

Currently Selected:

Gyenesis 49: MFANBRPC

Highlight

Copy