Gyenesis 47

Jakob Hyira Farao

1Na Josef sii mu kɔr fie na ɔkɛkaa kyerɛɛ Farao, na ɔsee dɛ, M’egya nye mo nuanom, hɔn nguan, hɔn anantwi, nye dza wɔwɔ nyinara, fi Keenan asaase do aba; na, wɔwɔ Gosen asaase do. 2Na ɔfaa no nuanom no hɔn mu beenum, na ɔdze hɔn kɛkyerɛɛ Farao. 3Na Farao bisaa no nuanom no dɛ, Wɔyɛ ebɛn edwuma? Na wɔsee Farao dɛ, Wo nkowaa yɛyɛ nguanhwɛfo, hɛn nye hɛn egyanom nyina. 4Na wɔsee Farao dɛ, Yɛaba dɛ yɛrebɛtsena asaase yi do; na wo nkowaa hɔn nguan nnya edzidzibea; osiandɛ ɔkɔm no mu ayɛ dzen wɔ Keenan asaase do: dɛm ntsi afei, yɛserɛ wo, ma wo nkowaa ntsena Gosen asaase do. 5Na Farao kaa kyerɛɛ Josef dɛ, W’egya nye wo nuanom aba wo nkyɛn: 6Egypt asaase da w’enyim; asaase no mu mbrɛ oye no na ma w’egya nye wo nuanom ntsena; ma wɔntsena Gosen asaase do: na sɛ inyim hɔn mu bi a wɔyɛ mbɔdzembɔfo a, ɔno yɛ hɔn mo mbowa do ahwɛfo. 7Na Josef dze n’egya Jakob bae begyinaa Farao n’enyim: na Jakob hyiraa Farao. 8Na Farao bisaa Jakob dɛ, Wo nkwa nda mu mfe yɛ ahen? 9Na Jakob see Farao dɛ, M’akwantu ne mfe nda yɛ mfe ɔha eduasa: mo nkwa ne mfe nda kumaabi na mbusu nko, na ɔnntoo m’egyanom hɔn nkwa ne mfe nda wɔ hɔn akwantu ber no mu. 10Na Jakob hyiraa Farao, na ofii Farao n’enyim kɔree. 11Na Josef maa n’egya nye no nuanom no tsenabew, na ɔmaa hɔn beebi wɔ Egypt asaase do, wɔ asaase no do mbrɛ oye, wɔ Rameses asaase do, dɛ mbrɛ Farao hyɛe no ara. 12Na Josef bɔɔ n’egya, nye no nuanom, nye n’egya ne fifo nyinara akɔhoma, dɛ mbrɛ hɔn ebusua ebusua tsetsee.

13Nna edziban nnyi asaase no do beebiara; na ɔkɔm no mu yɛɛ dzen dodoodow, ma Egypt asaase nye Keenan asaase tɔɔ bitsi wɔ ɔkɔm no ntsi. 14Na Josef boaboaa sika a wonyaa no Egypt asaase do, nye Keenan asaase do no, eburow a wɔtɔe no ne sika no nyinara ano: na Josef dze sika no baa Farao fie. 15Na aber a nkorɔfo ho sika nyinara sae wɔ Egypt nye Keenan asaase do no, Egyptfo no nyinara baa Josef hɔ, na wɔbɛsee dɛ, Ma hɛn edziban: na ɔbɛyɛ dɛn ntsi na yebowuwu wɔ w’enyim? Hɛn ho sika asa. 16Na Josef see dɛ, sɛ hom ho sika asa a, hom mfa hom mbowa mma; na mebɛgye hom mbowa na mama hom bi. 17Na wɔdze hɔn mbowa brɛɛ Josef: na Josef maa hɔn edziban dze gyee mpɔnkɔ, nye nguan, nye anantwi, nye nsoasopɔnkɔ: na ɔmaa hɔn edziban dze gyee hɔn mbowa nyinara wɔ afe no mu. 18Na afe no bɛsenee no, wɔbaa no hɔ afe a otsia ebien no, na wɔbɛsee no dɛ, Yɛnnkɛfa esuma mo wura dɛ, hɛn sika nyinara asa; na hɛn mbowa nyinara yɛ mo wura dze; biribiara nnyi hɔ a ɔaka wɔ mo wura n’enyim, ka hɛn honam nye hɛn asaase ho; 19ebɛnadze ntsi na yebowu w’enyim, hɛn nye hɛn asaase nyina? Fa edziban tɔ hɛn nye hɛn asaase, na hɛn nye hɛn asaase bɛyɛ asomfo ama Farao: na ma hɛn eduaba, ama yaatsena ase, na yeennwuwu, na amma asaase yi aannda pan. 20Nna Josef tɔɔ Egypt asaase nyinara maa Farao; na Egyptfo nyinara tontɔɔn hɔn haban, osiandɛ ɔkɔm no mu yɛɛ dzen wɔ hɔn do: na asaase no bɛyɛɛ Farao dze. 21Na nkorɔfo no dze, ɔdaan hɔn nkowaa otuu hɔn hɔ ma wɔkɛtsenatsenaa nkurow a ofi Egypt ɔhe no kurotsia kɛpem ne kurotsia no mu. 22Asɔfo no hɔn asaase nko na ɔanntɔ: osiandɛ Farao maa asɔfo no kyɛfa bi, na wodzii hɔn kyɛfa a Farao dze maa hɔn no; dɛm ntsi wɔanntɔn hɔn asaase. 23Nna Josef see nkorɔfo no dɛ, Hwɛ matɔ hom nye hom asaase ndɛ ama Farao: hwɛ, hom eduaba nye yi, na hom nkoduadua no wɔ asaase no do. 24Na dza ɔbɛyɛ nye dɛ, hom dze ekuadze yi mu mbumu enum enum bɛma Farao, na anan no ayɛ homankasa homdze, ma wɔdze bi edua haban mu, na ɔayɛ hom, nye hom fifo nye hom mbofraba edziban. 25Na wɔsee dɛ, Agye hɛn nkwa: ma yennya mo wura n’enyim enyimnyam, na yɛbɛyɛ Farao n’asomfo. 26Na Josef dze yɛɛ mbra too hɔ wɔ Egypt asaase do ɔdze bɛpem ndɛ ara, dɛ wɔmfa mbumu enum enum mma Farao; gyedɛ asɔfo no hɔn asaase nkotsee na annyɛ Farao dze. 27#Ndwu 7.14 Na Israel tsenaa Egypt wɔ Gosen asaase do; na wonyaa egyapadze wɔ hɔ, na wɔwowoe, na wɔdɔɔr pii.

Jakob Ne Samansew

28Na Jakob tsenaa Egypt asaase do mfe duesuon: na Jakob ne nda, no nkwa ne mfe, yɛɛ mfe ɔha eduanan esuon. 29#Gye 49.29-32; 50.6 Na mber a Israel dze bowu no bɛnee no: ɔfrɛɛ ne ba Josef, na ɔsee no dɛ, Sɛ afei menya w’enyim enyimnyam a, meserɛ wo, fa wo nsa to m’aserɛ ase, na enye me ndzi no ayamuyie mu nye nokwar mu; meserɛ wo, mma nnsie me wɔ Egypt: 30na sɛ mokɔ me nsamankyir a, ɔno soa me fi Egypt, na kesie me wɔ m’egyanom hɔn esiei. Na ɔsee dɛ, Mebɛyɛ dɛ mbrɛ aka no ara. 31Na Jakob see dɛ, Dzi nsew kyerɛ me: nna Josef dzii nsew kyerɛɛ no. Na Israel bɔɔ no mu adze wɔ mpa no n’etsifi.

Currently Selected:

Gyenesis 47: MFANBRPC

Highlight

Copy