Gyenesis 46

Jakob Na N’ebusuafo Kɔ Egypt

1Na Israel faa dza ɔwɔ nyinara sii mu, na ɔbaa Beer-seba, na ɔbɔɔ afɔr maa n’egya Isaak ne Nyankopɔn. 2Na Nyankopɔn kasaa kyerɛɛ Israel wɔ anafua nyikyerɛ mu, na ɔfrɛɛ no, Jakob, Jakob, na ɔsee dɛ, Emi nye yi. 3Na ɔsee dɛ, Emi nye Nyankopɔn, w’egya ne Nyankopɔn: mma nnsuro dɛ ebɔkɔ Egypt; na mebɛyɛ wo ɔman kɛse wɔ hɔ: 4menye wo bɔkɔ Egypt; na medze wo efi hɔ aba bio so ampaara: na Josef dze n’abaw mu na ibowu ada. 5Na Jakob soɛree fii Beer-seba: na Israel ne mba no twuuw hɔn egya Jakob, nye hɔn mbofraba, nye hɔn yernom, wɔ ntseaseanam a Farao maa wɔdze baa dɛ wɔmfa mbɛfa no no mu. 6#Ndwu 7.15 Na wɔfaa hɔn mbowa, nye hɔn ahodze a wonyaa no wɔ Keenan asaase do no, na wɔbaa Egypt, Jakob nye n’asefo nyinara a wɔka no ho: 7ne mbabanyin, nye ne mbabanyin hɔn mbabanyin ka no ho, ne mbabaa nye ne mbabanyin hɔn mbabaa, nye n’asefo nyinara na wɔka no ho na ɔnye hɔn baa Egypt.

8Na Israel ne mba a wɔbaa Egypt no hɔn edzin nye yi, Jakob nye ne mbabanyin: Jakob n’abakan Reuben. 9Na Reuben ne mbabanyin; Hanok, Pallu, Hezron, nye Karmi. 10Na Simeon ne mbabanyin; Jemuel, Jamin, Ohad, Jakin, Zohar, nye Saul, Keenannyi ɔbaa bi ne ba no. 11Na Levi ne mbabanyin; Gerson, Kohat, nye Merari. 12Na Juda ne mbabanyin; Er, Onan, Sela, Perez, nye Zera: mbom Er nye Onan dze, wowuu Keenan asaase do. Na Perez ne mbabanyin nye Hezron na Hamul. 13Na Isakar ne mbabanyin; Tola, Puva, Iob, nye Simron. 14Na Zebulun ne mbabanyin; Sered, Elon, nye Jaleel. 15Woyinom nye Leah ne mbabanyin a ɔwoo hɔn maa Jakob wɔ Paddan-aram nye ne babaa Dina: ne mbabanyin nye ne mbabaa nyinara yɛ akra eduasa ebiasa. 16Na Gad ne mbabanyin; Zifion, Hagi, Suni, Ezbon, Eri, Arodi, nye Areli. 17Aser ne mbabanyin; Imna, Isva, Isvi, Beria, nye hɔn akyerɛbaa Sera: na Beria ne mbabanyin; Heber, nye Malkiel. 18Woyinom nye Zilpa a Laban dze no maa ne babaa Leah no ne mbabanyin, na woyinom na ɔwoo hɔn maa Jakob; wɔyɛ akra duesia. 19Jakob ne yer Rahel ne mbabanyin; Josef nye Benjamin. 20#Gye 41.50-52 Na wɔwoo Manaasɛ nye Efraim wɔ Egypt asaase do maa Josef, On ɔsɔfo Potifera ne babaa Asenat woo hɔn maa no. 21Na Benjamin ne mbabanyin; Bela, Beker, Asbel, Gera, Naaman, Ehi, Ros, Muppim, Huppim, nye Ard. 22Woyinom nye Rahel ne mbabanyin a wɔwoo hɔn maa Jakob: hɔn nyinara wɔyɛ akra duanan. 23Na Dan ne babanyin nye Husim. 24Na Naftali ne mbabanyin nye Jahzeel, Guni, Jezer, nye Sillem. 25Woyinom nye Bilha a Laban dze no maa ne babaa Rahel no ne mbabanyin na woyinom na ɔwoo hɔn maa Jakob: hɔn nyinara wɔyɛ akra esuon. 26Akra a wɔnye Jakob kɔr Egypt a wofi n’asen mu nyinara, sɛ Jakob ne mbabanyin hɔn yernom nnka ho a, akra no nyinara yɛ eduosia esia. 27#Ndwu 7.14 Na Josef ne mbabanyin a wɔwoo hɔn maa no wɔ Egypt no wɔyɛ akra beenu: Jakob ne fie akra a wɔbaa Egypt no nyinara, wɔyɛ eduosuon.

28Na ɔsomaa Juda ma odzii n’enyim kan kɔr Josef hɔ, ama oeebedzi n’enyim akyerɛ no Gosen kwan; na wɔbaa Gosen asaase do. 29Na Josef yɛɛ ne tseaseanam krado, na ɔkɔree kehyiaa n’egya Israel kwan wɔ Gosen; na ɔdze noho kyerɛɛ no, na ɔbaar no kɔn, na osui wɔ no kɔn ho ara ma ɔkyɛɛr kakra. 30Na Israel see Josef dɛ, Menya mehu dɛ eda ho ara etse ase yi dze, afei mutum kɔ me nsamankyir. 31Na Josef see no nuanom, nye n’egya ne fifo dɛ, Morokɔ na makɛka akyerɛ Farao, na mase no dɛ, Mo nuanom, nye m’egya ne fifo a wɔwɔ Keenan asaase do no aba me nkyɛn: 32na nkorɔfo no yɛ nguanhwɛfo, na mbowa na wɔnyɛn; na wɔdze hɔn nguan, nye hɔn anantwi, nye dza wɔwɔ nyinara aba. 33Na sɛ Farao frɛ hom, na obisa dɛ, Wɔyɛ ebɛn edwuma a? 34Ɔno hom nse dɛ, Ofitsi hɛn mbofra mu dze bɛpem ndɛ ara wo nkowaa mbowa ara na yɛnyɛn, hɛn, nye hɛn egyanom nyinara: ama hom aatsena Gosen asaase do; osiandɛ oguanhwɛfo biara yɛ ekyiwadze ma Egyptfo; wɔnye nguanhwɛfo nndzi afora.

Currently Selected:

Gyenesis 46: MFANBRPC

Highlight

Copy