Ndwuma 13

Wɔsoma Barnabas nye Saul

1Nna asɔr a ɔwɔ Antiok no, nkɔnhyɛfo nye akyerɛkyerɛfo bi wɔ mu, hɔn nye Barnabas nye Simeon a wɔfrɛ no Niger nye Lusius, Sirenenyi no nye Manaen a wɔtsetsee ɔno nye ɔmansinhen Herod bɔɔ mu no, nye Saul. 2Na aber a wɔrosɔr Ewuradze, na woridzi mbuada no, Sunsum Krɔnkrɔn no see hɔn dɛ, Hom nyi Barnabas nye Saul mma me ma wɔnkɛyɛ edwuma a osian ntsi ma mafrɛ hɔn no. 3Nna wodzii mbuada, na wɔbɔɔ mpaa dze hɔn nsa guu hɔn do, na wogyaa hɔn kwan.

4Na Sunsum Krɔnkrɔn no somaa hɔn dɛm no, wosii mu kɔr Selusia, na wofii hɔ nam hɛn mu kɔr Siprus. 5Na wodur Salamis no, wɔkaa Nyankopɔn n’asɛm no wɔ Jewfo nhyiamudan mu; na wonyaa John so dɛ hɔn somfo. 6Na wotwaa mu wɔ supruw no mu kodur Pafos no, wokohun osumantunyi nkɔnhyɛnyi torfo, Jewnyi bi a ne dzin dze Bar-Jesus a 7ɔwɔ ambrado Sergius Paulus a ɔyɛ ɔbadwembafo no nkyɛn. Ɔno na ɔfrɛɛ Barnabas nye Saul, na ɔpɛɛ dɛ otsie Nyankopɔn asɛm. 8Na Elimas nkongyaayinyi no (mbrɛ ne dzin ne nkyerɛase tse nye no) siiw hɔn kwan, na ɔhwehwɛɛ dɛ ɔdan ambrado no fi gyedzi no ho. 9Na Saul a ɔnoara so wɔfrɛ no Paul a Sunsum Krɔnkrɔn ahyɛ no ma no, dze n’enyi tsiim no do, 10na ɔsee dɛ, Wo a ndaadaa nye emumuyɛ nyina ahyɛ wo ma, abɔnsam ba, tsenenee nyina tamfo, ana innkegyaa dɛ ekontom Ewuradze no kwan a ɔtsen yi? 11Na afei, hwɛ, Ewuradze nsa da wo do, na w’enyi bofura, na irunnhu ewia dze ekesi da bi. Na amonmu hɔ ara na fua nye sum dwiir no do, na okyinii hwehwɛɛ binom a wobosuo ne nsamu akyerɛ no kwan. 12Aber a ambrado no hun dza esi no, ɔgyee dzii, na Ewuradze ne nkyerɛkyerɛ no yɛɛ no ahobow.

Paul nye Barnabas Kɔ Antiok a Ɔwɔ Pisidia

13Na Paul nye hɔn a wɔnye no nam no tui fii Pafos, na wɔbaa Perga a ɔwɔ Pamfilia: na John fii hɔn nkyɛn sanee kɔr Jerusalɛm. 14Na hɔn dze, wotwaa mu wɔ Perga no, wɔbaa Antiok wɔ Pisidia; na wɔkɔr nhyiamudan mu ahomgyeda kɛtsenaa hɔ. 15Na wowiee mbra no nye nkɔnhyɛfo kenkan no, nhyiamudan mu mpanyimfo no somae ma wɔbɛsee hɔn dɛ, Enuanom, sɛ hom wɔ afotusɛm bi ka kyerɛ nkorɔfo no a, hom nka. 16Na Paul soɛree gyinae, na onyinaam ne nsa kyerɛɛ hɔn see dɛ: Israel mbarimba, nye hom a hom suro Nyankopɔn, hom ntsie. 17#Eks 1.7; Eks 12.51 Israelman yi hɔn Nyankopɔn no saan mu yii hɛn egyanom, na ɔman no tsenaa Egypt asaase do dɛ ahɔho no, ɔmaa hɔn do, na ɔdze nsa a ɔkrɔn yii hɔn fii hɔ. 18#Nka 14.34; Deut 1.31 Na bɛyɛ mfe eduanan na osiee hɔn ho abotar dandaan hɔn wɔ sar no do. 19#Deut 7.1; Jos 14.1 Na ɔbɔɔ amantɔw esuon wɔ Keenan asaase do no, ɔdze hɔn asaase maa hɔn dɛ egyapadze, bɛyɛ mfe ahaanan eduonum; 20#Atsɛ 2.16; 1 Sam 3.20 na n’ekyir no ɔmaa hɔn atsɛmbuafo dze bodur nkɔnhyɛnyi Samuel do. 21#1 Sam 8.5; 1 Sam 10.21 Na nkyii wobisaa ɔhen; na Nyankopɔn dze Saul Kish ba no a ofi Benjamin ebusuakuw mu maa hɔn mfe eduanan. 22#1 Sam 13.14; 1 Sam 16.12; Dwom 89.20 Na otuu no no, ɔmaa David do hyɛɛ no hen maa hɔn, ɔno so na ɔgyee no ho dase dɛ, Mehu David, Jesse ba no, ɔbarimba a mankasa m’akoma da no ho: ɔno na ɔbɛyɛ m’apɛdze nyina. 23Oyi n’asefo mu na Nyankopɔn nam anohoba do eyi Jesus ayɛ Agyenkwa ama Israel; 24#Mar 1.4; Luk 3.3 John dzii kan kaa nnuho enuma ho asɛm kyerɛɛ Israelman nyina ansaana ɔbae. 25#Joh 1.20; Mat 3.11; Mar 1.7; Luk 3.16; Joh 1.27 Na John reyɛ ewie no dwuma dzi no, ɔsee dɛ, Hom susu dɛ emi nye woana? Nnyɛ emi nye no. Na hwɛ, obi dzi m’ekyir reba a mennsɛ dɛ mesan n’ananadze nsokota. 26Enuanom, Abraham asefo, nye hom mu obiara a osuro Nyankopɔn no, hɛn na wɔasoma nkwagye asɛm yi abrɛ hɛn. 27Na hɔn a wɔtse Jerusalɛm nye hɔn mu etsitsir, osiandɛ wonnyim ɔno nye nkɔnhyɛfo no ndze a wɔkenkan no ahomgyeda nyina ntsi, wobuu no fɔ ma ɔbaa mu. 28#Mat 27.22, 23; Mar 15.13, 14; Luk 23.21-23; Joh 19.15 Na woennhu biribiara a ɔfata wu wɔ no mu, naaso wɔserɛɛ Pilate dɛ onku no. 29#Mat 27.57-61; Mar 15.42-47; Luk 23.50-56; Joh 19.38-42 Na wowiee dza wɔakyerɛw wɔ no ho nyina ma hyɛ no, woyii no fii dua no ho dze no kɔtoo nda mu. 30Na Nyankopɔn nyaan no fii ewufo mu; 31#Ndwu 1.3 na oyii noho nda pii kyerɛɛ hɔn a wɔnye no fii Galilii baa Jerusalɛm: hɔn nye n’adasefo ma ɔman no. 32#Dwom 2.7 Na hɛn dze, yɛka hom anohoba a wɔbɔɔ egyanom no no ho asɛmpa, 33dɛ Nyankopɔn ama aba mu ama hɛn mba, dɛ oenyan Jesus; dɛ mbrɛ wɔakyerɛw wɔ ndwom a otsia ebien no mu dɛ,

Ɔwo nye me Ba,

ndɛ na mawo wo.

34 # Isa 55.3 Na dɛ onyaan no fii ewufo mu ma ɔronnkɔ mprɔwee mu bio no, ɔkaa no dɛm dɛ,

Mebɛma hom adom krɔnkrɔn a osi pi

a medze bɔɔ David anohoba no.

35 # Dwom 16.10 Dɛm ntsi so ɔka wɔ ndwom fofor bi mu dɛ,

Ennkɛma wo Krɔnkrɔnnyi no ehu mprɔwee.

36Na David dze, ɔsoomee wɔ nankasa ne santsen mu wiei wɔ Nyankopɔn n’apɛdze no, ɔkɔr ne kra ekyir, na wokesiee no n’egyanom nkyɛn, na ohun mprɔwee: 37na nyia Nyankopɔn nyaan no no dze, oennhu mprɔwee. 38Dɛm ntsi, enuanom, hom nhu dɛ ɔnam oyi do na wɔka bɔnfakyɛ kyerɛ hom; 39na ɔnam oyi do na ndzɛmba nyina a ɔnam Moses mbra do a hom enntum enndzi ho bem no, obiara a ɔgye dzi no odzi ho bem. 40Dɛm ntsi hom nhwɛ yie mma dza wɔkaa no nkɔnhyɛfo mu no aammba hom do, dɛ;

41 # Hab 1.5 Hom nhwɛ, hom atwetwesifo!

Ɔnyɛ hom nwanwa, na hom nhera:

Osiandɛ mereyɛ edwuma bi wɔ hom nda mu,

Edwuma a obi ka kyerɛ hom mpo a, hom renngye nndzi.

42Na wopuei no, wɔserɛɛ hɔn dɛ ahomgyeda bi so wɔmbɛka nsɛm yi nkyerɛ hɔn. 43Na wɔpoon nhyiamudan mu som no, Jewfo nye nyamesurofo a wɔdan Jewfo no mu pii kaa Paul nye Barnabas do: na hɔn dze, wɔkasaa kyerɛɛ hɔn tuu hɔn fo dɛ wɔntsena Nyankopɔn adom no mu.

44Na ahomgyeda a odzi do no durii no, ɔka kakraabi ma nkyɛ kurow mu no nyina ebehyia dɛ woribetsie Nyankopɔn asɛm. 45Na Jewfo no hun nyimpadodow no, nyinkun hyɛɛ hɔn ma, na wɔkasae tsiaa ndzɛmba a Paul reka ho asɛm no gyee kyim, na wɔkaa ebususɛm. 46Na Paul nye Barnabas dze ndam kaa dɛ, Ohia dɛ wodzi kan ka Nyankopɔn asɛm no kyerɛ hom. Na osiandɛ hom sun kyen, na hom bu homho dɛ hom nnsɛ onnyiewiei nkwa no ntsi, hwɛ, yɛdan kɔ amanamamfo no hɔ. 47#Isa 42.6; 49.6 Na dɛmara na Ewuradze ahyɛ hɛn dɛ,

Medze wo esi hɔ dɛ kandzea ama amanamamfo,

Ama aayɛ nkwagye ekodu asaase ano noho.

48Na amanamamfo no tsee yi no, wodzii dɛw, na wɔhyɛɛ Nyankopɔn asɛm no enyimnyam; na dodow a woeyi hɔn ama onnyiewiei nkwa no wɔgyee dzii. 49Na Ewuradze n’asɛm no tserɛwee wɔ asaase no nyina do. 50Na Jewfo no wee guu mbaa nyamesurofo a wɔwɔ dzin, nye kurow no mu etsitsir no aso mu, na wɔmaa ahohiahia kɛse baa Paul nye Barnabas do, na wɔpaam hɔn fii hɔn nkwaado. 51#Mat 10.14; Mar 6.11; Luk 9.5; 10.11 Na hɔn dze, wɔporoporoow hɔn anan ho huntuma guu hɔn do, na wɔbaa Ikonium. 52Na esuafo no dze, dɛw nye Sunsum Krɔnkrɔn hyɛɛ hɔn ma.

Currently Selected:

Ndwuma 13: MFANBRPC

Highlight

Copy